रोमी 13

देचेन चेलाकतानेरीन पाटा पातरानो

1 जाम्मा लोग देचेन चेलाकतान आदीकारीकूल पाटेलीन पातरानो आय। एटे एनोड मापोरबू नीतीकपायेड आरोई आदीकारी चिलाड। आरू आंगरूरान आदीकारीकूलीन मापोरबू ई नीतीकतेड नाड। 2 आदूगी आदीकारीकूलीन विरूद चाजूरानेड एड एरको, ओड मापोरबू नीतीक मेन्डानोन विरूद चाजूराड आरू विरूद चाजूरानेड डेन्ड बेटूराड। 3 एटे एनोड रेच्चाट कामूल चाजूरानेर आंगरूरानेरूग नारचू लागाया, एरोड कियाल तो कामूल चाजूरानेरी ओरूग नारचू लागूरा। एबे ईन पान्न ती मेन्डानेडूग नारचाका मेन्डान एनमोत एरोड, रेच्चाट कामूलीन चाज, तेबे ओड इन पिदीरीन पातराड। 4 एटे एनोड ओड इनूंग रेच्चा एरको एनी काम चाजूरान मापोरबून कामीयाल आय। एरोड ईन कियाल तो कामूलीन चाजूमोत एरोड नारचू। एटे एनोड ओड कान्डेन पोका पाताडी; आरू ओड कियाल तो कामूल चाजूरानेरीन डेन्ड चियू मापोरबून कामीयाल आय। 5 आदूगी आमान मापोरबू डान्डूरान नार्रूगी एरा, एरोड बीतराम तो मेन्नीन गोवाईन चेत्तूग बेले आदीकारीकूलीन मानूरानो आय। 6 आदूगी ईम पोटी बेले चियूर; एटे एनोड देचेन आंगरूरानेर मापोरबून कामीयालेर मेन्नी किली पोटी पातरान कामूलीन चाजूमेर। 7 आदूगी जाम्मेन बाटेन चियारे चेनूर; एरूग पोटी चियू लागूरा ओरूग पोटी चियूर; एरूग माचूल चियू लागूरा ओरूग माचूल चियूर; एरूग नारचू लागूरा ओनूग नारचूर; आरू एरीन इजीत चाजूरानो आय ओनीन इजीत चाजूर।

पेम चाजी किली नियोमीन पूरा चाजूरानो

8 ओकूर ओकूरीन चोग चाजूरानोन चायी नातेली एर लागेतोरी एरमोर; एटे एनोड एड आवूरीनोड पेम चाजूराड ओडी नियोमीन पूरा चाजेड नाड। 9 एटे एनोड “दोस पाडरान कामूलीन चाजूरानो एरा, आनकीकतानो एरा, डोंगरानो एरा, जिवड़ेय एर्रानो एरा” एन्डान ईवीन चायी आरो बेले आवूर मापोरबून तियारनी पाटेल “ईम आपलेनी चोग चाजूरान आकाट इम लेग्गाट तो लोगीनोड चोग चाजूर” एन्डान ई ओकती पाटे ती पूरूमोव। 10 एड एरको पेम चाजोड आपला लेग्गाट तो लोगूग कियाल एरको एनाडा। आदूगी लेग्गाट तो लोगीन चोग चाजूरानेडी मूसाल नियोमीन पूरा चाजूराड।

11 बेरा एदू-एदू एञ्ञो ना एनी चोमजी किली ओकूर ओकूरीन पेम चाज चाजी मेनूर। आम पोईल-पोईल मसीयालीन बिसवात चाजोम जे? आदूग ले बेले आगेर लेग्गे बाचाकतान इसाब पूर्रान बेरा एदेरनो ना। आदूगी इमूंग गुरगोन तीग चुलची किली लेक ती मेन्डानो आय। 12 चित्ता पोली वेरेक एटे जेटके-जेटके विलीज आटरा, आटनी ईसू मसीयाल बेले जेटके नी वेर्राड बे। आदूगी आम्मोर चीकोड आकाट तो पापीयाट कामूलीन चाय काड्डी किली विलीज आकाट तो मापोरबून पाटेलीन आतीयारूल आकाट पातार। 13 आम्मोर पोका वेवोड एट्टो चेलनूकूड़ूल ती चेल्लानो आय आटनी चेलार। निसे तीग चोरनूरानो, मातवारकूल चेंगे बिड़ी जाल-जाल एर्रानो, दोस पाडरान कामूल चाजूरानो, आरू लालेच तो बिचारूल चाजूरानो, कावडी उयरानो आरू कुचेर एर्रानो एन्डान इसाबूल तीग गूच काडार। 14 आरू मेन्न के लागेन तो लालेचूलीन पूरा चाजूरानेल बिड़ी मेनमोर। एरोड पोरबू ईसू आकाट चेलार।