रोमी 16

पोलूस कुबे लोगीन पिदीर पात्ती जुवारतानो

1 आम्म बिसवासी बायी आरू किंकीरीयेत पोरबून बिसवात चाजूरान मान्देत लोगूग काम चाजूरान पीबेन बीतेर ती आन लिकूमेन। 2 आद पोरबूनो आय। आदूग ईम मापोरबूग एलगाक मेन्डान लोगीन मानूरान आकाट, आदीन मानूर। ईम आदूग नातो-नातो लागूरा आदीन चियूर। एटे एनोड आद कुबे लोगीन बेले आरू आनूंग बेले चेंग चिञ्ञो ना।

3 आन्न चेंगे ईसू मसीयालीन काम चाजूरान पिरीसका आरू अक्कीलेग बेले आन जुवार पोक्कूमेन। 4 ओर आन्न जियोमीन बाचाक ताम्म जियोमीन आबोड़ ती पाडीक मेन्डीर; आमान आनी एरा, एरोड एऊदीकूल चिला लोगीन कान तीग पोरबून बिसवात चाजूरान जाम्मा मान्देलतेर बेले ओरीन जुवार पोक्कूमेर। 5 आरू ओर ओलेक ती उलजूरान पोरबून बिसवात चाजूरान मान्देन बेले जुवार पोक्कूमेन। आसीये देचे ती पोईल-पोईल पातीयाकतान आन्न लाडराल इपेनीतूसीन बेले जुवार पोक्कूमेन। 6 इमूंग निक्के मोयमोत चाजी मेन्डान मरीयमूग बेले जुवार। 7 आन्न कुटूम तो आन्दरूनीकूस आरू युनीयासूग जुवार। ओर आन्न चेंगे जेल ती मेन्डीर। आरू पोरबू नीतीकतानेर ओर रेच्चालेर एनी पुट्टेर आरू ओर आन्न ले मुन्नी मसीयालीन बिसवात चाजूरानेर आय। 8 पोरबून चेंगे बिड़ी मेन्डानूग आन्न लाडराल आम्पलीयातूसूग जुवार। 9 मसीयालीन चेंगे बिड़ी मेन्डानूग आन्न चेंगे काम चाजूरान उरबानूसूग, आरू आन्न लाडराल इसतकूसूग जुवार। 10 आबोड़ एरोड बेले मसीयालीन पातीयाकतान कान बेरकेच मेन्डान आपील्लेसूग जुवार। आरीसतूबूलूसीन ओलेक लोगूग बेले जुवार। 11 आन्न कुटूम तो एरोदीयोनूग जुवार। पोरबून चेंगे बिड़ी मेन्डान नरकीयूसीन ओलेक लोगूग जुवार। 12 पोरबून चेंगे बिड़ी मेन्डानूग मोयमोत चाजूरान तुरपेनेग आरू तुरपोसेग जुवार। पोरबून चेंगे बिड़ी मेन्डानूग निक्के मोयमोत चाजूरान लाडराल पिरीसीसूग जुवार। 13 मुकीयाट कामीयाल एनी पोरबू आची मेन्डान रुपूसूग आरू ओन ईय्या आरू आनूंग बेले ईय्या आकाट तो मेन्डान, इरूलूगी जुवार। 14 आसूनकीरीतूस आरू पिलगोन आरू ईरमेस आरू पतरूबासूग आरू ईरमांस आरू ओर चेंगेत बिसवासी लोगूग जुवार। 15 पिलूलूगूस आरू युलीया आरू नेरयूस आरू ओन चालाल, उलूम्पास आरू ओर चेंगे मेन्डान मापोरबूग एलगाक मेन्डान लोगूग जुवार। 16 ओकूरीन ओकूर मसीयालीन पेम तीग चोन्ड मोट्टी किली जुवार चाजूर। पोरबू मसीयालीन बिसवात चाजूरान जाम्मा मान्देलतेर टिटाक तीग इमीन जुवार।

चेरा चेरीत केडीकतान इसाबूल

17 एपोर ए बिसवासी बायीयोव आरू दादेरे! इमीन मेरचीक मेन्डान चेत्त पाटेल तीग इमीन आवूर तो पाटेल मेरचीक किली मारकाडा एर्रान आरू इमीन पुटा-पुटा चाजूरान लोगीन ले लेक ती मेनूर आरू ओर ले गूची मेनूर एनी आन इमीन गुवारूकमेन। 18 एटे एनोड आटो लोग आम्म पोरबू मसीयालीन कामीन चाजारा, एरोड ताम्म पोटेग काम चाजूरार; आरू चोड़ीयाकतान आरू वेनूंग रेच्चा बावूरान पाटेल तीग सोजालेरीन मेन्नीन बुलकाकतार। 19 ईम मापोरबू पोकरान पाटेन मानूरानो जाम्मा लोगूग पाता चेलोतो ना, आदूगी आन इम इसाब ती वेड़का एर्रान। एरोड ईम रेच्चाटूग बुदीतोर एरूर आरू कियाल इसाबूलीन एके मुरले चाजूमोर एनमेन। 20 चुक तो मुर तो मापोरबू जेटके नी चेयतानीन इम केलूल ती रेमदाक चियराड। आम्म पोरबू ईसू मसीयालीन माया पेम इम चेंगे मेनको।

21 आन्न चेंगे काम चाजूरान तिमूतीयूसीन टिटाक तीग इमूंग जुवार, आरू आन्न कुटूम तो लुकीयूस आरू यासोन आरू सोसीपातरूसीन टिटाक तीग बेले इमूंग जुवार।

22 पोलूस पोक्केक ई चिट्टीन लिकूरान आन, तिरतीयूसीन टिटाक तीग बेले, पोरबून चेंगे बिड़ी मेन्डानूग इमूंग जुवार।

23 आनूंग आरू पोरबून बिसवात चाजूरान मान्देत लोगूग पाड चियरान गयूसीन टिटाक तीग इमूंग जुवार। गेड़ेत कजानसी इरासतूस, आरू बिसवासी तोल्लेड कोवारतूसीन टिटाक तीग बेले इमूंग जुवार। 24 

मापोरबून जुवारतानो

25 एपोर, आन मेरचीकतान एडो पाटे ती मेन्डान आकाट इमीन बेरकेच चाजू नाम्बीकतान मापोरबूग जुवार एरको। आ पाटा ईसू मसीयालीन बीतेर तो पाटा आय। आद कुबे कोम्बेर ले पाकीक मेन्डू। 26 एरोड एबे एके जुग-जुग तो मापोरबू तियारतानूग, देचेल-देचेल तो लोग बिसवात तीग मानेकेर एनी मापोरबून कान तीग काबेर वेन्नी किली लोगीन पोक चियरान गुरूकूल कागेतूल तीग पारगाक एञ्ञो आरू वेनपीक एञ्ञो। 27 आदूगी ओकूरी बुद्दीतेड मेन्डान मापोरबूग, ईसू मसीयाल तीग जुग जुगूग इजीत तो मान एरको। आटनी एरको।