कुलू 4

1 ए सावकारकूले! सरग ती इमूंग बेले ओक सावकार मेन्डाड एनी पुन्नी किली आपला-आपला कामीयालेरीन चेंगे चेकी एराका नातो रेच्चाट आय आदीनी चाजूर।

पोलूस बिन्ती जोड़ू गुवारतानो

2 ए बायीयोवे आरू दादेरे! एतोड नांग बिन्ती जोड़ जोड़ी मेनूर। आरू ईम बिन्ती जोड़ेक मेन्न लागाक किली मापोरबून जुवार चाज चाजी मेनूर। 3 आञ्ञोती एरा, मुन्नी पाकीक मेन्डीड जे? आ पाटेन वेनपीक मापोरबू आमूंग पाव पुच्चेकेड एनी आमूंग बेले बिन्ती जोड़ूर। आ पाटेन वेनपीकतान चेत्तूग आन केयदाल मेन्डान। 4 आरू एटे आन आदीन चोमजारे पोक चियरानो आय आटनी पोक्केकेन एनी बेले बिन्ती जोड़ूर।

5 बिसवात चाजा लोगीन मुन्देल बुदी ती पीयूर। पोलोंग चूड़ी मापोरबून पाटेन ओरूग पोक्कूर। 6 इमूंग एरूग एटे जवाब चियरानो आय एनी पाता चेलोको एनी एतोड एरको ईम दिरजे ती ऊबूर। इम ऊबाचील लोगूग मेन्न ती वेरकोव।

चेरा चेरीत पाटेल

7 तुकीकूस आन्न टिटाक तो जाम्मा काबेरीन इमूंग एन्देर्राड। ऊड आन्न लाडराल बिसवासी तोल्लेड आरू बिसवात चाजू एर्रान बातेर तो काम चाजूरानेड आरू आन्न चेंगे पोरबून सेवा चाजूरानेड आय। 8 आन ओनीन, आम एटे मेन्डाम एनी पोक्की किली इम मेन्नूलूग उचांग चियकेड एनी आय चोडूकमेन। 9 आरू ओन चेंगे, उनेसीमूस एन्डानेडीन बेले चोटतेरमेन। ओड बेले बिसवात चाजू एर्रान बातेरतेड आय आरू आन्न लाडराल बिसवासी तोल्लेड आय। ओड इम कान तीग ओकूर आय। इना एटे-एटे एञ्ञो एनी आ जाम्मेनी ऊर इरूल इमीन पोक चियरार।

10 आन्न चेंगे केयदाल मेन्डान आरीसतरकूस इमीन जुवार पोक्कूमेड। आरू बरनबासीन बाचाल मरकूस बेले जुवार पोकूमेड। (ओड इम्मेल वेरोड ओनीन रेच्चा मान दान चाजूर एनी मुन्नीत ले तियारतानो मेन्डा।) 11 आरू युसतूस एन्डान ईसून टिटाक ले बेले इमूंग जुवार; एऊदीकूल कान तीग ऊर मूवीरी आय आन्न चेंगे मापोरबू आंगरूरान इसाबीन लोगीन वेनपीकतान काम चाजूमेर। आरू ओर आनीन जियोम तापरानेर मेन्डार।

12 इम टिटाक तो, ईसू मसीयालीन कामीयाल इप्परास इमीन जुवार पोक्कूमेड आरू ईम मापोरबून जाम्मा उवाटीन पूरा पुन्नी आदीन ती चेल्लान ती बेरकेच आरू मोंजीबूत मेनकोर एनी ओड इमूंग चेत्त मेन्न तीग बिन्ती जोड़ जोड़ी मेन्डाड। 13 ओड इमूंग आरू लोदीकीयेत आरू इरापूलीस तो लोगूग निक्के मोयमोत चाजी सेवा चाजेड नाड एनी आदीन गोवा आन मेन्डान।

14 केम्बूर चियरान आन्न लाडराल लूका आरू देमासीन टिटाक ले इमूंग जुवार। 15 लोदीकीयेत बिसवासी लोगूग, आरू नुमपास आरू आदीन ओलेक ती उन्डरान पोरबून बिसवात चाजूरान मान्देत लोगूग आन जुवार पोक्कूमेन एनी पोक काड्डूर।

16 आरू चूड़ूर ई चिट्टीन ईम पोड़ी किली लोगीन वेनपीकतान पिटतेल लोदीकीयेत पोरबून बिसवात चाजूरान मान्देत लोगीन बेले पोड़ी किली वेनपीकतानो आय। आटनी लोदीकीयेत बिसवासी लोगूग आन लिकी मेन्डान चिट्टीन बेले ईम पोड़ी किली वेनपीकपूर।

17 आरू आरकीपूसीन इनूंग पोरबून कान तीग टोन्डी मेन्डान सेवेन लेक ती मेन्नी पूराकतानो आय एनी पोक काड्डूर।

18 आन पोलूस कुदे इमूंग जुवार एनी किली आन्न केय्योड लिकूमेन। आन जेल ती मेन्डानोन बूलकाका आनूंग बिन्ती जोड़ूर। मापोरबून माया पेम इम चेंगे मेनको। आटनी एरको।