पिली 1

पिलीप्पी गेड़तेरूग

पोलूस लिकूरान चिट्टी

जुवारतानो

1 ईसू कामीयालेर पोलूस आरू तिमूतीयूसीन टिटाक ले,

मसीयाल ईसून चेंगे बिड़रानूग मापोरबू तानूंग एलगाक मेन्डान पिलीप्पी गेड़ेत लोगूग आरू पोरबून मान्देत लोगीन मुकीयालेरूग आरू ओरीन चेंग चियी किली पोरबून काम चाजूरानेरूग लिकूरान चिट्टी इद आय:

2 आम्म बुवा मापोरबू आरू आम्म पोरबू ईसू मसीयाल टिटाक ले इमूंग माया पेम आरू चुक टोन्ड टोन्डी मेनको।

पोलूसीन बिन्ती आरू जुवारतानो

3 आन एतोड-एतोड इमीन चुरता चाजूरान, आतोड-आतोड आम्म मापोरबून जुवारूकमेन। 4 आरू एतोड एरको आन ईम जाम्मेगी बिन्ती जोड़ेक, वेड़के तीग बिन्ती जोड़ूमेन। 5 एटे एनोड ईम मसीयालीन पातीयाकतान पोईल चिरीक ले पात्ती किली इनेत्तार्रे एडो पाटेन वेनपीक आन्न चेंग मिसोर नार। 6 इम कान रेच्चाट कामीन मुरीयाकतान मापोरबू, तान मुरीयाकतान कामीन चाज चाजी ईसू मसीयाल मारी वेर्रान दिने ती आदीन पूरा चाजूराड एनी आन चेत्तेगी आचा चाजूमेन। 7 आरू इमीन निक्के चोग चाजूरानूग, इम जाम्मेन बीतेर ती आन ईटो बिचार चाजूरानो रेच्चा आय। एटे एनोड एपोर आन जेल ती मेनेक बेले आरू एडो पाटेन बीतेर ती जवाब चियी किली आ पाटा चेत्ते तो आय एनी टोटीकपेक बेले, मापोरबू आपला माया पेम तीग आनूंग ओपीक मेन्डान काम ती, ईम आनूंग चेंग चिञ्ञोर नार। 8 मसीयाल ईसू इमीन चोग चाजूरान आकाट आन इमीन चोग चाजी किली इमूंग जाम्मेगी जियोम उकराकमेन एनी मापोरबू आन्न गोवा मेन्डाड। 9 आरू मापोरबून पुन्दान तीग आरू नातो पाटेल रेच्चाचील आय एनी पोरकूरान तीग ईम चोग चाजूरानो मारी बेले चान्दारे चेनको एनी आन बिन्ती जोड़ूमेन। 10 आटनी ईम चोग चाजूरान ती चान्दारे चेनोड, मसीयाल मारी वेर्रान दिना एदारे ईम रेच्चाट ले रेच्चाट पाटेन आची किली केचूर चिलायेर आरू बोदी चिलायोर मेन्डार। 11 आरू ईसू मसीयाल तीग टोन्डूरान देरोम तो चेलनूकूड़ूल ती मोंजीबूत एर्रारे चेनूर। तेबे लोग मापोरबूग इजीत तो मान चियेकेर आरू ओनीन जुवारपेकेर।

पोलूस जेल ती मेनेक एडो पाटा कुबे लोगूग पारगोतो

12 ए बायीयोवे आरू दादेरे! आन आनूंग एञ्ञो जे? आ आबोड़ूल तीग एडो पाटा कुबे लोगूग पारगोतो एनी ईम पुनूंग लागूरा एनमेन। 13 आरू आद आतीनी एरा, एरोड केसर कोसीन माल तो जाम्मा पालटेनकूल आरू जाम्मा लोगूग बेले आन मसीयाल चेत्तूग केयदाल एञ्ञेन नान एनी पाता चेलोतो ना। 14 आरू बिसवासी लोगीन कान तीग कुबे लोग, आन जेल ती मेन्डान चेत्तूग, पोरबून पातीयाकतान कान बेरकेच एरी किली, नारचाका मापोरबून पाटेन वेनपीक डाडू चाजूमेर।

15 ओदेर एके कुचेरूग आरू आन्न ले आगेर सेवा चाजूमोम एनी लोगीन टोटीक आय मसीयालीन पाटेन वेनपीकमेर। आरू मारी ओदेर एके ताम्म रेच्चाट मेन्न तीग वेनपीकमेर। 16 रेच्चाट मेन्न तीग वेनपीकतानेर एके आन एडो पाटेन इसाब ती जवाब चियरान चेत्तूग जेल ती मेन्डान एनी पुन्नी किली चोग ती वेनपीकमेर। 17 आरू कुचेरूग वेनपीकतानेर एके तामूंगी लाब एरको एनी मसीयालीन पाटेन मेन्न तीग एरा, एरोड आनूंग जेल ती इदूग ले आगेर आबोड़ टोन्डोको एनी बिचार चाजी किली वेनपीकमेर। 18 आटेकोड नान एन्डान? कियाल तो बिचारूल चिलाड एके रेच्चाट बिचारूलोड बेले एरावा नांग। एटे एरोड बेले, एटनी एराया। ओर मसीयाल पाटेलीन गो वेनपीकमेर, आदूग आन आवीन तीग वेड़का एरमेन।

ओ, आन वेड़का एर एरी मेन्डान। 19 एटे एनोड ईम बिन्ती जोड़रानूगी, आरू ईसू मसीयालीन जियोम चाकी एर्रान चेत्तूगी, आनूंग एर्रान जाम्मेन तीग आन चोड़ाक एर्रान एनी आन पुट्टेन। 20 आन गो आरोई पाटेग मुरले लाज एराना, एरोड आन चाय्योड चिलाड जियोम मेनोड बेले, एटे एरोड बेले डाडू चाजी किली, एबे मेन्डान आकाट, एतोड नांग आन्न मेन तीग मसीयालीन इजीत चाजूरान एनी निक्के मेन्न चाजी किली आचा चाजूमेन।

मसीयालीन सेवा चाजू ई आन जियोम मेन्डान

21 एटे एनोड आन जियोम मेन्डानो मसीयालीन सेवा चाजू ई गो आय जियोम मेन्डान, आरू चाय्योड बेले आन मसीयालीन चेंगे मेन्डानूग आद आनूंग रेच्चाट आय। 22 एरोड आन मेन तीग जियोम मेनोड आन मसीयालूग चाजूरान कामूल आगेर चान्दराव गो; आन आरोन आचूरान एनी पूनान। 23 एटे एनोड आन इरडूकीन नाड़बूल आरे तीगी एरा कियाल चिरंगेन नान। आन एके, आन्न जियोम मसीयाल लेग्गे पेची चेनोड निरबे रेच्चा आय एनी आदीन आचा चाजूमेन। 24 एरोड इम चेत्तूग जियोम मेन्डानो आदूग ले बेले आगेर काम पाडरानो आकाट बावूमो। 25 आन इदीन रेच्चा पुट्टेन। आदूग ईम बिसवात ती बेरकेच एरी किली वेड़के ती मेनकोर एनी, आन जियोम मेन्डान तेबे आरू ईम जाम्मेन चेंगे नी मेन्डान एनी आन पुट्टेन। 26 तेबे आन इम लेग्गाट मारी वेरोड, आन्न इसाब ती इमूंग मसीयाल ईसून पिदीर काटीक इदूग ले बेले आगेर बेरा टोन्डूरा।

27 जाम्मेग ले मुकीयाट पाटा नाताय एनोड, आन इम लेग्गाट वेरी किली बेट गाट एरकेन चिलाड एरा बेले मेनकेन, एरोडी बेले इम बीतेर ती ईम ओकती मेन्न ती बिसवात ती मोंजीबूत मेन्डार आरू ओकती चोर एरी किली एडो पाटेन बिसवात चाजूरानोन राका चाजू जिकाटाना एरमोर एनी आन वेनकेन। आरू इम चेलनूकूड़ूल मसीयाल एडो पाटे ती मेन्डान आकाटी मेनकोव। 28 आरू नातेल बेले विरूदी लोगूग नारचूमोर। आटनी डाडू चाजी मेन्डानो मापोरबू ओरीन नाचाकताड आरू इमीन एके बाचाकताड एन्डानोन चेत्त टोटीकमो। 29 एटे एनोड मसीयालीन चेत्तूग ईम ओनीन आमान बिसवात चाजू ई एरा, एरोड ओन चेंगे आबोड़ एरू बेले इमूंग माया पेम टोन्डोतो ना। 30 आरू ईम आन एटे आबोड़ूल ती आलवाल एरेक चूड़ोर नार, आरू एबे नी बेले आटनी आलवाल एरमेन एनी वेनमोर जे? आटनी ईम बेले आलवाल एर एरी मेनमोर।