1कुरी 2

कुरूस ती कोटीक एर्रान मसीयालीन बीतेर ती वेनपीकतानो

1 आरू ए बिसवासी बायीयोवे आरू दादेरे! पाकीक मेन्डू जे? आ मापोरबून पाटेलीन वेनपीक आन इम लेग्गाट वेरेक, बेड़कूल चिलाड निक्के गियान तो पाटेल तीग वेनपीकपेना। 2 एटे एनोड आन इम नाड़बूल मेनेक ईसू आरू ओड कुरूस ती कोटीक एर्रानोन चायी आवूर नाती पाटेन मुरले ऊबाना एनी बिचार चाजी मेन्डीन। 3 आन कोमजोरी तीग, नार्र तीग, आरू निक्के तिरी उयरान तीग इम चेंगे मेट्टेन। 4-5 इम बिसवात मांजेन गियानीन पोडे एरा, एरोड मापोरबून ताकोतीन पोडे मान्डोको एनी आन्न पाटेल ती, आरू आन मेरचीकतान कान गियान तो आरू लालेच एरीकतान पोद्दूल चिला मेन्डूव। एरोड मापोरबू आपला जियोमीन ताकोतीन टोटीकतेड।

मापोरबून जियोमीन गियान

6 एरोड बेले बिसवात ती बेरकेच मेन्डान लोगीन, आम गियान तो पाटेन वेनपीकमोम। एरोड आ गियान तो पाटा ई जुग तो लोगीन गियानीन आकाट तो चिलाड नाच चेन्डान, ई जुग तो लोगीन आंगरूरानेरीन गियानीन आकाट तो बेले एरा; 7 एरोड आम मापोरबून एडी पूना गियान तो इसाबीन पोक चियमोम। आद मुन्नी पाकीक मेन्डानो मेन्डू। आरू आदीन मापोरबू मुन्नीत जुग तो वादेक ले आमूंग मसीयालीन इजीत तो मान ती बाटा एरको एनी नीतीकतेड नाड। 8 आदीन ई जुग तो लोगीन आंगरूरानेर एडी चोमजेरा। ओर चोमजी मेनोड इजीत तो मान तो पोरबून कुरूस ती कोटेरामीन। 9 एरोड बेले,

“मापोरबू तानीन चोग चाजूरानेरूग तायार चाजी मेन्डानोन

आरोई बोम्मेल बेले चूड़ोवा,

आरोई केकोचील बेले वेनोवा,

आरू आव आरोई मांजेन मेन्न ती बेले पाडोवा”

एनी लिका मेन्डा। 10 एरोड मापोरबू आवीन तान्न जियोमीन तीग आमूंग पारगाकतेड नाड।

मापोरबून जियोम जाम्मा पाटेलीन, आरू मापोरबून मेन्न तो गिड़ीये ती मेन्डान पाटेलीन बेले कानची उयराड। 11 मांजेन कान तीग एडी बेले मांजेन बिचारूलीन पूनार। एरोड ओन कान मेन्डान ओन जियोम पुट्टेड। आटनी मापोरबून बिचारूलीन बेले एडी पूनार। एरोड ओन जियोम पुट्टेड। 12 मापोरबू आमूंग इनाम चियी मेन्डान पाटेलीन पुनूंग, आम मोंजीपूर तो जियोमीन एरा, एरोड मापोरबून कान तीग वेर्रान जियोमीन बेटोम नाम। 13 आयची पाटेलीन आम मांजेन गियान तीग मेरचीकतान पोद्दूलोड एरा, एरोड मापोरबून जियोम मेरचीकतान पोद्दूलोड बोकतीत चेत्त पाटेलीन बोकतीत लोगीन चोमजाकमोम। 14 एरोड मापोरबून जियोम चिला मांजा मापोरबून जियोमीन कान तो पाटेलीन पातीयाकपाडा। एटे एनोड आव ओन नेंजेरूग बाकवाट पाटेल आय, आरू आवीन मापोरबून जियोम तीग चोमजू लागूरानूग ओड आवीन चोमजू ओड़ाड। 15 मापोरबून जियोम मेन्डानेड, जाम्मा बानीन आन्ताज चाजूराड; एरोड ओनीन एडी आन्ताज चाजू ओड़ार।

16 “एटे एनोड पोरबून मेरचीक एनी

ओन मेन्नीन पुन्दानेड एडी चिल्लार।”

एरोड आम्म कान मसीयालीन मेन्न मेन्डा।