မ်ဟ 30

လွင် ဒါင် ဂုင် ဂေဇူ ဒီ ဇဝ်ဖြာ

အာဒါဝိတ် ဟဲ့ ဒဲမ် မှုဝ် နီ။ ဂေ တဝ်း မှုဝ် နီ ဒေါ ဘူင် ဂေ ဘ့လွယ် မွင့်ကာရာ ဟုဝ် ဇဝ်ဖြာ။

1 အိုယ် မဲ ဇဝ်ဖြာ၊ အုဝ် ဒီ အိူပ် မဲ ဇဝ်။ မဲ ဇဝ် ဟဲ့ ချွတ် အုဝ်။ မဲ ဇဝ် တူ တဲး ဂေ ရန်ဆူ အုဝ် ပွိုန် ဒီ ခူယ် ကူပ် အုဝ်။

2 မဲ ဇဝ်ဖြာ၊ မဲ ဘော မုး ဇဝ်ဖြာ ပီ ကြိုပ် အုဝ်။ ဒေါ မှာန့် အုဝ် တဲး မဲ ဇဝ် စွယ် အုဝ်၊ မဲ မိူဝ် ဟဲ့ တဲး အုဝ် ကဲန်။

3 မဲ ဇဝ်ဖြာ တူ တဲး အုဝ် ယမ်။ မဲ ဇဝ် ဘော တဲး အုဝ် ဂျာမ်ဆာ၊ တူ တဲး အုဝ် ကွယ် ခဲင် ဘာရေဝ်။

4 အိုယ် ဘေ ဒူအီ အီ ရွက့် ဇဝ်ဖြာ၊ တဲး ဘေ တဝ်း မှုဝ် အီ အိူပ် ဇဝ်ဖြာ။ တဲး ဘေ ဒါင် ဂုင် ဂေဇူ ဒီ အန် ဇဝ် အီ ဘွတ် ကာဆဝ်။

5 ခုဝ်၊ ဇဝ်ဖြာ ဒီ ဘော ရူ စာဝ် အူ ကာစန်။ အန် ယီ ဒီ ဒွါ ဂေဇူ ဒီ အေ ဘော စုဝ် အာဆာက် အေ။ အေ ပီ ဘော ယာမ် ခဲင် မှိုဝ်၊ ဟီ ဇမ် ဆိန့်ဝး၊ ဟဲ့ ဝီ ဒါခိုယ်။

6 ဒေါ ကွယ် ဒါခိုယ် အုဝ်၊ အုဝ် ဘော တဝ်း၊ “အုဝ် အာဝ် ဟူ နပ် ဒီ စှိုမ် ဒေါ မှဝ်။”

7 အိုယ် မဲ ဇဝ်ဖြာ၊ န့ မုး ဂေဇူ ပီ ဒွါ မဲ ဒီ အုဝ်၊ တဲး အုဝ် ကွယ် မန် ဆီချာ။ ပန် တီ မဲ ဇဝ် ယီ တူ ဝီ ယွတ် အုဝ်၊ တဲး န့ ဘော ညှာပ် ကာဝှ်ု ကာဝျှီန် ခဲင် နဝ်း အုဝ်။

8 အုဝ် ဘော ဆာခိုဝ် ဒီ မဲ ဇဝ်ဖြာ။ အုဝ် ဘော မှာန့် တဝ်း၊

9 “ဆေ အုဝ် ဟီ ယမ်၊ န့ တူ ဘဲန် အာဂျိုဝ် ဒီ မဲ ဇဝ်။ ကာပုး တူ နပ် ဒီ အိူပ် မဲ ဇဝ်၊ တူ နပ် ဒီ ကာလာင် လွင် နာ မုး နာ မှာန် ပီ ဘူင် မဲ ဇဝ်။

10 အိုယ် မဲ ဇဝ်ဖြာ၊ အုဝ် မှာန့်၊ တဲး မဲ ဇဝ် ကာဝေ ဘော ထူမ် ဂြုဝ်း အုဝ်၊ တဲး မဲ ဇဝ် စွယ် အုဝ်။”

11 ပန် တီ အီ ဒုက် အီ ညှာပ် ဒီ နဝ်း အုဝ်၊ မဲ ဇဝ်ဖြာ ဟဲ့ ဝီ ဘူင် တဲး န့ ဝီ ဘဲန် နဝ်း ခူယ်၊ နဝ်း ကြွိုမ်။ န့ ဘော ပီ မဲ ဇဝ် ဟဲ့ ဘုတ့် ဝဲန် ခြိုင် စာန် ပီ စှိုပ် အုဝ်၊ ဝီ တဲး နာ ဘျုဝ် ဒါခိုယ် ကော ရူပ် အုဝ်။

12 ခုဝ် အန် တီ အုဝ် မိူဝ် တူ ကွယ် ဒီလူယ် ဒီလာယ်၊ အုဝ် ဒီ တဝ်း မှုဝ် အီ အိူပ် အာဖုင် ဒင်ခုဝ် မဲ။ အိုယ် မဲ ဇဝ်ဖြာ၊ မဲ မုး ဇဝ်ဖြာ ပီ ကြိုပ် အုဝ်။ အုဝ် ဒီ ဒါင် ဂုင် ဂေဇူ ဒီ မဲ ဆေဆေ။