Ester 8

Oiimna osi nliinzolik Bojudeu

Zonu ominzun, nliinAsueru hul ahar lo Ester ŋun uzuuz ŋili o ŋnsi Aman, nmbir bojueu. Mardokeu neej zurun nlin, zonkont ahar nliinzuupa jaa aoko awk aliin ankuli lo. 2 Nlin punun kmiun lo ksi karimbu aseh ki ze kñen Aman, hul Mardokeu kolo. Ester zu Mardokeu duzuŋun uzuuz ŋnsi Aman.

3 Ester pot lado na nliinjet ze izim lo, huri ñaun lo agar ozafu ohuzin osi Aman, ninsi kiiñ Agag, osi abamununkZojir bojudeu. 4 Nlin solun Ester plaŋra lo phuru. Ester nazo naz zurun lo. 5 Jaa: Ze nliin nyeek digzani, ze nji iin kñago zurun nlin, ze un ondai jaal zurun nlin, ze nliinzaaf uni ona ŋjona pdolo, ze nliinlindarin, prim ploŋ kpiso phopi pgar ozaafu Aman, awk Amedata, ninsi kiiñ Agag, apisi ptoom na bojudeu uzuuz bonhoki ze knzoŋ ŋnsaak ŋnsi nlin. 6 Moon njou piinz khuzin khoki bi duzu bopugi ni? Moon njou piinz kiiñ ni tomoo na kolo? 7 Nlin Asueru jak ahar lo Ester na Mardokeu njudeu: ''Nji hilan psik Aman ze psiki zonkont akaa ozafu pfiŋ bojudeu uzuuz , nji hul Ester ŋun Aman, uzuuz . 8 Ikarta uzuuz impisohi ze ktiim nlin, inzuoi kmiun na karimbu nlin, kozi hilun phuglo. Ka nde hilun pisr bojudeu, ze ktiim nlin, ze mi nde iimi ka mo na mnjona ze nde; nde karimbaranka na kmiun nlin."

9 Ze ŋnu 23 ze pli phajzan. Bopis bosi nliinduo pis ŋun uzuuz Mardokeu jaki boko bopis, sa pisr bomitran uz, nmitran nieek, na boyeek utihun bosi ŋnsaak osent na ŋntaaj ŋmpuguz na ŋnsaak jaand zojir ŋnsaak ŋieek ptep ze India ampjau ze Etiopia. Bi hilani ze ŋnsaak ŋieek, ze mi kana osaak jai kapis, kana bopugi ze mi bojai ka lado, hunkranda uz ze bojudeu ze mi bojai kalado. 10 Ikarta piso na ktiim nliinAsueru, karimbar na kmiu nliinbo hilan ya ze iñen bohili nliinbonjawkunk ka dapo ŋnsumpliz ze ku ŋnsumpliz nlin. 11 Ze ikarta nliinhuli bojudeu philun, antom bozoklan yeen boko, antom bosok, bofiŋ bo toom na ofooza bopugi zosaak bo kmbiki pgut na boko, bohilni bo kfiŋ boko ktoom na boko, bohaz boko na bopoz boko; antom bojek priza boko uzuuz . 12 Ŋnu finoo zonkont un ominzi zosaak uzuuz osi nliinAsueru ŋnu 13 ze pli 12. 13 Karta kloŋ kmpisoki kzuo ze kñen bohurun nliinbonkaaki ptezan kolo injaka oiimna zosaak uzuuz osi nlin, hilani ze iñen baña uzuuz , antom bojudeu hilun bamni zonu ominzun botun bo bir boko pko. 14 Bohurun nliinbondapoki ze ŋnsumpliz nlin, boya osar-osar, ze mi nliinjakmi boko. Oiimna ominzun sa pot zupo ze kmbau Susan.

15 Mardokeu pun ze zurun nliintimo yun nliinhuli lo, intaplani mbau nfulamul, nfasla na kdaŋu khieek ksi mhuru na kmbisa ksi mmuz miknjilmi bolempmi na kmbisa khieek knjilki. Baña kmbau Susan ieh na mnlina. 16 Bojudeu hil lilun makrin, ze mi bo kamunk kpe, baña uzuuz hul boko ulujul. 17 Ze ŋnsaak uzuuz na imbau zun oiimna nliinominzun jaui, okaa mnlina mieek, ze psoof bojudeu, onah na onu ozukl. Baña bonsumki bosi ŋrasa ŋnloŋo huglo bojudeu zonkont bokalo bojudeu.