မ်ဟ 29

လွင် ဂြုဝ်း ဇဝ်ဖြာ ပီ ခုန်

အာဒါဝိတ် ဟဲ့ ဒဲမ် မှုဝ် နီ။

1 အိုယ် ဘေ အီ ကွယ် ခဲင် ဂါင်ဟြာဝ်၊ တဲး ဘေ အိူပ် ဇဝ်ဖြာ။ တဲး ဘေ အိူပ် ခဲ့ တာင် အာဖုင် ဒင်ခုဝ် အန်၊ ခဲ့ တာင် ပွုန် အန်။

2 တဲး ဘေ အိူပ် အာဖုင် ဒင်ခုဝ် ဇဝ်ဖြာ။ တဲး ဘေ ကြိုပ် အန် ဇဝ် ဒေါ လိုဝ်း အာဖုင် ဒင်ခုဝ် အန် ဒီ ဘေ။

3 ဂြုဝ်း ဇဝ်ဖြာ ဟဲ့ ပွိုန် ယိုဝ် ဒဲင် အိုမ် နမ်မုက်ဆာရာ။ ဂြုဝ်း အန် ဇဝ် အီ မိုဝ်း အာဖုင် ဒင်ခုဝ် တာင်၊ န့ ပီ ဟမ် ကာနမ်။ န့ မုး ဇဝ်ဖြာ အီ ကွယ် ဒဲင် အိုမ် တာင်။

4 ဂြုဝ်း ဇဝ်ဖြာ တီ၊ န့ ဘော မိုဝ်း ပွုန် ဟဲန့် ကာဆဝ်။ န့ ဘော ဘျ အာဖုင် ဒင်ခုဝ် အန်။

5 ဂြုဝ်း ဇဝ်ဖြာ တီ ဘော တဲး ဟေ အာရိတ်^a ကာဘက် တူတ့်။ ဇဝ်ဖြာ ဘော ကာဘက် ဟေ အာရိတ် အီ ကွယ် ဒီ နွန် လေဘာနုန်။

6 ဆေ ဇဝ်ဖြာ ဘူင် တဲး မာအိမ် ယေန့်၊ န့ ပီ နွန် လေဘာနုန် ဒီ ဒဲန် ပီ ဂွန် မက်။ န့ ဘော ပီ နွန် ဟေရာမူန် ဒီ ဒဲန် ပီ မက် ပြဲ။

7 ဂြုဝ်း ဇဝ်ဖြာ တီ၊ န့ ဘော လေး ပီ ပ့လဲ့ ငဝ်။

8 ဂြုဝ်း ဇဝ်ဖြာ ဘော တဲး ဒူင် ကာဟဝ်း ဒီယုး ဒီယေန့်။ ဇဝ်ဖြာ ဘော ဒီယုး ပြဲ ကာဟဝ်း အီ စိူဝ် ဆာဒေတ်၊ တဲး န့ ရ်ု။

9 ဂြုဝ်း ဇဝ်ဖြာ ဘော တဲး ဟေ တာင် ဒီယုး၊ ဘော တဲး လှာ ဟေ လှာ ပြဲ ဆီဂ့လုး၊ စုဝ်း တူတ့် ခဲင် ပြဲ။ ဂေ အီ ကွယ် ခဲင် ဟုဝ် ဇဝ်ဖြာ ဒွန် အီ ယီ တဝ်း၊ “အေ အိူပ် အာဖုင် ဒင်ခုဝ် ဇဝ်ဖြာ။”

10 ဆေ အိုမ် မ့ပုန် ကာဒါယ်၊ ဇဝ်ဖြာ ဘော အိုပ် အိုမ် တီ။ ဇဝ်ဖြာ ဘော မုး ခုန်ဒီခမ် အီ အိုပ် ဆေဆေ။

11 မှာန့်၊ မဲ ဇဝ်ဖြာ တဲး ပ့လူမ်၊ တဲး ဟဲန့် ဒီ ဒူအီ ပီ အိုပ် မဲ ဘောကာဂ့လျီတ်။ တဲး မဲ ဇဝ်ဖြာ မွင့်ကာရာ ဒွါ ဒီ ဂေ၊ တဲး ဂေ ပွိုန် ဒီ ကွယ် ဒါခိုယ်။