पिली 3

1 एपोर, ए आन्न बायीयोवे आरू दादेरे! पोरबून चेंगे बिड़ी मेन्डानूग वेड़के ती मेनूर।

लेक ती मेनूर

आन लिकूरान पाटेलीन गेन-गेन लिकू आनूंग नाती केट-केट एराया आरू आव्वी इमीन टेगू-टेगू मेरचीकतानेरीन तीग बाचाकताव। 2 मापोरबून मुन्देल देरमी एरू मेन तो बागीन कुडरानो आय एनी मेरचीकतान आ कुड्डीकतान लोगीन तीग लेक ती मेनूर। ओर नेत्तेल आकाट चूत पाडरानेर, आरू कियाल तो कामूल चाजूरानेर आय। 3 एटे एनोड आम मापोरबून जियोम पोकरान आकाट मापोरबून सेवा चाजूमोम; ईसू मसीयालीन पाटे ती बोड़पान एरमोम आरू मोंजीपूर तो नियोमूलीन मानोड गो आमीन मापोरबू देरमी एरीकताड एनी आचा चाजामा। आदूगी आमी गो जियोम पाड तो तीप तोलीन चेत्ते कुडीक एर्रानोम आय। 4 एरोड आन गो कुदे मोंजीपूर तो नियोमूलीन मानूरान इसाबूलीन बेले नीनगा बिड़ाक किली बेले आचा चाजू नाम्बीकतान। आरू एरूग बेले मोंजीपूर तो नियोमूलीन मानूरान इसाबूलीन नीनगा बिड़ाक किली आचा चाजूरान बिचार मेन्डा एरोड आन ओन ले बेले आगेर आचा चाजू नाम्बीकतान। 5 एटे एनोड आँट दिने ती आन्न कुट्टेर। आन इसराएली जाततेन आरू बिनयामीनीन कुटूमतेन आरू उपजात इबरानी आय; आरू नियोमूलीन तीग इट आट गूचाका मानूरान इसाब ती पोकोड आन आय। 6 आरू आन नियोमूलीन निक्के ओरबोर एरी मानूरानूग पोरबून बिसवात चाजूरान मान्देल तो लोगीन सताकतेन आरू नियोमूलीन मानी किली मापोरबून मुन्देल देरमी एरू कानतान इसाब ती केचूर चिलायेन मेन्डीन।

पोलूस मसीयालीन पुनूंग आचा चाजूरानो

7 आन ईवीन जाम्मेनी आनूंग लाब तो आय एनी चोमजूरीन; एरोड, आन बिसवात चाजूरान चेत्तूग आयची पाटेलीन नोकसानतोव आय एनी चोमजेन। 8-9 आरू आतीनी एरा, एरोड ईसू मसीयालीन आन्न पोरबू आय एनी मानूरानो ई जाम्मेग ले मुकीयाट पाटा आय एन्डान चेत्तूग जाम्मा पाटेलीन नोकसानतोव आय एनमेन। ओन चेत्तूगी आन जाम्मा बानील तो नोकसानीन बुकतेन। आरू आन मसीयालीन निक्के रेच्चा पुन्दान आकेलीन बेटेकेन, आरू ओन चेंगे नी मिसी मेनकेन एनी आवीन तुर्रीन आकाट चोमजूमेन। आरू नियोमूलीन मानी किली मापोरबून मुन्देल देरमी एर्रान एनी कानपाना। एरोड मसीयाल कान बिसवात चाजी किली मापोरबून मुन्देल देरमी एर्रान एनी कान्डूकमेन। देरमी एर्रानो मापोरबून टिटाक ले ओनीन बिसवात चाजूरानूगी टोन्ड़ूमो। 10-11 आञ्ञोती एरा, आन मसीयालीन पुनकेन; ओनीन चाय्यरान कान तीग मारी जियोम पाटतीकतान ताकोतीन पुनकेन; आरू ओड मुन्नी आबोड़ एञ्ञेड जे? आ आबोड़ूल ती मिसेकेन आरू आन एटे बेले एरी किली, चाय्यरान कान तीग मारी जियोम पाटतीक एर्रानोन बेटेकेन एनी ओड चाय्यरान आकाट आन बेले आबोड़ूल तीग चाय्येकेन एनी बेले मेन्न चाजूमेन।

मसीयाल एट्टेड एरू कूयेड आदीन बेटू आलवाल एर्रानो

12 आन ई जाम्मेनी बेटेन नान चिलाड ई जाम्मा इसाबूलीन मापोरबू आन कान पूरा चाजेड नाड एनी पोक्काना। एरोड ईसू मसीयाल आनीन एट्टेड एरू कूयी मेन्डीड आदीन बेटेकेन एनी आय मुन्देल चेनूंग आलवाल एरमेन। 13 ए बायीयोवे आरू दादेरे! आन आदीन बेटेन नान एनी बिचार चाजाना। एरोड आन ओक काम चाजूमेन। एटे एनोड आन पोटतेल चायेन नान आ इसाबूलीन बूलकी किली मुन्देल इड्डी मेन्डान इसाबूलीन बेटू आलवाल एरमेन। 14 आन मसीयाल ईसून चेंगे बिड़ी मेन्डानूग मापोरबू आनूंग पोडी सरग ती इड्डी मेन्डान आ इनामीन बेटू, आन आरे चेनूंग लागूरा आना आलवाल एरी चेनमेन। 15 आदूगी आम्म कान तीग एंगोट लोग बिसवात ती बेरकेच मेन्डार, ओर इदीनी बिचार चाजेकेर। आरू इम कान नातो एरको आवूर तो बिचार मेन्डा एरोड मापोरबू आदीन बेले इमीन टोटीकताड। 16 आदूगी आम बेटोम नाम आयची चेत्त ती नी चेल चेली मेन्डानो आय।

रेच्चाट चेलनूकूड़ूल ती चेलूर

17 ए बायीयोवे आरू दादेरे! ईम आन्न आकाट चेलू आन्न चेलनूकूड़ूल ती मिसूर। आरू आम एटे चेल्लानो आय एनी मेरचीकतान आकाट चेलानेरीन लेक चाजी किली ओर आकाट मेनूर। 18 एटे एनोड कुबे लोगीन चेलनूकूड़ूल मसीयाल कुरूस ती आबोड़ एर्रान इसाबूलीन विरूद ती मेन्डाव एनी आन इमीन कुबे गुबोड़ूल पोक्केन नान, आरू एपोर बेले आदीन आड़ आड़ी पोक्कूमेन। 19 ओर चेरा चेरी नाचरारी। ओर आपला पोट्टेगी नातीन एरको चाजूमेर। नातेग लाज एर्रानो मेट्टो, आदीन तीग ओर तामूंग पिदीर काट्टीकमेर। ओरी गो आय ई मोंजीपूर तो बानील ती मेन्न लागाक-लागाक मेन्डानेर। 20 एरोड आम्म कुदे देचा सरग ती गो आय मेन्डा। आरू आम आमीन बाचाकतान पोरबू ईसू मसीयाल आन्नी तीग वेर्राड एनी पाव चूड़ चूड़ी मेनमोम। 21 ओड जाम्मा बानीन तान्न ताकोत तीग तान्न काबजे ती चाजूराड आरू आयची ताकोत तीग मोंजीपूर तो आम्म चामरान मेनीन बादलाक किली तान्न एतोडी चाय्या सरग तो मेनीन आकाट चाजूराड।