လွင် ပွုန် ဇဝ်ဖြာ
အာဒါဝိတ် အီ မုး ဒဲစေန့် ဇဝ်ဖြာ ဟဲ့ ဒဲမ် မှုဝ် နီ ဝါယ် ဟဲ့ တဲး ဇဝ်ဖြာ အာဆောလူ ဘော ဒါ ဆိုက် အန် စှိုမ် တူတ့်။ တဲး ဒါ အီ ယဲတ့် ဂေ အီ တဝ်း မှုဝ် တိး။
18
1 အိုယ် မဲ ဇဝ်ဖြာ၊ အုဝ် ရွက့် မဲ။ မဲ ဇဝ်ဖြာ ဟဲ့ တဲး ပ့လူမ်၊ တဲး ဟဲန့် ဒီ အုဝ်။2 မဲ ဇဝ်ဖြာ ပီ ဒါအာင် မာဝ် ဒူင် ပွိုန် အုဝ် ကွယ် ဆီချာ။ မဲ ဘော ပီ ရဲင် မိူင် အီ ဟဲ့ ရဲ အုဝ်။ မဲ ဇဝ် ဟဲ့ တဲး အုဝ် လွတ်။ မဲ ဇဝ် ဘော ရဲ ဘော ဂွင့် အုဝ်။ မဲ ဇဝ် ဘော ပီ ဒူင် ပွိုန် အုဝ် ချြီင်။
3 ဒွန် အီ ဟဲ့ ကာအာပ် အိူပ် မဲ ဇဝ်ဖြာ။ ဒေါ ဆာခိုဝ် မှာန့် အုဝ် ဒီ မဲ ဇဝ်၊ မဲ ဇဝ် ဟဲ့ စွယ်၊ တဲး အုဝ် လွတ် တ ရန်ဆူ အုဝ်။
4 န့ ပီ ဝန် တာင် ဟဲ့ ဟွတ့် ပက် အုဝ်။ န့ ဘော ပီ အုဝ် ဟဲ့ ကွယ် ခဲင် အိုမ် အီ ဇုး အီ ဇဲဝ် ကာဆဝ်၊ တဲး အုဝ် ယမ် အာခ်ု မှာန်။
5 န့ ဘော ပီ အုဝ် ဟဲ့ ဟွတ့် ယမ်၊ ဟဲ့ ဟွတ့် ဇမ် ခဲင် ဘာရေဝ်။
6 ဒေါ ဇမ် အုဝ် ဒုက် တာင် ကာဆဝ် တီ၊ အုဝ် ဘော ဆာခိုဝ်၊ မှာန့် ဇဝ်ဖြာ စွယ် အုဝ်။ အန် ဇဝ် အီ ကွယ် ခဲင် ဟုဝ် ဘွတ်၊ အန် မိူဝ် ထူမ် ဂြုဝ်း အုဝ်။ ဂြုဝ်း ပီ ဆာခိုဝ် အုဝ် တီ ဘော လိုဝ်း ဒီ အန်။
7 ဒေါ အန် တီ ကာဒါယ် ဂေ နွန် ဘော ရ်ု ဘော ဒီယုး ဒီယေန့် ဒွန် ပ့လုဝ့် ကူပ် ဟဲ့ ရူ ဇဝ်ဖြာ။
8 န့ ပီ ဒက် ငဝ် ဟဲ့ လေး ခဲင် ဂုင်မုး အန်။ ဘော န့ကိုဝ် ငဝ် ဟဲ့ ကွယ် ခဲင် မူတ့် အန်၊ တဲး ငဝ် ဘော ကုး လေး။
9 ဇဝ်ဖြာ ဘော တဲး ဘ့လေန့် ကာယာတ့်၊ ဘော တး လူင်၊ တဲး န့အု ဝွင့် ကွယ် ခြိုမ် အန်။
10 ဇဝ်ဖြာ ဘော ပဝ့် အာမူ အာမာတ် အန် အီ စိူဝ် ခေရုပ်။ န့ ဘော ပီ အန် ဘိုန့် ဒဲင် ခုန်။
11 အန် ဇဝ် ဘော ချြီင် ဒုဝ် အန် ခဲင် အပ် ဝွင့်။ အန် ဘော တဲး န့အု အီ ဟေတ့် ကာဆဝ် ကွယ် ရူပ် အန်။
12 အာရူင် ဇဝ်ဖြာ ဟဲ့ ဘ့လာင် ကာဆဝ်။ အန် ဘော တဲး ဘျြီ ဂေ ပ့လ မ့ပ့လေတ့် လေး ခဲင် န့အု အီ ကာဘိတ် ဘ့လာင် အန်။
13 ဇဝ်ဖြာ ဘော ဘူင် တဲး န့ မိုဝ်း ဟမ် ကာနမ် ခဲင် ဘ့လေန့်။ ဇဝ်ဖြာ အီ တာင် လွှိုမ် တူတ့်၊ အန် ဘော တဲး အီ ယိုဝ် ဂြုဝ်း အန်။
14 န့ ပီ ဇဝ်ဖြာ ဘော ဘန့် ဘ့လာ အ အန်၊ တဲး ရန်ဆူ အန် ကာစှူတ့်။ အန် ဘော ဘ့လေး ပ့လ မ့ပ့လေတ့်၊ တဲး ဂေ တဝ်။
15 ဒေါ အန် တီ ဇဝ်ဖြာ ဘော အေး ကာလာင် ဂြုဝ်း တာင် အီ မွှိုမ် ယုဝ်၊ တဲး န့ လိုဝ်း ဒူင် လိုက် ခဲင် အိုမ် နမ်မုက်ဆာရာ၊ တဲး န့ ဘော လိုဝ်း ဒင် ကာဒါယ်။
16 ဇဝ်ဖြာ အီ ကွယ် နာ ဒဲင်၊ အန် ဘော ဆူင့် လူင် ဒဲ အန်၊ ပါ အုဝ်။ န့ ပီ အန် ဟဲ့ တဲး အုဝ် လေး ခဲင် အိုမ် လိုက်။
17 အန် ဇဝ် ဘော တဲး အုဝ် လွတ် တ ရန်ဆူ အုဝ်။ အန် တဲး အုဝ် လေး ဒီ ဒူအီ အီ မိုဝ်း ပ့လူမ် လွှိုမ် အုဝ်။
18 ဂေ ဟဲ့ တဝ်း ဒီ ကာဂုဝ်း ဒေါ ဒုက် ညှာပ် ကာဆဝ် ဒီ အုဝ်။ မာလဲ၊ ဇဝ်ဖြာ ယီ ဂွင့် ယီ ရဲ အုဝ်။
19 ဇဝ်ဖြာ ဘော ယဲတ့် အုဝ်၊ တဲး အုဝ် ဇမ် ဒူင် ကာဝဝ်း၊ ဒူင် ဆီချာ။ ကူပ် ဟဲ့ ဒါခိုယ် နဝ်း ဇဝ်ဖြာ ဒီ အုဝ်၊ အန် ဘော စွယ် အုဝ်။
20 ဇဝ်ဖြာ ဘော ဒွါ အာဂျိုဝ် ဒီ အုဝ်၊ တဲး န့ ကာဒါန် ခဲ့ မိုဝ်း အုဝ် နဝ်း ဆိူဝ်၊ နဝ်း မှာန်။ အန် ဇဝ် ဘော ဘူင် ဝျီ့ ဒီ အုဝ် ခဲ့ မိုဝ်း အုဝ် နဝ်း ဆိူဝ် နဝ်း မှာန်။
21 ကူပ် တူ ဝဲန် အုဝ် ဇဝ်ဖြာ၊ ကူပ် တူ ဘူင် အုဝ် နာ မိူက် နာ ဟာယ်၊ ကူပ် ဟဲ့ ဒူပ် ဆီချာ အုဝ် ဇဝ်ဖြာ ဆေဆေ၊ အန် ဟဲ့ ဝီ ဘူင် ဇိုဝ် တီ ဒီ အုဝ်။
22 ခဲ့ ပီ ဒမ် ဇဝ်ဖြာ ယေ ဘူင်၊ အုဝ် မိူဝ် လှုဝ်း ဆေဆေ။ အုဝ် မိူဝ် တူ ဝဲန် ဒါရာ ဇဝ်ဖြာ ဒေါ မှဝ်။
23 ဇဝ်ဖြာ ဟဲ့ နပ်၊ အာဝ် မိုဝ်း အာဆေ အီ ပွိုန် ဒီ ကာလာင် နာ တူ မွှိုမ် လွင် အုဝ်။ အုဝ် မိူဝ် ဆာဒိက်၊ ကွဲ့ တဲး အုဝ် ဘူင် မှာပ်။
24 ခုဝ်၊ ဇဝ်ဖြာ မိူဝ် ဝီ ဘူင် တဲး န့ ဘဲန် အာဂျိုဝ် ဒီ အုဝ်၊ တဲး န့ ကာဒါန် ခဲ့ ပီ ယိုဝ် အန်၊ ခဲ့ မိုဝ်း အုဝ် နဝ်း ဆိူဝ်၊ နဝ်း ဘွတ်၊ ခဲ့ မိုဝ်း အုဝ် နဝ်း လုယ်၊ နဝ်း ဆီငါ။
25 ဂေ အီ မိုဝ်း နဝ်း ရွက့် ကာဝေ၊ မဲ ဇဝ်ဖြာ ဘော ရွက့် ကာဝေ ဂေ။ ဂေ အီ တူ မိုဝ်း အာဆေ အီ ပွိုန် ကာလာင် နာ တူ မွှိုမ် လွင် ဂေ၊ မဲ ဇဝ်ဖြာ မိူဝ် တူ ကာလာင် နာ တူ မွှိုမ် လွင် ဂေ။
26 ဂေ ဒူအီ အီ ဆီငါ ဘွတ်၊ မဲ ဇဝ်ဖြာ ဘော ဘူင် အီ ဆီငါ ဘွတ် ဒီ ဂေ။ ဂေ အီ ဘူင် ကာဘး ဒီ ဇဝ်ဖြာ၊ ဇဝ်ဖြာ ဘော ဇွင့် ဂေ။
27 ဂေ ဒူအီ အီ မိုဝ်း နဝ်း တျီမ်၊ ဇဝ်ဖြာ ဘော စွယ် ဂေ။ ဂေ အီ ပီခိုက် ပီစာ နဝ်း ဂေ၊ ဇဝ်ဖြာ ဒီ ဝီ တဲး ဂေ စုဝ်း တျီမ်။
28 မဲ ဇဝ်ဖြာ၊ အီ မုး ဇဝ်ဖြာ ပီ ကြိုပ် အုဝ်၊ မဲ ဘော တဲး န့ ဘ့လာင် ဒီ အုဝ်။ အီ အပ် ဝွင့်၊ မဲ ဇဝ် တဲး န့ ဝီ ဘဲန် အီ ဘ့လာင်။
29 အုဝ် ဘိုင် မဲ ဇဝ်ဖြာ၊ တဲး အုဝ် ဘော ပွိုန် ပဲ ရန်ဆူ အုဝ်၊ တဲး အုဝ် ဘော ပွိုန် ဒီ ဒဲန် ကာလုဝ်း ရဲင် ပီ ရဲ ဂေ ဒီ အုဝ်။
30 ပီ ဘူင် ဇဝ်ဖြာ ဒွန် မျုဝ် ဟဲ့ မှာန် ဟဲ့ မုး။ အာဝ် မိုဝ်း အီ ပွိုန် နဲန။ ကာဒိက် ဆတ်ဇာ ပီ ဒွါ အန်၊ န့ ဘော မှာန် အာခါခ်ု။ ဂေ အီ ဘိုင် ဇဝ်ဖြာ၊ ဇဝ်ဖြာ ဒီ ဘော ရဲ ဘော ဂွင့် ဂေ ဒွန် အီ။
31 ဒဲင် ဇဝ်ဖြာ နီ၊ အာဝ် မိုဝ်း ဇဝ်ဖြာ ပေါ အူ ကာဒင်။ ဒဲင် ဇဝ်ဖြာ ကာဒင် နီ၊ အာဝ် မိုဝ်း အီ ပွိုန် ဘိုင် တဲး အေ ပွိုန် ကွယ် ဆီချာ။
32 ဇဝ်ဖြာ ဟဲ့ တဲး ပ့လူမ် တဲး ဟဲန့် ဒီ အုဝ်။ အန် ဇဝ် ဘော ယဲတ့် အုဝ် ဟာဝ် ဒူပ် န့တေန့် ဒါခိုယ်။
33 အန် ဘော တဲး ပ့လဝ် အုဝ် ခြန် ပီ ပ့လဝ် မာဇ အီ မုး ဒုဝ် မာ။ အန် ဘော တဲး အုဝ် ဟာဝ် ကွယ် ဆီချာ ဒဲင် နွန် စာ။
34 ဇဝ်ဖြာ ဘော မာနုဝ် အုဝ်၊ တဲး အုဝ် နပ် ဒီ ကာဂုဝ်း၊ တဲး အုဝ် ပဲ ဒီ ဝိတ့် အ ဘွင့်။
35 ဇဝ်ဖြာ ဟဲ့ ရဲ ဟဲ့ ဂွင့် အုဝ်၊ တဲး န့ ချွတ် အုဝ်။ အန် ဘော စွယ် ဘော ဂမ် အုဝ်။ အန် ဘော မုတ် လူင်၊ စုဝ့် ဟုဝ့် အုဝ်၊ တဲး အုဝ် တာင်။
36 မဲ ဇဝ်ဖြာ ဘော ဘူင် န့တေန့် အီ ကာဝဝ်း၊ တဲး အုဝ် ဟာဝ် ဆီချာ၊ ကွဲ့ တဲး ပ့လဝ် အုဝ် ဒီပ့လာတ်။
37 အုဝ် ဘော ခုင်ခြး ခြပ် ရန်ဆူ အုဝ်။ အာတ့် ညှမ် ဟွတ့် အုဝ် ငဝ်း ယမ် တူတ့် ဂေ၊ အုဝ် တူ ဝီ တး။
38 အုဝ် ဘော ဆတ် တဲး ဂေ ယမ်၊ ကွဲ့ တဲး ဂေ ဆီ ဝီ ပွိုန် ဒီ ယိတ့်။ ဂေ ဘော ကေး တူတ့် ဒီ အာတ့် အုဝ်။
39 မဲ ဇဝ်ဖြာ ဟဲ့ တဲး ပ့လူမ်၊ တဲး ဟဲန့် ဒီ အုဝ်။ မဲ ဟဲ့ တဲး အုဝ် ပဲ ဂေ၊ တဲး ဂေ စှိုမ် တူတ့်။
40 မဲ ဘော တဲး ဂေ ရန်ဆူ အုဝ် တဝ် အုဝ်။ အုဝ် ဘော ငဝ်း ဘော ပျာတ့် ဂေ၊ တဲး ဂေ စှိုမ် တူတ့်။
41 ဂေ ဘော ဒဲ့ ဟြေတ့် အီ စွယ် ဂေ၊ ယီ တူ မိုဝ်း အီ စွယ်။ ဂေ ဘော ဒဲ့ ဆာခိုဝ် ဇဝ်ဖြာ၊ ဇဝ်ဖြာ ယီ တူ ထူမ် ဂြုဝ်း ဂေ။
42 အုဝ် ဘော ဘူင် ဒီ ဂေ၊ တဲး န့ ပီ အီ ဘ့လာတ့် ကာမုန် ကာဒါယ် ဘဲန် ကာပုး၊ ဝီ တဲး ခုန် ဘုတ်။ အုဝ် ဘော ဝဲန် ဂေ၊ တဲး န့ ပီ အီ ဝဲန် ညုဝ့် အီ ကွယ် ခူပ် န့တေန့်။
43 မဲ ဇဝ်ဖြာ ဟဲ့ စွယ် တဲး အုဝ် လွတ် တ ဂေ ဒူအီ အီ ကာဂုဝ်း ကာခဲန့် ဒီ အုဝ်။ မဲ ဇဝ် ဘော တဲး အုဝ် ဘဲန် ဒါ တာင် အီ အိုပ် ဂေ ဒူအီ ဘဲန် မျုဝ် ဘဲန် မျုဝ်။ ဂေ ဒူအီ ပီ တူ နပ် အုဝ်၊ ဂေ ဟဲ့ ဝီ ဘဲန် ဒဲစေန့် အုဝ်။
44 ဒူအီ ဂေ တီ၊ ဂေ ဘော ယိုဝ် ဂြုဝ်း ပီ ကာလာင် အုဝ်၊ ဂေ ဝီ ထူမ် ဒူပ် အူ ဇေန့်။ ဂေ ဒူအီ ဘဲန် မျုဝ် ဘဲန် မျုဝ် တီ၊ ဂေ ဘော တး ခြုတ် တး ဂူမ် အုဝ်။
45 ဂေ ဒူအီ အာမျုဝ် တီ၊ ဂေ မိူဝ် ဟဲ့ ဒီလှး၊ ဒီယုး ဒီယေန့်၊ လေး တး ဒူင် ချြီင် ဂေ။
46 ဇဝ်ဖြာ မုး ဇဝ်ဖြာ အိမ် ဆေဆေ။ အုဝ် ဘော အိူပ် အန် အီ ဟဲ့ ရဲ ဟဲ့ ဂွင့် အုဝ်။ အုဝ် အိူပ် မျုက် ဇဝ်ဖြာ အီ ချွတ် အုဝ်။
47 အန် ဇဝ် ဟဲ့ ဘူင် နာ မုး နာ မှာန် ဒီ အုဝ်၊ ဝီ ဘူင် ဝျီ့ ဒီ ဂေ ခဲ့ ပီ ဘူင် ဂေ ဒီ အုဝ်။ အန် ဘော တဲး ဂေ ဒူအီ ဘဲန် မျုဝ် ဘဲန် မျုဝ် ဂူမ် အုဝ်၊ တဲး အုဝ် အိုပ် တူတ့် ဂေ။
48 ဇဝ်ဖြာ ဟဲ့ စွယ် တဲး အုဝ် လွတ် တ ရန်ဆူ အုဝ်။ အန် ဘော စုဝ့် အုဝ်၊ တဲး အုဝ် တာင် လွှိုမ် ဂေ အီ ကာဂုဝ်း ဒီ အုဝ်။ အန် ဇဝ် ဘော စွယ် တဲး အုဝ် လွတ် တ ဂေ ဒူအီ မိူက် ဒူအီ ဟာယ်။
49 ခုဝ် အန် တီ အုဝ် အိူပ် မျုက် မဲ ဇဝ်ဖြာ၊ တဲး ဘော ဒူအီ အာမျုဝ် ဟဝ် ထူမ်။ အုဝ် ဒီ ဘော တဝ်း မှုဝ် အီ အိူပ် မဲ ဇဝ်ဖြာ၊ တဲး န့ လိုဝ်း ခဲ့ ဘွတ် မဲ။
50 ဇဝ်ဖြာ တဲး ခုန်ဒီခမ် ပဲ ရန်ဆူ အန်။ အန် ဇဝ် ဘော ရွက့် ကာဝေ ဆေဆေ ဒူအီ ပဲ့ ဟဲ့ ရဝ်း ဟဲ့ တိုယ် အန်။ ဘော ဒီ အာဒါဝိတ် ဘော ဒီ လှုက်လှာန် အန် ဒွန် စုဝ် ဒွန် ဇာတ်၊ ဇဝ်ဖြာ ဒီ ဘူင် နာ မွှိုမ် ဆေဆေ။