दोस पाडरान कामूल चाजूरानेरीन पुचूर
5
1 इम कान दोस पाडरान कामूलीन चाजूरानेर मेन्डार एनी वेनूंग एरमो।
आद बेले ओकूर मांजा आपला बुवेन आयालीन राकेड गे।
ईटो दोस पाडरान कामूलीन मापोरबून माना लोग बेले चाजारा।
2 एरोड,
ईम एके आदीन बीतेर ती बोड़पान एरमोर।
एरोड इमूंग मुर मुरा एरी किली,
आटो कामूल चाजूरानेरीन इम नाड़बूल तीग पुचरानो मेट्टो।
3 आन गो,
मेनीन इसाब ती कोमाड मेनोड बेले,
जियोमीन इसाब ती इम चेंगे नी मेन्डान।
आन इम चेंगे मेनेक चाजूरान आकाट ईटो कामूल चाजूरानेडीन,
डेन्ड चियरानो आय एनी उवाट पुच्चेन नान।
4 ईम,
आम्म पोरबू ईसून पिदीर तो ताकोत तीग उलजेक,
आन्न जियोमीन इसाब ती आन इम चेंगे मेन्डान आरू पोरबू ईसून ताकोत बेले आना मेन्डा।
5 आटो मांजेन पोरबून बिसवात चाजूरान मान्देन तीग पुच्ची किली चेयतानूग ओपीक चियूर आरू ओन मेन्न के लागेन तो इसाबूल नाचाक एरकोव।
तेबे ओन जियोम पोरबू ईसू मारी वेर्रान वादेक तो डेन्ड तीग बाचोको।
6 ईम बोड़पान एर्रानो रेच्चा एरा;
किन्डीक आकाट पुलतान पोर्र मोवूरान जाम्मा पोर्रीन पुलपीकता एनी पूनार काय एटे?
7 पुलतान पोर्रीन आकाट तो कियालतेरीन इम नाड़बूल तीग गुचाकपूर।
a तेबे ईम मोवूरान पुन्न पुलपा पोर्रीन आकाट कियाल चिलायोर एर्रार।
चेत्ते ईम आटनीतोर आय।
एटे एनोड मसीयाल मापोरबू आड़ञूरान तियार तो मेन्डा पापीन आकाट जेतरा एञ्ञेड नाड।
8 आदूगी वेरूर,
आम्मोर पुलतान पोर्रीन आकाट तो कियाल तो आरू एड़जाट तो बिचारूलीन गुचाकपार।
एरोड पुलपा पोर्र तो रोटील आकाट तो रेच्चाट आरू चेत्ते तो बिचारूलोड आम्मोर तियारीन मानार।
9 आन मुन्नीत आन्न चिट्टी ती,
इमूंग दोस पाडरान कामूलीन चाजूरानेरोड चेंग बिड़रानो एरा एनी लिकेन नान।
10 एरोड,
ई मोंजीपूर ती मापोरबून माना लोगीन कान तीग दोस पाडरानेरोड,
जिवड़ेय एर्रानेरोड,
लूटूरानेरोड,
चिलाड मुरीतूलीन मानूरानेरोड बिड़रानो एरा एनी मुरले पोक्केना;
आटे एनोड इमूंग ई मोंजीपूर तीग पेची किली चेनूंगी पाडरा।
11 एरोड,
एबे एड बेले तानीन तानी बिसवासी लोग मेन्नी किली बेले,
दोस पाडरानेड चिलाड जिवड़ेय एर्रानेड,
मुरीतूलीन मानूरानेड चिलाड लोगीन नेडीकतानेड,
मातवार,
चिलाड लूटूरानेड एरोड,
ओन चेंगे बिड़रानो एरा;
आरू आटो मांजेन चेंगे तिन्दानो बेले एरा एनी लिकूमेन।