मसीयालीन पाटेन पायतान बान्डारीकूल
4
1 लोग आमीन मसीयालीन सेवा चाजूरानेर आरू पाकीक मेन्डान मापोरबून पाटेलीन पारगोड पोक चियी किली पायतान बान्डारीकूल आय एनी मानेकेर।
2 आत्तीनी एरा बान्डारीकूल तामीन नीतीकतानेडूग बिसवात चाजू एर्रान बातेरतेड मेन्डानो आय।
3 आनूंग एरोड ईम चिलाड आरो एरको पोँच तो लोग आनीन नियाव चाजोड बेले किसीयाकपाना,
आरू कुदे आन आनीन नियाव चाजाना।
4 एटे एनोड आन्न बीतराम तो मेन्नीन गोवाई आनीन नाती पाटे ती केचूर लागाकपाया।
एरोड आदीन चेत्तूग आन केचूर चिलायेन आय एनी पोक्कू ओड़ान।
पोरबू ई आय आनीन नियाव चाजूरानेड।
5 आदूगी दिनेल पूराका मुन्नी नाती पाटेग नियाव चाजूरानो एरा।
पोरबू मारी वेर्रान आर्रे कापूर।
ओडी चीकोड ती पाकी मेन्डान कियाल तो कामूलीन विलीज ती एन्देर्राड आरू मेन्न तो बिचारूलीन पारगाकताड।
आतोड मापोरबू ओकूर ओकूरीन,
“ईन रेच्चा चाजोत” एनी पोकराड।
6 ए बिसवासी बायीयोवे आरू दादेरे!
ईम आम्म तीग मापोरबून कागेत ती लिकी मेन्डान ले आगेर बिचार चाजूरानो एरा आरू ओकूरीन चाबाची एरी,
ओकूरीन इनमान चाजूरानो एरा एन्डान पाटेन इमीन चोमजाक आन,
आन्न आरू आपूल्लोसीन पाटेलीन इम चेत्तूग डाग्गेन आकाट पोक्कूमेन।
7 एटे एनोड इनीन एड आवूर लोगीन ले बेड़तेड एरीकतेड?
आरू आवूर लोगीन तीग बेटायो इन्नेल नातो मेन्डा?
आरू ईन आवूर लोगीन तीग बेटोत एरोड मारी बेटानी एन्डान आकाट नांग बोड़पान एरमोत गो?
गुलाय मोंजीपूर मुन्देल, पोरबू नीतीकतानेर
8 इमूंग लागूरानो जाम्मा इमूंग मेन्डा एनी ईम बिचार चाजूमोर चिला?
ईम सावकार एञ्ञोर एनी चोमजूमोर काय एटे की?
आम चिलाका कोसकूल एञ्ञोर आदूग?
ईम कोसकूल एञ्ञोर एरोड,
आम कुबे वेड़का एर्रूममीन।
तेबे आम बेले इम चेंगे आंगरूरानेर एर्रूममीन।
9 एटे एनोड आन्न बिचार ती पोरबू नीतीकतान आमूंग मापोरबू,
चेरा चेरीत पाड चियी किली जाम्मा लोगीन मुन्देल चाय्यीकतान डेन्ड चियरान नियाव चीड़रान लोगीन आकाट एरीकतेड नाड।
एटे एनोड आम गुलाय मोंजीपूर,
सरग दूतकूल आरू मांजेग नाट टोटीकतानेर आकाटतोम एञ्ञोम नाम।
10 आम मसीयालीन चेत्तूग बाकवालेर आय;
एरोड ईम गो मसीयालीन चेंगे बिड़रानूग निक्के बुदीतोर आय गे नाना!
आम एके लाव चिलायोम आय,
एरोड ईम गो लावतोर आय गे नाना!
इमीन गो लोग इजीत मानूमेर गे नाना।
एरोड आमीन इजीत चुम्मूमेर।
11 आम एबेतार्रे मुरानी चेनमोम;
नीर आन्डरानोम मेनमोम आरू पाटाट गान्डेल नूड़ूमोम;
मुटकेल मार तिनमोम आरू ओलेकूल चिला लोगीन आकाट चुल चुल्ली मेनमोम;
12 आरू आम्म केय्य तीगी काम चाजी किली मोयमोत चाजूमोम।
लोग आमीन चेरापेक आम एके आसतीर चियमोम;
लोग आमीन सताकपेक आम एके बुकतूराम।
13 लोग आमीन बोदी चियेक,
आम एके चोग ती ऊबूराम।
आम एबेतार्रे नेन्दील तो तुर्रीत कूड़ेन आकाटतोम आरू मोंजीपूर तो लोगूग तुर्रीत गुन्डेन आकाटतोम एञ्ञोम नाम।
पापकूलीन चोमजाकतान आकाट चोमजाकतानो
14 आन इमीन लाज पाटतीक ई पाटेलीन लिकाना।
एरोड ईम आन्न लाडराल पापकूल आकाटतोर आय एनी इमीन चोमजाकमेन।
15 एटे एनोड मसीयालीन चेंगे बिड़रानूग,
इमीन चेलाकतानेर नेकीक ओड़ा कियालतेर मेनोड बेले,
इमूंग बुवेर कुबे चिल्लार;
एटे एनोड ईसू मसीयालीन चेंगे बिड़ी मेन्डानूग एडो पाटेन इमीन वेनपीकतान इसाब तीग,
आनी इम बुवेन आकाट एञ्ञेन।
16 आदूगी ईम आन चेल्लान आकाट तो चेलनूकूड़ूल ती चेलूर एनी,
आन इमीन आलवाल चियी पोक्कूमेन।
17 आदूगी आय आन आन्न लाडराल चिन्डीन आकाट तो तिमूतीयूसीन चोडूकमेन।
ऊड पोरबून चेंगे बिड़ी मेन्डानूग बिसवात चाजू एर्रान बातेरतेड आय।
ओड ईसू मसीयालीन चेंगे बिड़ी मेन्डानूग इमीन,
आन चेल्लान पावूल तो पाटेलीन चुरता चाजपीकताड।
आद आन जाम्मा पाडकूल ती पोरबून बिसवात चाजूरान मान्देत लोगीन जाम्मेनी मेरचीकतान पाटेल ती मीसूरा।
18 इम कान तीग ओदेर-ओदेर गो आन एपोर इम लेग्गाट वेराना बे एनी पोबाकमेर।
19 एरोड पोरबून उवाट एरोड,
आन इम लेग्गाट जेटके नी वेर्रान;
आतोड आमान आ पोबाकतानेरीन पाटेलीनी एरा,
एरोड ओर ताकोतीन बेले पुन्दान।
20 एटे एनोड मापोरबू जाम्मेनी आंगरूरानो आमान ऊबाल ती एरा एरोड मापोरबून ताकोत ती आय मेन्डा।
21 ईम आन इम लेग्गे जुटी पाती वेरकेन एनमोर काय चोग आरू दिरजेत मेन्न तीग वेरकेन एनमोर?