မ်ထ 22

လွင် ဇဝ် ယေဆူ ပီ ဂွန် ခုန်ဒီခမ်

1 ဝါယ် အန် တီ ဇဝ် ယေဆူ ဝီ ခဲ အူဖာမာ ဒီ ဂေ။ အန် တဝ်း၊ 2 “ခဲင် မိူင် ပီ အိုပ် ဇဝ်ဖြာ န့ ပီ၊ န့ မိုဝ်း ခုန်ဒီခမ် အူ ကာဒင်။ အန် ရဲန် ဘ့လွယ် ခတ် အာဒါ ဂွန် ကာညူမ် အန်။ 3 အန် ဟဲ့ ဟွတ့် ဘာင် ဒူအီ၊ ဟဲ့ ဟွတ့် ရဲန်၊ အန် ဝီ တိုယ် ဒဲစေန့် အန်၊ တဲး ဂေ ဒဲ့ ခဲတ့် ပဲ့ ဟဲ့ ဘာင် အန် တွိုန် တး လိုပ် ဘ့လွယ်။ ဒူအီ ဂေ တီ ယီ တူ ဆီ လိုပ်။

4 ပန် တီ အန် ဝီ တိုယ် ဒဲစေန့် အန် ပေါ န့ ပွါ၊ ဝီ တဝ်း၊ တဲး ဘေ ကာလာင် ဒီ ဂေ ဒူအီ ပီ ဘာင် အုဝ် တဝ်း၊ ‘အုဝ် ဟဲ့ ဟွတ့် ရဲန် တူတ့် ဒွန် မျုဝ်။ အုဝ် ဟဲ့ ဟွတ့် ဒင် ဟာပ် ဘဲန် မျုဝ် ဘဲန် မျုဝ်။ ဟဲ့ ဇေ့ဇုင် တူတ့်။ တဲး ဘေ တး လိုပ် ဟူမ် ဘ့လွယ် အုဝ်။’

5 ဂေ ဒူအီ ပဲ့ ဟဲ့ ဘာင် ခုန်ဒီခမ် တွိုန်၊ ဂေ ယီ တူ ထူမ် ဂြုဝ်း ဒဲစေန့် ခုန်ဒီခမ်။ ဂေ ဝီ ဟာဝ် ပေါ အူ ပ့လုဝ့်။ အူ ဝီ ဟာဝ် ဒီ မာန် အန်၊ ပေါ အူ ဝီ တဝ်း ဒီ ဟာဝ် ကာစိုဝ်း ကာယွင့် ကြုဝ်။ 6 န့ ဘော မိုဝ်း မင် အီ၊ ဂေ မှေတ့် ဒဲစေန့် ပီ တိုယ် ခုန်ဒီခမ် တွိုန်၊ ဘူင် နာ စီစိဝ် ဘဲန် မျုဝ် ဘဲန် မျုဝ် ဒီ ဂေ။ ဟဲ့ ဟွတ့်၊ ဂေ ဝီ ငဝ်း ဒဲစေန့် ဂေ တွိုန်။ 7 ပန် တီ ခုန်ဒီခမ် ဘော ရူ ကာဆဝ်။ အန် ဝီ စ်ု ဒါ ဆိုက် အန်၊ တဲး ဂေ ငဝ်း ဝဲန် ဂေ ဒူအီ တွိုန်၊ အီ ဟဲ့ ငဝ်း အာဆာက် ဒဲစေန့် အန်။ အန် ဘော စ်ု ဂေ ဒုဝ့် မိူင် ဒူင် ကွယ် ဂေ တီ။

8 ပန် တီ အန် ဝီ တဝ်း ဒီ ဒဲစေန့် အန် မင် အီ၊ ‘အုဝ် ဟဲ့ ဟွတ့် ရဲန် ဘ့လွယ် ခတ်။ ဂေ ဒူအီ ပီ ဘာင် အုဝ်၊ ဂေ ယီ တူ ဆီ တး။ 9 တဲး ဘေ ဟာဝ် ဒီ ကာယဝ်း န့တေန့်၊ တဲး ဘေ ဘာင် ဒွန် အီ ပီ ကာတုန့် ဘေ။’ 10 ပန် တီ ဂေ ဒဲစေန့် အန် ဝီ ဟာဝ် ဒူပ် န့တေန့်၊ ဝီ ဒဲ့ ဒွန် အီ ပီ ယိုဝ် ဂေ၊ တဲး ဂေ တး။ ဘော ဒူအီ မွှိုမ် ဘော ဒူအီ တူ မွှိုမ်၊ ဂေ ဘောကာဂ့လျီတ် တး၊ တဲး ဒူအီ ကော နုဝ့် ခဲင် ဟုဝ် ဒူင် ဟူမ် ဂေ ဘ့လွယ် တွိုန်။

11 ပန် တီ န့ ဝီ မုး ခုန်ဒီခမ် တွိုန်၊ အန် ဝီ တး ယွတ် ခဲတ့် အီ ဟဲ့ တး လိုပ် ဘ့လွယ်။ အန် ဘော ယိုဝ် ဒူအီ အူ ဝီ၊ အီ စှိုပ် ခြိုင် အီ တူ ကာအာပ် စှိုပ် ဒေါ လိုပ် ဘ့လွယ် ခတ်။ 12 ခုန်ဒီခမ် ဝီ ဒီမွှတ် အန် တဝ်း၊ ‘အိုယ် ဂိုက်၊ မဲ ပါယ် မှဝ် ဒီ လိုပ် ခဲင် ဟုဝ် နီ။း မှဝ် န့ ပါယ် ပီ တူ စှိုပ် မဲ ခြိုင် အီ ကာအာပ် စှိုပ် ဒေါ ဟူမ် ဘ့လွယ် ခတ်။း’ ဒူအီ တွိုန် တူ နပ် ပီ ဒီ ကာလာင် အန်။

13 ပန် တီ ခုန်ဒီခမ် ဝီ စ်ု ဒဲစေန့် အန် တဝ်း၊ ‘ဒိုဝ်း ဒူအီ နီ၊ ပက် ဘော ပ့လဝ် ဘော ဒဲ အန်၊ ဝဲန် အန် နာ ရေတ့်၊ တဲး အန် ကွယ် ခဲင် အပ် ဝွင့်၊ တဲး အန် ဝီ ယာမ်၊ တဲး ကုင်ကာပ် အန် ကော ကာဒွယ် ဒီ ယုဝ်။’

14 န့ ဘော ပါယ် တီ။ ဇဝ်ဖြာ ဟဲ့ ဘာင် ဒူအီ ကိူန်၊ တဲး ဂေ လိုပ် ခဲင် မိူင် ပီ အိုပ် အန်။ ဂေ ဒူအီ ပီ ရဝ်း ဇဝ်ဖြာ၊ ဂေ ယီ တူ ကိူန်။” ခဲ့ တီ ဇဝ် ယေဆူ ကာလာင် လွင် ဘ့လွယ် ခတ်။^a

လွင် ဒွါ ရွိုန် စိုင် ဒီ ခုန်ဒီခမ် အာကဲဆာ

15 ဝါယ် အန် တီ ဂေ ဒူအီ ခဲင် ဖိုင် ဖာရီဆဲ ဝီ လေး ဒူင် ကွယ် ဇဝ် ယေဆူ၊ ဝီ လာယ် ဆင်ချာင် လွင် မှဝ် ဂေ ဒီ ပါယ် ဒီ ဒီမွှတ် အန်၊ တဲး အန် ဝီ ဝျီ့ ဂြုဝ်း တူ မွှိုမ်၊ တဲး ဂေ ပွိုန် ဒီ ဖျာက် အန်။ 16 ဂေ ဝီ တိုယ် ဒီဘဲ ဂေ မင် အီ တဲး ဂေ ဝီ ဟာဝ် ဇမ် ဒူင် ကွယ် ဇဝ် ယေဆူ။ ဘော ဂေ ဘော ဒူအီ ခဲင် ဖိုင် ခုန်ဒီခမ် အာဟေရူတ် မင် အီ၊ ဂေ ဟာဝ် ရိုမ်။ ဂေ တဝ်း၊ “မဲ ဆာရာ၊ ယေ နပ်၊ မဲ မုး ဒူအီ အီ ကာလာင် ဂြုဝ်း မှာန် အာခါခ်ု ဆေဆေ။ ယေ ဘော နပ်၊ ပီ မာနုဝ် မဲ လွင် ဒူအီ ဒူပ် ဇဝ်ဖြာ၊ န့ မှာန်။ မဲ မိူဝ် တူ ရွက့် တူ ဇွင့် အာဆေ။ 17 ခုဝ် အန် တီ တဲး မဲ ကာလာင် ဒီ ယေ၊ မာဆေ ပီ ထာင် မဲ။ ဆေ ယေ ဒွါ ရွိုန် စိုင် ဒီ အာကဲဆာ တွိုန်၊ န့ ဒူပ် တူ ဒူပ် ဒါရာ ဇဝ်ဖြာ။း”

18 ဇဝ် ယေဆူ ယီ နပ်၊ နဝ်း ဂေ တူ မွှိုမ်။ ဂေ ဆီ ဖျာက် အန်။ ခုဝ်၊ အန် ဝီ တဝ်း၊ “ဘေ မုး ဒူအီ အီ ညိုင်ရာင် ဘွတ်။ မာလဲ ဘေ ထေဝ် ဒီ ကာဆုး အုဝ် ကာလာင် ဂြုဝ်း အီ တဲး ဘေ ပွိုန် ဒီ ဖျာက် အုဝ်။^b 19 တဲး ဘေ ဒွါ ရွိုန် အူ ဘူင့် ဒီ အုဝ်၊ အီ မုး ရွိုန် ပီ လုဝ် ဒွါ ဘေ ဒီ အာကဲဆာ။” ဂေ ဝီ ဒွါ ရွိုန် ဇဲတ် အူ ဘူင့် ဒီ အန်။ 20 အန် ဝီ ဒီမွှတ် ဂေ တဝ်း၊ “အာရိုပ် အာဆေ န့ မုး ဒဲင် ရွိုန် နီ။း စိူဝ် အာဆေ ဟဲ့ ဒဲမ် နာ ဒဲင်။း”

21 ဂေ ဝီ တဝ်း၊ “အာကဲဆာ။” ပန် တီ အန် ဝီ တဝ်း ဒီ ဂေ အီ တး ဒီမွှတ် အန်၊ “တဲး ဘေ ဒွါ ဒီ အာကဲဆာ ခဲ့ ပီ လုဝ် ဘေ ဒွါ ဒီ အန်။ တဲး ဘေ ဘော ဒွါ ဒီ ဇဝ်ဖြာ ခဲ့ ပီ လုဝ် ဘေ ဒွါ ဒီ ဇဝ်ဖြာ။” 22 ဂေ ဒူအီ တွိုန် ဟဲ့ ထူမ် ဂြုဝ်း တီ၊ ဂေ ဘော အာမ်။ ဂေ ဝီ လေး ဟာဝ် ဒူင် ကွယ် ဇဝ် ယေဆူ။

လွင် ဒူအီ အီ ဟဲ့ ဟွတ့် ယမ် ဝီ ယိတ့် ဝီ အိမ်

23 ဆီငဲ အန် တီ၊ န့ ဘော မိုဝ်း ဂေ ဒူအီ ခဲင် ဖိုင် ဆာဒူခဲ မင် အီ၊ ဂေ တး ဒူင် ကွယ် ဇဝ် ယေဆူ။ ဂေ ဒူအီ ခဲင် ဖိုင် တီ၊ ဂေ တဝ်း၊ ဆေ ဒူအီ ဟဲ့ ဟွတ့် ယမ်၊ ဂေ တူ ပွိုန် ဒီ ဝီ ယိတ့် ဝီ အိမ်။ ဂေ ဒူအီ ဇိုဝ် တီ ဝီ တး ဒီမွှတ် ဇဝ် ယေဆူ။ 24 ဂေ တဝ်း၊ “ဆာရာ၊ ဒါ အာမုဝ်ဆဲ တွိုန်၊ အန် ဟဲ့ မာနုဝ် အေ လွင် ဒူအီ ယမ်။ အန် ဟဲ့ ဒွိုမ် တဝ်း၊ ဆေ အီမာယ် အူ ဝီ ယမ် အာတ့် ယမ် အီဘိုန့် အန်၊ ဆေ အန် ညှမ် မိုဝ်း ဂွန်၊ ဝါ အန် လုဝ် ဝီ လာယ် ယာ ဆီပြး တီ၊ တဲး ဂွန် ဂါယ် ဝီ ဘဲန် ဂွန် အီကတ် အန်၊ ကွဲ့ တဲး ခြိုဝ် အီကတ် အန် ဟြာယ်။ 25 န့ ယီ ဒွိုမ် မိုဝ်း ဂေ အူကတ် အူဝါ ဘူ ဝီ။ ဝီ တာင် ဟဲ့ ခတ် ဒိုဝ်း အီဘိုန့်။ အန် ယီ ယမ် ဒေါ ညှမ် မိုဝ်း အန် ဂွန်။ ခုဝ်၊ ဝါ အန် ပီ ဝီ ဒိုဝ်း အီဘိုန့် တီ။ 26 အီမာယ် တီ ပီ ဝီ ယမ် အာတ့် မိုဝ်း အန် ဂွန်။ ဘော ဒွန် အီ လာယ် ဒါမ် ပါယ် တီ။ ဂေ အူကတ် အူဝါ ဘော ဘူ ဝီ၊ ဂေ ဒွန် အီ ဟဲ့ ဒွိုမ် ခတ် ဒိုဝ်း အီဘိုန့် တီ၊ ယီ တူ မိုဝ်း ဂွန်။ 27 ဟဲ့ ဟွတ့်၊ ဘော အီဘိုန့် တီ ဘော ဝီ ယမ်။

28 ဆေ ဂေ ဒူအီ ယမ် ဒီ ဝီ ယိတ့် ဝီ အိမ်၊ အီဘိုန့် တီ ဒီ ဝီ ဘဲန် အီဘိုန့် အာဆေ ခဲင် ဒူအီ ဘူ ဝီ တွိုန်၊ အီ ဟဲ့ ဒွိုမ် ဘဲန် အီမာယ် အန်။း”

29 ဇဝ် ယေဆူ ဝီ ဝျီ့ ဂြုဝ်း တီ။ အန် တဝ်း၊ “ကူပ် တူ နပ် ဆီချာ ဘေ ပီ ဒဲမ် အုန် ခဲင် ဘပ် ဇဝ်ဖြာ၊ ပီ ဇေန့်ဇာ ဘေ ဟဲ့ ကာလိုပ်။ ဘေ မိူဝ် တူ နပ် မာဆေ လွင် ပွုန် ဇဝ်ဖြာ။ 30 ပန် ဒီ ဝီ ယိတ့် ဝီ အိမ် ဂေ ဒူအီ အီ ဟဲ့ ဟွတ့် ယမ်၊ ဂေ တူ ဝီ လာယ် ခတ်။ ဂေ ဒီ ဘော ပီ အာမူ အာမာတ် ဇဝ်ဖြာ အီ ကွယ် ခဲင် ဂါင်ဟြာဝ်။ 31 ဆေ န့ ယီ မုး လွင် ဂေ ဒူအီ အီ ဟဲ့ ဟွတ့် ယမ်၊ ဂေ ဒီ ဝီ ယိတ့် ဝီ အိမ်၊ ဘေ တူ ဒွိုမ် တိး ပဲ့ ဟဲ့ ကာလာင် ဇဝ်ဖြာ ဒီ ဘေ။း အန် ဟဲ့ တဝ်း၊ 32 ‘အုဝ် မုး ဇဝ်ဖြာ ပီ ကြိုပ် ဘော အာဘြာဟမ် ဘော အာဆဲက် ဘော အာကူပ် တွိုန်။’^c ဆေ ဒူအီ ဟဲ့ ဟွတ့် ယမ်၊ ဂေ တူ ပွိုန် ကြိုပ် ဇဝ်ဖြာ။ န့ မုး မီ ဂေ ဒူအီ အိမ်၊ အီ ပွိုန် ကြိုပ် ဇဝ်ဖြာ။ ခုဝ်၊ ဒါ တာင် အူယ် ဝီ တွိုန် ဟဲ့ ဝီ ယိတ့် ဝီ အိမ်၊ ကွယ် ခဲင် မိူင် ပီ အိုပ် ဇဝ်ဖြာ။”

33 ဂေ ဒူအီ ကိူန် အီ ထူမ် ဂြုဝ်း တီ၊ ဂေ ဝီ အာမ် ကာဆဝ် ဂြုဝ်း ပီ မာနုဝ် ဇဝ် ယေဆူ။

လွင် ဒါရာ ဇဝ်ဖြာ ညွင့် အီ လုဝ် ဒူပ် ဒီ အာတ့်

34 ဇဝ် ယေဆူ ဟဲ့ ဟွတ့် ကာလာင် လွင် အန် တီ၊ ဂေ ဒူအီ ခဲင် ဖိုင် ဆာဒူခဲ တွိုန်၊ ဂေ ကော ဟူ နပ် ဒီ ဝီ ဝျီ့ ဂြုဝ်း အန်။ ဝါယ် အန် တီ၊ ဂေ ဒူအီ ခဲင် ဖိုင် ဖာရီဆဲ ဘော နပ် လွင် အန် တီ။ ခုဝ်၊ ဂေ ဝီ တး လာယ် ကာဇု၊ 35 ဝီ စ်ု ဒါ အီ မာနုဝ် ဒါရာ ဇဝ်ဖြာ အူ ဝီ၊ တဲး အန် ဝီ ဒီမွှတ် ဇဝ် ယေဆူ ပေါ အူ မျုဝ်၊ တဲး ဂေ ဝီ ဟြေတ့် ဒင် ဒီ ပွိုန် ဂေ ဒီ ဖျာက် ဇဝ် ယေဆူ။ ဒူအီ ဝီ တီ ဟဲ့ နပ် ဆီချာ ဒါရာ ဇဝ်ဖြာ။ 36 အန် တဝ်း၊ “ဆာရာ၊ ခဲင် ဒါရာ ပီ ဒွါ ဇဝ်ဖြာ ဒွန် ညွင့်၊ ဒါရာ ညွင့် မှဝ် မုး ဒါရာ အီ လုဝ် ဒူပ် အာတ့် ဒူပ် ဒါရာ ညွင့် ဟဝ်။း”

37 ဇဝ် ယေဆူ ဝီ တဝ်း၊ “ဒါရာ တီ၊ န့ တဝ်း၊ ‘ဇဝ်ဖြာ ပီ ကြိုပ် ဘေ၊ အန် ဘော မုး ဇဝ်ဖြာ အီ အိုပ် ဘေ။ ဘေ လုဝ် ရွက့် အန် ဇဝ် တီ၊ တဲး ဘော နဝ်း ဘော တူတ့် ရွက့် အန်။ ခဲ့ ပွိုန် ဘေ ရွက့် ခဲင် နဝ်း၊ ခဲ့ မိုဝ်း ဘေ အာငျာန်၊ ခဲ့ မိုဝ်း ဘေ ပ့လူမ်၊ ဇိုဝ် တီ ဒွန် မျုဝ် ဘေ လုဝ် ဒိုဝ်း တူတ့်၊ ဝီ ရွက့် အန် ဇဝ်။’ 38 အာတီ မုး ဒါရာ ဇဝ်ဖြာ အူ ညွင့်၊ ပီ လုဝ် ဒူပ် အီ ဒီ အာတ့်။ 39 န့ မိုဝ်း ဒါရာ ပေါ အူ ညွင့် ပီ လုဝ် ဒူပ် အီ၊ တဲး န့ ပီ ပီ ဒူပ် ဂေ ဒါရာ ပဲ့ ဟဲ့ ဟွတ့် ကာလာင် အုဝ်။ န့ တဝ်း၊ ‘ဘေ လုဝ် ရွက့် အီ ဟဝ်၊ တဲး န့ ပီ၊ ဘေ ရွက့် ဒုဝ် ဘြိမ် ဘေ။’ 40 န့ မုး ဒါရာ အာ ညွင့် တီ၊ ပီ လုဝ် ဒူပ် အီ ဒီ အာတ့် ဒါရာ ဒွန် ညွင့်။ ဒါရာ ပီ ဒွါ ဇဝ်ဖြာ ဒီ အီ ဘော ဂြုဝ်း ပီ မာနုဝ် ဂေ ဒူအီ အီ ဘျာန် ဂြုဝ်း ဇဝ်ဖြာ၊ ဒွန် မျုဝ် ဇိုဝ် တီ၊ န့ ဒူပ် တူတ့် ဒါရာ အာ ညွင့် တီ။”

လွင် ဒူအီ ပီ ရဝ်း ပီ တိုယ် ဇဝ်ဖြာ

41 ဝါယ် အန် တီ န့ မိုဝ်း ဒူအီ ခဲင် ဖိုင် ဖာရီဆဲ။ ဂေ ကွယ် ရိုမ်၊ လာယ် ဆင်ချာင်။ ဒေါ အန် တီ ဇဝ် ယေဆူ ဝီ ဒီမွှတ် ဂေ။ အန် တဝ်း၊ 42 “မာဆေ ပီ ထာင် ဘေ လွင် ဒူအီ ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ။း ဘေ ထာင် အန် မုး ဂွန် အာဆေ။း” ဂေ တဝ်း၊ “အန် မုး လှုက်လှာန် ခုန်ဒီခမ် အာဒါဝိတ် တွိုန်။”

43 ဇဝ် ယေဆူ ဝီ တဝ်း၊ “ဆေ န့ ပါယ် တီ၊ မှဝ် န့ ပါယ် ပီ တဝ်း အာဒါဝိတ်၊ လှုက်လှာန် အန် တီ မုး ဒါ ကာညာ အန်။း ခုဝ်၊ နဝ်း ဖွိုမ် ဇဝ်ဖြာ ဟဲ့ တဲး အန် ကာလာင် ပါယ် နီ၊ 44 ‘ဇဝ်ဖြာ ဟဲ့ ဒွိုမ် ကာလာင် ဒီ ဒါ ကာညာ အုဝ်၊ “တဲး မဲ တုတ့် ဘ့လာက် အာအး အုဝ်၊ တဲး န့ ဇမ် အာခြာဝ် ဒီ တဲး အုဝ် တဲး မဲ ညဲတ့် တူတ့် ရန်ဆူ မဲ။”’

45 ပါယ် တီ၊ ခုန်ဒီခမ် အာဒါဝိတ် တွိုန် ဟဲ့ တဝ်း၊ ဒူအီ ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ၊ အန် မုး ဒါ ကာညာ အီ အိုပ် အာဒါဝိတ်။ ခုဝ်၊ ဘေ တူ ပွိုန် တဝ်း၊ အန် မုး လှုက်လှာန် အာဒါဝိတ်။” 46 ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ၊ အာဝ် မိုဝ်း အာဆေ အီ ပွိုန် ဝျီ့ ဂြုဝ်း အန် တီ။ အူ ဆိန့် ဆီငဲ တီ၊ အာဝ် ဟူ မိုဝ်း အာဆေ အီ ဝီ ယ တး ဒီမွှတ် ဇဝ် ယေဆူ ပေါ န့ ပွါ။