रोमी 15

बिसवात ती कोमजोरी मेन्डानेरीन सामालतानो

1 आमीन आमी वेड़का एरीकतानोन चाय काड्डी, बिसवात्ती बेरकेच मेन्डान आमूंग बिसवात्ती कोमजोर मेन्डानेरीन सामालतानो आय। 2 आम्म कान तीग ओकूर-ओकूर आवूरतेडीन मापोरबून बिसवात ती चान्दीक, ओनूग नातो रेच्चा आय आदीन आम्मोर चाजी किली ओनीन वेड़का एरीकपार। 3 एटे एनोड तानीन तानी वेड़का एरीकपेडा। एरोड “इनीन बोदी चियरानेरीन बोदी आन्न पोडे वेञ्ञो” एनी लिका मेन्डान आकाट ओनूग एञ्ञो। 4 आम्मोर सामालची किली मापोरबून कागेत तीग उचांग बेटू आचा चाजी मेनार एनी एंगोटा पाटेल मुन्नीत ले लिकूरानोव मेन्डाव। आव आमूंग मेरीयू आय लिकूरानोव मेन्डाव। 5 सामालतान ताकोत आरू उचांग चियरान मापोरबू, ईम ईसू मसीयाल पाटेल ती चेल्लानूग ओकूर ओकूरीनोड मिलेन ती मेन्डानोन इनाम चियकेड। 6 तेबे ईम जाम्मा बिड़ी किली ओकती चोर ती आम्म पोरबू ईसू मसीयाल बुवा मापोरबून चाराकपोकोर। 7 आदूगी एटे मसीयाल इमीन तान्न चेंगे बिड़ाकतेड, आटनी ईम बेले मापोरबूग इजीत तो मान एरको एनी ओकूरीन ओकूर इम चेंगे बीड़ाकपूर। 8 एऊदी लोगीन बुवेर दादीलेरूग मापोरबू चिड़ाक मेन्डान जुमानीन पूरा चाजू, मसीयाल जियोम पाड तो तीप तोलीन कुड्डीकतान एऊदीकूल कामीयाल एरी किली मापोरबू चेत्तेतेड आय एनी टोटीकतेड। 9 आरू एऊदीकूल चिला देचेल-देचेल तो लोग बेले मापोरबू तामूंग जियोम नोयपीकतानूग ओनीन चाराकपेकेर एनी मसीयाल वेञ्ञेड एनी आन पोक्कूमेन।

“आदूगी आय आन एऊदीकूल चिलायेरीन कान इनीन जुवारतान,

आरू इन पिदीर ती पाटेल पाडरान”

एनी मापोरबून कागेत ती लिकी मेन्डान आकाट एञ्ञो। 10 आरू मारी,

“ए एऊदीकूल चिला लोगीने!

मापोरबून लोगीन चेंगे वेड़का एरूर”

एनी पोकरानो मेन्डा। 11 आरू मारी बेले,

“ए एऊदीकूल चिला लोगीने! ईम जाम्मा पोरबून जुवार चाजूर,

आरू जाम्मा जाती जातीत लोग ओनीन पिदीर एरीकपेकेर”

एनी मेन्डा। 12 आरू मारी एसाया मेनगा बेले,

“इसेन कुटूम तीग ओक मुर मांजा पेताड,

आरू ओड देचेल-देचेल तो लोगीन आंगरू चुलताड,

ओन कान जाती जातीत तो लोग आचा इडरार”

एनी पोक्कूमेड। 13 आदूगी ईम आचा चाजूरानो नाती केचूर चिला जियोमीन ताकोत तीग चान्दारे चेनको एनी इम मेन्न ती आचा चियरान मापोरबू, ओनीन बिसवात चाजूरानूग टोन्डूरान जाम्मा वेड़का आरू चुक तीग इमीन कोप्पीकपेकेड।

पोलूस आपला कामीन बीतेर ती लिकूरानो

14 ए बिसवासी बायीयोवे आरू दादेरे! ईम निरबे रेच्चालेर मेन्नी किली पोरबून पूरा गियान तीग कोप्पी मेन्डानूग, ओकूरीन ओकूर केडीक नाम्बीकतार एनी आन कुदे चेत्तेगी पुट्टेन। 15 एरोडी बेले आन ईसू मसीयालीन काबेरतेन एरू आनूंग मापोरबून माया पेमीन कान तीग टोन्डूरान इनामीन चेत्तूग, आरो-आरो पाटेलीन इमीन चुरता चाजपीक डाडू चाजी लिकेन नान। 16 तेबे गो आन ईसू मसीयालूग सेवा चाजूरानेन मेन्नी, एऊदीकूल चिलायेरूग मापोरबून एडो पाटेन वेनपीकतान कामीन पेलाचीन आकाट चाजी किली, आदीन तीग एऊदीकूल चिलायेरीन मापोरबूग मेन्न ती वेर्रान आरू नाती केचूर चिला जियोमीन तीग मापोरबूग एलगाक मेन्डान बोदनेन आकाट चोत्तीकतान। 17 आदूगी ईसू मसीयाल आनीन काम चाजपीकतानूग आन मापोरबूग चाजूरान कामूल तो इसाब ती बोड़पान एरू नाम्बीकतान। 18 एटे एनोड मसीयाल आपला पोद्द आरू पोरलेत कामूलोड आनीन काम चाजपीक किली एऊदीकूल चिलायेरीन तानीन पातीयाक इट्टेड। आ पाटेलीन चायी आन आवूर पाटेन इसाब ती पोक्कू कानपाना। 19 आरू चिनेल आरू पोरलेत काम तो चिनेल आरू आचरूत एरीकतान कामूलीन ताकोत तीग चाजेड आरू मापोरबून नाती केचूर चिला जियोमीन ताकोत तीग आदीन चाजेड। तेबे आन एरूसेलेम तीग पात्ती किली बोँरेक इल्लूरीकूम एन्डान पेरगेन आर्रे मसीयालीन एडो पाटेन वेनपीक किली ओनूग चाजूरान सेवेन पूराकतेन। 20 आरू आटनी आन आरे-आरे मसीयाल पिदीरीन लोग वेनारी, आना-आना एडो पाटेन वेनपीकतान, एरोड आवूरतेर वेनपीक मेन्डान कान चेनाना एनी मेन्न चाजेन नान।

21 “एरूग ओन एडो पाटा एदायी, ओर ओनीन चूड़रार

आरू एड मुरले वेनारी ओर ओनीन चोमजूरार”

एनी मापोरबून कागेत ती लिकी मेन्डान आकाट एञ्ञो।

रोमी देचे ती चेनूंग पोलूस बिचार चाजूरानो

22 आन एडो पाटेन वेना लोगूग वेनपीक इट आट चुल्लान चेत्तूगी इम लेग्गाट वेरू गेन-गेन आटकाक एर्रीन। 23 एरोड एपोर ई देचेल ती आन्न कामूलूग पाड चिल्ला आरू कुबे बेरेकूल ले आन इम लेग्गाट वेरू जियोम उकराकमेन। 24 आदूग आन इसपानीया देचे ती चेनेक इम पावोडी चेन्डान एनी आचा चाजूमेन। तेबे आन इम चेंगे बेट गाट एरी आन्न जियोम किन्डीक मान्डोड ईम आनूंग पाव ताकू लागूरान बानीलीन चियतूर एनमेन। 25 एरोड एबे आन मापोरबूग एलगाक मेन्डान लोगूग देरोम तो पोयसेलीन चियू एरूसेलेम गेड़े ती चेन्डान गाट। 26 एटे एनोड मकीदूनीया आरू आकाया देचेल तो बिसवासी लोग, एरूसेलेम तो मापोरबूग एलगाक मेन्डान लोगीन कान तो चाकोल लोगूग किन्डीक देरोमूग पोयसेल चियू मेन्न चाजेर नार। 27 आटनी चाजूरानो ओरूग रेच्चा बावोतो आरू ओर लागेलतेर बेले गो आय। एटे एनोड एऊदीकूल चिलायेर एऊदीकूलीन बोकतीत आसतीरूल तो पाट लागेतेर एर्रानूग, ओर बिसवासी एऊदीकूलूग आपला देन माल तीग चेंग चियू लागूरा। 28 आदूगी आन ई कामीन पूरा चाजी किली ओरूग ई रुन्डाक मेन्डान देरोम तो पोयसेलीन ओपीक किली इम पावोड इसपानीया देचे ती चेन्डान। 29 आरू आन इम लेग्गाट वेरेक, मसीयालीन आसतीरीन आम जाम्मा ई पूरा बेटूराम एनी आन पुट्टेन।

30 आरू ए बिसवासी बायीयोवे आरू दादेरे! आम्म पोरबू ईसू मसीयाल तीग नाती केचूर चिला जियोमीन चोगीन चुरता चाजपीक किली, आनूंग ईम आन्न चेंगे बिड़ी मापोरबून रेच्चा बिन्ती जोड़ जोड़ी मेनूर एनी आन इमीन गुवारूकमेन। 31 आन एऊदी देचेत बिसवात चाजा लोगीन तीग बाची मेनकेन आरू आन मापोरबूग एलगाक मेन्डान एरूसेलेम तो लोगूग उयरान देरोमूग चियरान पोयसेलीन ओर मेन्न चाजेकेर एनी बिन्ती जोड़ूर। 32 तेबे आन मापोरबून उवाट तीग इम लेग्गाट वेड़के तीग वेरी किली इम चेंगे उचांग एरकेन। 33 चुक तो मुर तो मापोरबू इम जाम्मेन चेंगे मेनकेड। आटनी एरको (आमीन)।