तितू 1

तितूसूग

पोलूस लिकूरान चिट्टी

जुवारतानो

1-4 मापोरबून कामीयाल आरू ईसू काबेरीन पोक्कू पोरबू नीतीकतान पोलूसीन टिटाक ले, ओकती बिसवातीन चेत्तूग आन्न चेत्त पोट्टेत चिन्डीन आकाट तो तितूसूग लिकूरान चिट्टी:

बुवा मापोरबून आरू आमीन बाचाकतान मसीयाल ईसून माया पेम आरू चुक इनूंग टोन्ड टोन्डी मेनको।

मापोरबू तानूंग आचूरान लोग, मापोरबू मेन्न चाजूरान बोकती ती चेलू, ओर बिसवातीन आरू ओर चेत्तीन चिताकतानोन चान्दीक आनीन नीतीकतेड नाड। जुग-जुग तो जियोम टोन्डूरा एन्डान आचा आमूंग मेन्डा। एतोडी टेगा मापोरबू मुन्नीत जुग ले आदीन पाटा चिञ्ञेड नाड। आरू रेच्चाट बेरे ती नी आमीन बाचाकतान मापोरबू, तान्न पोद्द तीग आदीन पारगाक किली आ पाटेन वेनपीक आनीन तियारची किली ओपीक चिञ्ञेड नाड।

केरेते देचे ती तितूसीन काम

5 बाची मेन्डान उजराक लागूरान इसाबूलीन उजराक, आरू आन पोक्की मेन्डान आकाट गेड़ेल-गेड़ेल ती पोरबून बिसवात चाजूरान मान्देत सियानकूलीन नीतीक एनी किली आय आन इनीन करेते देचे ती चायी किली वेञ्ञेन। 6 सियानकूल केचूर चिलायेर आरू ओकती आयाल तो माईड मेन्डानो आय। ओन पापकूल बिसवात चाजूरानेर मेन्डानो आय आरू ऊबागेरीयालेर आरू आगेर एर्रानेर मेन्डानो एरा। 7 एटे एनोड पोरबून मान्देत लोगीन मुकीयाल, मापोरबून बान्डारी एर्रान चेत्तूग केचूर चिलायेड मेन्डानो आय। ओड डेंगेय, रिचाल, मातवार, चाटतानेड, आरू टेगी किली कामाकतान देन तो लालचाल मेन्डानो एरा। 8 एरोड चेगा लोग बागीनोड ओड चेगा लोगीन मानूरानेड, रेच्चाटीन चोग चाजूरानेड, आपलेन काटलाकतानेड, चेत्त नियाव चाजूरान देरमी, केचूर चिलायेड आरू आपलेनी सामालतानेड मेन्डानो आय। 9 आरू ओनूग पोरबू नीतीकतानेर मेरचीक मेन्डान बिसवात चाजू एर्रान बातेर तो पाटेलीन बेरकेच पातीयाक मेनकेड। तेबे ओड चेत्त देरोम तो पाटेलीन मेरचीक किली आवीन चेड़रानेरीन बेले जेतनी पोक्कू नाम्बीकताड।

10 एटे एनोड एंगोटा लोग आगेर एर्रानेर, पोका पोकात पाटेल पोकरानेर, दोका चियरानेर मेन्डार। आदूग ले बेले आगेर, बिसवासीकूलीन जाम्मेनी जियोम पाड तो तीप तोलीन कुडीकतानो आय एनी मेरचीकतान लोगी आटनीतेर आय। 11 ऊरीन किटूक पाटतीक लागूरा। इयची लोग आय, टेगी तिन्दान कामेयीन चेत्तूग, ताम मेरचीक बाना पाटेलीन मेरचीक किली एंगोटा कुटूमूल तो लोगीन नाचाक काडरार। 12 केरेते देचेतेर कान तीगी, मापोरबून कान तीग काबेर वेन्नी किली लोगीन पोक चियरान गुरू ओकूर, “करेतेत लोग एतोड नांग पोन्ददी पाटा पोकरानेर, एराट जियादूल आकाटतेर, टेगरीकूल आरू माचेयकूल मेन्डार” एनी किली पोक्केड नाड। 13 ई गोवाई चेत्ते आय। आदूगी ओर बिसवात ती बेरकेच मेनकेर एनी ओरीन रेच्चा कावडी किली चोमजाक। 14 तेबे ओर एऊदीकूलीन पुरानूल चिलाड चेत्त पाटेलीन बाकनूरान लोगीन तियारनी पाटेल ती मेन्न लागाक किली बूलकी चेना मेनकेर। 15 चूत पाडा लोगूग जाम्मा बानी चूत पाडायो आय, एरोड चूत पाडरानेरूग आरू बिसवात चाजा लोगूग एके नातो एरको चूत पाडरानो मेन्डा। आरू ओर मेन्न आरू बीतराम तो मेन्नीन गोवाई इरडूकी चूत पाट्टोव नाव। 16 ओर “आम मापोरबून पुट्टोम” एनी पोकरार, एरोड ओर मापोरबूग बावा कामूलीन चाजी किली ओनीन पूना लोगीन आकाट पीयरार। एटे एनोड ओर किच किचालेर, पोकरान पाटेलीन मानायेर, आरू नाती रेच्चाट कामीन चाजूरान बातेरतेर चिलायेर आय।