လွင် ဂေ ဒူအီ မိုဝ်း အာငျာန် တး ကြိုပ် ဇဝ် ယေဆူ
2
1 ဇဝ် ယေဆူ ဟဲ့ ဂွိုတ် ခဲင် မိူင် ဘေတ်လဲမ် အီ ကွယ် ခဲင် အိူင် ယူဒါ။ ဒေါ အန် တီ န့ မိုဝ်း ခုန်ဒီခမ် အာဟေရူတ် တွိုန်။ အန် အိုပ် ခဲင် အိူင် တီ။ န့ ဘော မိုဝ်း ဒူအီ အီ မိုဝ်း အာငျာန်။ ဂေ တး နာ လေး ဆီငဲ၊ ဝီ ဇမ် ခဲင် မိူင် ယေရူဆာလဲမ် တွိုန်။ 2 ဂေ ဒီမွှတ် အီ ဟဝ် တဝ်း၊ “မှဝ် ဒူင် ကွယ် ဂွန် အီ ဟဲ့ တး ဂွိုတ် ဘဲန် ခုန်ဒီခမ် ဒူအီ ယူဒါ။း ယေ ဟဲ့ ယိုဝ် ဆီမန့် ဟဲ့ လေး နာ လေး ဆီငဲ အီ ဘျ လွင် အန်။ ပန် တီ ယေ ဟဲ့ တး ဒီ နီ၊ တဲး ယေ ပွိုန် ဒီ ကြိုပ် အန်။”3 ခုန်ဒီခမ် အာဟေရူတ် တွိုန် ဘော ယိုဝ် လွင် အန် တီ၊ န့ ဘဲန် ဒုက် တာင် ဒီ နဝ်း အန်။ ဘော ဒူအီ ဒွန် အီ ခဲင် မိူင် ယေရူဆာလဲမ် ဟဲ့ ဘဲန် နဝ်း အာဝ် ဒါခိုယ်။ 4 ပန် တီ အန် ဝီ ဒဲ့ ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ ဘော ဂေ ဒါ ဆာရာ အီ မာနုဝ် ဒါရာ ယူဒါ၊ တဲး ဂေ ဘောကာဂ့လျီတ် တး ကာဇု ဒူင် ကွယ် အန်။ ဟဲ့ ဟွတ့်၊ အန် ဝီ ဒီမွှတ် ဂေ လွင် ဒူအီ ပီ ရဝ်း ပီ တိုယ် ဇဝ်ဖြာ အီ ဒီ တး ချွတ် ဒူအီ၊ နာ မှဝ် အန် ဒီ ဂွိုတ်။ 5 ဂေ ဝီ တဝ်း၊ “အန် ဒီ ဂွိုတ် ခဲင် မိူင် ဘေတ်လဲမ်၊ အီ ကွယ် ခဲင် အိူင် ယူဒါ။” ခုဝ်၊ ခဲင် ဘပ် ဇဝ်ဖြာ ဒူအီ အီ ဘျာန် ဂြုဝ်း ဇဝ်ဖြာ ဟဲ့ ဒွိုမ် ဒဲမ် အုန် ပါယ် နီ။ န့ တဝ်း၊
6 “မဲ မိူင် ဘေတ်လဲမ်၊ မဲ ကွယ် ခဲင် အိူင် ယူဒါ။ ကာတဲ မိူင် အီ ကွယ် ခဲင် အိူင် ယူဒါ၊ အာရေ မဲ ဟဲ့ တာင်။ ခုဝ်၊ ခဲင် မိူင် မဲ န့ ဒီ မိုဝ်း ဒူအီ အီ ဒီ ဘဲန် ဒါ ကာညာ အီ အိုပ် ဒူအီ အာမျုဝ် အီဆာရေလ။ အန် ယီ ဒီ ပီ ဒူအီ အီ ဟျီင် မာဘူ။”
7 ဝါယ် အန် တီ အာဟေရူတ် တွိုန် ဝီ ဒဲ့ ဂေ ဒူအီ အီ မိုဝ်း အာငျာန်၊ တဲး ဂေ တး ဒူင် ကွယ် အန်၊ ကွဲ့ တဲး အီ ယိုဝ်။ အန် ဝီ ဒီမွှတ် ဂေ၊ တဲး အန် နပ် ဆီချာ၊ ဒေါ မှဝ် ဂေ ဟဲ့ ယိုဝ် ဆီမန့် တွိုန်။ 8 အန် ဝီ တိုယ် ဂေ ဟာဝ် မိူင် ဘေတ်လဲမ် ဝီ ဒမ် ဂေ တဝ်း၊ “တဲး ဘေ ဟာဝ် ဟြေတ့် ဆီချာ ဂွန် တီ။ ဘေ ဟီ ယိုဝ် အန်၊ တဲး ဘေ ဝီ တး ဒူင် ကွယ် အုဝ်၊ ဝီ ကာလာင် ဒီ အုဝ်၊ တဲး ဘော အုဝ် ပွိုန် ဒီ ဟာဝ် ကြိုပ် အန်။”
9 ဂေ ဟဲ့ ဟွတ့် ထူမ် ဂြုဝ်း ခုန်ဒီခမ် အာဟေရူတ် တွိုန်၊ ဂေ ဝီ လေး ဟာဝ် ဒူင် ကွယ် အန်။ ဒေါ ဟာဝ် ဂေ ဒူပ် န့တေန့်၊ ဆီမန့် ပီ ဒွိုမ် ယိုဝ် ဂေ နာ လေး ဆီငဲ တွိုန်၊ အန် ဝီ ယဲတ့် ဒီ အာတ့် ဂေ၊ တဲး ဂေ ကော ဇမ် ဒူင် ကွယ် ဂွန် တွိုန်။ ဂေ ဟဲ့ ဟွတ့် ဇမ် ဒူင် တွိုန်၊ ဆီမန့် ဝီ ဂိူတ် နာ ဒဲင် ဒူင် ကွယ် ဂွန် တီ။ 10 ဂေ ဘော ယိုဝ် ဆီမန့် တွိုန်၊ နဝ်း ဂေ ဘော ခူယ် ကာဆဝ်။ 11 ဂေ ဝီ လိုပ် ခဲင် ကာင်၊ ဝီ ယိုဝ် ဘော ဂွန် ဘော မာ အန်၊ အီ စိူဝ် နာင် မာရီ။ ဂေ ဝီ ဂိုပ် ကြိုပ် ဂွန် တီ။ ဟဲ့ ဟွတ့်၊ ဂေ ဘော ဒိုဝ်း ကြုဝ်ကြာမ် ဂေ၊ ဝီ ဒွါ ဒီ အန်၊ တဲး န့ ဘဲန် လက်ဆွင်။ လက်ဆွင် ပီ ဒွါ ဂေ တီ၊ န့ မုး ခြိဝ် ဘော ကာညန် လေဘူန် ဘော ဒဝ် မောရာ။ 12 ဒေါ အိတ် ဂေ၊ ဂေ ဝီ မ့ဘာဝ် လွင် ဇဝ်ဖြာ စ်ု ဂေ၊ ကွဲ့ တဲး ဂေ ဝီ ဝေန့် ဒူင် ကွယ် အာဟေရူတ်။ ခုဝ်၊ ဂေ ဝီ ဝေန့် မိူင် ဂေ၊ ဝီ ဟာဝ် ဒူပ် န့တေန့် ပေါ အူ ညွင့်။
13 ဂေ ဒါ အီ မိုဝ်း အာငျာန် တွိုန် ဟဲ့ ဟွတ့် ဟာဝ်၊ န့ မိုဝ်း အာမူ အာမာတ် ဇဝ်ဖြာ အူ ကာဒင် ဝီ တး ကာပ့လုး ဒီ အာယုဝ်ဆဲပ် ဒေါ မ့ဘာဝ် အန်။ အန် တဝ်း၊ “အာဟေရူတ် ဒီ တး ဟြေတ့် ဒီ ငဝ်း ဝဲန် ဂွန် မဲ။ ခုဝ်၊ မဲ လုဝ် ယိတ့်၊ ဒိုဝ်း ဘော ဂွန် ဘော မာ အန်၊ တဲး ဘေ တဝ် ဟာဝ် မိူင် အဲဂိုပ်၊ တဲး ဘေ ကွယ် ခဲင် မိူင် တီ၊ တဲး ကော ဇမ် အာခြာဝ် ဒီ ဝီ ကာလာင် အုဝ် ဒီ မဲ။”
14 ခဲင် မှိုဝ် တီ အာယုဝ်ဆဲပ် ဘော ယိတ့်၊ ဝီ ဒိုဝ်း ဂွန် အန် ဂါယ် အီဘိုန့် အန်၊ ဝီ တဝ် ဟာဝ် ဇမ် မိူင် အဲဂိုပ်။ 15 ဂေ ဝီ ကွယ် ခဲင် မိူင် အဲဂိုပ်၊ တဲး အာဟေရူတ် ကော ယမ်။ ပါယ် တီ န့ ဟဲ့ ဘဲန် ပီ ဒွိုမ် ကာလာင် ဇဝ်ဖြာ။ အန် ဟဲ့ ဒွိုမ် စ်ု ဒူအီ အီ ဘျာန် ဂြုဝ်း ဇဝ်ဖြာ တဲး အန် ဒဲမ် အုန်၊ “အုဝ် ဟဲ့ ဒဲ့ ဂွန် အီမာယ် အုဝ်၊ တဲး အန် လေး တ မိူင် အဲဂိုပ်။”
16 န့ ယီ မုး ခုန်ဒီခမ် အာဟေရူတ် တွိုန်၊ အန် ဘော နပ်၊ ဂေ ဒါ အီ မိုဝ်း အာငျာန် တွိုန် ဟဲ့ ပီလွှက့် ဒီ အန်၊ အန် ဘော ရူ ကာဆဝ်။ အန် ဝီ စ်ု ဒါ ဆိုက် အန်၊ တဲး ဂေ ဟာဝ် မိူင် ဘေတ်လဲမ် ဘော ရဝ် တေတ့် ရဝ် တ၊ တဲး ဂေ ငဝ်း ဝဲန် တူတ့် ဂွန် အီမာယ် ဆိန့် အာဆာက် အာ ဆီနမ် လူင် နာ ခြိုမ်။ အန် စ်ု ဂေ ဘူင် ပါယ် တီ ကူပ် တိး အန် အာခြာဝ် ပီ ဒွိုမ် ကာလာင် ဂေ ဒူအီ အီ မိုဝ်း အာငျာန် တွိုန် ဒီ အန်။ 17 ပါယ် တီ န့ ဟဲ့ ဘဲန် ပီ ဒွိုမ် တဝ်း ဒူအီ အီ ဘျာန် ဂြုဝ်း ဇဝ်ဖြာ အီ စိူဝ် အာယေရေမီ။ အန် ဟဲ့ ဒွိုမ် တဝ်း၊
18 “ခဲင် မိူင် ရာမာ န့ ပွိုန် ယိုဝ် အီ ယာမ် တာင်။ ဂေ ဘော ယာမ် ဘော က့လိုဝ် ကာဆဝ်။ န့ မုး နာင် ရာအေန်၊ အီ ယာမ် ကူပ် ဟဲ့ ယမ် ဂွန် အန်။ အန် တူ တဲး အာဆေ ဘဲန် ဂိုက် အန်၊ လှဝ် နဝ်း အန်။ အန် က့လိုဝ် ကူပ် တူ မိုဝ်း အန် ဂွန်။”
လွင် ဇဝ် ယေဆူ ဘော ဂုန့် မာ အန် ဝီ ဝေန့် မိူင် နာဆာရေတ့်
19 ခုန်ဒီခမ် အာဟေရူတ် တွိုန် ဟဲ့ ဟွတ့် ယမ်၊ အာမူ အာမာတ် ဇဝ်ဖြာ အူ ကာဒင် ဝီ ကာပ့လုး ဒီ အာယုဝ်ဆဲပ် ဒေါ ကွယ် အန် ခဲင် မိူင် အဲဂိုပ်။ အန် ဝီ တး ကာလာင် ဂြုဝ်း ဒီ အာယုဝ်ဆဲပ် ဒေါ အိတ် မ့ဘာဝ် အန်။ 20 အန် တဝ်း၊ “တဲး မဲ ယိတ့်၊ တဲး မဲ ဒိုဝ်း ဘော ဂွန် ဘော မာ အန်၊ ဝီ ဝေန့် မိူင် အီဆာရေလ။ ဂေ ဒူအီ အီ ဆီ ငဝ်း ဂွန် မဲ၊ ဂေ ဟဲ့ ဟွတ့် ယမ်။”
21 ပန် တီ အာယုဝ်ဆဲပ် ဝီ ယိတ့်၊ ဝီ ဒဲ့ ဂွန် အန် ဂါယ် အီဘိုန့် အန်၊ ဝီ ဝိဝ် ခဲင် မိူင် အီဆာရေလ။ 22 အန် ယီ ယိုဝ် ဆာဒါင် လွင် ခုန်ဒီခမ် အာခေတ်လာဝ် ဟဲ့ ပ့လု ဂုန့် အန်၊ န့ တဲး အန် ဝီ ယုဝ်။ အန် ယီ တူ ယ ဟာဝ် မိူင် ဒူင် ကွယ် ခုန်ဒီခမ် ကာမာယ် တီ။ ဒေါ မ့ဘာဝ် အန်၊ အာမူ အာမာတ် ဇဝ်ဖြာ ဝီ စ်ု အန်၊ တဲး အန် ဆာဒိက်။ ပန် တီ အန် ဝီ ဟာဝ် ကွယ် ခဲင် အိူင် ဂါလီလေ။ 23 အန် ဝီ ဟာဝ် ကွယ် ခဲင် မိူင် အီ စိူဝ် မိူင် နာဆာရေတ့်။ ပါယ် တီ န့ ဘော ဘဲန် ပီ ဒွိုမ် တဝ်း ဒူအီ အီ ဘျာန် ဂြုဝ်း ဇဝ်ဖြာ တွိုန်။ အန် ဟဲ့ တဝ်း၊ “ဂေ ဒီ တဲး အန် စိူဝ် ဒါ အီ တး မိူင် နာဆာရေတ့်။”