1कुरी 7

चुरचा इसाब तो चुवाल

1 एबे ईम लिकी किली जाच आडूरान इसाबूलीन लिकूरान: “माईड आयालीन टोडाका मेनोड रेच्चा आय।” 2 एरोड दोस पाडरान कामूल तीग बाचू जाम्मा माईंड चिन्डूग आपला-आपला आडेय, आरू जाम्मा आयचीलूग आपला-आपला माईड मेन्डानो आय। 3 माईड आपला आयालीन मेन्नीन, आरू आयाल एके आपला माईडीन मेन्नीन पूरा चाजूरानो आय। 4 आडेयूग आपला मेनीन पोडे पान्न चिल्ला; आटनी माईडूग बेले आपला मेनीन पोडे पान्न चिल्ला। एरोड माईडीन मेनीन पोडे आडेयूग आरू आडेयीन मेनीन पोडे एके माईडूग पान्न मेन्डा। 5 ईम ओकूर ओकूरीनोड पुटा-पुटा मेनमोर। एरोड डेन्डीक तीग राजी पाड्डी किली बिन्ती जोड़ू पुटा मेनूंग एर्रा। आरू मारी ओकती चेंगे मेनूर; चिलाड एरू नाम्बीकता काटलाक ओड़ाकोड चेयतान इमीन पोरकूरा बेले।

6 एपोर इद आन पोकरान पाटा आय; तियारतानो एरा। 7 आन-आन एटे मेन्डान आटनी जाम्मा लोग मेनकेर एनमेन। एरोड जाम्मेगी मापोरबून टिटाक ले आवूर-आवूर इनामूल टोन्डोव नाव। ओकूरूग ओक इसाब तो आरू मारी ओकूरूग आवूर तो इसाब तो आय।

8 एरोड आन चुरचा एरायेर आरू केटाचील इसाब ती ओर आन्न आकाट चुरचा एराका मेन्डानो रेच्चा आय एनी पोक्कूमेन। 9 एरोड ओर काटलाक ओड़ाकोड चुरचा एरकेर। एटे एनोड एरोड एरको दोस पाडरान कामूल चाजू लालेच एर्रान ले चुरचा एर्रानो रेच्चाट आय।

10 आयाल आपला माईडीन चायूरानो एरा एनी आन चुरचा एञ्ञेर नार ओरीन तियारूकमेन। (आन एरा, एरोड पोरबू तियारूकमेड) 11 (आरू ओर चाया चायी एरोडी बेले आद मारी गेर एराका मेनको। चिलाड आपला माईडीनोड मारी मिलोको) आरू माईड बेले आडेयीन चायूरानो एरा।

12 एपोर बाचूरान आवूरतेरीन आन पोक्कूमेन, (पोरबू एरा एरोड आनी आय पोक्कूमेन), आरो बिसवासी तोल्लेडीन आडेय बिसवात चाजायो मेन्नी ओनोड मेनूंग वेड़के ती मेन्डा एरोड, ओड आदीन चायूरानो एरा। 13 आटनी आरो बिसवासी आयालीन माईड बिसवात चाजायेड मेन्नी, आदीनोड वेड़के ती मेनूंग मेन्न चाजोड आद माईडीन चायूरानो एरा। 14 एटे एनोड आ बिसवात चाजा माईडीन, आ आडेयीन चेत्तूग मापोरबू तानूंग एलगाकतानेड एरीकताड। आरू आटनी बिसवात चाजा आडेयीन एके माईडीन चेत्तूग मापोरबू तानूंग एलगाकतानो एरीकताड। चिलाड इम पापकूल चूत पाडरानेर एर्रीरमीन। एरोड एपोर ओर मापोरबू तानूंग एलगाकतानेर आय।

15 एरोड आरो बेले बिसवासी चिला माईड चिलाड आयाल एलगू कानपोड एलगू इडूर। आटनीत इसाब ती आरोई बिसवासी तोल्लेड आरू बिसवासी बायी बेरपेला ओरीन चेंगे नी मेनूर एनी पोक्कू लागाया। एरोड मेल मिलेन ती मेनूंग मापोरबू आमीन कूयेड नाड। 16 ए आयालीने! एरू नाम्बीकता आपला माईडीन ईन । आरू ए माईडीने! एरू नाम्बीकता आपला आयालीन ईन ।

मापोरबू एटे कूयेड आटनी चेलूर

17 पोरबू ओकूर ओकूरूग एटे इनामूलीन पायतेड नाड आरू मापोरबू ओकूर ओकूरीन कूयेक, ओड एटे-एटे मेट्टेड, आटनी ओड चेलेकेड। ई नीतीन, आन पोरबून बिसवात चाजूरान जाम्मा मान्देल तो लोगूग नीतीकतान। 18 एरीन बेले जियोम पाड तो तीप तोलीन कुडीकतान पिटतेल कूयी मेनोड ओड कुडीकपायेडीन आकाट एरू कानपा मेनकेड। आरू जियोम पाड तो तीप तोलीन कुडीकपायेड मेनेक कूयी मेनोड, जियोम पाड तो तीप तोलीन कुडीक कानपा मेनकेड। 19  कुडीकतानो आरू कुडीकपायो इद नाती एरा, एरोड मापोरबू तियारतानोन मानूरानो ई जाम्मेन ले रेच्चाट आय। 20 जाम्मा लोग पोरबू कूयेक, एटे मेन्डूर आटनीची मेनूर। 21 ईन कामीयाल मेनेक इनीन पोरबू कूयेड नाड एरोड, आदीन इसाब ती किसीयाकमेन। एरोड ईन आ बान्देन तीग बाचू नाम्बीकतात एरोड आटनी चाज। 22 एटे एनोड एरीन कामीयाल मेनेक पोरबू कूयेड नाड, ओनीन चेयतानीन पान्न तीग चोड़ाकतानेड पोरबू आय। आरू आटनी एरीन, एर बान्देन ती नी चिलायेड एनी पोरबू कूयेड नाड, ओड कामीयाल आय। 23 पोरबू इमीन मोल्ला चियी किली पात्तेड नाड; आदूगी मांजेन इम पोडे पान्न चेलाक इडूमोर। 24 ए बिसवासी बायीयोवे आरू दादेरे! एरीन एटे पोरबू कूयेड नाड, ओड आटनी मापोरबून चेंगे मेनकेड।

चुरचा एरायोव आरू केटाचील

25 चुरचा एरा वाटा माचील इसाब ती आनूंग पोरबू नाती पोद्द चियेडा। एरोड पोरबू आनूंग जियोम नोयपीकतानूग आन बिसवात चाजू एर्रान बातेरतेन आय; आदीन इसाब ती नी चोमजाकमेन। 26 आजी काली एर्रान आबोड़ूल चेत्तूग मांजा एटे मेन्डाड आटनी मेनोड रेच्चा आय एनी आन बिचार चाजूमेन। 27 एबे ईन चुरचा एञ्ञोत एरोड, आदीन चायूरान बिचार चाजूमेन। आरू ईन चुरचा एराती एरोड, आयाल कानतान उवाट चाजूमेन। 28 एरोड ईन चुरचा एरोड बेले पापदेरोम एरा; आरू वाटा माल, आरोन आडेर नार, आद चुरचा एरोड बेले नाती पापदेरोम चाजायी। एरोड चुरचा एर्रानेरूग ई जियोम ती कुबे आबोड़ूल एर्राव, आरू आन आदीन तीग इमीन बाचाक कान्डूकमेन।

29 ए बिसवासी बायीयोवे आरू दादेरे! आन इदीन आय पोक्कूमेन: पोरबू दूड़ा वेर्रान काल वालाकी एर्रा। आदूगी एरूग आयचील मेनोड, ओर आयाल चिला कियाल एरी मेनूर। 30 आरू मुर मुरा एरी आड़रानेर एके आड़ा कियाल एरूर; आरू वेड़का एर्रानेर एके वेड़का एरा कियाल एरूर; आरू मोलयाकतानेर एके मोलयाकतानो नाती ताम्मोत एरा एन्डान आकाट एरूर। 31 आरू ई मोंजीपूर तो बानीलीन काम ती लागाकतानेर एके, मोंजीपूर तो बानील ती नी जीवना मेन्डा एना मेनकेर। एटे एनोड ई मोंजीपूर ती एबे मेन्डानोव जाम्मा मेट चेन्डाव।

32 आन इमीन बिचार चोकरान तीग बाचोकोर एनमेन। चुरचा एरा माईंड चिन्ड पोरबून एटे वेड़का एरीकतान एन्डान पाटेलूग बिचारताड। 33 एरोड चुरचा एर्रान मांजा तान्न आयालीन एटे चाजी किली वेड़का एरीकतान एनी मोंजीपूर तो पाटेलूग बिचारताड। 34 आरू ओड आयालीन काय मापोरबून, एरीन वेड़का एरीकतान एनी इरडू पाटेलीन बिचारताड। आरू चुरचा एरायो चिलाड वाटा माल, पोरबून इसाबूलीन मेन्न लागाक किली, मेन आरू जियोम इरडूकीन तीग, एटे मापोरबू तानूंग एलगाक मेन्डानेन एरीक एरकेन एनी बिचारता। एरोड चुरचा एर्रानो एके ई मोंजीपूर तो इसाबूल ती मेन्न लागाक किली तान्न माईडीन एटे वेड़का एरीकतान एनी बिचारता। 35 आन ई पाटेलीन इमूंग लाब एरको एनी पोक्कूमेन। इमीन चुरचा एर्रान तीग माना चाजू एरा; एरोड ईम रेच्चाट पाव ती चेली किली पोरबून पातीयाकतान ती पूरा मेन्न लागाकपोकोर एनी आय पोक्कूमेन।

36 एबे एड बेले तान आडी मेन्डान जुवान मालीन चेंगे एटे एर्रानो आय आटनी एराना एनी चोमजोड आरू काटलाक ओड़ाकोड आरू जरूरी बेले आय एरोड एटे बावोड आटे चाजूर। इना पापदेरोम काटाया; आरू आदीन चेंगे चुरचा एरूर। 37 एरोड एड एरको मेन्न तीग बेरकेच मेन्नी किली, काटलाक ओड़पोड, तानूंग आडी मेन्डान मालीन चुरचा एन्दाना एन्डान बिचार ती मेनोड, ओड बेले रेच्चा चाजूराड। 38 आटनी मेन्डानूग तानूंग आडी मेन्डान जुवान मालीन चुरचा एन्दूरानेड बेले रेच्चा चाजूराड, आरू चुरचा एराएड बेले आदीक रेच्चा चाजूराड।

39 आरो एरको आयाल, माईड जियोम मेन्नारे ओन बान्देन ती मेन्डा। एरोड माईड चाय्य चेनोड, आद एरूग मेन्न लागोड ओनोड चुरचा एरू नाम्बीकता। एरोड ओड बेले पोरबून पातीयाकतानेड मेन्डानो आय। 40 आन्न बिचार ती आद एटे मेन्डा आटनी मेनोड, आदीक वेड़के ती मेन्डूमीन। आरू मापोरबून जियोम आन्न कान बेले मेन्डाड एनी आन चोमजूमेन।