မ်ထ 26

လွင် ဒူအီ ဆီ ငဝ်း ဇဝ် ယေဆူ

1 ဇဝ် ယေဆူ ဟဲ့ ဟွတ့် ကာလာင် ဂြုဝ်း ဇိုဝ် တီ ဒွန် မျုဝ်၊ အန် ဝီ ကာလာင် ဂြုဝ်း ဒီ ဒီဘဲ အန်။ အန် တဝ်း၊ 2 “ဘေ နပ်၊ န့ ဂိတ် မီ အာ ဆီငဲ ဂေ ဒီ ဘူင် ဘ့လွယ် လှုဝ်း ဂေ ဇဝ်ဖြာ ဒေါ ကာလုဝ်း အန် ကာင် ဂေ။ အာတ့် ဘူင် ဂေ ဘ့လွယ် တီ၊ ဂေ ဒီ အာပ် အုဝ် အီ ဟဲ့ ဘဲန် ဂွန် ဒူအီ ဒီ ရန်ဆူ အုဝ်၊ တဲး ဂေ ပွိုန် ဒီ ငဝ်း အာဆာက် အုဝ် ဒဲင် ရွင့် ကာဝဲ့။”

3 ပန် တီ ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ ဘော ဂေ ဒါ တာင် အီ အိုပ် မိူင်၊ ဂေ တး ကာဇု ခဲင် ဟုဝ် အီ မုး ဒူင် ကွယ် ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ။ ဒူအီ တီ၊ အန် စိူဝ် အာကာယ်ဖာ။ 4 ဂေ မိူဝ် လာယ် ဖြူမ် ဒီ ပီလွှက့် ဒီ ဇဝ် ယေဆူ၊ တဲး ဂေ ပွိုန် ဒီ မှေတ့် အန် ဘော ငဝ်း အာဆာက် အန်။ 5 ဂေ ယီ တဝ်း၊ “အာဝ် ပွိုန် ဘူင် ပါယ် တီ ဒေါ ဘူင် အေ ဘ့လွယ်၊ ယုဝ် ဂေ ဒူအီ ဆီနန် ဆီနိူင်။”

6 ဇဝ် ယေဆူ ယီ ဆီ ကွယ် ခဲင် ရဝ် ဘေထာနီ ခဲင် ကာင် ဒူအီ အူ ဝီ အီ စိူဝ် အာဆီမူန်။ ဂေ ဒွန် အီ ဘော တဝ်း၊ အန် မုး အာဆီမူန် အီ ဒွိုမ် မိုဝ်း ဆဝ် ဒုတ်။ 7 ဒေါ ကွယ် အန် ခဲင် ကာင် ဒူအီ တီ၊ န့ မိုဝ်း အီဘိုန့် အူ ဝီ၊ အန် ဂူင့် ကာပဝ် နာမန် အုး ငှုန်။ နာမန် အုး ငှုန် တီ ဟဲ့ ငဝ်း တာင် ကာဆဝ်။ အန် တး ဒူင် ကွယ် ဇဝ် ယေဆူ ဝီ လှုဝ် တူတ့် နာမန် တီ ဒီ ဂိန့် ဇဝ် ယေဆူ။ ဒေါ အန် တီ န့ ဆီငျာ ဟူမ် ဂေ ဘူမ်။

8 ဂေ ဒီဘဲ အန် ဘော ယိုဝ် အီဘိုန့် ဘူင် ပါယ် တီ၊ ဂေ တူ အိုင်။ ဂေ တဝ်း၊ “မှဝ် န့ ပါယ် ပီ လှုဝ် ဝဲန် အန် နာမန် အုး ငှုန် တီ၊ တဲး န့ စှိုမ် ဒီလူယ် ဒီလာယ်။း” 9 ဂေ ဘော တဝ်း၊ “ဆေ အေ ဟီ ယွင့် နာမန် တီ၊ န့ ပွိုန် ရွိုန် ကိူန်။ ဟဲ့ ဟွတ့်၊ ဝီ ပွိုန် ကာဆာင် ရွိုန် တီ ဒီ ဒူအီ ဂိန်။”

10 ဇဝ် ယေဆူ ယီ နပ် ပီ တဝ်း ဂေ။ ခုဝ်၊ အန် ဝီ တဝ်း၊ “ကွဲ့ တဝ်း မာဆေ တဲး နဝ်း အီဘိုန့် တီ လိုဝ်။ အန် ဟဲ့ ဘူင် နာ မွှိုမ် နာ ဘွတ် ဒီ အုဝ်။ 11 ဂေ ဒူအီ ဂိန်၊ ဂေ ဒီ ကွယ် ရိုမ် ဒူပ် ဘေ ဆေဆေ၊ တဲး ဘေ ပွိုန် ဒီ စွယ်။ န့ ယီ မုး အုဝ်၊ အုဝ် တူ ကွယ် ရိုမ် ဒူပ် ဘေ ဆေဆေ။ 12 ခုဝ်၊ အီ ကာအာပ် ဘူင် ဝါယ် ဟဲ့ ဟွတ့် ယမ် အုဝ်၊ အီဘိုန့် တီ ဟဲ့ ဟွတ့် ဘူင် အာတ့် ယမ် အုဝ်။ ပါယ် တီ၊ အန် ဟဲ့ မ့ပြာယ် ဘော ဒုဝ် ဘြိမ် အုဝ်၊ တဲး ဂေ ပွိုန် ဒီ ဒိပ် ဒုဝ် ဘူင့် အုဝ် ဝါယ် ယမ် အုဝ်။ 13 အုဝ် ယီ တဝ်း အာခ်ု ဒီ ဘေ။ ဒူအီ ဒီ ဟာဝ် ဒွန် နာ ဒွန် ပ့လုဝ့်၊ ကာလာင် ဒါရာ အီ တဲး နဝ်း ဒူအီ ဒါခိုယ်။ ဂေ ဘော ဟာဝ် ကာလာင် နာ မှဝ်၊ ဂေ ဒီ ဘော ခဲ လွင် ပဲ့ ဟဲ့ ဘူင် အီဘိုန့် တီ။”

14 ဝါယ် အန် တီ ခဲင် ဖိုင် ဒီဘဲ ဇဝ် ယေဆူ ဂိုဝ် ဒီ အာ ဝီ တွိုန်၊ န့ မိုဝ်း အာယူဒတ် အီ စိူဝ် ဘော အာဆာခါရီအူတ်။ အန် ဘော ဟာဝ် ဒူင် ကွယ် ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ။ 15 အန် ဝီ တဝ်း ဒီ ဂေ၊ “ဆေ အုဝ် အာပ် ဇဝ် ယေဆူ ဒီ ဘေ၊ ခဲ့ မှဝ် ဘေ ဒီ ဒွါ ဒီ အုဝ်။း” ဂေ မိူဝ် တဝ်း ဒီ ဒွါ ရွိုန် အူယ် ဂိုဝ် ဘူင့်။ 16 ဟဲ့ ဟွတ့် ပန် တီ အာယူဒတ် တွိုန် ဝီ ဟြေတ့် ပီ ဒီ ပါယ် အန် ဒီ အာပ် ဇဝ် ယေဆူ ဒီ ဂေ ဒါ တာင်။

17 န့ ယီ ဇမ် ဆီငဲ ဒေါ ကာစုး ဂေ ဒီ ဟူမ် ခါမုန် အီ တူ ဟပ် ဆီနမ် ဘြး။ ဆီငဲ တီ၊ ဂေ လုဝ် ငဝ်း ယမ် ဂွန် မာဘူ၊ တဲး ဂေ ဒူအီ ဟူမ် ရိုမ်။ ဂေ ဒီဘဲ ဇဝ် ယေဆူ ဝီ တး ဒီမွှတ် အန်။ ဂေ တဝ်း၊ “ဒူင် မှဝ် မဲ ဆီ တဲး ယေ ရဲန် မာဘူ၊ တဲး အေ ပွိုန် ဒီ ဟူမ်၊ တဲး အေ လှုဝ်း ဇဝ်ဖြာ ဒေါ ကာလုဝ်း အန် ကာင် ဂေ ဒူအီ ဒေါ မွိုန်။း”

18 အန် တဝ်း၊ “ဆေ ဘေ ဟာဝ် ခဲင် မိူင်၊ ဘေ ဒီ ယိုဝ် ဒူအီ အူ ဝီ။ ဘေ လုဝ် တဝ်း ဒီ အန်၊ ‘ဒါ ဆာရာ ယေ တဝ်း၊ အာခြာဝ် ပီ ဒွိုမ် တဝ်း အုဝ် ဟဲ့ ကာတတ် ဒီ တး။ အုဝ် ဒီ ဟူမ် ဘ့လွယ် လှုဝ်း အေ ဇဝ်ဖြာ ဒေါ ကာလုဝ်း အန် ကာင် အီ။ ဘော အုဝ် ဘော ဒီဘဲ အုဝ် ဒီ တး ဟူမ် ဘ့လွယ် တီ ခဲင် ကာင် မဲ။’” 19 ပန် တီ ဂေ ဒီဘဲ ဇဝ် ယေဆူ ဝီ ဘူင် ခဲ့ ပီ စ်ု ဇဝ် ယေဆူ ဂေ ဘူင်။ ဂေ ဘော ရဲန် ဘ့လွယ် တီ။

20 ဘာ ဒီ အပ်၊ ဘော ဇဝ် ယေဆူ ဘော ဂေ ဒီဘဲ အန် ဂိုဝ် ဒီ အာ ဝီ ကွယ် ရူပ် မာတိန့်၊ တဝ်း ဒီ ဟူမ် ဘ့လွယ် တီ။ 21 ဒေါ ဟူမ် ဂေ၊ ဇဝ် ယေဆူ တဝ်း၊ “အုဝ် တဝ်း အာခ်ု ဒီ ဘေ။ န့ မိုဝ်း ဒူအီ အူ ဝီ ကာတဲ ဘေ၊ အန် ဒီ အာပ် အုဝ် ဒီ ရန်ဆူ အုဝ်။”

22 ဒေါ ကာလာင် အန် ဂြုဝ်း တီ၊ ဂေ ဒီဘဲ အန် ကော က့လိုဝ် ကာဆဝ်။ ဂေ ဘဲန် ဝီ ဘဲန် ဝီ ဝီ ဒီမွှတ် ဇဝ် ယေဆူ တဝ်း၊ “မဲ ဇဝ်၊ အာဝ် မုး အုဝ်၊ မုး။း”

23 ဇဝ် ယေဆူ ဝီ တဝ်း၊ “ဘော အန် ဘော အုဝ် ဒီ ဇုတ် ခါမုန် ယာယ် ခဲင် ဆီလာတ့် အူ ဘ့လ။ ဝီ တီ ဒီ အာပ် အုဝ် ဒီ ရန်ဆူ အုဝ်။ 24 န့ မုး အုဝ်၊ အီ ဟဲ့ ဘဲန် ဂွန် ဒူအီ၊ အုဝ် ဒီ ခမ်၊ တဲး န့ ပီ ပီ ဒွိုမ် ဒဲမ် ခဲင် ဘပ် ဇဝ်ဖြာ။ န့ ယီ မုး ဒူအီ အီ အာပ် အုဝ်၊ အန် ဒီ ဇမ် ဒုက် တာင်။ ဆေ အန် တူ ဂွိုတ် ဘဲန် ဒူအီ၊ ဟဲ့ ဝဲ မွှိုမ် ဒီ အန်။”

25 ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ၊ ဘော အာယူဒတ်၊ အီ ဒီ အာပ် ဇဝ် ယေဆူ၊ အန် ဝီ တဝ်း၊ “မဲ ဇဝ်၊ အာဝ် မုး အုဝ်။ မုး။း” ဇဝ် ယေဆူ ဝီ တဝ်း၊ “ဟဲ့ မုး မဲ။”

26 ဒေါ ဟူမ် ဂေ ဘ့လွယ် တွိုန်၊ ဇဝ် ယေဆူ ဘော ဒိုဝ်း ခါမုန်၊ ဝီ ဒါင် ဂုင် ဂေဇူ ဒီ ဇဝ်ဖြာ။ ဟဲ့ ဟွတ့်၊ အန် ကာဘက် ခါမုန်၊ ဝီ ဒွါ ဒီ ဒီဘဲ အန်။ အန် တဝ်း၊ “ဒိုဝ်း ဟူမ် ခါမုန် တီ။ န့ ပီ ဒုဝ် ဘူင့် အုဝ်။”

27 ပန် တီ အန် ဘော ဒိုဝ်း ဆီလာတ့်၊ ဝီ ဒါင် ဂုင် ဂေဇူ ဒီ ဇဝ်ဖြာ၊ ပီ ဝီ ဒွါ ဂေ ဒျီင်။ အန် ဘော တဝ်း၊ “တဲး ဘေ ဒွန် အီ ဒိုဝ်း ဒျီင် အိုမ် တီ။ 28 န့ ပီ နှာမ် အုဝ် အီ လှဲ လေး ခဲင် ဒုဝ် ဘူင့် အုဝ် အာဒါ ဂေ ဒူအီ ကိူန်၊ တဲး ဇဝ်ဖြာ ဘ့လွာ့ ဝဲန် မှာပ် ဂေ။ န့ ဘော ဘျ ဒီ ဘေ လွင် ကာဒိက် ဆတ်ဇာ ကာမာယ် ပီ ဒွါ ဇဝ်ဖြာ ဒီ ဘေ။ 29 အုဝ် တဝ်း ဒီ ဘေ၊ အူ ဆိန့် ဒေါ တီ နီ၊ အုဝ် တူ ဝီ ဒျီင် အိုမ် ဆာဘျိတ် ဇိုဝ် တီ ကော ဇမ် ဆီငဲ ဒီ ကွယ် ရိုမ် အုဝ် ဒူပ် ဘေ ခဲင် မိူင် ပီ အိုပ် ဂုန့် အုဝ်။ ပန် အန် တီ အုဝ် ဒီ ဝီ ဒျီင် ပေါ အူ ဇေန့်။”

30 ဝါယ် အန် တီ ဂေ ဘော တဝ်း မှုဝ် ခဲင် ဘပ် ပီ မှုဝ် ထမ်။ ဟဲ့ ဟွတ့်၊ ဂေ လေး ခဲင် မိူင်၊ ဟာဝ် ဒဲင် နွန် ဟေ နာမန်။

31 ဒေါ အန် တီ ဇဝ် ယေဆူ ဝီ တဝ်း ဒီ ဒီဘဲ အန်၊ “ခဲင် မှိုဝ် နီ ဘေ ဒွန် အီ၊ ဘေ ဒီ တဝ် ဝဲန် အုဝ် ကူပ် ကာဒုး အုဝ် ဒုက်။ ခုဝ် အန် တီ ဇဝ်ဖြာ ဟဲ့ ဒွိုမ် ဒဲမ် အုန် ခဲင် ဘပ် အန်၊ ‘အုဝ် ဒီ ငဝ်း ဒူအီ အီ ပီ ဒူအီ ဟျီင် မာဘူ။ ခုဝ် အန် တီ ဂေ မာဘူ ပီ ဟျီင် အန်၊ ဂေ ဒီ ကာယဝ်း ဟာဝ် ဘဲန် ပ့လုဝ့် ဘဲန် ပ့လုဝ့်။’ 32 အုဝ် ဟီ ဟွတ့် ယမ်၊ ဟီ ဝီ ယိတ့် ဝီ အိမ်၊ အုဝ် ဒီ ယဲတ့် ဒီ အာတ့် ဘေ ခဲင် အိူင် ဂါလီလေ။”

33 အာပေတာရူ တွိုန် ဝီ တဝ်း၊ “ဆေ ဒွန် အီ ဒီ ဘော တဝ် ဝဲန် မဲ၊ အုဝ် တူ ဝဲန် မဲ ဒေါ မှဝ်။”

34 ဇဝ် ယေဆူ ဝီ တဝ်း ဒီ အန်၊ “အုဝ် တဝ်း အာခ်ု ဒီ မဲ။ အာတိုဝ် ခဲင် မှိုဝ် နီ အာတ့် ကာတွုန် အျီန်၊ မဲ ဒီ တဝ်း အူယ် ဇေန့်၊ မဲ တူ နပ် အုဝ်။”

35 အာပေတာရူ ယီ တဝ်း၊ “ဆေ အုဝ် ဘော လုဝ် ယမ် ရိုမ် ဒူပ် မဲ၊ အုဝ် တူ တဝ်း ဒေါ မှဝ်၊ အုဝ် တူ နပ် မဲ။” ဘော အာပေတာရူ ဘော ဂေ ဒီဘဲ ဇဝ် ယေဆူ၊ ဂေ ဒွန် အီ တဝ်း ပါယ် တီ။

36 ပန် တီ ဇဝ် ယေဆူ ဘော ဒီဘဲ အန် ဝီ ဟာဝ် အူ ပ့လုဝ့် အီ စိူဝ် ဂေတ်ဆေမာနေ။ ဇဝ် ယေဆူ ဝီ တဝ်း ဒီ ဒီဘဲ အန်၊ “ဘေ ကွယ် နှဝ့် အုဝ် ဒီ နီ ဒေါ ဟာဝ် ဆာခိုဝ် အုဝ် နာ ဒွယ်။” 37 အန် ယီ ဒဲ့ အာပေတာရူ ဘော ဂွန် အာဇေဘေဒေ အာ ဝီ၊ တဲး ဂေ ဒူပ် အန်။ အန် ဝီ ဘဲန် နဝ်း က့လိုဝ် ဘော ဘဲန် ဒုက် ကာဆဝ် ဒီ နဝ်း အန်။ 38 အန် ဝီ တဝ်း ဒီ ဂေ အူယ် ဝီ တွိုန်၊ “န့ ဟဲ့ ဒုက် ကာဆဝ် ဒီ နဝ်း အုဝ်။ န့ ပီ၊ အုဝ် ဟဲ့ ရိန် ဒီ ယမ် ကူပ် က့လိုဝ် နဝ်း အုဝ်။ တဲး ဘေ ကွယ် ဒီ နီ၊ ဘ်ု အုဝ်။”

39 အန် ဟဲ့ ဟွတ့် ကာလာင် ဂြုဝ်း တီ၊ အန် အူ ဝီ ဝီ ဟာဝ် ပေါ န့ ပွါ ပေါ အီ စဲက်။ အန် ဝီ ခြိုပ်ခြဝ် ဒဲင် ကာဒါယ်၊ ဆာခိုဝ် ဒီ ဇဝ်ဖြာ။ အန် တဝ်း၊ “အိုယ် ဂုန့် အုဝ်၊ ဆေ န့ ပွိုန်၊ ကွဲ့ တဲး အုဝ် ကာဒုး ဒုက် အီ ဒီ တး နာ အာတ့် နီ၊ အီ ပီ ဆီလာတ့် အီ မိုဝ်း ဂူင်။ ကွဲ့ တဲး အုဝ် လုဝ် ဒျီင်။ အုဝ် ယီ တူ မှာန့် မဲ ဘူင် ပီ အိုင် အုဝ်။ တဲး န့ ဒူပ် ပီ အိုင် မဲ။”

40 အန် ဟဲ့ ဟွတ့် ဆာခိုဝ် ပါယ် တီ၊ အန် ဝီ ဟာဝ် ဒူင် ကွယ် ဒီဘဲ အန် အူယ် ဝီ။ ဂေ ယီ ဟဲ့ အိတ်။ အန် ဝီ တဝ်း ဒီ အာပေတာရူ၊ “မှဝ် န့ ပါယ်၊ အူ နာရီ မိူဝ် ဘေ တူ ခမ် ဒီ ကွယ် ဘ်ု အုဝ်။း” 41 ဟဲ့ ဟွတ့်၊ အန် ဝီ တဝ်း ဒီ ဂေ၊ “ဘေ လုဝ် ဆာဒိက် ဘော ဆာခိုဝ် ဘ်ု ဆေဆေ၊ ကွဲ့ တဲး ဘေ ကာလိုပ် ဒေါ ကာဆုး ဘုဝ် ကာနမ် ဘေ ဘူင် မှာပ်။ ခုဝ်၊ နဝ်း ဖွိုမ် ဟဲ့ ဆီ ဘူင် နာ မွှိုမ်။ န့ ယီ မုး ဒုဝ် ဘူင့် အီ တူ ပဲ ဒီ ဘူင်။”

42 ဝါယ် အန် တီ ပေါ အူ ဇေန့် ဇဝ် ယေဆူ ဟာဝ် ပေါ အူ ပ့လုဝ့်၊ ဝီ ဆာခိုဝ်။ အန် ဝီ တဝ်း၊ “အိုယ် ဂုန့် အုဝ်၊ ဆေ အုဝ် ဘော လုဝ် ခမ် ဒုက် တာင် ဇိုဝ် တီ၊ ဆေ မဲ တူ ဆီ တဲး အုဝ် လွတ် ဒုက် တီ၊ အုဝ် ဆီ ဘူင် မီ ပီ အိုင် မဲ။”

43 ဟဲ့ ဟွတ့် ပန် တီ အန် ပီ ဝီ တး ဒူင် ကွယ် ဒီဘဲ အန် တွိုန်။ ဂေ ဟဲ့ ဝီ အိတ် ပေါ အူ ဇေန့်။ ခုဝ်၊ န့ ဘဲန် ဆီ အိတ် ကာဆဝ် ဒီ ဂေ။ 44 ခုဝ်၊ အန် တဲး ဂေ ကွယ် ပါယ် တီ၊ ပီ ဝီ ဟာဝ် ပေါ အူ ဇေန့်၊ ဝီ ဆာခိုဝ် ပေါ အူ ဇေန့် ပီ ခါ အာတ့်။

45 ဟဲ့ ဟွတ့်၊ အန် ဝီ တး ဒူင် ကွယ် ဒီဘဲ အန်၊ ဝီ တဝ်း ဒီ ဂေ၊ “မာဆေ န့ မုး၊ ဘေ ပီ ဆော နာယ် ဒီ ဆီ အိတ် ကာဆဝ်။း တဲး ဘေ ယိတ့်။ အာခြာဝ် ဒီ မှေတ့် ဂေ ဒီ အုဝ် ဟဲ့ တး ဒေါ တီ နီ။ ဂေ ဒီ ဘော အာပ် အုဝ် အီ ဟဲ့ ဘဲန် ဂွန် ဒူအီ ဒီ ဒူအီ မိုဝ်း မှာပ်၊ တဲး ဂေ ပွိုန် ဒီ ဆုင်ဖျာတ် အာမူ အုဝ်။ 46 ယိတ့်၊ အေ ဟဲ့ လုဝ် ဟာဝ် ဒေါ တီ နီ။ ဒူအီ အီ အာပ် အုဝ် ဒီ ဂေ၊ အန် ဟဲ့ တး။”

47 ဒေါ ကာလာင် ဇဝ် ယေဆူ ဂြုဝ်း တီ၊ အာယူဒတ် အီ ဘာ့ ခဲင် ဖိုင် ဒီဘဲ ဇဝ် ယေဆူ ဂိုဝ် ဒီ အာ ဝီ၊ အန် တး ဇမ် ဒူင် ကွယ် ဂေ။ န့ ဘော မိုဝ်း ဒူအီ ကိူန်၊ ဂေ တး ဒူပ် အန်။ ဂေ ဂူင့် မာပွါ့ လာင် ဘော န့ကြွုန်။ ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ ဘော ဂေ ဒါ တာင် အီ အိုပ် မိူင်၊ ဂေ ဟဲ့ တိုယ် ဒူအီ ဂေ တီ၊ တဲး ဂေ ဒူပ် အာယူဒတ်။ 48 အာယူဒတ် ဘော ဂေ ဒူအီ အီ ဒူပ် အန်၊ ဂေ ဟဲ့ လာယ် ဖြူမ် ဒီ အာတ့် တဝ်း၊ “ဒူအီ ပီ အုး အုဝ်၊ ဘေ လုဝ် မှေတ့်။” 49 ပန် တီ အာယူဒတ် ဘော ဟာဝ် ဆိူဝ် ဒီ ဇဝ် ယေဆူ ဝီ တဝ်း၊ “အိုယ် မဲ ဆာရာ၊” ဟဲ့ ဟွတ့်၊ အန် ဘော အုး ဇဝ် ယေဆူ။

50 ဇဝ် ယေဆူ ဝီ တဝ်း၊ “အိုယ် ဂိုက် အုဝ်၊ တဲး မဲ ဘူင် ပီ ဆီ ဘူင် မဲ။” ပန် တီ ဂေ ဒူအီ အီ ဒူပ် အာယူဒတ် တွိုန်၊ ဂေ တး၊ မှေတ့် ပက် ဇဝ် ယေဆူ။ 51 ဒေါ ပက် ဂေ ဇဝ် ယေဆူ၊ န့ မုး ဒူအီ အီ ဒူပ် အန် အူ ဝီ။ ဒူအီ တီ ဘော ထွတ် မာပွါ့ လာင် အန်၊ ဒဲပ် ဟျုဝ့် ဒါ အူ ဝီ အီ မုး ဒဲစေန့် ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ။

52 ဇဝ် ယေဆူ ဝီ တဝ်း ဒီ ဒူအီ တွိုန်၊ “မဲ ဝီ စျှီပ် အုန် မာပွါ့ လာင် မဲ ခဲင် ဘြာမ် အန်။ ခုဝ်၊ အာဆေ တာ မာပွါ့ လာင် ဒဲပ် အီ ဟဝ်၊ ဘော အန် ဒီ ဘော ယမ် ဒီ မာပွါ့ လာင် အီ။ 53 မဲ တူ နပ်။း အုဝ် ပွိုန် ဒဲ့ ဂုန့် အုဝ်၊ တဲး အန် တိုယ် အာမူ အာမာတ် အန် ဘူ မှိုန့် လူယ်၊ တဲး ဂေ တး စွယ် အုဝ် အူ ဇေန့်။ 54 ဆေ ဂေ တး၊ န့ ယီ တူ ဘဲန် ပီ ဒွိုမ် ဒဲမ် အုန် ခဲင် ဘပ် ဇဝ်ဖြာ၊ အီ ကာလာင် လွင် လုဝ် ခမ် အုဝ် ဒုက် ဇိုဝ် တီ။”

55 ပန် တီ ဇဝ် ယေဆူ ဝီ တဝ်း ဒီ ဂေ ဒူအီ ကိူန်၊ “မှဝ် န့ ပါယ် ပီ ဂူင့် ဘေ မာပွါ့ လာင် ဂေ န့ကြွုန်၊ တး မှေတ့် အုဝ်။း ဘေ ထာင်၊ အုဝ် မုး ဂိန့် ဒါ ဇူန်။း ဒွန် ဆီငဲ ဒွန် ဆီငဲ အုဝ် ဟဲ့ ကွယ် ခဲင် ဝဲင် ဟုဝ် ဇဝ်ဖြာ၊ မာနုဝ် ဒူအီ ကိူန်။ ဘေ ယီ တူ မှေတ့် အုဝ်။ 56 ပီ ဘူင် ဘေ ဇိုဝ် တီ၊ န့ ယီ ဘဲန် တူတ့် ဒွန် မျုဝ် ပီ ပီ ဒွိုမ် ဒဲမ် ဒူအီ အီ ဘျာန် ဂြုဝ်း ဇဝ်ဖြာ။” ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ၊ ဂေ ဒီဘဲ အန် ဒွန် အီ ဘော တဝ် လေး ဒူင် ကွယ် ဇဝ် ယေဆူ။

57 ဂေ ဒူအီ အီ မှေတ့် ဇဝ် ယေဆူ၊ ဂေ ဝီ တိုယ် အန် ဇမ် ဒီ အာတ့် အာကာယ်ဖာ၊ အီ မုး ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ။ ဘော အန် ဘော ဂေ ဒါ ဆာရာ အီ မာနုဝ် ဒါရာ ယူဒါ၊ ဘော ဂေ ဒါ တာင် အီ အိုပ် မိူင်၊ ဂေ ဟဲ့ တး ကာဇု ဒူင် ကွယ် အန်။ 58 အာပေတာရူ ဘော ဒူပ် ဇဝ် ယေဆူ၊ ယီ ကွယ် ရာမ် ကာတူင့်။ အန် ဝီ ဇမ် ခဲင် ဝဲင် ဟုဝ် ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ။ အန် ဟဲ့ လိုပ် ခဲင် ဝဲင် တွိုန်၊ အန် ဝီ ကွယ် ရိုမ် ဒူပ် ဂေ ဒူအီ အီ ဘ်ု ဟုဝ် တွိုန်၊ အန် ဘ်ု ဒီ ယွတ် ပီ ဒီ ဘူင် ဂေ ဒီ ဇဝ် ယေဆူ။

59 ပန် တီ ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ ဘော ဂေ ဒါ တာင် အီ ဆုင်ဖျာတ် အာမူ အီ၊ ဂေ ဘောကာဂ့လျီတ် ဟဲ့ တး ကာဇု၊ တဝ်း ဒီ ထူမ် ဂြုဝ်း ဂေ ဒူအီ အီ ကာလုဝ် ဒီ ကာလာင် ဘဲန် ဆက်ဆေ၊ တဲး ဂေ ပွိုန် ဒီ ငဝ်း ဝဲန် ဇဝ် ယေဆူ။ 60 န့ ဘော မိုဝ်း ဒူအီ ကိူန်၊ ဂေ တး ကာလုဝ် ဒီ ကာလာင် ဒွန် မျုဝ် လွင် အန်။ န့ ယီ တူ မိုဝ်း မာဆေ အီ တဲး ဂေ ပွိုန် ဒီ ဖျာက် အန်၊ တဲး န့ ကော ကာဒါန် ငဝ်း ယမ် အန်။ ဟဲ့ ဟွတ့်၊ န့ မိုဝ်း ဒူအီ အာ ဝီ။ 61 ဂါယ် တး တဝ်း၊ “ဒူအီ တီ ဟဲ့ ဒွိုမ် တဝ်း၊ အန် ဒီ ဘူင် တဲး ဟုဝ် ဇဝ်ဖြာ ကာပျာတ့် လိုဝ်။ အူယ် ဆီငဲ၊ အန် ဒီ ဝီ ဆမ် တဲး န့ ဟွတ့်။”

62 ပန် တီ ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ၊ အန် ဝီ ယိတ့်၊ ဝီ ဒီမွှတ် ဇဝ် ယေဆူ။ အန် တဝ်း၊ “မဲ မိုဝ်း ပီ ဒီ ဝျီ့ ဂြုဝ်း ပီ ဖျာက် ဂေ ဒီ မဲ တီ။း ဟဲ့ မှာန်၊ အာဝ် မှာန်။း” 63 ဇဝ် ယေဆူ ယီ တူ တဝ်း မာဆေ။ ပန် တီ ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ၊ အန် ဝီ တဝ်း၊ “အုဝ် စ်ု မဲ၊ တဲး မဲ ကာလာင် ဂြုဝ်း ဆိူဝ်၊ ဂြုဝ်း မှာန် အာခါခ်ု၊ တဲး ဘော ဇဝ်ဖြာ အီ ကွယ် ဆေဆေ ထူမ် ဂြုဝ်း မဲ တီ။ ဟဲ့ မှာန်၊ မုး မဲ ဒူအီ ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ။း ဟဲ့ မှာန်၊ မုး မဲ ဂွန် ဇဝ်ဖြာ။း”

64 ဇဝ် ယေဆူ ဝီ တဝ်း၊ “ဟဲ့ မုး၊ ပီ တဝ်း မဲ။ အုဝ် ယီ တဝ်း ဒီ ဘေ၊ ဘေ ဒီ ယိုဝ် အုဝ်၊ အီ ဟဲ့ ဘဲန် ဂွန် ဒူအီ ကွယ် ဘ့လာက် အာအး ဇဝ်ဖြာ၊ အီ မိုဝ်း ပွုန် တာင်။ ဘေ ဒီ ဘော ယိုဝ် အုဝ် ကွယ် ခဲင် န့အု၊ ဝီ တး လူင် ဒဲင် ကာဒါယ်။”

65 ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ၊ ဒါ တာင် အီ အိုပ် တူတ့် ဒူအီ အီ လှူ ဒီ ဇဝ်ဖြာ တွိုန်၊ အန် ဘော ရူ ကာဆဝ်၊ ကာယာတ့် ဆီတုဝ် အန်၊ ဝီ ကာလာင် ဒီ အီ ဟဝ်၊ “အန် ဟဲ့ ဟွတ့် ကာခဲန့် ဒီ ဇဝ်ဖြာ။ အေ အာဝ် ဟူ လုဝ် ထူမ် ဂြုဝ်း ပီ ဒီ ကာလာင် ဂေ အီ ဘဲန် ဆက်ဆေ။ ဘေ ဘောကာဂ့လျီတ် ဟဲ့ ဟွတ့် ထူမ် ဂြုဝ်း ကာခဲန့် အန် ဒီ ဇဝ်ဖြာ။ 66 မာဆေ ပီ ထာင် ဘေ။း” ဂေ ဝီ တဝ်း၊ “ဟဲ့ ကာအာပ် ငဝ်း ယမ် အန်။”

67 ပန် တီ ဂေ ဝီ ပတ့် နာ အန်၊ ဝီ ဝတ် အန်၊ တာ ကာလိုမ် ဂေ။ မင် အီ ဘော ကာထ ကာလာ အန်။ 68 ဂေ ဝီ တဝ်း၊ “မဲ အီ မုး ဒူအီ ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ၊ တဲး မဲ ကာလာင် ဒီ ယေ၊ အာဆေ ဟဲ့ ကာထ ကာလာ မဲ။”

69 ဒေါ အန် တီ န့ ယီ မုး အာပေတာရူ၊ အီ ကွယ် ခဲင် ဝဲင်။ န့ ဘော မိုဝ်း ဂွန် အီဘိုန့် အူ ဝီ အီ ဘဲန် မှာယ် အီ၊ အန် တး ဒူင် ကွယ် အာပေတာရူ ဝီ တဝ်း၊ “ဘော မဲ ဟဲ့ ဒူပ် အာယေဆူ အီ တး အိူင် ဂါလီလေ တွိုန်။”

70 အာပေတာရူ ဝီ ကာလာင် တဲး ဂေ ဘောကာဂ့လျီတ် ပွိုန် ဒီ ထူမ် ဂြုဝ်း အန် တီ။ အန် တဝ်း၊ “အုဝ် တူ နပ် ပီ တဝ်း မဲ။”

71 ပန် တီ အန် တဝ်း ဒီ ဝီ လေး ခဲင် ဝဲင် တွိုန်။ ယီ ဇမ် ဒီ ဘာင် မာလုဝ်း၊ န့ မိုဝ်း ဂွန် အီဘိုန့် ပေါ အူ ဝီ။ ဘော အန် တဝ်း ဒီ ဒူအီ အီ ကွယ် ကာတတ် အန်၊ “ဒူအီ နီ၊ အန် ဟဲ့ ဒွိုမ် ဒူပ် အာယေဆူ အီ တး မိူင် နာဆာရေတ့် တွိုန်။”

72 ပေါ အူ ဇေန့် အန် ဝီ ကာလုဝ်။ အန် ဘော ဒိူင် တဝ်း၊ “အုဝ် တူ နပ် ဒူအီ တီ။”

73 ဝါယ် အန် တီ အူ ကာစန်၊ န့ ဝီ မိုဝ်း မင် အီ အီ ကွယ် ဒီ ခူပ် မာလုဝ်း တွိုန်၊ ဂေ ဝီ ဟာဝ် ဒူင် ကွယ် အာပေတာရူ၊ ဝီ တဝ်း၊ “ဟဲ့ မှာန်၊ ဟဲ့ မုး။ မဲ မိူဝ် မုး ဒီဘဲ အန် အူ ဝီ။ ကာဆမ် ဂြုဝ်း မဲ ပီ ဂြုဝ်း ပီ ကာလာင် ဂေ ဒူအီ အီ ကွယ် ခဲင် အိူင် ဂါလီလေ။”

74 ပန် တီ အာပေတာရူ ဘော ဒိူင် ဒုဝ် အန် ဘော တဝ်း၊ “အုဝ် တူ ဒွိုမ် ယိုဝ် အန်။” အန် ဟဲ့ ဟွတ့် ကာလာင် ဂြုဝ်း တီ၊ န့ မိုဝ်း ကာတွုန် အျီန် အူ ဇေန့်။ 75 ဒေါ အန် တီ အာပေတာရူ ဝီ လှုဝ်း ဂြုဝ်း ဇဝ် ယေဆူ တွိုန်၊ ဒေါ တဝ်း အန်၊ “အာတ့် ကာတွုန် အျီန် မဲ ဒီ ကာလာင် အူယ် ဇေန့်၊ မဲ တူ နပ် အုဝ်။” အန် ဘော လှုဝ်း ဂြုဝ်း တီ၊ ဝီ လေး နာ ရေတ့်၊ ဝီ ယာမ် တာင်။