အင် 23

1 ဒေါ တုတ့် ဟူမ် မဲ ဒူပ် ဒါ အီ အိုပ် မိူင်၊ တဲး မဲ ဆာဒိက် ပီ ဒီ ဟူမ် ပီ ဘ့လေး အီ။

2 ဆေ မဲ မိုဝ်း နဝ်း ဆီ ဟူမ် တာင်၊ တဲး မဲ ယိူန်။

3 ကွဲ့ တဲး မဲ မိုဝ်း နဝ်း လောဖ ဆီ ဟူမ် ပီ ဒီ ဟူမ် အီ ဆီငဲး ပီ ဘ့လေး အန်၊ ယုဝ် အန် ပီလွှက့် ဒီ မဲ။

4 ကွဲ့ ဘူင် တဲး မဲ နုန် ရိုဝ် ကူပ် ဆီ ခြမ် မဲ။ တဲး မဲ မိုဝ်း အာငျာန်၊ နပ် ဒီ ယိူန် ဆာဒိက် ဒုဝ် ဘြိမ် မဲ။

5 ဒေါ ဆီငျာ ယွတ် မဲ ရွိုန် မဲ၊ န့ ဒီ ဘော ဟြာယ် အူ ဇေန့်။ န့ ဒီ ပီ မာလင်ဒါ အီ မိုဝ်း ဖျီင် ဘိုန့် ဟုဝ့် ခဲင် ဘ့လေန့်။

6 ကွဲ့ ဟူမ် ပီ ဒွါ ဒူအီ ဂျြီ့။ ကွဲ့ တဲး မဲ ဆီ ဟူမ် အီ ဆီငဲး ပီ ဟျီင် ဒူအီ ဇိုဝ် တီ ဒီ မဲ။

7 အန် နပ် ဒီ တဝ်း၊ “ဟူမ် လွယ် လွယ်၊ ဟူမ် ဖဲ ဖဲ။” အန် ပီ ဘော ဟဲ့ တဝ်း ပါယ် တီ မိူဝ်၊ ခဲင် နဝ်း အန် အာဝ် မုး အန် ဆီ ဟျီင်။

8 ခဲ့ ပီ ဟူမ် မဲ တီ၊ မဲ ဒီ ဘော ဝီ ဟိုဝ် လေး။ ဂြုဝ်း ဒါခိုယ်၊ ဂြုဝ်း ငါမ် ပဲ့ ဟဲ့ ကာလာင် မဲ ဒွန် မျုဝ် ဟဲ့ ဒီလူယ် ဒီလာယ် ပီယေန့်။

9 ကွဲ့ ကာလာင် ဂြုဝ်း အာငျာန် ဒီ ဒူအီ ရိုဝ်။ ခုဝ်၊ အန် ဒီ ဝီ လုက်တာယ် အာငျာန် မဲ တီ။

10 ကွဲ့ ကာထုဝ့် လွှက့် ကာအုန် ကာဒါယ် ပီ ဆမ် အုန် အီ ဟဝ်၊ အီ ဟဲ့ ဘြိမ် ဟဲ့ လှေန့်။ ကွဲ့ ဒိုဝ်း မာန် ဂေ ဒူင် နာ ဂွန် ဆီပြး။

11 ခုဝ်၊ ဇဝ်ဖြာ အီ စွယ် ဂေ၊ အန် မိုဝ်း ပွုန် တာင်။ အန် ဒီ ဘော ဖြူမ် ဘ့လာက် ဂေ။

12 တဲး နဝ်း မဲ ကာဒိုက် ကာဒဝ့် ဒီ ပီ ဟေန် မဲ။ တဲး မဲ ဟေန် ခဲ့ ပွိုန် မဲ ဒီ ဟေန်။

13 အာဝ် ပွိုန် တူ မာနုဝ် ဂွန်။ မဲ ပီ ဘော ဒိုဝ်း မ့ဖျီ့ ဆီဘျြီ့ အန် မိူဝ်၊ အန် တူ ယမ်။

14 တဲး မဲ ဒိုဝ်း မ့ဖျီ့၊ ဆီဘျြီ့ အန်။ န့ ဘော ပီ မဲ ချွတ် အန်၊ တဲး အန် လွတ် စုဝ်း ခဲင် မိူင် မာရာန။

15 အိုယ် ဂွန် ကာညူမ် အုဝ်၊ ဆေ မဲ မိုဝ်း အာငျာန်၊ နဝ်း အုဝ် မိူဝ် ဒီ ဒါခိုယ်။

16 နဝ်း အုဝ် ဒီ ဘော ခူယ် ဒေါ ယိုဝ် အုဝ် မဲ ကာလာင် ဂြုဝ်း ဆိူဝ် ဂြုဝ်း မှာန်။

17 မဲ ကွဲ့ လှယ် ဂေ အီ မိုဝ်း မှာပ်၊ တဲး မဲ ရုဝ်ဆေ ဇဝ်ဖြာ ဆေဆေ။

18 ဆေ မဲ ဘူင် ပါယ် တီ၊ နာ အာတ့် နီ ဟာဝ်၊ နဝ်း မဲ ဒီ တာင် ဒါခိုယ်။ န့ ဒီ ဘော ဘဲန် ပီ နှဝ့် န့ဒဝ့် မဲ။

19 အိုယ် ဂွန် ကာညူမ် အုဝ်၊ ထူမ် ဂြုဝ်း အုဝ်၊ တဲး မဲ မိုဝ်း အာငျာန်။ တဲး ဘော နဝ်း မဲ ဒူပ် အာငျာန် တီ။

20 မဲ ကွဲ့ ဘဲန် ဂိုက် ကာဒူပ် ဒီ ဂေ အီ ယိုတ့် ပဝ်း ဘော ဒီ ဂေ အီ ဟူမ် တာင် ဟူမ် ကိူန်။

21 ခုဝ်၊ ဂေ အီ ယိုတ့် ပဝ်း အီ ဟူမ် တာင် တီ၊ ဂေ ဒီ ဘော အေတ့် ဘော ဂိန်။ ဆေ မဲ ဆီ အိတ်၊ တူ အိုင် ဒီ ဘြေ့၊ မဲ ဒီ ကာဒုး ဒီ ပ့လိုက် ဟိုပ် အီ ဟဲ့ လှုး။

22 တဲး မဲ ထူမ် ဂြုဝ်း ဂုန့် ဂွိုတ် မဲ။ ကွဲ့ လုက်တာယ် မာ မဲ ပန် ဟဲ့ ကတ် အန်။

23 ဘော အာငျာန် ဘော နာ မုး နာ မှာန်၊ ဘော ပီ မာနုဝ် အီ တဲး န့ ကာလှုး ဒီ နဝ်း ဘဲန် မျုဝ် ဘဲန် မျုဝ်။ ဇိုဝ် တီ မဲ လုဝ် စိုဝ်း၊ ကွဲ့ တဲး မဲ ယွင့် ဝဲန်။

24 ဂုန့် ဂွန် အီ မိုဝ်း နဝ်း ဆိူဝ် နဝ်း မှာန်၊ အန် ဒီ ခူယ် ဒါခိုယ် ကာဆဝ်။ ဆေ ဂွန် အန် မိုဝ်း အာငျာန်၊ ဂုန့် အန် ဒီ ခူယ် ကာဆဝ်။

25 တဲး ဂုန့် မာ မဲ ခူယ်။ တဲး မာ မဲ ဒါခိုယ် ကူပ် မိုဝ်း မဲ အာငျာန်။

26 အိုယ် ဂွန် ကာညူမ် အုဝ်၊ တဲး နဝ်း မဲ ဒူပ် အုဝ်။ တဲး မဲ ဘူင် ဘော ညိုင် ဒူပ် ပီ ပါယ် အုဝ်။

27 ခုဝ်၊ ယာ မာလမ် ဟဲ့ ပီ ကာဒဝ် အီ လိုက် ကာဆဝ်။ ဘော အီဘိုန့် အီ ဟဝ်၊ အန် ဟဲ့ ပီ ကာဒဝ် အိုမ် ခိုမ် အီ ကာချီ့၊ အာဝ် ပွိုန် ဝီ လေး။

28 အီဘိုန့် ဇိုဝ် တီ၊ အန် ဘော ဘ်ု ဒီ ယွတ် မဲ ပီ ဒါ ဇူန်။ အန် ဘော ဘူင် တဲး အီမာယ် ကိူန် တူ ဒူပ် နာ မှာန်။

29 အာဆေ မိုဝ်း အီ ညှာပ် ဒီ နဝ်း။း အာဆေ ဟဲ့ ဇမ် ဒုက်။း အာဆေ ဟဲ့ ငှုန် တာင်။း အာဆေ ဟဲ့ မိုဝ်း ဒူင် မာယမ်။း အာဆေ ဟဲ့ မိုဝ်း ငါယ် ရေန့် ဒီရျီင်။း

30 န့ ဘော မုး ဂေ အီ ကွယ် စဲ တူ ကာထုဝ့် ခဲင် ဘာင် ပဝ်း။ န့ ဘော မုး ဘော ဂေ အီ ဒျီင် ပဝ်း အီ စဲ ဆီနမ်။

31 မဲ ပီ ဘော ဟဲ့ ယွတ် ဟဲ့ ယိုဝ် အိုမ် ပဝ်း ဟဲ့ ရေန့် ခဲင် ဆီလာတ့်၊ မဲ ပီ ဘော ဟဲ့ နပ်၊ ဆေ မဲ ဒျီင် န့ ဆီငဲး ကာဆဝ် မိူဝ်၊ မဲ ကွဲ့ တဲး ပဝ်း ပဲ မဲ။

32 ဟီ ဇမ် ပါ ခဲညှာ ဆိန့်ဝး၊ မဲ ဒီ ဝီ မာပြာန့် ဘော ညှမ် ဘော ဒုဝ်။ န့ ဒီ ပီ မာဟန့် ဟာယ် ဟဲ့ ဇုဝ့် မဲ။

33 ငါယ် မဲ မိူဝ်၊ န့ ဒီ ပဲ့။ နဝ်း မဲ မိူဝ်၊ န့ ဒီ ကာဝှ်ု ကာဝျှီန် တူတ့်။

34 မဲ ဒီ ကာကျီင် ကာကေး၊ ဝီ ပီ ဒူအီ အီ အိတ် ခဲင် ရိုဝ် အီ ကွယ် ခဲင် အိုမ် နမ်မုက်ဆာရာ။ မဲ ဒီ ဘော ပီ ဒါ အီ အိတ် ဒဲင် ရွင့် ဘိက် ခဲင် ရိုဝ် ဆင်ဖုဝ် တာင်။

35 မဲ ဒီ ဘော ဝီ တဝ်း၊ “ဂေ ဟဲ့ မး အုဝ်၊ အုဝ် ယီ တူ ယိုဝ် ဆဝ်။ ဂေ ဟဲ့ ဒုး အုဝ်၊ အုဝ် ယီ တူ နပ် ဒုဝ် အုဝ်။ ဒေါ ဝီ လှုဝ်း အုဝ် ဒီ ဒုဝ် အုဝ်၊ အုဝ် ဒီ ဝီ ဟြေတ့် ဒီ ဒျီင် ပဝ်း ပေါ န့ ပွါ။”