အင် 29

1 ဆေ ဒူအီ တူ ထူမ် ပီ မာနုဝ် အီ ဟဝ် ဘဲန် ဇေန့် ဘဲန် ဇေန့်၊ ယီ ဆီ နဲ့ ဒိူဝ်၊ အန် ဒီ ကာဒုး ဒုက် အူ ဇေန့်။ န့ ပီ အန် ဟဲ့ ကာဘက် လိုဝ် အာဝ် ဟူ ပွိုန် ဆီနမ်။

2 ဆေ ဒူအီ အီ မိုဝ်း နဝ်း ဆိူဝ် နဝ်း မှာန် ပွိုန် ဒီ အိုပ် မိူင်၊ ဂေ ဒူအီ ဘောကာဂ့လျီတ် ဘော ခူယ်။ ဆေ ဒူအီ ဟာယ် ဟီ ဝီ အိုပ်၊ ဒူအီ ဘောကာဂ့လျီတ် ဒီ ဝီ က့လိုဝ်၊ ဝီ ငှုန်။

3 အာဆေ အိုင် ဘော ရွက့် အာငျာန်၊ အန် တဲး နဝ်း ဂုန့် အန် ခူယ်။ အာဆေ ယီ ဒူပ် ယာ မာလမ်၊ ရွိုန် အန် ဒီ တူတ့် ပီယေန့်၊ ကော ဂိန်။

4 ဆေ ခုန်ဒီခမ် ဘူင် နာ မှာန် ဘော ဘူင် ဒူပ် ဒါရာ၊ မာန် မိူင် အန် ဘော ကွယ် ဆီချာ။ ဆေ အန် ယီ ပြာ ဒီ ဒိုဝ်း လက်ဆွင်၊ မာန် မိူင် အန် ဒီ ဘော လိုဝ်။

5 ဒူအီ အီ မှုဝ် ဒီ ကဝ် ဂိုက် အန်၊ န့ ပီ အန် ဘ့လး အုန် န့ရပ် ဒူင် ဒီ ဝဝ့် အန်။

6 ဒူအီ ဟာယ်၊ အန် ဒီ ဝီ ခြေ ယွတ့် ပီ ဒိန့် အုန် အန်။ အီ မုး ဒူအီ နဝ်း ဆိူဝ် နဝ်း မှာန်၊ အန် ဒီ ဘော ကွယ် ဒါခိုယ် တဝ်း မှုဝ်။

7 အာဆေ မိုဝ်း နဝ်း ဆိူဝ် နဝ်း မှာန်၊ အန် နပ် ဒီ ဆုင်ဖျာတ် အာမူ ဒူအီ ဂိန်၊ တဲး န့ ဒူပ် ဒါရာ။ ဒူအီ မိူက် ယီ တူ ဒိုဝ်း အာရေ ဂေ၊ တူ တဲး န့ လိုပ် ခဲင် နဝ်း ဂေ။

8 ဂေ ဒူအီ အီ လုက်တာယ် အီ ဟဝ်၊ ဂေ နပ် ဒီ ဘူင် တဲး န့ ဆီနန် ဆီနိူင် ဘော မိူင်။ အီ မုး ဒူအီ အီ မိုဝ်း အာငျာန်၊ ဂေ နပ် ဒီ ဘူင် တဲး န့ ယေန် ဒါခိုယ်။

9 ဆေ ဒူအီ အီ မိုဝ်း အာငျာန် ကာထဲန့် ဒီ ဒူအီ ရိုဝ်၊ ဒူအီ ရိုဝ် တီ ဒီ ဘော ပီရူ ပီဝါညာက် အန်၊ တူ စူ၊ တူ တဲး န့ ယေန်။

10 အာဆေ ဆီ ငဝ်း အီ ဟဝ်၊ အန် ဘော ဇွင့် ဒူအီ အီ မိုဝ်း နဝ်း ဘွတ် နဝ်း မွှိုမ်။ အီ မုး ဒူအီ ဘွတ်၊ အန် ယီ ဟြေတ့် ဒီ စွယ် ဒူအီ အီ မိုဝ်း နဝ်း ဆိူဝ် နဝ်း မှာန်။

11 ဒူအီ ဒိူဝ်၊ အန် ဘော နပ် ဒီ ဘျ နဝ်း ရူ အန်၊ တဲး န့ လိုဝ်း ဆီချာ။ ဒူအီ အီ မိုဝ်း အာငျာန်၊ အန် ယီ ပဲ ဒီ အူတ် နဝ်း ရူ အန်။

12 ဆေ ခုန်ဒီခမ် ထူမ် ဂြုဝ်း ကာလုဝ်၊ အာမူ အာမာတ် အန် ဒွန် အီ ဝီ ဘဲန် တူတ့် ဒူအီ အီ ဆီမာ ကာလုဝ်။

13 ဒူအီ ဂိန် ဂါယ် ဒူအီ အီ ခါနှာပ် အီ ဟဝ်၊ ဂါယ် မုး အူ မျုဝ်။ ခုဝ်၊ ဇဝ်ဖြာ ဟဲ့ တဲး ဂါယ် မိုဝ်း ငါယ် အီ ပွိုန် ဒီ ယိုဝ်။

14 ဆေ ခုန်ဒီခမ် ဆုင်ဖျာတ် နာ မှာန် ဒီ ဒူအီ ဂိန်၊ အန် ဒီ ပွိုန် ဒီ အိုပ် လှေန့်။

15 ဆေ မဲ မာနုဝ် ဂွန် တာ မ့ဖျီ့၊ အန် ဒီ မိုဝ်း အာငျာန် ကိူန်။ ဆေ မဲ ဘ့လေး ခဲ့ နဝ်း အန်၊ အန် ဒီ ဘူင် တဲး မာ အန် မွှိုမ် ဆာယ်။

16 ဆေ ဒူအီ ဟာယ် ဟီ ဘြဲ ကိူန်၊ ဘော မှာပ် ဒီ ဘြဲ ကိူန်။ မာလဲ၊ ဒူအီ အီ မိုဝ်း နဝ်း ဆိူဝ် နဝ်း မှာန်၊ ဂေ ဒီ ယိုဝ် ဒေါ စှိုမ် ဒူအီ ဟာယ် တီ။

17 တဲး မဲ မာနုဝ် ဂွန် အီမာယ် မဲ၊ အာဝ် လုဝ် နဝ်း မှဲ ကူပ် အန်။ အန် ဒီ တဲး ဘော နဝ်း မဲ ခူယ် ဒါခိုယ်။

18 ဆေ အာဝ် မိုဝ်း ဂြုဝ်း ဇဝ်ဖြာ၊ ဒူအီ ဒီ ဘော ဘူင် ခဲ့ ပီ အိုင် ဂေ ဒွန် အီ၊ တူ တဲး မိူင် ဒါခိုယ်။ ဆေ ဂေ ယီ ဘူင် ဒူပ် ဒါရာ၊ ဂေ ဒီ ဘော ဘျုဝ် ဒါခိုယ်။

19 ဆေ မဲ ဆီ မာနုဝ် မှာယ် မဲ၊ အာဝ် ပွိုန် စူ မီ ခဲ့ ဂြုဝ်း။ အန် ပီ ဘော ဟဲ့ နပ် မိူဝ်၊ အန် တူ ဆီ ထူမ်။

20 ဆေ မဲ မာနုဝ် ဒူအီ ရိုဝ်၊ န့ ဆီ ကဲန် လွှိုမ် မဲ မာနုဝ် ဒူအီ အီ ခြန် ဒီ ကာလာင်၊ အီ တူ ဇေန့်ဇာ ဒီ အာတ့်။

21 ဆေ မဲ ဘ့လေး ခဲ့ လဝ့် နဝ်း မှာယ် မဲ ဆိန့် ဒီတဲတ် အန်၊ အူ ဆီငဲ အန် ဒီ ဘော ဝီ ဒွါ ဒုက် ဘဲန် မျုဝ် ဘဲန် မျုဝ် ဒီ မဲ။

22 ဒူအီ အီ စေဝ် ရူ ကာဆဝ်၊ အန် ဘော နပ် ဒီ ဘူင် တဲး အီ ကာအေး ကာထဲန့်။ ဒူအီ ကာဟဝ်း ဘော နပ် ဒီ ဘူင် မှာပ် ဘဲန် မျုဝ် ဘဲန် မျုဝ်။

23 ဆေ ဒူအီ ပီခိုက် အန်၊ အန် ဒီ ဝီ လုဝ် ဆာယ် အီ။ ဆေ မဲ မိုဝ်း နဝ်း တျီမ်၊ အီ ဟဝ် ဒီ ဝီ ရုဝ်ဆေ အိူပ် မဲ။

24 အာဆေ စွယ် ဒါ ပြာ၊ အန် ဒီ ဝီ ဇွင့် ဒုဝ် ဘြိမ် အန်။ အန် ပီ ဘော ဒိူင် ဒီ အာတ့် ဒါ တာင် အီ ဆုင်ဖျာတ် ဒါရာ မိူဝ်၊ အန် တူ ပွိုန် ကာလာင် နာ မှာန်။

25 အာဆေ ယုဝ် ဒူအီ၊ န့ ပီ အန် ခြေ ယွတ့်။ မာလဲ၊ အာဆေ ညှိုမ် ဘိုင် ဇဝ်ဖြာ၊ အာဝ် လုဝ် ယုဝ် မာဆေ။

26 ဒူအီ ကိူန် ဆီ တဲး ခုန်ဒီခမ် ဂေဇူ ဂေ။ န့ ယီ မုး ဇဝ်ဖြာ အီ တဲး ဒူအီ ဆုင်ဖျာတ် နာ မုး နာ မှာန်။

27 ဒူအီ နဝ်း ဘွတ် နဝ်း မွှိုမ် ကာအိး ဒူအီ အီ ဆီမာ ကာလုဝ်။ ဒူအီ တူ မွှိုမ် မိူဝ်၊ အန် ကာအိး ဒူအီ နဝ်း ဘွတ် နဝ်း မွှိုမ်။