पोरबून बिसवात चाजूरानेर कावडी उयरानोव
6
1 इम कान तीग एड बेले आपला बिसवासी तोल्लेडीनोड कावडी उय्यी किली मापोरबू तानूंग एलगाक मेन्डान लोगीन कान नियाव एरू चेनाका,
ओदेरमीकूल पोँच ती चेनूंग नांग नारचाडा गो?
2 मापोरबू तानूंग एलगाक मेन्डानेर ई मोंजीपूर तो लोगीन नियाव चाजूरार एन्डानोन ईम पूनार काय एटे?
आरू ईमी मोंजीपूर तो लोगीन नियाव चाजूरानोर आय गो,
मारी नांग ई पिटीलेक-पिटीलेक पाटेलूग नियाव चाजू ओड़ोर नार?
3 एटे आम जाम्मा,
सरग दूतकूलीन नियाव चाजूराम एनी ईम पूनार आदूग?
ईम सरग दूतकूलीन नियाव चाजू नाम्बीकतार एरोड,
ई मोंजीपूर तो सादा पाटेलीन बेले नियाव चाजू नाम्बीकतार नाना।
4 मारी नांग आय ईम मोंजीपूर तो पाटेलूग नियाव चाजूरानो आय एरोड,
पोरबून बिसवात चाजूरान मान्देत लोग इजीत माना लोगीन कान तीग नियाव चिड़ाक एरमोर गो?
5 आन इमीन लाज पाटतीक आय ईटे पोक्कूमेन।
इम कान तीग बिसवासी लोग कावडी उयेक आदीन नियाव चाजूरान बुदीतेड ओकूर बेले चिल्लाड आदूग?
6 एरोड इम कान ओक बिसवासी बायी चिलाड तोल्लेड आवूर बिसवासी बायी चिलाड तोल्लेडीनोड कावडी उय्यी किली पोँच उन्डतीकतार;
आद बेले मापोरबून बिसवात चाजा लोगीन मुन्देल आटे चाजूरार।
7 ईम ओकूर ओकूरीनोड पोँचूल उन्डा उन्डी एर्रार।
ई इसाब ती ईम पोरबून पाव ती चेल्लान ती आरोर नार।
लोग इमीन कियाल चाजूरानोन नांग सामालूकपारा?
आरू लोग इमीन टेगरानोन नांग सामालूकपारा?
8 एरोड ईम गो कुदे कियाल चाजूरार आरू टेगरार।
आद बेले आपला ई बिसवासी लोगीन आटनी चाजूरार।
9 ओदेरोम चाजूरानेर मापोरबू आंगरूरान इसाब तो पाट लागेतेर एरू ओड़ार एनी ईम पूनार आदूग?
दोका तिनमोर:
दोस पाडरान कामूल चाजूरानेर,
मुरीतूलीन मानूरानेर,
आरू दारीयाट कामूल चाजूरानेर,
माईड माईडीनोड चिलाड आयाल आयालीनोड दोस पाडरानेर,
10 चिलाड डोंगालेर चिलाड जिवडे़यकूल,
चिलाड मातवारकूल चिलाड लोगीन नेडीकतानेर चिलाड जुरीयालेर मापोरबू आंगरूरानोन पातीयाक ओड़ार।
11 आरू इम कान तीग बेले एंगोटा लोग आटनीतोर मेट्टोर।
एरोड ईम पोरबू ईसू मसीयालीन पिदीरीन ताकोत तीग आरू आम्म मापोरबून जियोमीन तीग नोडीक एञ्ञोर,
आरू मापोरबू तानूंग एलगाकतानेर एञ्ञोर,
आरू देरमीकूल एरीक एञ्ञोर।
दोस पाडरान कामूल तीग तूलूर
12 “जाम्मा बानीन आनूंग चाजू बान्दा”,
एरोड जाम्मा ई बानील पायदेतोव एरावा।
“जाम्मा बानीन आनूंग चाजू बान्दा”,
एरोड आनीन नाती बानीन बेले पान्न चेलाक इडाना।
13 “बोजी पोट्टेग,
आरू पोट्टा बोजीग आय”,
एरोड मापोरबू इदीन आरू आदीन,
आ इरडूकीनी मुरजाकताड।
मेन एरोड दोस पाडरान कामूग एरा,
एरोड पोरबूग काम चाजू आय;
आरू पोरबू आय मेनूग लागूरान जाम्मा बानीन पूराकतानेड।
14 आरू मापोरबू तान्न ताकोत तीग पोरबून चाय्यरान कान तीग जियोम पाटतीकतेड आरू आमीन बेले जियोम पाटतीकताड।
15 इम मेनूल मसीयालीन मेन तो बागूल आय एनी ईम पुट्टोर काय एटे?
एटे आन मसीयालीन मेन तो बागूलीन पात्ती किली आवीन दारीयाट आयालीन चेंगे बीड़ाकतान आदूग?
आटे,
एतोडी बेले एरा!
16 एड एरको दारीयाट आयालीनोड चेंग बीड़ोड,
ओड आदीन चेंगे ओकती मेन एरी किली मेन्डाड एनी ईम पूनार आदूग?
एटे एनोड “ओर इरूल ओकती मेन एरी किली मेन्डार”a एनी मापोरबून कागेत ती लिका मेन्डा।
17 एरोड पोरबून चेंगे बिड़रानेड एके,
ओन चेंगे ओकती जियोम एर चेन्डाड।
18 दोस पाडरान कामूल तीग बाची किली तूलूर।
आवूर एंगोट पापदेरोमूल मांजा चाजूराड,
आव मेनूग ले वालतोव आय;
एरोड दोस पाडरान काम चाजूरानेड,
तान्न मेनीन विरूद ती नी पापदेरोम चाजूमेड।
19 इम मेन नाती केचूर चिला जियोमीन गुडी आय एनी ईम पुट्टोर काय एटे?
ओड इम कान डेरा पात्तेड नाड आरू ओड इमूंग मापोरबून टिटाक ले टोन्डेड नाड।
ईम इम्मोर एरार।
20 एटे एनोड इमीन मापोरबू मोल्ला चियी किली पात्तेड नाड।
आदूगी आपला मेन तीग मापोरबून जाम्मेग ले बेड़तेड आय एनी मानूर।