အင် 30

1 အာနီ န့ မုး ဂြုဝ်း ပီ ကာလာင် အာကူရ အီ မုး ဂွန် အာယာကဲ။ အန် ဘျာန် ဂြုဝ်း ဇဝ်ဖြာ တဝ်း၊ “အိုယ် မဲ ဇဝ်ဖြာ၊ နဝ်း အုဝ် ဟဲ့ နုန် ဟဲ့ ဒီလှး။ အုဝ် ဟူ နပ် ပီ ဒီ ပါယ် နာ အာတ့် ဟာဝ်။^a

2 အုဝ် ဟဲ့ ပီ ဒုဝ် ဆတ်ဒါဝါ၊ ဟဲ့ ရိုဝ် လွှိုမ် ဒူအီ ဟဝ်။

3 အုဝ် မိူဝ် တူ ဒွိုမ် ဟေန် အာငျာန်၊ တူ နပ် လွင် ဇဝ်ဖြာ အီ ဆီငါ ဘွတ်။

4 အာဝ် မိုဝ်း အာဆေ အီ ဟဲ့ ဟုဝ့် ဂါင်ဟြာဝ် ပီ ဝီ လူင်။ အာဝ် မိုဝ်း အာဆေ အီ ဟဲ့ ဒွိုမ် ပ့လက် ခုန် တာ ဒဲ အန်။ အာဝ် မိုဝ်း အာဆေ အီ ဟဲ့ ဒွိုမ် ဒိုဝ်း ဟိုပ်၊ ကာဘန် အိုမ် နမ်မုက်ဆာရာ။ န့ မိူဝ် တူ မိုဝ်း အာဆေ အီ ဟဲ့ မှာယ် ခူပ် ကာဒါယ်။ ဆေ မဲ ထာင် ဟဲ့ မိုဝ်း၊ တဲး အုဝ် နပ် စိူဝ် အန်။ တဲး အုဝ် နပ် အာဆေ မုး ဂွန် အန်။

5 ဂြုဝ်း ပီ ကာလာင် ဇဝ်ဖြာ ဟဲ့ မှာန်။ အန် ဇဝ် ဘော ဂွင့် ရဲ ဒွန် အီ အီ ဘိုင် အန်။

6 ဂြုဝ်း ဇဝ်ဖြာ ဟဲ့ ဂ့လိုမ်။ အာဝ် လုဝ် ပွါ ဂြုဝ်း ဒူအီ။ ယုဝ် အန် ဒမ် မှာပ် ဒီ မဲ၊ တဝ်း မဲ မုး ဒူအီ ဆီမာ ကာလုဝ်။

7 အိုယ် မဲ ဇဝ်ဖြာ၊ ဒေါ မုး စုဝ် အုဝ် နီ၊ အုဝ် မှာန့် အာ မျုဝ် ဒီ မဲ ဇဝ်၊ တဲး အုဝ် ပွိုန်။

8 အုဝ် မှာန့်၊ ကွဲ့ တဲး အုဝ် ကာလာင် ဂြုဝ်း တူ မှာန်၊ ဂြုဝ်း ကာလုဝ်။ အုဝ် ဘော မှာန့်၊ ကွဲ့ တဲး အုဝ် ဂိန် ကာဆဝ်၊ ဘော ကွဲ့ တဲး အုဝ် ခြမ် ကာဆဝ်။ ဒွန် ဆီငဲ ဒွန် ဆီငဲ၊ တဲး အုဝ် မိုဝ်း ခဲ့ ပီ လုဝ် ဟူမ် လုဝ် တာ အုဝ်။

9 ဆေ အုဝ် ဟီ မိုဝ်း ကိူန် ကာဆဝ်၊ ယုဝ် အုဝ် ဝဲန် မဲ ဇဝ် ဝီ တဝ်း၊ ဇဝ်ဖြာ တီ၊ အုဝ် တူ နပ်။ ဆေ အုဝ် ဟီ ဂိန် ကာဆဝ်၊ ယုဝ် အုဝ် ဝီ ဘဲန် ဒူအီ ဆီမာ ပြာ၊ ဘူင် ကွဲ့ တဲး အီ ဟဝ် ရုဝ်ဆေ မဲ ဇဝ်ဖြာ။”

10 ကွဲ့ ဖျာက် မှာယ် အီ ဒီ ကာညာ အန်။ ယုဝ် အန် ဒိူင် မဲ၊ တဲး မဲ ဇမ် ဒုက်။

11 န့ ဘော မိုဝ်း ဒူအီ မင် အီ အီ နပ် ဒီ ဒိူင်၊ နပ် ဒီ အေး ဂုန့် ဂေ၊ ဘော တူ ဘူင် နာ မွှိုမ် ဒီ မာ ဂေ။

12 န့ ဘော မိုဝ်း ဒူအီ အီ ထာင် ခဲင် နဝ်း ဂေ၊ ဂေ ဟဲ့ ဘွတ်။ ဂေ ယီ တူ ဝဲန် မှာပ် အီ မွှိုမ် ကာအိး။

13 န့ ဘော မိုဝ်း ဒူအီ အီ ပီခိုက် ဂေ ဘော ထာင်၊ ဂေ ဟဲ့ ဘွတ် ဟဲ့ မွှိုမ် လွှိုမ် အီ ဟဝ်။

14 န့ မိုဝ်း ဒူအီ မင် အီ၊ ဂေ ဘူင် နာ စီစိဝ် ဒီ ဒူအီ ဂိန် ဆေဆေ။ ဂေ ပီ ဒုဝ် ဆတ်ဒါဝါ အီ မိုဝ်း ပ့လဲ့ အီ လမ် အီ ပီ အာတိုမ်၊ တဲး ဂေ ပွိုန် ဒီ ကဝ့် ယမ် ဒူအီ ဂိန် တီ၊ ကွဲ့ တဲး ဂေ ဆီ မိုဝ်း။

15 န့ ဘော မိုဝ်း မာဘ့လိန့် အီ ဒိုက် ဒီ အီ ဘော နာ ပန် ဘော နာ အာတ့်၊ န့ ပီ အန် ဘော ဒဲ့ ဆေဆေ တဝ်း၊ “တဲး ဒီ အုဝ်၊ တဲး ဒီ အုဝ်။”

န့ မိုဝ်း အူယ် မျုဝ် အီ တူ နပ် ဒီ ဖဲ ဒေါ မှဝ်။ န့ ဘော မိုဝ်း ဖွုန် မျုဝ် အီ တူ နပ် ဒီ တဝ်း၊ “ဟဲ့ စူ။”

16 မျုဝ် တီ၊ န့ ဘော မုး မိူင် မာရာန ဘော အီဘိုန့် မှန်၊ အီ တူ နပ် ဒီ မိုဝ်း ဂွန် ဘော ကာဒါယ် အီ တူ နပ် ဒီ ဖဲ အိုမ် ဘော ငဝ် အီ ကာဆိုမ် တူ နပ် ဒီ ယတ်။

17 ဒူအီ အီ ကာယွင့် ဂုန့် အန် ဘော လုက်တာယ် တူ ရုဝ်ဆေ မာ အန်၊ န့ ကာအာပ် တဲး မာလင်ဒါ ဟူမ် ယင် အန် ဘော မာကာအ ပြဲ စုဝ့် လေး ခေါ ငါယ် အန်။

18 အီ ဘ့လိူင် ဒီ နဝ်း အုဝ်၊ ပီ ကာဖာ တူ လေး၊ န့ မိုဝ်း အူယ် မျုဝ်။ ပီ တူ နပ် အုဝ်၊ န့ ဘော မိုဝ်း ဖွုန် မျုဝ်။

19 န့ မုး ပန် မာလင်ဒါ အီ ဘိုန့် ဟာဝ် ခဲင် ဘ့လေန့် ဘော ပန် မာဟန့် အီ လှန် ဟာဝ် ဒဲင် မာဝ် ဘော ပန် ရိုဝ် ဆင်ဖုဝ် အီ ဟာဝ် ကာတဲ အိုမ် နမ်မုက်ဆာရာ ဘော ပီ ပါယ် ကာညူမ် ဒီဘျာ ဒီ လာယ် ရွက့် လာယ် အိုင်။

20 အီဘိုန့် အီ ဟဲ့ မိုဝ်း နဝ်း ကိူန်၊ အန် နပ် ဒီ ဘူင် ပါယ် နီ။ အန် ဟဲ့ ဟွတ့် တဲး အီ လာယ် အန်၊ အန် ဘော တာ အိုမ် ဝီ တဝ်း၊ “အုဝ် တူ မိုဝ်း ဒီ ဘူင် လုတ့် မာဆေ။”

21 လွင် အီ တဲး ကာဒါယ် ဒီယုး ဒီယေန့် န့ မိုဝ်း အူယ် မျုဝ်။ န့ ဘော မိုဝ်း ဖွုန် မျုဝ် အီ တဲး ကာဒါယ် တူ ပွိုန် ခမ်။

22 န့ ဘော မုး မှာယ် အီ ဟဝ် အီ ဟဲ့ ဝီ ပွိုန် ဒီ ဘဲန် ခုန်ဒီခမ် ဘော ဒူအီ ရိုဝ်၊ အီ ဟဲ့ ပွိုန် ဒီ ဟူမ် ဖဲ

23 ဘော အီဘိုန့် အီ မွှိုမ် ဇွင့်၊ ယီ ဝီ နပ် ဒီ ပွိုန် ဒီ ခတ် ဘော အီဘိုန့် အီ မုး မှာယ် အီ၊ ယီ ဝီ ပွိုန် ဒီ ပ့လု ယာ ကာညာ အန်။

24 ဒဲင် ကာဒါယ် နီ၊ န့ ဘော မိုဝ်း ဒုဝ် ဆတ် ဖွုန် မျုဝ် အီ ဒီတဲတ် ကာဆဝ်။ မာလဲ၊ ဂေ ပီ ဝီ မိုဝ်း အာငျာန် ကိူန် ကာဆဝ်။

25 အူ မျုဝ် ဘော မုး မာပြုန့်။ ဂေ တူ မိုဝ်း ပ့လူမ် ဂေ ဟဲန့်၊ ဂေ ယီ နပ် ဒီ ဟြေတ့် အုန် ပီ ဒီ ဟူမ် ဂေ အာခြာဝ် ဆုဝ့် ငှုဝ်။

26 ပေါ အူ မျုဝ် မုး မာယုန် ပြဲ။ ဂေ တူ မိုဝ်း ပွုန်၊ ဂေ ယီ နပ် ဒီ ဘူင် ဒူင် ဒီ ကွယ် ဂေ ခဲင် ဒး မာဝ်၊ ခဲင် ဒါအာင်။

27 ပေါ အူ မျုဝ် မုး မာ အာဇူင့်။ ဂေ တူ မိုဝ်း ခုန်ဒီခမ်၊ ဂေ ယီ နပ် ဒီ တး ဘဲန် ဖိုင် ဘဲန် ဖိုင် ပီ ဒါ ဆိုက်။

28 ပေါ အူ မျုဝ် မုး မာရွင့်ကာင်။^bဒူအီ ဟဲ့ ပွိုန် ကာနျီမ် ခဲင် ဒဲ ဂေ၊ ဂေ ယီ ပွိုန် လိုပ် ကွယ် ခဲင် ဟုဝ် ခုန်ဒီခမ်။

29 န့ ဘော မိုဝ်း အူယ် မျုဝ် အီ မှုဝ် ဒီ ဟာဝ် တဲး န့ မွှိုမ် ယွတ်။ န့ ဘော မိုဝ်း ဖွုန် မျုဝ် အီ နပ် ဒီ ဟာဝ် ဒူပ် န့တေန့် တဲး န့ မွှိုမ် ငွိုပ်။

30 ဇိုဝ် တီ ဘော မုး မာခြင်ဆီ။ အန် မိုဝ်း ဟဲန့် လွှိုမ် ဒုဝ် ဆတ် ဒွန် မျုဝ်။ အန် မိူဝ် တူ ဒွိုမ် တဝ် အာဆေ။

31 န့ မုး ဘော အာဂူင့် အီ ပီဖုင် အန် ဘော မာပဲ အာလူင့် ဘော ခုန်ဒီခမ် အီ ယဲတ့် ဒါ ဆိုက်။^c

32 ဆေ မဲ ဟဲ့ ဒွိုမ် ရိုဝ်၊ ဟဲ့ ဒွိုမ် အိူပ် ဒုဝ် ဘြိမ် မဲ၊ ဆေ မဲ ဟဲ့ ဒွိုမ် ခြာမ် ဒီ ဘူင် အီ တူ ဘွတ် အီ တူ မွှိုမ်၊ ကွဲ့ ဟူ ဘူင် ဇိုဝ် တီ။ တဲး မဲ စူ။

33 ခုဝ်၊ ဆေ မဲ ကာဝ်ု အိုမ် ပူ မက်၊ န့ ဒီ တဲး ဘျြီင် အန် လေး။ ဆေ မဲ ဆီနျီ့ ဂုင်မုး၊ န့ ဒီ တဲး နှာမ် လေး။ န့ ဘော ပါယ် တီ။ ဆေ အီ လာယ် ကာဆုး တဲး နဝ်း ရူ၊ န့ ဒီ ဘဲန် ကာအေး၊ ကာထဲန့်။