पिली 2

मसीयालीन बिचार आकाट इम्मोत बेले एरको

1 ईम मसीयालीन चेंगे बिड़ी मेन्डानूगी आय उचांग एरमोर आरू ओड इमीन चोग चाजूमेड एनी पुन्दानूगी आय इम जियोम बेले मान्डोतो। आरू मापोरबून जियोम इमीन चेंग चियमेड आरू ईम ओकूर ओकूरीन चोग चाजी जियोम नोयपीकमोर। 2 आदूगी ईम ओकती मेन्न ती मेन्नी किली, ओकूरीन ओकूर ओकती काटार चोग चाजी किली, आरू ओकती चोर ती ओकती बिचार चाजी किली आनीन पूरा वेड़का एरीकपूर। 3 आपलेगी लाब एरको एनी चिलाड आपला पिदीर कामाक नाती चाजूमोर, एरोड दिरजे ती ओकूर ओकूरीन आपलेन ले मुकीयाल मानूर। 4 इम कान तीग ओकूर-ओकूर आमान आपलेगी रेच्चा एरको एनी एरा, एरोड आवूरूग बेले रेच्चा एरको एनी बिचार चाजूर।

5 मसीयाल ईसून बिचार एट्टोत मेन्डू, आटनी इम बिचार बेले मेनको।

6 ओड मापोरबून काटार मेन्नी किली बेले

मापोरबून काटार मेन्डान पोद्दीन मुरले चायाना एनी बिचार चाजेडा।

7 एरोड कामीयाल आकाट, मांजेन मुरीत ती जेनोम एरी किली

तानीन तानी इनमानतेड एरीकतेड।

8 आरू मांजेन मुरीत ती जेनोम एरी किली

तान चाय्यरान एदारे, ओ, कुरूस पारे ती चाय्यू बेले

मापोरबून पाटेन मानी किली तानीन तानी इनमान एरीकतेड।

9 आदूगी आय मापोरबू ओनूग निक्के बेड़तो पोद्दीन

आरू जाम्मेन ले निक्के बेड़तो पान्नीन बेले चिञ्ञेड।

10 तेबे सरग आरू मोंजीपूर आरू किड़ीतपूर तो जाम्मा ई लोग

ईसून पिदीरीन इजीत मानी किली ओनीन मोड़केकेर,

11 आरू बुवा मापोरबून इजीत तो मान चियू

जाम्मा लोगीन नेवान्डूल ईसू पोरबू मानोकोव

एनी आय आटनी चाजेड।

मोंजीपूर तो विलीजूल आकाटतोर एरूर

12 आदूगी ए आन्न लाडरालेरे! ईम एटे मुन्नीत ले आन मेरचीकतान पाटेलीन मानूरूर, आटनी आमान आन्नोडी मेनेकी एरा एरोड आदूग ले बेले आगेर, एपोर आन ले कोमाड मेनेक बेले मापोरबूग नारचूर आरू इजीत मानूर। तेबे मापोरबू इमीन बाचाकतेड एन्डानोन इम चेला बूलेल तीग टोटीकपूर। 13 एटे एनोड मापोरबू ई आय तानूंग एटे मेन्न ती वेर्रा आटे इम मेन्न ती उवाटूलीन उपजाक किली आवीन चाजपीक उच उचाकमेड।

14 जाम्मा कामूलीन गुर-मुराका चिलाड पोका पोकी एराका चाजारे चेनूर। 15-16 तेबे ईम एड़जालेर आरू जालकूल नाड़बूल बोदी चिलायेर आरू सोजालेर एरी किली मापोरबून केचूर चिला पापकूल मेन्डार आरू ओर नाड़बूल जियोम चियरान पाटेलीन रेच्चा पातीयाक किली आवीन मेडूरान विलीजूल आकाट, ई मोंजीपूर तो लोगीन पारगाकतार। तेबे मसीयाल मारी वेर्रान दिने ती, आन तूल तूली एडो पाटेन वेनपीक मोयमोत चाजूरानो पोका चेनोया एनी आन बोड़पान एरू नाम्बीकपेकेन। 17 ईम मसीयालीन बिसवात चाजी किली सेवा चाजूरान तीग ईम आबोड़ूलीन बुकतूमोर। आद जेतरे ती कुडरान जियादीन आकाट मेन्डा। कुडरान जियादीन पोडे चापरान मेलीन आकाट आन्न नेतीरीन ओटीक पाडोड बेले आन वेड़के ती मेन्डान आरू इम जाम्मेन चेंगे वेड़का एर्रान। 18 आटनी ईम बेले वेड़के ती मेनूर आरू आन्न चेंगे ऊदीम एरू बिड़ूर।

तिमूतीयूस आरू इप्परूदीतूस

19 पोरबू ईसून उवाट मेनोड, तिमूतीयूसीन तुरते इम लेग्गाट चोटतान एनी आचा चाजूमेन। तेबे ईम एटे मेन्डार एनी ओड काबेर एन्देरपोड आदीन वेन्नी किली आनूंग बेले आसतीर टोन्डोको एनमेन। 20 एटे एनोड आन्न आकाट इमूंग रेच्चाट मेन्न तीग चुरता चाजूरानेड ओनीन चायी आन्न लेग्गे एडी चिलाड। 21 एटे एनोड जाम्मा ई लोग ईसू मसीयालूग मेन्न ती वेर्रानोन कान्डूक चायी आपलेगी लाब टोन्डोको एनी कान्डूकमेर। 22 एरोड ईम गो तिमूतीयूस बिसवात चाजू एर्रान बातेरतेड आय एनी पुट्टोर। चिन्ड बुवेन चेंगे काम चाजूरान आकाट एडो पाटेन वेनपीक ओडी आन्न चेंगे सेवा चाजेड नाड। 23 आदूगी आनूंग पेसी ती एटे एर्रा एनी पाता चेलूके, आन तुरते ओनीन चोटतेर्रान एनी आचा चाजूमेन। 24 आरू कुदे आनी बेले जेटके वेर्रान एनी आन पोरबून कान तीग आचा चाजूमेन।

25 एरोड आन्न बिसवासी तोल्लेड इप्परूदीतूसीन आन इम लेग्गाट चोडूक लागूरा एनी चोमजेन नान। ओड आनूंग काम चाजू चेंग चियरानेड आरू एडो पाटेन चेत्तूग जिकाटाना एर्रान ती आन्न चेंग चियरान पालटेनीन आकाटतेड आय। ओडी इम कान तीग आन्न लेग्गे काबेर एन्देर्रान मांजा आरू आनूंग कोमी पाडरान बानीलूग देक रेक चाजू ईम चोडतेर्रानेड बेले आय। 26 एटे एनोड ओड इमूंग जाम्मेगी जियोम उकराकतीड आरू ईम ओड नोयकूड ती पाट्टेड नाड एनी वेनदानूग ओड किसीयाकतीड। 27 आरू ओड चेत्तेगी बेमार एरी किली चाय्यरान बातेर एरी मेन्डीड। एरोड मापोरबू ओन कान, आरू आमान ओन कानी एरा, आन कान बेले किसीन पोडे किसी वेरा मेनको एनी जियोम नोयपीकतेड। 28 आदूगी ईम ओनोड मारी बेट गाट एरी किली वेड़का एरकोर आरू आन्न किसी बेले कोम एरको एनी ओनीन चोडूक आन आगेर आलवाल एरमेन। 29 आदूगी ईम पोरबून चेंगे बिड़ी मेन्डानूग ओनोड वेड़केनोड बेट गाट एरूर, आरू आटेरूग इजीत चियूर। 30 एटे एनोड ओडी आय मसीयालीन कामीन चेत्तूग आपला जियोम ती डेन्ड एरी किली ईम आनूंग नातो कामीन चाजू ओड़ा मेन्डूर, आदीन चाजू चाय्यू बेले तायार मेन्डीड।