မ်ဟ 19

လွင် ပဲ့ ဟဲ့ ဖာန် ဘ့လေး ဇဝ်ဖြာ အီ ဘျ အာဖုင် ဒင်ခုဝ် အန်။

အာဒါဝိတ် ဟဲ့ ဒဲမ် မှုဝ် နီ။ တဲး ဒါ အီ ယဲတ့် ဂေ အီ တဝ်း မှုဝ် တိး။

1 ဆေ အေ ယွတ် ဂါင်ဟြာဝ်၊ န့ တဲး အေ နပ် အာဖုင် ဒင်ခုဝ် ဇဝ်ဖြာ။ ဆေ အေ ယွတ် ခဲင် ဘ့လေန့်၊ န့ တဲး အေ နပ် ခဲ့ ကိူန် ပဲ့ ဟဲ့ ဖာန် ဘ့လေး ဇဝ်ဖြာ။

2 န့ ပီ၊ အူ ဆီငဲ ဟဲ့ ကာလာင် လွင် အန် တီ ဒီ ပေါ အူ ဆီငဲ။ အူ မှိုဝ် ဝီ မာနုဝ် ပေါ အူ မှိုဝ်။

3 န့ ယီ တူ မိုဝ်း ဂြုဝ်း အီ ပွိုန် ယိုဝ်၊ တူ ပွိုန် ထူမ် ဟမ် မာဆေ။

4 မာလဲ၊ ပီ မာနုဝ် ဂေ ဟဲ့ ဟွတ့် ကာလတ့် ဒဲင် ကာဒါယ် ဒွန် ပ့လုဝ့်။ ပီ ဘျ ဂေ မိူဝ် ဟဲ့ ဇမ် ဒူင် ဆိူတ် ကာဒါယ်။ ဇဝ်ဖြာ ဟဲ့ ဘ့လေး ဆီငဲ ခဲင် ဘ့လေန့်၊ တဲး ဆီငဲ ကွယ် ဆေဆေ ဒီ တီ။

5 ပန် ဒီ လေး ဆီငဲ၊ န့ ဘော ပီ ကာညူမ် အီ ဒီ ခတ်။ န့ ဘော ပီ ဒူအီ အူ ဝီ အီ လေး တး ခဲင် ကာင် အန်။ အန် ဟဲ့ ခူယ် ဒါခိုယ် ကူပ် ဟဲ့ မိုဝ်း အန် ပ့လူမ်၊ ကူပ် ဟဲ့ ပွိုန် ဟာဝ် အန် ဒူပ် န့တေန့်။

6 ဆီငဲ ဘော လေး ဆိူတ် ဘ့လေန့် အူ ဘ့လာက်၊ ဝီ လဲပ် ဟာဝ် ဇမ် ဆိူတ် ဘ့လေန့် ပေါ အူ ဘ့လာက်။ အာဝ် မိုဝ်း ခေါ အူ မျုဝ် အီ ပွိုန် ချြီင်၊ ကွဲ့ တဲး ဆီငဲ ဆောဒါတ် ဒီ အန်။

7 ဒါရာ ဇဝ်ဖြာ ဟဲ့ မှာန်၊ ဟဲ့ မုး၊ အာဝ် လုဝ် မ့ပြာယ် မာဆေ။ န့ ယီ နပ် ဒီ မ့ပြာယ် နဝ်း ဖွိုမ် အေ။ ဂြုဝ်း ပီ ကာလာင် အုန် ဇဝ်ဖြာ ဘော ပွိုန် ညှိုမ် ဆီချာ။ န့ တဲး ဒူအီ ရိုဝ် ဝီ မိုဝ်း အာငျာန်။

8 ဇဝ်ဖြာ ဘော ဒမ် အုန် နာ မုး နာ မှာန်၊ တဲး န့ ဘဲန် နဝ်း ဒါခိုယ် ဒီ အီ။ အာကျာမ် အာငျာန် ဇဝ်ဖြာ ဟဲ့ ဘွတ်၊ တဲး န့ ဘော ကာလှုး ဒီ နဝ်း အီ။

9 ဆေ အီ ရုဝ်ဆေ ဇဝ်ဖြာ၊ န့ ဘွတ်၊ န့ မွှိုမ် ဆေဆေ။ ပီ ဆုင်ဖျာတ် ဇဝ်ဖြာ၊ န့ ဘော မှာန် ဆေဆေ၊ အာဝ် ဟူ မိုဝ်း ဒီ ကာလာင် နာ တူ မွှိုမ် လွင် အန်။

10 ဒါရာ ဇဝ်ဖြာ ဟဲ့ ကာအာပ် တဲး အေ ဝုဝ် လွှိုမ် ဝုဝ် အေ ခြိဝ်။ န့ မွှိုမ် လွှိုမ် ခြိဝ် ဇဲတ်။ န့ ဘော လဝ့် နဝ်း လွှိုမ် ငါမ် မာဖျီန် အီ လေး ဒီ န့လာင် အန်။

11 ဒဲင် တီ၊ ဒါရာ မဲ ဇဝ်ဖြာ ဘော နပ် ဒီ ဒမ် ဆာဒိက် ဒီ အုဝ်၊ အီ မုး ဒဲစေန့် မဲ။ ဆေ အုဝ် ဘော ဒူပ် ဒါရာ မဲ၊ န့ ဝီ ဘဲန် အာဂျိုဝ် ကိူန် ဒီ အုဝ်။

12 န့ ယီ တူ မိုဝ်း အာဆေ အီ နပ် ဒေါ ဒီ ကာလိုပ် အန်။ အုဝ် မှာန့်၊ တဲး မဲ ဇဝ်ဖြာ ဂဝ်း ဝဲန် မှာပ် ပီ ဘူင် အုဝ်၊ ပီ တူ နပ် အုဝ်။

13 အုဝ် ဘော မှာန့်၊ ကွဲ့ တဲး အုဝ် မိုဝ်း နဝ်း ယ ဒီ ဘူင် မှာပ်။ ကွဲ့ တဲး အီ တူ မွှိုမ် ပွိုန် ဒီ အိုပ် အုဝ်။ ဆေ မဲ စွယ် အုဝ် ပါယ် တီ၊ အုဝ် ဒီ ဘော လွတ် ဘူင် မှာပ် အီ မွှိုမ် ကာအိး။ န့ မိူဝ် တူ တဲး အီ ပွိုန် ဒီ ကာလာင် နာ တူ မွှိုမ် လွင် အုဝ်။

14 မဲ ဇဝ်ဖြာ ဘော ပီ ဒူင် ချြီင် အုဝ်။ မဲ ဘော မုး အီ ချွတ် အုဝ်။ ဂြုဝ်း ပီ ကာလာင် အုဝ် ဘော အာကျာမ် အာငျာန် ပီ ကာဖာ အုဝ် ခဲင် နဝ်း အုဝ်၊ အုဝ် မှာန့်၊ တဲး န့ လဝ့် နဝ်း မဲ။