कुलू 2

1 ईम आरू लोदीकीयेतेर आरू आन्न मोकोमीन एतोडी चूड़ा लोग आन इमूंग जाम्मेगी एटे मोयमोत चाजूमेन आदीन पुनूर एनी आन्न मेन्न मेन्डा।2 आन नांग मोयमोत चाजूमेन एनोड, ईम आरू ओर आपला मेन्न ती उचांग एरी किली ओकूरीन ओकूर रेच्चा चोग चाजी ओकती चोर ती मेनकोर आरू मापोरबू मुन्नी पाकी मेन्डीड जे? आ पाटेन पूरा पुन्नी, चोमजी मेनकोर एनी आय मोयमोत चाजूमेन। गो मुन्नी पाकीक मेन्डान आ पाटा आय।3 ओडी पाकीक मेन्डान देन तो गेदीयेल आकाट मेन्डान मापोरबून बुदी आरू गियानीन पारगाकताड।4 एडी इमीन चोड़ीयाकतान पाटेलोड बूलकाकपा मेनकेर एनी आय आन इदीन पोक्कूमेन।5 एटे एनोड आन मेन तीग इम ले कोमाड मेन्डान, एरोड बेले आन्न जियोम गो इम चेंगे नी मेन्डा। आरू ईम, मसीयालीन लोग एटे पीयरानो आय आटनी पीयी किली ओनीन बिसवात चाजूरान ती बेरकेच मेन्डानोन आन वेन्नी किली वेड़का एरमेन।

मसीयालीन चेंगे बिड़ी मेन्डान पुन जियोम

6 आदूगी ईम एटे ईसू मसीयालीन पोरबू आय एनी मानोर नार, आटनी ओन पाटे ती चेल चेली मेनूर। 7 मेरकूल तो वार नेन्दील ती रेच्चा बेरकेच चेनी मेन्डान आकाट आरू पायेन बेरकेच ती एटे कुड़ीया मोंजीबूत मेन्डा आटनी ईम ओन पाटे ती चान्दारे चेनूर। आरू एटे इमूंग मेरचीकतानो मेन्डा आटनी बिसवात ती मोंजीबूत मेनूर आरू निक्के जुवारची-जुवारची मेनूर।

8 लेक ती मेनूर। मांजेन बिचार तीग पेतान बूलकाकतान आरू पोकात पाटेल पोक्की किली एडी ताम्म पान्दे ती इमीन चिरकीक ओड़ा मेनकेर। आव मुन्नीत जुग ले तेरानूल ले तेरानूल तीग लोगूग मेरचीक मेन्डान पाटेल आरू ई मोंजीपूर तो वेन्दीड बिटाचीलीन पाटेल आय। आरू आव मसीयालीन कान तो पाटेल एरावा। 9 एटे एनोड मापोरबून पूरा चेला बूलेल मसीयालीन मेन ती डेरा पात्तूमोव। 10 आरू ओन चेंगे बिड़ी मेन्डानूग ईम नाती पाटेल ती बेले कोमी चिलायोर मेन्डार। ओडी पान्न चेलाकतान आरू आंगरूरान सरग दूतकूल आरू वेन्दीड बिटाचील जाम्मेग ले मुकीयाल आय। 11 आरू ओन चेंगे बिड़ी मेन्डानूग जियोम पाड तो तीप तोलीन इमूंग मांजा कुड्डारी एरोड आद इमूंग ई इसाब ती एञ्ञो: ईम मसीयालीन बिसवात चाजूरानूग ओड इम मेन्न के लागेन तो बिचारूलीन कुड्डी किली तीनतेड। 12 आरू ईम बपतीसमा एपेक मसीयाल चेंगे मापोरबू इमीन माटी चियरान आकाट एञ्ञोर आरू ओन चेंगे मापोरबू इमीन जियोम पाटतीकतान आकाट ईम पुन्न जियोमीन बेटोर। चाय्यरान कान तीग मसीयालीन जियोम पाटतीकतान मापोरबून ताकोतीन ईम बिसवात चाजूरानूग आटे एञ्ञो। 13 आरू मुन्नी ईम पापदेरोम चाजूरानूग चाय्यरान लोगीन आकाटतोर मेन्डूर। आरू मेन्न के लागेन तो बिचारूल ती चेली किली जियोम पाड तो तीप तोलीन कुडीकपा कियाल मेन्डूर। एबे मापोरबू एके आम्म जाम्मा पापदेरोमूलीन माप चाजी किली आमीन मसीयालीन चेंगे जियोम पाटतीक किली पुन्न जियोम चिञ्ञेड। 14 आरू आमूंग नातो डेन्ड टोन्डूरा एनी लिकी मेन्डान पोरचीत लिकेन आदीन नीती इसाबूल चेंगे कुरूस पारे ती कूटील कोटीक किली पूरा मेटाक काट्टेड। 15 आरू पान्न चेलाकतान आरू आंगरूरान सरग दूतकूल आरू वेन्दीड बिटाचीलीन पान्नीन नाचाकतेड। आवीन कुरूस पारे ती जीती किली जाम्मा लोगीन मुन्देल लाज पाटतीकतेड। ई पाटेलीन चायी एड बेले आवूर पाटेलीन मेरचीक किली इमीन पान्दे ती चिरकीक ओड़ा मेनकेर।

16 आञ्ञोती एरा। ईम तिन्दान उन्डान इसाब ती चिलाड बेरचाने आरू नेलींगूग ओपोट पुनी बागूरान चिरीक तियार तिन्दान इसाब ती चिलाड आँट दिनेग ओपोट पाबूरान चिरीकीन मानूरान इसाब ती एड एरको इमीन बोदी चियोड आदीन लेक चाजू लागाया। 17 एटे एनोड पिटतेल वेर्रान मसीयालीन नीड़ा मुन्नी आ नियोमूल तीग आट्टी मेन्डू। एबे आ नीड़ा एरोत मेन्डू ओडी आय मसीयाल। 18-19 ओड पोरबून बिसवात चाजूरान मान्देत लोगूग तेल्ल आकाटतेड आय। एटे मेन तो बागूल गेटकूल आरू नेरबूलोड तेल्ल चेंगे जोड़ी किली गुलाय मेन ताकोत बेटूरा आरू आद चान्दरा, आटनी ओड तान्न मेन आकाट मेन्डान बिसवासी लोगीन मापोरबूग मेन्न ती वेर्रान आकाट चान्दीकताड। एड बेले तेल्ल आकाट मेन्डान मसीयालीन पाटेन पातीयाक चायी ओन चेंगे बिड़ी मेनायेड, “आन मुकीयाट केलायकूड केलायेन” एनी किली, नाती इसाब चिलाका आपला मेन्न के लागेन तो बिचारूल तीग बोड़पान एरी किली, ईम सरग दूतकूलीन काबजे ती एर्रानो आय आरू ओरीन सेवा चाजूरानो आय एनी आलवाल चियू कानची किली इमूंग टोन्डूरान इनामीन ईम बेटा कियाल चाजा मेनकेड।

20 ईम मसीयाल चेंगे मोंजीपूर तो वेन्दीड बिटाचीलीन पाटेलूग चाय्यरान आकाटतोर एञ्ञोर नार गो, मारी नांग एबले बेले ईम ई मोंजीपूर ती पीयरानेर मानूरान आकाट तो, 21 ई, इना केय्य इडोड बानाया, आरू आदीन चाकोड बानाया आरू आदीन टोडोड बानाया एन्डान नियोमूलीन मानूमोर गो? 22 (ईव ओपोट काम चियोड नाचरान इसाबूलीन बीतेर ती पोकूमोव) आरू आ नियोमूल आमान मांजा पोकरानोव आरू केडीकतानोव आय। 23 ई नियोमूल ती ताम्म उवाट तीग निक्के बोकतीत सेवा चाजूरान आकाट टोटीकतानो आरू आपला मेनूलीन नोयपीकतानो मेन्डाव। आरू ईव बुदीतोव आकाट टोन्डूराव। एरोड ईव मेन्न के लागेन तो बिचारूलीन चाजूरान कान तीग आटकाक ओड़ाव।