မ်ထ 24

လွင် အာခြာဝ် ဒီ တူတ့် ဇာတ် နီ

1 ဝါယ် အန် တီ ဇဝ် ယေဆူ ဝီ လေး ခဲင် ဝဲင် ဟုဝ် ဇဝ်ဖြာ။ ဒေါ ဟာဝ် အန် ပေါ အူ ပ့လုဝ့်၊ ဂေ ဒီဘဲ အန် ဝီ တး ဒီ အန်၊ တဲး အန် ယွတ် ဟုဝ် ဘဲန် မျုဝ် ဘဲန် မျုဝ် အီ ကွယ် ရူပ် ဟုဝ် ဇဝ်ဖြာ။ 2 ဇဝ် ယေဆူ ဝီ တဝ်း၊ “ဟဲ့ မုး၊ ဟုဝ် ဘဲန် မျုဝ် ဘဲန် မျုဝ် ပီ ဆမ် ဂေ၊ ဟဲ့ တာင် ဘော စှိတ်။ အုဝ် ယီ တဝ်း အာခ်ု ဒီ ဘေ၊ န့ ဒီ လိုဝ် တူတ့်။ မာဝ် ဂေ နီ၊ ဂေ ဒီ ပျာတ့် ဝဲန် တူတ့်။ မာဝ် အူ ဘူင့် မိူဝ် အာဝ် ဟူ ဝီ ကွယ် ဒူင် ကွယ် ဘြိမ် အန်။”

3 ဝါယ် အန် တီ ဇဝ် ယေဆူ ဝီ ဟာဝ် ဇမ် ဒဲင် နွန် ဟေ နာမန်။ ဒေါ ကွယ် အန် ဒီ နွန် တီ၊ ဂေ ဒီဘဲ အန် ဝီ တး ကာလာင် ဂြုဝ်း ဒီ အန် ဒေါ တူ မိုဝ်း အီ ဟဝ် ထူမ်။ ဂေ တဝ်း၊ “တဲး မဲ ကာလာင် ဒီ ယေ၊ ပန် မှဝ် ဂေ ဒီ ဘူင် တဲး ဟုဝ် ဇဝ်ဖြာ ကာပျာတ့် လိုဝ်။း လက်ဆာနာ ပါယ် မှဝ် အီ တဲး ယေ နပ် လွင် အာခြာဝ် ဒီ ဝီ တး လူင် မဲ ဒဲင် ကာဒါယ် နီ ဘော လွင် ဟဲ့ ကာတတ် ဒီ ဇမ် ပန် ဒီ တူတ့် ဇာတ် နီ။း”

4 ဇဝ် ယေဆူ ဝီ တဝ်း၊ “ဘေ လုဝ် ဆာဒိက်၊ ကွဲ့ တဲး အီ ပွိုန် ဒီ ကာလုဝ် ဘေ။ 5 န့ ဒီ မိုဝ်း ဘဲန် ဝီ ဘဲန် ဝီ၊ ဂေ ဒီ တး ဂါဝ် ပွုန် အုဝ်။ ဂေ ဒီ ဘော တဝ်း၊ ‘အုဝ် ဟဲ့ မုး အန် ဇဝ် ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ။’ ပါယ် တီ ဂေ ဒူအီ ကိူန် ဒီ ကာလိုပ် ဒီ ညှိုမ် ဂြုဝ်း ပီ ကာလုဝ် ဂေ။ 6 ဘေ ဒီ ဘော ယိုဝ် ဆာဒါင် ဘဲန် မျုဝ် ဘဲန် မျုဝ် လွင် ဂေ ဒူအီ လာယ် ကာဂုဝ်း၊ ဘော လွင် ဂေ ဒူအီ အီ တဝ်း ဒီ ကာဂုဝ်း ဒီ အီ ဟဝ်။ ဒေါ အန် တီ ဘေ ယီ လုဝ် ဆာဒိက်၊ ကွဲ့ တဲး ဘေ ယုဝ်။ န့ ဒီ ဘော ဘဲန် ဇိုဝ် တီ ဒွန် မျုဝ်၊ ယီ ညှမ် ဇမ် အာခြာဝ် ဒီ တူတ့် ဇာတ် နီ။ 7 န့ ဒီ မိုဝ်း အာမျုဝ် ဒူအီ အူ မျုဝ်၊ ဒီ ဝီ ဘဲန် ရန်ဆူ ဂေ ဒူအီ ပေါ အူ မျုဝ်။ ဘော ခုန်ဒီခမ် အူ ကာဒင် ဒီ ဝီ ကာဂုဝ်း ဒီ ခုန်ဒီခမ် ပေါ အူ ကာဒင်။ ဒေါ အန် တီ န့ ဒီ ဘော မိုဝ်း ဒူအီ ဘဲန် ပ့လုဝ့် ဘဲန် ပ့လုဝ့်၊ ဂေ ဒီ အေတ့် ပီ ဒီ ဟူမ်။ ဘော မာအိမ် ဒီယေန့် ဘဲန် ပ့လုဝ့် ဘဲန် ပ့လုဝ့်။ 8 ဆေ ဒူအီ ကာဒုး ဒုက် ဇိုဝ် တီ ဒွန် မျုဝ်၊ န့ ဘော ပီ အီဘိုန့် အီ မိုဝ်း ဆဝ် ဒီ ဂွိုတ် ဂွန်။

9 အာခြာဝ် ဒေါ အန် တီ ဂေ ဒီ ဘော မှေတ့် ဘေ၊ အာပ် ဘေ ဒီ ဒါ တာင်၊ တဲး ဘော ဘေ ခမ် ဒုက် ဘဲန် မျုဝ် ဘဲန် မျုဝ်၊ တဲး ဂေ ငဝ်း ယမ် ဘော ဘေ။ ကူပ် ညှိုမ် ဘေ ဒီ အုဝ်၊ ဂေ ဒူအီ ဒွန် မျုဝ် ဒီ ဘော ဇွင့် ဘေ။ 10 ပန် ဒီ ဇမ် အာခြာဝ် အန် တီ၊ န့ ဒီ မိုဝ်း ဒူအီ အီ ညှိုမ် အုဝ်၊ ဂေ ကိူန် ဒီ ဘော ဝဲန် အုဝ်၊ တူ ခမ် ဒုက် ဇိုဝ် တီ။ ဂေ ဒူအီ တီ၊ ဂေ ဒီ လာယ် ရူ၊ ဒီ လာယ် ဖျာက် ဒီ အာတ့် ဒါ တာင်။ 11 န့ ဒီ ဘော မိုဝ်း ဒူအီ ကိူန်၊ ဂေ ဒီ ကာလုဝ် ဒီ တဝ်း၊ ဂေ မုး ဒူအီ အီ ဘျာန် ဂြုဝ်း ဇဝ်ဖြာ။ ဘော ဒူအီ ကိူန် ကာလိုပ် ဒီ ညှိုမ် ဂေ။ 12 ဂေ ဒူအီ ဟာယ် ဂေ ဝဲ ကိူန် လွှိုမ် ခါ အာတ့်။ ခုဝ်၊ ဂေ ဒူအီ အာဝ် ဟူ နပ် ဒီ လာယ် ရွက့် ပီ ခါ အာတ့်။ 13 အာဆေ ယီ မိုဝ်း နဝ်း မန် ဘော ခမ် တူတ့် ဒွန် မျုဝ်၊ တဲး ဇာတ် တီ ကော တူတ့်၊ ဇဝ်ဖြာ ဒီ ချွတ် အာဆာက် အန်။ 14 ဂေ ဒူအီ တီ ဒီ ကာလာင် လွင် ဇဝ်ဖြာ ဒီ အိုပ် ကာဒါယ်၊ တဲး ဒူအီ ဘဲန် နဝ်း ဒါခိုယ်၊ တဲး ဒွန် အီ ဒဲင် ကာဒါယ် ပွိုန် ဒီ ထူမ်။ ဆေ ဒူအီ ဒွန် မျုဝ် ဟီ နပ် လွင် အန် တီ၊ ဇာတ် နီ ဒီ တူတ့်။

15 န့ ဒီ ဘော မိုဝ်း ကြုဝ် အီ မွှိုမ် ယုဝ်၊ အီ တဲး တူတ့် ဒွန် မျုဝ် ကာပျာတ့် လိုဝ်။ ဆေ ဘေ ယိုဝ် အီ ဘ့လေး ကြုဝ် တီ ခဲင် ဒူင် ဘွတ်၊ ဘေ လုဝ် တဝ် ဟာဝ် ပေါ ပ့လုဝ့်။” ဒူအီ အီ ဘျာန် ဂြုဝ်း ဇဝ်ဖြာ အီ စိူဝ် အာဒါနေလ၊ အီ ကွယ် ဒေါ မွိုန်၊ အန် ဟဲ့ ဒွိုမ် ဒဲမ် လွင် အန် တီ တဝ်း၊ “အာဆေ တိး လွင် အန် တီ လုဝ် ဆာဒိက်၊ တဲး လွင် ဒါင် အန် လိုဝ်း။” 16 ဇဝ် ယေဆူ တဝ်း၊ “ဆေ ဘေ ယိုဝ် ကြုဝ် တီ၊ ဘေ အီ ကွယ် ခဲင် အိူင် ယူဒါ လုဝ် တဝ် ဟာဝ် ဒဲင် နွန်။ 17 ဆေ ဒူအီ ကွယ် နာ ဒဲင် ကာင် အန်၊ ဆေ အန် လူင်၊ ကွဲ့ တဲး အန် ဝီ လိုပ် ခဲင် ကာင်၊ ဒိုဝ်း ကြုဝ် အန် အီ ကွယ် ခဲင် ကာင်။ တဲး အန် တဝ် ဟာဝ် အူ ဇေန့်။ 18 အာဆေ ကွယ် ခဲင် မာန်၊ ကွဲ့ တဲး အန် ဝေန့် ခဲင် ကာင် အန်၊ ဒိုဝ်း ဆီတုဝ် အန်။ 19 ဆေ န့ မိုဝ်း အီဘိုန့် အီ တူ အး ဘော အီဘိုန့် အီ မိုဝ်း ဂွန် အာင အီ ဆီ ပူ ဒီ မာ အန်၊ ဂေ ဒီ ကာဒုး ဒုက် တာင်။ 20 ဘေ ယီ လုဝ် ဆာခိုဝ်၊ ကွဲ့ တဲး ဒုက် တာင် ဇိုဝ် တီ တး ဒေါ မုး အာခြာဝ် ဂတ် ဂျီတ်၊ ကွဲ့ တဲး န့ မုး ဆီငဲ ဒီလှဝ်။ 21 အူ ဆိန့် ဒေါ ဂုဝ် အန်၊ ဒေါ ဘူင် ဘ့လေး ဇဝ်ဖြာ ကာဒါယ် ကော ဇမ် အာတိုဝ်၊ န့ တူ ဒွိုမ် မိုဝ်း ဒုက် တာင် ဇိုဝ် တီ ဒဲင် ကာဒါယ် နီ။ ဟီ ဟွတ့် ဝါယ် အန် တီ န့ မိူဝ် တူ ဝီ မိုဝ်း ဒုက် ဇိုဝ် တီ ဒေါ မှဝ်။ 22 ဆေ ဇဝ်ဖြာ တူ တဲး ဒုက် ဇိုဝ် တီ ဝီ စေဝ် ဟွတ့်၊ န့ တူ ဝီ မိုဝ်း အာဆေ အီ ဒီ လွတ် ယမ်။ ကူပ် မိုဝ်း ဂေ ဒူအီ ပီ ရဝ်း ဇဝ်ဖြာ၊ ဇဝ်ဖြာ တူ တဲး ဒုက် တာင် တီ ကွယ် လှေန့်။ 23 ဒေါ အန် တီ ဆေ န့ မိုဝ်း ဒူအီ အီ တဝ်း ဒီ ဘေ၊ ‘ယွတ် နာ နီ၊ အန် ဇဝ် ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ ဟဲ့ ကွယ် ဒီ နီ၊’ ဘေ ကွဲ့ ညှိုမ် ဂြုဝ်း တီ။ ဆေ ဂေ ဘော တဝ်း၊ ‘အန် ဇဝ် ကွယ် နာ ဒွယ်၊’ ကွဲ့ ညှိုမ် ဂြုဝ်း တီ။ 24 န့ ဒီ မိုဝ်း ဒူအီ၊ ဂေ ကာလုဝ် ဒီ တဝ်း၊ ဂေ မုး ဒူအီ ဒီ ချွတ် အာဆာက် အီ။ ဂေ ဒီ ဘော ကာလုဝ် ဒီ တဝ်း၊ ဂေ မုး ဒူအီ အီ ဘျာန် ဂြုဝ်း ဇဝ်ဖြာ။ ဂေ ဒီ ဘော ဘူင် နာ မွှိုမ် အာမ် ကာဆဝ် ဘဲန် မျုဝ် ဘဲန် မျုဝ်။ ဂေ ဘော ထေဝ် ဒီ ကာလုဝ် ဒီ ဂေ ဒူအီ ပီ ရဝ်း ဇဝ်ဖြာ။ ဂေ ယီ တူ ပဲ ဒီ ဘူင် တဲး ဂေ ညှိုမ် ဂြုဝ်း ပီ ကာလုဝ် ဂေ တီ။ 25 ဆေ န့ ဟီ ဇမ် အာခြာဝ် ပီ တဝ်း အုဝ် တီ၊ ဘေ ဒီ ဘော နပ်၊ ကူပ် ဟဲ့ ဟွတ့် ခဲ အုဝ် ဒီ ဘေ လွင် အန် တီ။

26 ခုဝ် အန် တီ ဆေ န့ ဒီ မိုဝ်း ဒူအီ အီ တဝ်း၊ ‘အန် ဇဝ် အီ ချွတ် အေ၊ အန် ဟဲ့ တး ကွယ် ခဲင် ပြဲ ကာဟဝ်း၊’ ဘေ ကွဲ့ ဟာဝ် ယွတ်။ ဆေ န့ ဘော မိုဝ်း ဒူအီ တဝ်း၊ ‘အန် ဇဝ် ဟဲ့ တး ကွယ် ခဲင် ကာင်၊ ခဲင် ဟူင် အိတ်၊’ ကွဲ့ ညှိုမ် ဂြုဝ်း တီ။ 27 ဆေ အုဝ် အီ ဟဲ့ ဘဲန် ဂွန် ဒူအီ ဒီ ဝီ တး လူင် ဒဲင် ကာဒါယ် နီ၊ န့ ဒီ ပီ ပ့လ မ့ပ့လေတ့်၊ အီ တး နာ လေး ဆီငဲ၊ ဝီ ဟာဝ် ဇမ် နာ ဂေတ့် ဆီငဲ၊ တဲး အီ ယိုဝ် ဆီချာ။ 28 န့ ဘော ပီ ဒူအီ အီ ယိုဝ် မာလင်ဒါ။ ဂေ ဟဲ့ နပ်၊ ဆေ န့ မိုဝ်း ဒုဝ် အီ ယမ် ဒီ မှဝ်၊ ဂေ မာလင်ဒါ ဒီ တး ကာဇု ဒူင် တီ၊ ဟူမ်။

29 ဆေ ဂေ ဒူအီ ဒဲင် ကာဒါယ် ဟီ ဟွတ့် ဇမ် ဒုက် တာင် တီ၊ အူ ဇေန့် န့ ဒီ ဘော ဘဲန် ပီ ဒွိုမ် ကာလာင် ဒူအီ အီ ဘျာန် ဂြုဝ်း ဇဝ်ဖြာ အီ ဟဲ့ တဝ်း၊ ‘ဆီငဲ ဒီ အပ် ဝွင့်။ ဘော မာဂျီန် အာဝ် ဟူ မိုဝ်း ဘ့လာင် အန်။ ဘော ဆီမန့် ဒီ ရး စုဝ်း ခဲင် ဘ့လေန့်။ ဘော ပွုန် အီ တဲး ဆီမန့် ကွယ် ခဲင် ဘ့လေန့် အာဝ် ဟူ ပီ ဘြိမ်။ ခုဝ်၊ န့ ဒီယုး ဒီ ယေန့် တူတ့်။’

30 ဒေါ အန် တီ အုဝ် အီ ဟဲ့ ဘဲန် ဂွန် ဒူအီ၊ အုဝ် ဒီ ကာပ့လုး ခဲင် ဘ့လေန့်။ ဂေ ဒူအီ အီ ကွယ် ဒဲင် ကာဒါယ် ဒွန် မျုဝ်၊ ဂေ ဒီ ဘဲန် နဝ်း က့လိုဝ်။ ဂေ ဒီ ဘော ယိုဝ် အုဝ် အီ ဟဲ့ ဘဲန် ဂွန် ဒူအီ၊ ဒေါ ကွယ် အုဝ် ခဲင် န့အု၊ ဝီ တး လူင် ဒဲင် ကာဒါယ်။ ဂေ ဒီ ဘော ယိုဝ် ပွုန် ဘော အာဖုင် ဒင်ခုဝ် အုဝ် အီ တာင် ကာဆဝ်။ 31 အုဝ် ဒီ ဘော တိုယ် အာမူ အာမာတ် အုဝ်၊ တဲး ဂေ ဘုတ် ဝဝ် နိုင် မာပဲ၊ တဲး န့ ဟမ် တာင်၊ တဲး ဂေ ဒဲ့ ဒူအီ ပီ ရဝ်း ဇဝ်ဖြာ၊ တဲး ဂေ တး ဒွန် နာ ဒွန် ပ့လုဝ့် ဖွုန် ဘ့လာက် နာ တူင့် ဆိူတ် ဒဲင် ကာဒါယ် ဘော နာ တူင့် ဆိူတ် ခဲင် ဂါင်ဟြာဝ်၊ တဲး ဂေ တး ကာဇု ဒူင် ကွယ် အုဝ်။

32 တဲး ဘေ ယွတ် ဟေ ဒီပူ၊ တဲး န့ ဘဲန် အူဖာမာ ဒီ ဘေ၊ တဲး ဘေ ဟေန် ဒီ အန်။ ဆေ ဘေ ယိုဝ် ဟေ ဒီပူ ဒီ န့လုဝ်း၊ ဘေ ဘော နပ်၊ ဂ့လာယ် ဒီ တး။ 33 န့ ဘော ပါယ် တီ။ ဆေ ဘေ ယိုဝ် န့ ဟဲ့ ဘဲန် ပီ တဝ်း အုဝ်၊ ဘေ ဘော နပ်၊ အုဝ် ဟဲ့ ကာတတ် ဒီ ဝီ တး။ န့ ပီ၊ အုဝ် ဟဲ့ ကွယ် ဒီ အာတ့် မာလုဝ်း။ 34 အုဝ် တဝ်း အာခ်ု ဒီ ဘေ။ ဇာတ် နီ တူ တူတ့် အာတ့် ဒီ ဘဲန် တူတ့် ဒွန် မျုဝ် ပီ တဝ်း အုဝ် ဒီ ဘေ ဒေါ တီ နီ။ 35 ဘော ဘ့လေန့် ဘော ကာဒါယ် ဒီ ဟြာယ် တူတ့်။ ဂြုဝ်း ပီ ကာလာင် အုဝ် ယီ တူ ဟြာယ် ဒေါ မှဝ်။ န့ ဒီ ကွယ် ဆေဆေ။

36 ပန် ဒီ ဝီ တး အုဝ်၊ အာဝ် မိုဝ်း ဒူအီ အီ နပ် ဆီချာ လွင် ဆီငဲ အန်၊ နာရီ အန်။ ဘော ဂေ အာမူ အာမာတ် ဇဝ်ဖြာ အီ ကွယ် ဂါင်ဟြာဝ်၊ ဘော ဂွန် ဇဝ်ဖြာ မိူဝ် တူ နပ်။ မီ ဇဝ်ဖြာ အီ နပ် ဒေါ မှဝ် န့ ဒီ ဘဲန် ပီ တဝ်း အုဝ်။ 37 ဆေ အုဝ် အီ ဟဲ့ ဘဲန် ဂွန် ဒူအီ ဒီ ဝီ တး လူင် ဒဲင် ကာဒါယ်၊ န့ ပီ ဒေါ မုး ဇာတ် ဒါ အာနုဝ် ဒေါ မွိုန် တွိုန်။ 38 ခုဝ်၊ ဒေါ မုး ဇာတ် အာနုဝ် တွိုန်၊ အာတ့် မိုဝ်း အိုမ် တာင် အီ မ့ပုန် ကာဒါယ်၊ ဂေ ဒူအီ ဟူမ် ဒါခိုယ်။ ဂေ ဘော လာယ် လာယ်၊ လာယ် ခတ်၊ တဲး န့ ကော ဇမ် ဆီငဲ ဒေါ လိုပ် အာနုဝ် ခဲင် ရိုဝ် ဆင်ဖုဝ် တာင် တွိုန်။ 39 ဂေ မိူဝ် တူ နပ်၊ န့ ဒီ ပါယ် မှဝ်။ ဒေါ တး အိုမ်၊ မ့ပုန် ကာဒါယ်၊ ဂေ ဘော ယမ် အူ ဇေန့်။ ပန် ဒီ ဝီ တး လူင် အုဝ်၊ အီ ဟဲ့ ဘဲန် ဂွန် ဒူအီ ဒဲင် ကာဒါယ် နီ၊ န့ ဒီ ဘော ပါယ် တီ။ ဂေ ဒူအီ မိူဝ် ဒီ ဇမ် ဒုက် အူ ဇေန့်။ 40 ဒေါ အန် တီ န့ ဒီ မိုဝ်း ဒူအီ အာ ဝီ ဘူင် မာန်။ ဇဝ်ဖြာ ဒီ တဲး အူ ဝီ ဟုဝ့် ဂါင်ဟြာဝ်။ ပေါ အူ ဝီ ယီ ကွယ် နာ ပန်။ 41 န့ ဒီ ဘော မိုဝ်း အီဘိုန့် အာ ဝီ အီ ကွယ် အူ ပ့လုဝ့်၊ ကြိတ် ခါမုန်။ ဇဝ်ဖြာ ဒီ ဒိုဝ်း အူ ဝီ၊ ဝီ အုန် ပေါ အူ ဝီ။

42 ခုဝ် အန် တီ ဘေ လုဝ် ဘ်ု ဆာဒိက် ဆေဆေ၊ ကူပ် တူ နပ် ဘေ ဒေါ မှဝ် အန် ဇဝ် ဒီ တး။ 43 တဲး ဘေ နပ် ဆီချာ။ ဆေ န့ မိုဝ်း ဒါ ကာညာ ကာင်၊ ဆေ အန် နပ် အာခြာဝ် ဒီ တး ဒါ ပြာ လိုပ် ကာင် အန်၊ အန် ဒီ ဘော ခြဲ ဒါ ပြာ၊ တူ တဲး ဒါ ပြာ ပွိုန် ဒီ လိုပ် ပြာ ခဲင် ကာင် အန်။ 44 ပါယ် တီ၊ ဘော ဘေ လုဝ် ဘ်ု ဆေဆေ။ ခုဝ်၊ ဘော အုဝ် အီ ဟဲ့ ဘဲန် ဂွန် ဒူအီ၊ အုဝ် ဒီ ဝီ တး အာခြာဝ် ပီ တူ ထာင် ဘေ။

45 ခုဝ်၊ ဆေ န့ မိုဝ်း ဒါ ကာညာ အူ ဝီ၊ အန် တဝ်း ဒီ ဟာဝ် ပေါ အူ ပ့လုဝ့်၊ အန် ဟဲ့ စ်ု ဒဲစေန့် အန် အူ ဝီ ယွတ် မဲန် ဂေ ဒဲစေန့် အန် ဒွန် ဝီ၊ ဆေ အန် ဒွါ ပီ ဒီ ဟူမ် ဒီ ဂေ ဒေါ လုဝ် ဂေ ပီ ဒီ ဟူမ်၊ ဒဲစေန့် တီ ဟဲ့ ဘူင် နာ မှာန်၊ နာ မွှိုမ်။ 46 ဆေ ဒါ ကာညာ အန် ဝီ တး၊ ဝီ ယိုဝ် အန် ဘူင် ဆီချာ ပီ လုဝ် ဘူင် အန်၊ န့ ဒီ ဘဲန် နာ မွှိုမ် ဒီ အန်။ 47 အုဝ် တဝ်း အာခ်ု ဒီ ဘေ၊ ဒါ ကာညာ အန် ဒီ ဝီ တဲး ဒဲစေန့် တီ အိုပ် တူတ့် ကြုဝ်ကြာမ် အန်။ 48 ဆေ ဒဲစေန့် တွိုန် ယီ တူ မွှိုမ်။ ဆေ အန် တဝ်း၊ ‘အုဝ် ဟဲ့ နပ်၊ ဒါ ကာညာ အုဝ် ဒီ ကွယ် လှေန့်၊ ညှမ် ငှိုယ် ဒီ ဝီ တး ဇမ် ဒီ နီ၊’ 49 ဟဲ့ ဟွတ့် အန် ဒီ ဘော မး ဂိုက် အန် အီ မုး ဒဲစေန့် ပီ အန်။ အန် ဘော ဟူမ် တာင်၊ ဒျီင် ပဝ်း၊ ကွယ် ရိုမ် ဒူပ် ဂိုက် အန် အီ တူ မွှိုမ်။ 50 ပန် တီ ဒါ ကာညာ ဒီ တး ဒေါ တူ ထာင် အန်။ န့ ဒီ ဘော မုး အာခြာဝ် တူ နှဝ့် န့ဒဝ့် အန် ဒီ တး။ 51 ဒေါ အန် တီ ဒါ ကာညာ တွိုန် ဒီ ဘော ငဝ်း အာဆာက် အန်၊ ဒဲပ် ဒုဝ် အန် တဲး န့ ကာပျာတ့် ဘော ခြွင့် အုန် အန် ဒူင် ကွယ် ဂေ ဒူအီ အီ ညိုင်ရာင် ပီမွှိုမ် ဂေ။ ဒူင် တီ ဒွန် အီ ဒီ ဘော ယာမ် တာင်။ ကုင်ကာပ် ဂေ ဘော ကာဒွယ် ကူပ် ယုဝ် ဂေ။” ခဲ့ တီ ဇဝ် ယေဆူ ကာလာင် ဒီ ဒီဘဲ အန် လွင် အာခြာဝ် ဒီ တူတ့် ဇာတ် နီ။