पिली 4

1 आदूगी ए आन्न लाड तो बायीयोवे आरू दादेरे! ईटे पोरबून कान बेरकेच मेनूर। ए आन्न लाडरालेरे! आन इमीन चोग चाजूमेन आरू इमीन बेट गाट एरू जियोम उकराकमेन। आरू ईमी आय आनीन ऊदीम चाजूरानोर आरू आन मोयमोत चाजूरानूग बेटूरान इनामीन आकाटतोर।

एतोड नांग ऊदीम ती मेनूर

2 आन युआदीया आरू सन्तूके, इरालीनी पोरबून चेंगे बिड़ी मेन्डानूग ओकती चोर ती मेनूर एनी गुवारूकमेन। 3 ओ, ए चेत्ते तो चेंगेने! ईन बेले ई आयचीलीन मिलेन ती मेनूंग आवीन बोरीयाक एनी गुवारूकमेन। ईव आन्न चेंगे आरू किलेमेन्स आरू आवूर तो चेंग चियरानेर चेंगे एडो पाटेन वेनपीक मोयमोत चाजरूव। ओर जाम्मेन पिदीरूल जुग-जुग तो जियोम बेटूरान लोगीन पिदीरूल लिकी मेन्डान कागेत ती लिकूरानोव मेन्डाव।

4 पोरबून चेंगे बिड़ी मेन्डानूग एतोड नांग ऊदीम एर एरी मेनूर। इदीनी आन मारी पोक्कूमेन, ऊदीम एर एरी मेनूर। 5 इम चुचारू तो चेलनूकूड़ूल जाम्मा लोगूग देका पाडोकोव। पोरबू मारी वेर्रानो लेग्गे मेन्डा। 6 नाती पाटेग किसीयाकमोर; एरोड ईम जाम्मा पाटेलूग बिन्ती जोड़ी, गुवारची किली जुवारची-जुवारची मापोरबून पोक्कूर। 7 तेबे ईम ईसू मसीयाल चेंगे बिड़ी मेन्डान तीग, एडी चोमजू ओड़ा मापोरबून चुक, इम मेन्नीन आरू इम बिचारूलीन चाकलूरा।

8 आरू एपोर, ए बायीयोवे आरू दादेरे! एंगोट पाटेल चेत्तेतोव, इजीत्तोव, देरोमतोव, केचूर चिलायोव, मेन्न ती वेर्रानोव, वेड़का चियरानोव, लोग रेच्चाट एनी मानूरानोव, जाम्मेन ले रेच्चाचील आरू पिदीर पातीक एर्रान बातेर तोव आय, आयची पाटेलीन बिचार चाजारे मेनूर। 9 आन्न तीग मेरीयूरानोन, बेटूरानोन, वेनदानोन आरू आन चाजेक चूड़रानोन चाजूरान उवाट चाज चाजी मेनूर। आरू चुक चियरान मापोरबू इम चेंगे मेन्डाड।

पिलीप्पी गेड़ेतेरूग पोलूस जुवार पोकरानो

10 ईम चेत्तेई आनीन मारी चेंग चियू चुरता चाजूरूर, एरोड कोमाड मेन्डान चेत्तूग इमूंग, आनूंग चेंग चियू पोलोंग टोन्डा मेन्डू। एरोड एपोर आनीन चेंग चियू इमूंग मारी पोलोंग टोन्डूरानूग आन निक्के वेड़का एरी पोरबून जुवार पोक्कूमेन। 11 आनूंग नातो एरको कोमी पाडरान चेत्तूग आन ईटे पोक्काना। एटे एनोड आन एटे मेनोड बेले आदीन तीगी वेड़के ती मेनूंग मेरीयेन नान। 12 आन्न लेग्गे किन्डीक आकाट मेनेक बेले आन पीयू मेरीयेन नान, आरू चेड़ीगेन मेनेक बेले पीयू मेरीयेन नान। एटे एरोड बेले आरू एट्टो वादेक एरको पीयू मेरीयेन नान। पोट्टा पाञ्ञी मेनेक चिलाड आन्डकूड ती मेनेक बेले पीयू मेरीयेन नान। आरू चेड़ीगेन मेनेक चिलाड मुरले चिला वादेक बेले आन चुक ती मेनूंग मेरीयेन नान। 13 आनूंग लाव चियरान मापोरबून बेरकेच तीग आन नातोन एरको सामालूग नाम्बीकतान। 14 एरोड बेले, ईम आन्न आबोड़ वादेक आनूंग देरोमूग चियू कानतानो रेच्चा आय।

15 आरू ए पिलीप्पी गेड़ेत लोगीने! आन इमीन पोईल-पोईल एडो पाटेन वेनपीक किली, मकीदूनीया पेरगेन तीग पाव आत्तेन। आतोड देरोमूग चिया चियी एर्रान इसाब ती आमान इम कान तो पोरबून बिसवात चाजूरान मान्दा गो आनूंग चेंग चिञ्ञो। आवूर आरोई मान्देल आनूंग चेंग चियोवा एनी ईम पुट्टोर। 16 आटनी आन तिसलूनीकीयो गेड़े ती मेन्डीन, आतोड बेले आनूंग लागूरानोन ओपोटी एरा, एरोड कुबे गुबोड़ूल ईम चोटतोर नार। 17 ईम आनूंग देरोमूग इनामूल चियकोर एनी कानपाना, एरोड ईम आनूंग चियरानूग मापोरबू इमूंग पालटा चियकेड एनी कान्डूकमेन। 18 ईम इप्परूदीतूसीन केय्य ती इनाम चोटची मेन्डूर, आवीन बेटी किली आनूंग लागूरानोव पूरा एञ्ञोव आरू आगेर बेले एञ्ञोव। ईव जाम्मा मापोरबूग चोत्तीकतान दाग चियरान बोदनेन आकाट आरू मापोरबू पातीयाकतान आरू मेन्न चाजूरान जेतरेन आकाट तोव एञ्ञोव। 19 आरू आन मानूरान मापोरबू तान्न निरबे आचरूत तो बेड़तो ताकोतीन कान तीग, ईम मसीयाल ईसून चेंगे बिड़ी मेन्डानूग इमूंग कोमी पाडरान ओक-ओक बानीन चियराड। 20 आम्म बुवा मापोरबूग लोग जुग जुगूग इजीत तो मान चियेकेर। आटनी एरको।

चेरा चेरीत जुवार

21 मापोरबू तानूंग एलगाक मेन्डान जाम्मेनी मसीयाल ईसून चेंगे बिड़ी मेन्डानूग आन जुवार पोक्कूमेन एनूर। आन्न चेंगे मेन्डान बिसवासी लोग इमीन जुवारूकमेर। 22 मापोरबू तानूंग एलगाक मेन्डान इनात जाम्मा लोग इमीन जुवारूकमेर। केसर कोसीन ओलेक काम चाजूरानेर बेले इमीन जुवार एनमेर।

23 आम्म पोरबू ईसू माया पेम इम जियोमीन चेंगे मेनको।