रोमी 14

आपला बिसवासी तोल्लेडीन निन्दरूमोर

1 बिसवात ती कोमजोर मेन्डानेरीन इम चेंग ती पातूर। एरोड ओर बिसवात चाजूरान इसाबूल बीतेर ती पोक्का पोक्की एरमोर। 2 एटे एनोड ओकूरूग जाम्मा बानीन तिन्दानो रेच्चा आय एनी बिसवात मेन्डा। एरोड बिसवात ती कोमजोर मेन्डानेड एके आमान कुच्चा पोर्रेनी तिन्दाड। 3 आरू जाम्मा बानीन तिन्दानेड नाती तिनायेडीन निन्दरूमोर। आरू नाती नी तिनायेड एके जाम्मा बानीन तिन्दानेडीन बोदी चियमोर; एटे एनोड मापोरबू ओरीन पातीयाकतेड नाड। 4 आरू ओर मापोरबून कामीयालेर आय। ईन एड आय आदूग आवूरतेडीन कामीयालीन बोदी चियमोत? ओड बेरकेच मेनोड चिलाड उरकोड बेले ओन सावकारी ओनीन पोकराड आरू बेरकेच चाजूराड। आटनी पोरबू तान्न कामीयालीन बेरकेच चाजू नाम्बीकताड।

5 ओकूर एके ओक दिनेन आवूर तोन ले आगेर मुकीयाट एनी मानूराड, आरू मारी ओकूर एके जाम्मा दिनेलीन ओकती सामान मानूराड। एड एरको तान चाजूरानोन मापोरबूग मेन्न ती वेर्रान आकाट चाजूमेन एनी मेन्न ती पात्ती मेन्डानो आय। 6 एड आरो दिनेन मुकीयाट मानूराड, पोरबून पिदीर एरको एनी मानूराड। तिन्दानेड एके मापोरबून जुवार पोक्की किली पोरबून पिदीर एरको एनी तिन्दाड। आरू नातीन-नातीन तिनायेड बेले मापोरबून जुवार पोक्की किली पोरबून पिदीर एरको एनी तिनाडा। 7 एटे एनोड आम्म कान तीग एडी आपलेग पीयारा, आरू एडी आपलेग चाय्याडा। 8 आम जियोम मेन्डाम एरोड, पोरबून पिदीर एरको एनी जियोम मेन्डाम; आरू चाय्योड पोरबून पिदीर एरको एनी आय चाय्यराम; आदूगी आम पीयोड बेले आरू चाय्योड बेले आम पोरबूनोम आय। 9 एटे एनोड जियोम मेन्डानेरूग बेले आरू चाय्यरानेरूग बेले पोरबू एरू ई आय चाञ्ञेड आरू मारी जियोम पाट्टेड गो।

10 मारी नांग ईन आपला बिसवासी लोगीन बोदी चियमोत? चिलाड गिन-गिनाल चोमजूमोत? आम जाम्मा ई मापोरबून नियाव तो गाद्दीत मुन्देल निलताम। 11 एटे एनोड,

“‘जाम्मा लोग आन्न मुन्देल माटीकूटेल चियरार,

आरू जाम्मा नेवान्डूल मापोरबून मानूराव

एनी आन आन्न जियोमोड किरीया तिनमेन’

एनी पोरबू पोक्कूमेड”

एनी मापोरबून कागेत ती लिका मेन्डा। 12 आदूगी आम्म कान तीग जाम्मा ई लोगूग आपला-आपला लेका मापोरबूग चियू लागूरा।

बिसवासी तोल्लेडूग बिसवात ती चान्दू आड्डोम एरमोर।

13 आदूगी एपोर आम्मोर ओकूरीन ओकूर बोदी चियमोर। आरू एडी आपला बिसवासी लोगीन आपला बिसवात ती चेल्लान तीग उट तिरीकतान आड्डोम चिलाड देवनेन आकाट एर्रान इसाबूलीन चाजूमोर। 14 पोरबू ईसू आनीन पारगाक मेन्डान चेत्तूगी आय, नातो एरको तिन्दान बानी तानूंग तानी चूत पाडरानो एरा, एरोड एड आदीन चूत पाट्टो एन्डाड, ओनूग आद चूत पाडरानो आय एन्डान ई चेत्तीन आन चेत्ते पुट्टेन। 15 ईन नातोन तिन्दात आदीन चेत्तूग इन बिसवासी तोल्लेडीन ईन मुर मुरा एरीकमोत एरोड, ईन चोग ती चेलाता। आरू आरो बिसवासी तोल्लेडूग मसीयाल चाञ्ञेड नाड आ बिसवासी तोल्लेडीन बिसवातीन ईन नातीन-नातीन तिन्दान तीग नाचाकमेन। 16 ईन रेच्चाट आय एनी चोमजी किली चाजूरानो आवूर लोग कियाल तो आय एनी बोदी चियरान आकाट एरोड आदीन चाजूमेन। 17 एटे एनोड मापोरबू आंगरूरान इसाब तिन्दान उन्डानोतीनो एरा। एरोड आद मापोरबून मुन्देल देरमी एर्रानो आरू मिलेन ती मेन्डानो, आरू नाती केचूर चिला जियोमीन तीग वेड़का एर्रानो आय। 18 एड एरको ईटे तीग मसीयालीन सेवा चाजूराड, ओड मापोरबूग मेन्न ती वेर्रानेड आय आरू मांजा ओन पिदीर पातरार। 19 आदूगी आम्मोर मिलेन ती मेन्डान ती आरू ओकूर ओकूरीन बिसवात ती चान्दीकतान पाटेलीन चाज चाजी मेनार।

20 तिन्दान बानीलीन चेत्तूग मापोरबून कामूलीन नाचाकमेन। जाम्मा बानील तिनूंग बान्दाव। एरोड एड तान तिन्दान बानीन चेत्तूग आवूरतेडीन बिसवात ती चेल्लान तीग उट तिरीकताड आद एरूग एरको कियाल तो आय। 21 चेप्पूल तिन्दानो चिलाड निसा उन्डानो आरू आवूर नातो एरको आवूर बिसवासी लोगीन बिसवात ती चेल्लान तीग उट तिरीकमोव एरोड आवीन चाजाकोड रेच्चा आय। 22 ईन तिन्दानोन चिलाड उन्डानोन आरू आवूर नातीन एरको रेच्चा आय एनी बिसवात चाजूमोत एरोड आवीन मापोरबून मुन्देल आपला मेन्न ती नी इड्डी मेन। नातीन एरको रेच्चाट आय एनी मानूरान इसाब ती तानीन तानी केचूरतेड एरीकपायेड आसतीरीन बेटूराड। 23 एरोड दुय मेन्न एरी किली तिन्दानेड डेन्ड बेटूरान बातेरतेड एरीक एञ्ञेड नाड। एटे एनोड ओड तान बिसवात चाजूरान आकाट चाजाडा; आरू बिसवात तीग चाजायो नातो एरको पापदेरोम आय।