तितू 3

बिसवासी लोगीन चुरता चाजपीक पोकरान इसाबूल

1 आंगरूरानेर आरू आदीकारीकूलीन काबजे ती मेनूंग आरू ओर पोकरानोन मानू आरू जाम्मा रेच्चाट कामूलीन चाजू तायार मेनूंग बिसवासी लोगीन चुरता चाजपीक। 2 आरू एरीनी बोदी चियाका मेनूंग, कावडी उयाका मेनूंग, चुचारूतेर मेनूंग आरू जाम्मा लोगीन इजीत चियी किली पेम ती मेनूंग बेले ओरीन चुरता चाजपीक-चाजपीक मेन। 3 एटे एनोड आम बेले मुन्नी बुदी चिलायोम, पाटा पातायोम, बुरलूरानोम मेट्टोम आरू बानीग-बानीग तो लालेचूल आरू आसतीर ती मेन्डानोन कानतान काबजे ती मेट्टोम, आरू एड़जालेर एरी किली इरका कुचेर एर एरी पीयरूम। आवूर लोग आम्मोड कुचेर एर्रीर आरू आम ओकूर ओकूरीनोड कुचेर एर्रूम। 4 एरोड आमीन बाचाकतान मापोरबू जियोम नोयपीकतानो आरू ओन चोग देका पाट्टो। 5 आदूग आम चाजूरान देरोम तो कामूल तीग एरा, एरोड ओड आमूंग जियोम नोयपीकतानूग आमीन । ओड नाती केचूर चिला जियोमोड आमीन नोड्डी किली पुन जेनोम आरू पुन जियोम चियी किली । 6 ओड नाती केचूर चिला जियोमीन आमीन बाचाकतान ईसू तीग आम्म कान उलदूरान आकाट चाप चिञ्ञेड। 7 ओड नाती केचूर चिला जियोमीन नांग चिञ्ञेड एनोड, आम ओन माया पेम तीगी देरमीकूल एरीक एरी किली, आचा चाजूरान तीग जुग-जुग तो जियोमूग काबजेतेर एरकोम एनी आय। 8 आन लिकी मेन्डान ई पाटा बिसवात चाजू एर्रान बातेर तो आय आरू मापोरबून कान बिसवात चाजूरानेर रेच्चाट-रेच्चाट कामूलीन चाजूरान ती लागी मेनूंग लेक ती मेनकेर एनी ई इसाबूलीन बेरपेला केडीक एनी आनूंग मेन्न मेन्डा। ई इसाबूल जाम्मेग ले रेच्चाचील आरू मांजेग लाबतोव आय। 9 एरोड मुरूक पाटेल आरू तेरानूल-तेरानूल तो काटावूलीन पोका पोकी एर्रानो आरू नियोमीन इसाब ती ऊबा ऊबी एर्रानो आरू कावडी उयरानो, ईटो इसाबूल तीग बाची किली मेन। एटे एनोड ईव पोकातोव आय आरू नाती कामूग एरायोव आय। 10-11 आरो एरको बिसवासी लोग चोर ती मेन्डानोन, एलगाकतानेडीन ओपोट इरोट चोमजाक किली, ओड मानाकोड, ई मांजा मापोरबून पाव तीग बूलकेड नाड, आरू तानीन तानी केचूरतेड एनी नियाव चिड़ाक किली पापदेरोम चाज चाजी मेन्डाड एनी पुन्नी किली ओन तीग कोमाड मेन।

चेरा चेरीत गुवारना

12 आन इन लेग्गाट आरतीमासीन चिलाड तुकीकूसीन चोटपोड, आन्न लेग्गाट निकूपूलीस ती एटे ती बेले वेर्रान उवाट चाज। एटे एनोड आन आन्नी पाञ्ञील पोलारे मेन्डान एनी उवाट चाजेन नान। 13 उकील जेनास आरू आपूल्लोस पाव ताकेक ओरूग लागूरानोन चियू आरू ओरूग नाती कोम पाडा मेनको। 14 आरू आम्म लोग बेले, चिला लोगीन चेंग चियू, रेच्चाट कामूल चाजूरान कान लागी मेनूंग मेरीयेकेर। तेबे ओर जियोम पोका चेनाया।

15 आन्न चेंगे मेन्डानेर जाम्मा इनीन जुवार पोक्कूमेर। आरू बिसवातीन चेत्तूग आमीन चोग चाजूरानेरीन जुवार पोक्कू।

इमूंग जाम्मेगी माया पेम टोन्ड टोन्डी मेनको।