कुलू 3

मापोरबू चियरान पुन्न जियोमीन बीतेर तो पाटेल

1 मापोरबू इमीन चेंगे जियोम पाटतीक किली पुन्न जियोम चिञ्ञेड नाड। आरू एबे ओड मसीयालीन सरग ती तान्न इजीत तो पाड ती उन्डतीकतेड नाड। आदूगी ईम सरग तो इसाबूलीन कानची-कानची मेनूर। 2 ई मोंजीपूर तो इसाबूल ती एरा, एरोड सरग तो इसाबूल ती मेन्न लागाक-लागाक मेनूर। 3 एटे एनोड इम मुन्नीत जियोम चाय्य चेन्डो आरू ईम पीयरान पुन्न जियोम मसीयालीन चेंगे पीयूमोर। आदीन मापोरबू चाकलेड नाड। 4 इमूंग पुन्न जियोम चियरानेड मसीयाल आय। ओड मारी देका पाडेक ईम बेले ओन चेंगे ओन निरबे रेच्चाट चाबाव तीग मेडूरान रेग तीग देका पाडरार।

5 आदूगी इम गेरोब ती मेन्डान ई मोंजीपूर तो लोग लालेच चाजूरान इसाबूलीन चाय काडूर। आव नातोव आय एनोड: दारीयाट कामूल, चूत पाटतीकतान कामूल, लालेच आरू एतोड नांग एड़जाट काम चाजू मेन्न चाज-चाजी मेन्डानो नातेक आय। आनूंगी जाम्मा एरको एनी जिवड़ेय एरमेन; आद मुरीतूलीन मानूरान आकाट तो आय। 6 इयची एड़जाट कामूल चाजूरान चेत्तूग मापोरबू तानीन माना लोगीन डान्डूराड। 7 आरू ईम बेले मुन्नी इटनीत कामूल ती चेलूरूर आरू आवीन चाज-चाजी पीयरूर। 8 एरोड एपोर ईम ईवीन जाम्मेनी चाय काडूर। रिच एर्रानो, मुरूक एर्रानो, गिन-गिना बावूरानो, लोगीन नेडीकतानो आरू इम चोन्ड ती केचडे़य पाटा पोकरानो ई जाम्मा पाटेलीन चाय काडूर। 9 आरू ओकूरीन ओकूर पोन्ददी पाटा पोक्कूमोर। एटे एनोड इमूंग टेकेर पाड्डी मेन्डान मेन्न के लागेन तो बिचारूलीन ईम चाय काड्डी किली, 10 पुन्न जियोम तो बिचारूलीन पुन्न गान्डेन आकाट नूड़ोर नार। आरू ईम मापोरबून पुन्दान आकेलीन पूरा बेटी किली इम पुन बिचारूल तो चेला बूलेल इमीन गेड़रान मापोरबूनोव आकाट एर्रारे इमीन ओड पुन्नेर चाजारे चेन्डाड। 11 आटनी एर्रानूग इना एऊदीकूल चिलायेर, एऊदीकूल आरू जियोम पाड तो तीप तोलीन कुडीकतानेर, जियोम पाड तो तीप तोलीन कुडीकपायेर, पोर्रालेर, आनपोड़ लोग, बान्देन ती मेन्डान लोग, बान्देन ती चिलायेर एनी पुटा-पुटा चिल्लार। एरोड मसीयाली आय जाम्मेग ले मुकीयाल आरू ओडी जाम्मा बिसवासी लोगीन कान मेन्डाड।

12 ईम मापोरबू आची मेन्डान, ओनूग एलगाक मेन्डान लाडरालेर आय। आदूगी ईम पुन्न चेलनूकूड़ूलीन पुन्न गान्डेन नूड़रान आकाट नूड़ी मेन्डानो आय। आव नातोव आय एनोड: जियोम नोयपीकतानो, देये ती मेन्डानो, बोड़पान एराका मेन्डानो, सोजाल मेन्डानो आरू दिरजा पात्ती मेन्डानो, 13 ओकूरीन ओकूर सामालची मेन्डानो, आरू एरूग एरको एरीन बेले बोदी चियरान इसाब मेनोड बेले पोरबू इमीन माप चाजूरान आकाट ओरोन माप चाजूरानो एन्डान चेलनूकूड़ूल आय। 14 आरू लोगीन पूरा इसाब ती ओकती चोर ती मेनीकतान चोगीन ईवीन जाम्मेन चेंगे बीड़ाकपूर। 15 आरू इमीन ओकती मेनीन आकाट मिली मिसी मेनूंग कूयी मेन्डानूग इमूंग मसीयाल चियरान चुक इम मेन्नीन चेलाकपोको। आरू ईम ओनीन जुवार पोक पोक्की मेनूर। 16 मसीयालीन पोद्दीन इम कान चेड़ीगेन गेरोब पात्तू इडूर; आरू ओकूरीन ओकूर जाम्मा गियान तीग मेरचीकपूर आरू केडीकपूर। आरू आपला-आपला मेन्न ती जुवार पोक्की किली मापोरबून पोद्दूल तो पाटेल आरू ओनीन जुवार चाजूरान पाटेल आरू ओन जियोम मेन्न चाजूरान पाटेल पाडूर। 17 इम ऊबाल आरू कामूल तीग आरोन एरको चाजोड ईम पोरबू ईसून पिदीर पात्ती किली ओन तीग बुवा मापोरबून जुवारची-जुवारची चाजूर।

बिसवासी लोग एटे मेन्डानो आय

18 ए आयचीले! आपला-आपला माईडीन काबजे ती मेनूर। इद्दी पोरबून बिसवात चाजूरान आयचीलूग रेच्चाट आय।

19 ए माईले! आपला-आपला आडेयीनोड चोग चाजूर। आरू आवीन सादना दायना चाजूमोर।

20 ए पापकूले! जाम्मा पाटेल ती आपला-आपला ईय्या बुवेर पाटेलीन मानूर, एटे एनोड आटे चाजोड पोरबूग आद मेन्न ती वेर्रा।

21 ए पापकूलतेरे! आपला-आपला पापकूलीन बिर बिरा चाजूमोर, चिलाड ओर मेन्न चीड़ चेन्डा।

22 ए कामीयालेरे! ई मोंजीपूर ती आपला सावकारकूल पाटेलीन जाम्मा इसाबूलूग मानूर। सोजे ओर इमीन चूड़रान वादेकी एरा चिलाड ओरीन वेड़का एरीकी एरा, एरोड मापोरबूग नारची किली चेत्त मेन्न तीग चाजूरानो आय। 23 आरू ईम आरोन एरको चाजोड आदीन पूरा मेन्न तीग मांजेग एरा, एरोड पोरबूग आय चाजूमोम एनी चाजूर। 24 एटे एनोड इदीन पालटा इमूंग पोरबून तीग काबजेत बाटा टोन्डूरा एनी पुट्टोर। ईम आपला सावकार मसीयालूग आय सेवा चाजूमोर। 25 एटे एनोड एड कियाल चाजूराड ओड तान कियाल चाजूरान चेत्तूग डेन्ड बेटूराड। मापोरबूग जाम्मा ई लोग ओकती काटारतेर आय।