22
1 ဆေ မဲ မိုဝ်း ဆာရေ၊ န့ မွှိုမ် လွှိုမ် မိုဝ်း မဲ ကြုဝ်ကြာမ် ကိူန်။ ဆေ ဒူအီ ရုဝ်ဆေ မဲ၊ န့ မွှိုမ် လွှိုမ် ရွိုန် ဂေ ခြိဝ်။2 ဒူအီ ခြမ် ဘော ဒူအီ ဂိန်၊ ဂေ မုး အူ မျုဝ်။ ဇဝ်ဖြာ ဟဲ့ ဖာန် ဘ့လေး ဂေ ဘောကာဂ့လျီတ်။
3 ဒူအီ အီ မိုဝ်း အာငျာန်၊ အန် နပ် ပန် ဒီ မိုဝ်း အာဖေ အာရေ။ အန် ဘော နပ် ဒီ ဝး။ အီ မုး ဒူအီ ရိုဝ်၊ အန် ယီ တူ ကာဖာ ဘော ဟာဝ် တဲး အန် ကော ဇမ် ခဲင် ဒုက်။
4 ဆေ မဲ ရုဝ်ဆေ ဇဝ်ဖြာ ဘော မိုဝ်း နဝ်း ဂူမ်၊ န့ တဲး မဲ မိုဝ်း ဆာရေ၊ မိုဝ်း ဘော ကြုဝ်ကြာမ်။ အာဆာက် မဲ မိူဝ် ဒီ ဘော တူင့်။
5 ဒူအီ ဟာယ် ဒီ ကာဒုး ဒုက် ပီ အီ လိုပ် ခဲင် ယွတ့် ခဲင် မာအာတ့်။ ဆေ ဒူအီ ယီ ရွက့် အာဆာက် အန်၊ အန် နပ် ဒီ ဝး၊ တူ ဟာဝ် ကာတတ် ဒူင် တီ။
6 ဆေ မဲ မာနုဝ် ဂွန် ပီ ကာအာပ် အန် ဘူင်၊ အန် ဒီ ဘော လှုဝ်း ဘော ဒူပ် ဘော စုဝ် အာဆာက် အန်။
7 ဒူအီ ဂိန် ဒီ လုဝ် ဘဲန် မှာယ် ဒူအီ ခြမ်။ ဆေ မဲ ကာရဝ်း ဒီ အီ၊ မဲ ဒီ လုဝ် ဘဲန် မှာယ် ဒူအီ အီ ဒွါ ဒီ မဲ။
8 ဆေ မဲ ဘူင် တူ ကာဆိူဝ်၊ န့ ပီ မဲ ဘြတ် ငှုဝ်။ မဲ ဒီ ဒုက် ပန် ဒီ ဆုဝ့် မဲ။ ဘော ပဲ့ ဟဲ့ မှာန့် ခါနှာပ် မဲ ဒီ အီ ဟဝ်၊ န့ တူ ဘဲန် အာဂျိုဝ် မာဆေ၊ န့ ဒီ ဘော တူတ့် ဒွန် မျုဝ်။
9 အာဆေ မိုဝ်း နဝ်း ဒီဟာင်၊ အန် ဒီ ဘော ဘျုဝ် ဒါခိုယ် ကူပ် ဒိုဝ်း အန် ပီ ဒီ ဟူမ်၊ ကာဆာင် ဟျီင် ဂေ ဒူအီ ဂိန်။
10 တဲး မဲ ညွန် တဝ် ဂေ ဒူအီ အီ ကာညး ဘော ဖျာက် အီ ဟဝ်။ ဆေ မဲ ဘူင် ပါယ် တီ၊ ဒူအီ အီ လာယ် ကာလုတ့်၊ လာယ် ကာထဲန့်၊ လာယ် ကာအေး၊ အာဝ် ဟူ မိုဝ်း။ န့ ဒီ ယေန် ဒါခိုယ်။
11 ဆေ မဲ အိုင်၊ မဲ ဝုဝ် နဝ်း လုယ် ဆီငါ ဘော ကာလာင် ဂြုဝ်း န့စု န့စမ်၊ မဲ ဒီ ဘော ပွိုန် ဒီ ဘဲန် ဂိုက် ခုန်ဒီခမ်။
12 ဇဝ်ဖြာ ဒီ ယွတ် မဲန် ဘဲန် မျုဝ် ဘဲန် မျုဝ် အီ ကာလှုး ဒီ နဝ်း အီ။ ပီ ကာလာင် ဂေ ဒူအီ အီ ဘူင် နာ တူ မှာန်၊ ဇဝ်ဖြာ ယီ တူ တဲး န့ အွင်။
13 ဒူအီ ကြာန် ဒီ ဘော တဝ်း၊ “မာခြင်ဆီ ကွယ် နာ ရေတ့် ကာင်။” အန် နပ် ဘော ဒီ တဝ်း၊ “ဆေ အုဝ် ဟီ လေး ဟာဝ်၊ အီ ဟဝ် ဒီ ငဝ်း ယမ် အုဝ်။”
14 ဂြုဝ်း ပီ ကာလာင် ယာ မာလမ်၊ န့ ပီ ကာဒဝ် ဟူလဝ်၊ ပီ ဘော ယွတ့်။ ဂေ ဒူအီ ပီ ကာအိး ဇဝ်ဖြာ၊ ဂေ ဒီ စုဝ်း နာ ခဲင်။
15 ရိုဝ် ဘော အီ တူ မွှိုမ် ကွယ် ခဲင် နဝ်း ဂွန် ဒွန် အီ။ မ့ဖျီ့ ယီ မာနုဝ် တဲး ရိုဝ် အန် လေး။
16 ဆေ မဲ ဒွါ လက်ဆွင် ဒီ ဒူအီ ခြမ်၊ ဘော ခါနှာပ် ဒူအီ ဂိန်၊ တဲး န့ တဲး မဲ ခြမ်၊ ဘော မဲ ဒီ ဝီ ဘဲန် ဒူအီ ဂိန် ဒူအီ ဖ့လာန်။
လွင် ဂြုဝ်း အာငျာန် အူယ် ဂိုဝ် ဒဲ
17 အုဝ် ဒီ ကာလာင် တဲး မဲ ထူမ် ဂြုဝ်း ပီ ကာလာင် ဂေ ဒူအီ အီ မိုဝ်း အာငျာန်။ တဲး မဲ ထူမ် ဆီချာ ဘော ဘူင် ဒူပ် အာကျာမ် အာငျာန် ပီ မာနုဝ် အုဝ်။
18 ဆေ မဲ လှုဝ်း၊ တူ ပိဝ် ဂြုဝ်း ဇိုဝ် တီ၊ န့ ဒီ တဲး မဲ ကွယ် ဒါခိုယ် ဘော တဲး မဲ နပ် ဒီ ကာလာင် လွင် အန် ဆေဆေ။
19 အုဝ် ဆီ တဲး မဲ ညှိုမ် ဘိုင် ဇဝ်ဖြာ။ ခုဝ်၊ အုဝ် မာနုဝ် ဂြုဝ်း နီ အာတိုဝ် နီ၊ တဲး ဘော မဲ ပွိုန် ဒီ ထူမ်။
20 အုဝ် ဟဲ့ ဒဲမ် ဂြုဝ်း အူယ် ဂိုဝ် ဒဲ ဒွါ ဒီ မဲ၊ န့ ဘော မုး လွင် ဒွါ ဆာဒိက်၊ ဘော အာကျာမ် အာငျာန် အီ တဲး မဲ နပ် ဘဲန် မျုဝ် ဘဲန် မျုဝ်။
21 တဲး မဲ နပ် အာမှဝ် အီ မုး၊ အာမှဝ် အီ မှာန်။ တဲး မဲ ဝီ နပ် ဘော ဒီ ကာလာင် ဒီ ဂေ အီ စ်ု မဲ တး။
22 မဲ ကွဲ့ ဝိန် ဒီ ခါနှာပ် ဒူအီ ဂိန် ကူပ် ဂိန် အန်။ ဆေ ဒူအီ ဟဲ့ ဇမ် ဒုက်၊ ကွဲ့ ဘူင် တဲး အန် စှိုမ် ဒေါ ဆုင်ဖျာတ် ဘေ အာမူ အန်။
23 ခုဝ်၊ ဇဝ်ဖြာ ဒီ ဝီ ဖြူမ် ဘ့လာက် ဂေ။ အာဆေ ဘူင် တဲး အီ ဟဝ် စှိုမ်၊ ဇဝ်ဖြာ ဒီ ဝီ တဲး ဘော ဒူအီ ဝီ တီ စှိုမ်။
24 မဲ ကွဲ့ လာယ် ကာဂိုက် ဒီ ဒူအီ ကာဟဝ်း။ မဲ ကွဲ့ ကာဒူပ် ဒီ ဒူအီ အီ မိုဝ်း နဝ်း ဟာယ် အီ ငှိုယ် ရူ။
25 ယုဝ် မဲ ဟေန် အာဂျာင် ဂေ၊ ယုဝ် န့ ပီ မဲ လိုပ် ခဲင် ယွတ့်၊ တူ ဝီ ပွိုန် ဒီ လေး။
26 မဲ ကွဲ့ ကာဆဲန့် ဒီ ဝျီ့ နီ ဒါင် အီ ဟဝ်။ မဲ ကွဲ့ ကီခမ် ဒါင် အီ ဟဝ်။
27 ဆေ မဲ ဟီ တူ မိုဝ်း ဒီ ဒွါ၊ ဂေ ဒီ ဘော ဒိုဝ်း ဘော ဒီနွှင့် ဒူင် အိတ် မဲ။
28 ကွဲ့ တဲး မဲ ရိုတ့် ကာထုဝ့် လွှက့် ကာအုန် ကာဒါယ် အီ မုး ပီ ဆမ် အုန် ဒါ ဒါ မဲ။
29 ဆေ မဲ ယိုဝ် ဒူအီ အီ ကျ၊ အီ လှဲဝ် ဒီ ဘူင် ဂါန် အန်၊ မဲ နပ် ဒူအီ တီ ဒီ ဘူင် ဂါန် ပီ စ်ု ခုန်ဒီခမ်။ အန် တူ ဘူင် ဂါန် ဂေ ဒူအီ ရဝ် ဒူအီ ကာင်။