မ်ထ 10

လွင် ဇဝ် ယေဆူ ရဝ်း ဒီဘဲ အန် ဘော စ်ု ဂေ ဟာဝ် ဘဲန် ပ့လုဝ့် ဘဲန် ပ့လုဝ့်

1-4 ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ၊ အန် ဝီ စုး ဒီ ဒဲ့ ဒီဘဲ အန် ဂိုဝ် ဒီ အာ ဝီ၊ တဲး ဂေ ဒူပ် အန် ဆေဆေ။ န့ ဘော မုး အာဆီမူန် အီ စိူဝ် ဘော အာပေတာရူ ဘော ဝါ အန် အီ စိူဝ် အာအန်ဒါရူ ဘော အာယာကူပ် အီ မုး ဂွန် အာဇေဘေဒေ ဘော ဝါ အန် အီ စိူဝ် အာယောဟာန် ဘော အာဖီလိပ် ဂါယ် အာဘာထုဝ်လုဝ်မုဝ်၊ အာထုဝ်မာတ် ဘော အာမာထဲ အီ မုး ဒူအီ ဂဲပ် ရွိုန် စိုင် ဘော အာယာကူပ် အီ မုး ဂွန် အာလာဖဲ ဘော အာထာဒေ ဘော အာဆီမူန် အီ ဟဲ့ ဒွိုမ် ဘဲန် ဒါ ဇူန် ဘော အာယူဒတ် အီ စိူဝ် ဘော အာဆာခါရီအူတ်၊ အီ အာပ် ဇဝ် ယေဆူ ဒီ ရန်ဆူ အန်။ ဒူအီ ဂေ တီ ဟဲ့ ဘဲန် ဒီဘဲ ဇဝ် ယေဆူ ဂိုဝ် ဒီ အာ ဝီ။ ဇဝ် ယေဆူ ဘော ဒွါ ပွုန် အန် ဒီ ဂေ၊ တဲး ဂေ ဆုတ့် ကာနမ် လေး ခဲင် ဒုဝ် ဘူင့် အီ ဘော တဲး ဂေ ပီကဲန် ဆဝ် ဒူအီ ဘဲန် မျုဝ် ဘဲန် မျုဝ်။

5-6 ဇဝ် ယေဆူ ဘော စ်ု ဂေ ဒီဘဲ အန် ဂိုဝ် ဒီ အာ ဝီ တီ။ အန် တဝ်း၊ “တဲး ဘေ ဟာဝ် ဒူင် ကွယ် ဂေ ဒူအီ အီဆာရေလ။ ဒူအီ ဂေ တီ၊ ဂေ ပီ မာဘူ အီ တူ မိုဝ်း ဒါ အီ ဟျီင်။ ကွဲ့ ဟာဝ် ဒူင် ကွယ် ဂေ ဒူအီ အာမျုဝ် ဟဝ်။ ကွဲ့ ဟာဝ် လိုပ် မိူင် ဂေ ဒူအီ ဆာမာရီ။ 7 ဘေ လုဝ် ဟာဝ် ကာလာင် ဒီ အီ၊ ‘အာခြာဝ် ဒီ အိုပ် ဇဝ်ဖြာ ကာဒါယ် ဟဲ့ ကာတတ် ဒီ တး။’ 8 ဘေ လုဝ် ပီကဲန် ဒူအီ ဆဝ်၊ ဝီ ဘူင် တဲး ဒူအီ ယမ် ဝီ ယိတ့် ဝီ အိမ်။ ဘူင် တဲး ဂေ ဒူအီ အီ မိုဝ်း ဆဝ် ဒုတ်^a ဝီ ကဲန်၊ ဆုတ့် ဂေ ကာနမ် လေး တ ဒုဝ် ဘူင့် အီ။ ပွုန် ပီ ဒွါ အုဝ် ဒီ ဘေ အီ တဲး ဘေ ဘူင် ဇိုဝ် တီ ဘဲန် မျုဝ် ဘဲန် မျုဝ်၊ အုဝ် ဟဲ့ ဒွါ ဒီလူယ် ဒီ ဘေ၊ အာဝ် လုဝ် ဒွါ ရွိုန်။ ခုဝ်၊ ဘော ဘေ လုဝ် ဒွါ ဒီလူယ် ဒီ အီ၊ ကွဲ့ မှာန့် ရွိုန်။ 9 ကွဲ့ ဟပ် ရွိုန် ခဲင် ဆဲ့ ဘေ။ 10 ကွဲ့ ဂူင့် ဟူ ဒေါ ဟာဝ် ဘေ ဒူပ် န့တေန့်။ ကွဲ့ ဂူင့် ဆီတုဝ် ကာပ့လုတ်။ ကွဲ့ ဒိုဝ်း ခူဒိန့် ဂေ န့ကြွုန်။ ခုဝ်၊ အာဆေ ဘူင် ဂါန်၊ အန် ဘော ကာအာပ် ပွိုန် ရုး အန်။

11 ဘေ ဘော ဟာဝ် နာ မှဝ်၊ ဆေ ဘေ ဇမ် အူ ပ့လုဝ့်၊ တဲး ဘေ ဟြေတ့် ဒူအီ မွှိုမ်၊ အီ တဲး ဘေ ကွယ် ခဲင် ကာင် အန်။ ဟဲ့ ဟွတ့်၊ ဘေ လုဝ် ကွယ် ခဲင် ကာင် တီ၊ တဲး ကော ဇမ် အာခြာဝ် ဒီ ဝီ ဝေန့် ဘေ။ 12 ဆေ ဘေ လိုပ် ခဲင် ကာင် ဒူအီ ဇိုဝ် တီ၊ ဘေ လုဝ် မွင့်ကာရာ တဲး ဒီ ဂေ အီ ကွယ် ခဲင် ကာင် တီ၊ တဲး ဂေ မိုဝ်း နဝ်း ဂျီတ်။ 13 ဆေ ဒူအီ ခဲင် ကာင် တီ ဆီ ပွိုန် ပီ မွင့်ကာရာ တဲး ဘေ ဒီ ဂေ၊ ဘေ လုဝ် တဲး ပီ မွင့်ကာရာ ဘေ တီ ကွယ် ဒီ ဂေ။ ဆေ ဂေ ယီ တူ လုဝ် ပီ မွင့်ကာရာ တဲး ဘေ ဒီ ဂေ၊ ဘေ လုဝ် ဝီ ဒိုဝ်း ပီ မွင့်ကာရာ ဘေ တီ၊ ကွဲ့ တဲး န့ ဘဲန် နဝ်း ဂျီတ် ဒီ ဂေ။ 14 ဆေ ဒူအီ တူ ရွုး ဘေ၊ ဆေ ဂေ တူ ဆီ ထူမ် ဂြုဝ်း ဘေ၊ ဘေ လုဝ် လေး ဒူင် ကွယ် ဂေ ဘော ဒီယိုဝ်း ရး ကာပုး ဒီ ပ့လဝ် ဘေ၊ တဲး န့ ဘျ ဒီ ဂေ လွင် ပီ တူ ထူမ် ဂေ၊ န့ တူ မွှိုမ်။ 15 အုဝ် ယီ တဝ်း အာခ်ု ဒီ ဘေ။ ဆေ ဇဝ်ဖြာ ဒီ ဆုင်ဖျာတ် ဒါရာ ဒီ ဒူအီ ဘောကာဂ့လျီတ်၊ ဂေ ဒူအီ အီ ဒွိုမ် ကွယ် ခဲင် မိူင် ဆုဝ်ဒူမ် ဂါယ် မိူင် ဂုဝ်မုဝ်ရာ တွိုန်၊ ဂေ လုဝ် ခမ် မှာပ် ကိူန်။ မာလဲ၊ ဂေ ယီ တူ လုဝ် ခမ် ခဲ့ ပီ လုဝ် ခမ် ဂေ ဒူအီ အီ တူ ထူမ် ဂြုဝ်း ဘေ။ 16 အုဝ် မိူဝ် စ်ု ဘေ ဟာဝ် ကာလာင် ဒီ အီ လွင် အုဝ်၊ တဲး ဘေ ပီ မာဘူ အီ ဟာဝ် ဒူင် မိုဝ်း မာဆုဝ် ပြဲ၊ အီ ဆီ ကဝ့် မာဘူ။ ခုဝ်၊ ဘေ လုဝ် လွှက့် ပီ မာဟန့်။ ဘေ ယီ လုဝ် ဘ့လေး နဝ်း၊ တဲး န့ ပီ မာဘ့လူယ်၊ ကွဲ့ တဲး ဘေ ဘူင် နာ တူ မွှိုမ်။

17 ဘေ လုဝ် ဆာဒိက် ဂေ ဒူအီ။ ဆေ ဂေ တူ အိုင် ဒီ ထူမ် ဂြုဝ်း ဘေ၊ ဂေ ဒီ အာပ် ဘေ ဒီ ဒါ တာင် ခဲင် မိူင် ဂေ။ ဂေ ဒီ ဘော ဒဲ့ ဘေ တး ခဲင် ဇူင် ဂေ၊ တဲး ဂေ မး ဘေ။ 18 ဂေ ဒီ ဘော တိုယ် ဘေ ဟာဝ် ဒီ အာတ့် ဂေ ဒါ ကာညာ အီ အိုပ် မိူင် ဘော ခုန်ဒီခမ် အီ အိုပ် မိူင် အီ ဟဝ်၊ တဲး ဘေ ကာလာင် လွင် အုဝ် ဒီ ဒူအီ ဇိုဝ် တီ ဘော ဒီ ဂေ ဒူအီ အာမျုဝ် ဟဝ်၊ အီ တူ နပ် ဇဝ်ဖြာ။ 19 ဆေ ဂေ ဒီ ဘော မှေတ့် ဘေ၊ တဝ်း ဒီ ခြွင့် ဘေ ခဲင် ကာပိုမ်၊ ကွဲ့ တဲး နဝ်း ဘေ ကာဟွာ့၊ ကွဲ့ ဇေန့်ဇာ ဒီ အာတ့်၊ မာဆေ ပီ ဒီ ကာလာင် ဘေ ဒီ ဂေ၊ မှဝ် ဘေ ဒီ ပါယ် ဒီ ကာလာင် ဂြုဝ်း ဒီ ဂေ။ ဟီ ဇမ် အာခြာဝ် ဒီ လုဝ် ဘေ ကာလာင်၊ ဇဝ်ဖြာ ဒီ တဲး ဘေ နပ် ဆီချာ ဂြုဝ်း ပီ ဒီ လုဝ် ဘေ ကာလာင်။ 20 မာလဲ၊ ဂြုဝ်း အီ လေး ခဲင် မူတ့် ဘေ အာဝ် မုး ဂြုဝ်း ဘေ။ ဇဝ်ဖြာ အီ ပီ ဂုန့် ဘေ၊ အန် ဒီ တဲး နဝ်း ဖွိုမ် ဇဝ်ဖြာ ကာလာင် ခဲင် မူတ့် ဘေ။

21 န့ ဒီ မိုဝ်း အူကတ် အူဝါ၊ ဂေ ဒီ လာယ် အာပ် ဒီ ဒါ တာင်၊ တဲး ဂေ ယမ်။ ပါယ် တီ၊ န့ ဒီ မိုဝ်း ဘော ဂုန့် အီ နပ် ဒီ အာပ် ဂွန် အန်၊ တဲး အန် ယမ်။ ဘော ဂွန် ဒီ ရူ ဒီ ဂုန့် မာ အန်၊ တဲး ဂါယ် ယမ်။ 22 ဂေ ဒူအီ ဟဝ် ဒီ ဘော ဇွင့် ဘေ ကူပ် ညှိုမ် ဘေ ဒီ အုဝ်။ အာဆေ ယီ ခမ် ဒုက် ဇိုဝ် တီ ဒွန် မျုဝ်၊ အာဆေ တူ ဝဲန် အုဝ် တဲး ကော ဇမ် ပန် တူတ့် အာဆာက် အန်၊ ဇဝ်ဖြာ ဒီ ချွတ် ဒူအီ ဇိုဝ် တီ။ 23 ဆေ ဂေ ဒူအီ ဒွါ ဒုက် ဒီ ဘေ ဒေါ ကွယ် ဘေ အူ ပ့လုဝ့်၊ ဘေ လုဝ် ဝီ တဝ် ဟာဝ် ပေါ အူ ပ့လုဝ့်။ အုဝ် တဝ်း အာခ်ု ဒီ ဘေ။ န့ မုး အုဝ်၊ အီ ဟဲ့ ဘဲန် ဂွန် ဒူအီ၊ အုဝ် ဒီ ဝီ တး ဇမ် ဒဲင် ကာဒါယ် နီ။ အာတ့် တး ဇမ် အုဝ်၊ ဘေ တူ ပဲ ဒီ ဟာဝ် ဒွန် နာ ဒွန် ပ့လုဝ့် ခဲင် မိူင် အီဆာရေလ၊ ဝီ ဟုဝ် ဒါရာ လွင် အုဝ်၊ တဲး ဂေ ဒွန် အီ ကော နပ်။ အုဝ် ဒီ တး အာတ့် ဘူင် ဟွတ့် ဘေ ဂါန် တီ။

24 ဆေ န့ မုး ဒီဘဲ အီ၊ အန် တူ တာင် လွှိုမ် ဒါ ဆာရာ အန်။ ဘော မှာယ် အီ၊ အန် တူ တာင် လွှိုမ် ဒါ ကာညာ အန်။ 25 ဆေ ဒီဘဲ ပဲ ပီ ဘဲန် ပီ ဒါ ဆာရာ အန်၊ န့ ဟဲ့ စူ ခဲ့ တီ။ ဘော မှာယ် အီ၊ ဆေ အန် ဟဲ့ ဘဲန် ပီ ဒါ ကာညာ အန်၊ အန် တူ လုဝ် ပေါ န့ ပွါ။ န့ ဘော ပါယ် တီ လွင် အုဝ်။ အုဝ် ပီ ဂိန့် န့ဟူမ်။ ဆေ ဂေ တဝ်း ဒီ ဂိန့် န့ဟူမ် တီ၊ အန် မုး ကာနမ် အီ စိူဝ် ဘေဆေဘူ၊^b ဂေ ဒီ ဘော တဝ်း ပါယ် တီ ဒီ ဂေ ဒူအီ အီ ကွယ် ခဲင် ကာင် အန်။

26 ဘေ ယီ တူ လုဝ် ယုဝ် ဂေ ဒူအီ အီ ဇွင့် ဘေ။ ဒူအီ တူ ပွိုန် ချြီင် မာဆေ။ ခဲ့ ပီ ဆီ ချြီင် ဂေ၊ န့ ဒီ ဝီ လိုဝ်း ဆီချာ ဒီ အီ။ ခဲ့ ပီ ကာဘိတ် အီ ကွဲ့ တဲး အီ ယိုဝ်၊ န့ ဒီ ဝီ လိုဝ်း ဆီချာ၊ ဝီ တဲး ဒွန် အီ ပွိုန် ဒီ ယိုဝ်။ 27 ပီ တဝ်း အုဝ် ဒီ ဘေ ခဲင် မှိုဝ်၊ တဲး ဘေ ဝီ ကာလာင် ဒေါ ကာတဲ ဆီငဲ။ ပီ ဖူဖာပ် အီ ခဲင် ဟျုဝ့် ဘေ၊ ဘေ လုဝ် ဝီ ဒတ် တာင် ဒဲင် ဂြး၊ တဲး ဒွန် အီ ကော နပ်။ 28 ဘေ ကွဲ့ ယုဝ် ဂေ ဒူအီ အီ နပ် ဒီ ငဝ်း ယမ် ဒုဝ် ဘူင့် ဘေ၊ ယီ တူ ပွိုန် တဲး ဘေ စုဝ်း ကာလုဝ့် ငါရာယ်။ ဘေ ယီ လုဝ် ယုဝ် ဇဝ်ဖြာ အီ ပဲ ဒီ ဝဲန် ဘော ဒုဝ် ဘော နဝ်း၊ တဲး ဘေ စှိုမ် တူတ့်၊ စုဝ်း ခဲင် ကာလုဝ့် ငါရာယ်။ 29 ဆေ န့ မုး မာဆိမ် မာဆီလဝ်း၊ ဂေ ဒူအီ ယွင့် အာ ဒုဝ် အူ ဘျာ။ ဆေ ဇဝ်ဖြာ တူ ဆီ တဲး ဂေ ယမ်၊ အူ ဒုဝ် မိူဝ် တူ ယမ်။ ဘော ဘေ မိူဝ် ပါယ် တီ။ 30 ဇဝ်ဖြာ ဟဲ့ နပ် တူတ့် ဒွန် မျုဝ် လွင် ဘေ။ န့ ပီ အန် ဟဲ့ တိး ဟိုက် ဂိန့် ဘေ ဒွန် ညွင့်။ 31 ဆေ န့ ပါယ် တီ၊ ဘေ တူ လုဝ် ယုဝ် မာဆေ။ ငဝ်း ဘေ ဟဲ့ တာင် လွှိုမ် ငဝ်း ဂေ မာဆီလဝ်း အီ ကိူန် ကာဆဝ်။

32 ဆေ ဒူအီ အူ ဝီ ကာလာင် ဒီ အီ ဟဝ် လွင် ညှိုမ် အန် ဒီ အုဝ်၊ အုဝ် မိူဝ် ဒီ ဝီ ကာလာင် လွင် အန် ဒီ ဂုန့် အုဝ်၊ အီ ကွယ် ဂါင်ဟြာဝ်။ 33 ဆေ ဒူအီ ယီ တဝ်း ဒီ အီ ဟဝ်၊ အန် တူ နပ် အုဝ်၊ အုဝ် မိူဝ် ဒီ တဝ်း ဒီ ဂုန့် အုဝ် လွင် ဒူအီ ဝီ တီ၊ ‘အုဝ် တူ နပ် အန်။’

34 ဆေ ဘေ ထာင်၊ အုဝ် တး ဒဲင် ကာဒါယ် နီ၊ ဒီ တဲး ဂေ ဒူအီ ကွယ် ရိုမ်၊ ကွယ် ဒါခိုယ်၊ န့ တူ မှာန်။ ကူပ် ဟဲ့ တး အုဝ် ဒဲင် ကာဒါယ် နီ၊ ဂေ ဒူအီ ဒီ လာယ် ကာဂုဝ်း၊ လာယ် ရူ။ 35 ကူပ် တး အုဝ် ဒဲင် ကာဒါယ် နီ၊ န့ ဒီ မိုဝ်း အူ ဂုန့် အူ ဂွန် ဘော အူ ဂွန် အူ မာ ဘော အူ ဂိုန့် အူ အဝ် ဒီ လာယ် ကာယဝ်း။ 36 ဂေ ဒူအီ အီ ကွယ် အူ န့ဟူမ်၊ ဂေ ဒီ ဘော မိုဝ်း ရန်ဆူ ကာတဲ ဂေ။

37 ဆေ ဒူအီ အူ ဝီ ယီ ရွက့် ဂုန့် မာ အန် လွှိုမ် ရွက့် အန် ဒီ အုဝ်၊ အာဝ် ပွိုန် ဘဲန် ဒီဘဲ အုဝ်။ အာဆေ ဘော ရွက့် ဂွန် အန် လွှိုမ် ရွက့် အန် ဒီ အုဝ်၊ အာဝ် ပွိုန် ဘဲန် ဒီဘဲ အုဝ်။ 38 အာဆေ ဆီ ဒူပ် အုဝ် လုဝ် ဘ့လေး နဝ်း အန် တဝ်း၊ ‘ဆေ အုဝ် ဒီ ဘော လုဝ် ယမ်၊ အုဝ် ယီ ဒီ ဒူပ် ဇဝ်ဖြာ ဆေဆေ။’ အာဆေ တူ ဘ့လေး နဝ်း ပါယ် တီ၊ အာဝ် ကာအာပ် ဒူပ် အုဝ်။ 39 အာဆေ လှယ် အာဆာက် အန်၊ အန် ဒီ စှိုမ်။ အာဆေ ယီ တူ ယုဝ် ဒီ ယမ် ကူပ် ဒူပ် အန် ဒီ အုဝ်၊ အန် ဝီ ပွိုန် အာဆာက် ကာမာယ်။

40 အာဆေ ရွုး ဘေ၊ အန် ဒီ ဘော ရွုး ဘော အုဝ်။ အာဆေ ယီ ရွုး အုဝ် တဲး အုဝ် လိုပ် ခဲင် နဝ်း၊ အန် ဒီ ဘော ရွုး ဘော ဇဝ်ဖြာ အီ တိုယ် အုဝ် တး ဇမ် ဒီ နီ၊ တဲး အန် ဇဝ် လိုပ် ခဲင် နဝ်း အန်။ 41 အာဆေ ရွုး ဒူအီ အီ ဘျာန် ဂြုဝ်း ဇဝ်ဖြာ ကူပ် ကာလာင် အန် ဂြုဝ်း ဇဝ်ဖြာ၊ အန် ဒီ ဝီ ပွိုန် ရုး ပီ ပွိုန် ဒူအီ အီ ဘျာန် ဂြုဝ်း ဇဝ်ဖြာ တွိုန်။ အာဆေ ဘော ရွုး ဒူအီ အီ ဘူင် နာ မှာန် ဆေဆေ၊ အန် ဒီ ဘော ပွိုန် ရုး ပီ ပွိုန် ဒူအီ ဇိုဝ် တီ။ 42 ဆေ ဒူအီ အူ ဝီ ဒီ ဒွါ အိုမ် ဂျီတ် ဒီ ဒူအီ ပီ ရွက့် အုဝ်၊ တဲး အန် ဒျီင်၊ ဆေ အန် ဒွါ အိုမ် တီ ကူပ် မုး ဒူအီ တီ ဒီဘဲ အုဝ်၊ အုဝ် ဒီ ဝီ ဒွါ ရုး ဒီ အန်။ အာတီ အုဝ် တဝ်း အာခ်ု ဒီ ဘေ။”