मापोरबून सेवा चाजूरानेर
3
1 ए बिसवासी बायीयोवे आरू दादेरे!
मापोरबून जियोम चेलाकतान लोगीनोड ऊबूरान आकाट आन इम्मोड ऊबू ओड़ेन।
एरोड मेन्न के लागेन तो इसाब ती चेल्लान लोगीनोड आरू मसीयालीन चेंगे बिड़ी मेन्डान ती पापकूल आकाट मेन्डानेरोड ऊबूरान आकाट ऊबेन।
2 एटे कीला पापकूलूग वेय तितीक एराया,
एरोड ओरीन पेल उनतीक लागूरा,
आटनी आन बेले इमीन मापोरबून गिड़ीयेत इसाबूल तो पाटेलीन मेरचीकपेना।
एटे एनोड ईम आदीन चोमजूरान बातेरतोर चिला मेन्डूर।
आरू एबे बेले चिल्लार।
3 एटे एनोड एबलेतार्रे बेले ईम मेन्न के लागेन तो इसाब ती चेलानोर आय।
इम कान कुचेर एर्रानोव आरू कावडी उयरानोव मेन्डाव;
आदूग ईम मोंजीपूर तो इसाब ती आरू मांजेन नियोम ती चेलानोर मेन्डार।
4 एटे एनोड इम कान तीग ओकूर,
“आन पोलूसीनेन आय”,
आरू मारी ओकूर एके “आन आपूल्लोसीनेन आय” एनमोर;
आदूगी ईम आमान मांजेन नियोम ती चेलानोर आय।
5 आपूल्लोस नातेड आय आदूग?
आरू पोलूस नातेड आय आदूग?
आम सेवा चाजूरानेरी गो आय;
आम्म तीग ईम जाम्मा मापोरबून पाटेन बिसवात चाजोर।
पोरबू एटे आमीन नीतीकतेड आटनी आम आम्म कामीन चाजोम।
6 ईम कामेयूलीन आकाटतोर आय।
आरू आम कामाकतानेर आकाट मेन्नी मापोरबून पाटेलीन इमूंग पोक चिञ्ञोम।
आन वित्तील वीतेन;
आपूल्लोस नीर चिञ्ञेड;
एरोड मापोरबू ई गो आय चान्दीकतेड।
7 आदूगी वित्तील वीतूरानेड बेले नातेडी एरा आरू नीर चियरानेड बेले नातेडी एरा;
एरोड मापोरबू चान्दीकतानूग ओडी जाम्मेगी जाम्मा बानी आय।
8 जागाकतानेड आरू नीर चियरानेड इरूलूग ओकती उवाट मेन्डा;
आरू ओकूर-ओकूर आपला-आपला कामीन इसाब ती आपला बूती बेटूराड।
9 एटे एनोड आम मापोरबून चेंग चियरान कामीयालेर आय;
ईम मापोरबून कामेय आरू मापोरबून ओलेकीन आकाटतोर आय।
10 मापोरबू आनूंग तान्न माया पेम तीग चिञ्ञेड नाड आ इनामीन चेत्तूग,
आन रेच्चाट मिसतीरीन आकाट ओलेक तो पाया ताप्पेन।
आरू आवूरतेड आना रेदा इड्डूमेड।
एरोड आना ओकूर-ओकूर एटे-एटे रेदा इडराड आले,
आदीन लेक ती मेन्नी इडरानो आय।
11 एटे एनोड,
तापरानो मेन्डा आ पायेन चायी,
एडी आवूर तो पाया कोट्टू ओड़ार आरू आ पायेन आकाटतेड ईसू मसीयाल आय।
12 आरू एबे एड बेले ई पाये ती सोन चिलाड चान्दी चिलाड निक्के मोल्लेत केल्ल चिलाड पारेल चिलाड लाटा चिलाड पीर तो रेदा ताप्पोड गो,
13 ओन कामूल एट्टोव आय एनी चेर चेरा देका पाडराव।
एटे एनोड नियाव चिरीक मापोरबू आदीन विलीज ती पारगाकताड।
आदीन किच तीग पोरकूराड आरू आ किच ओकूर ओकूरीन कामूल एट्टोव आय एनी पोरकूरा।
14 एर काम आदीन तीग बेरकेच मेन्डा,
ओड इनाम बेटूराड।
15 आरू एर काम बेले केरोड,
ओनूग नोकसान एर्रा;
एरोड ओड कुदे केरी-केरी बाचूराड।
16 एटे,
ईम मापोरबून गुडील आय,
आरू मापोरबून जियोम इम कान डेरा चाजूमेड एनी ईम पुट्टोर काय एटे?
17 एड बेले मापोरबून गुडीन नाचाकपोड मापोरबू ओनीन नाचाकताड।
मापोरबून गुडीन मापोरबूग आची मेन्डानो आय आरू ईमी आय आ गुडील।
18 एडी आपलेनी दोदूमोर।
इम कान तीग एड बेले आपलेनी ई जुग तो लोगीन नेंजेर ती निक्के गियानतेड एनी चोमजोड ओड बाकवाल एरकेड।
तेबे ओड गियानतेड एर्राड।
19 एटे एनोड ई मोंजीपूर तो गियान मापोरबून मुन्देल बाकवाटीन आकाट तो आय।
“ओड गियानीकूलीन ओर चेतूर एर्रान कान चिरकीकताड”a एनी लिका मेन्डा।
20 आरू मारी “पोरबू,
गियानीकूलीन बिचारूल पोकातोव आय एनी पुट्टेड।”b
21 आदूगी मांजेन बीतेर ती एडी बोड़पान एरा मेनकेड।
एटे एनोड जाम्मा बानील इम्मोवी गो आय:
22 पोलूस चिलाड आपूल्लोस चिलाड केपा (पतरस) चिलाड मोंजीपूर चिलाड जियोम चिलाड चाय्यकूड चिलाड एबेत बेरा चिलाड वेर्रान वादेक चिलाड नातो एरको,
आव जाम्मा बानील इम्मोवी आय।
23 आरू ईम मसीयालीनोर आय,
आरू मसीयाल मापोरबूनेड आय।