Ester 2

Asueru nimro na Ester

Kero ŋun ŋminzŋi zipi, oreu Asueru bi yali, ka lel un Vasti hili doli, ze mi ahulmi prim jaa: Vasti azi pot opho ahar. 2 Bozaŋ nliinbok ntihunari lo jaka: Baña ir ber bompili boani pho mee ñiinz, bonuroki antom phul nlin. 3 Nlin nyeek sa kaa pzu ñai pho uz zurun utihun, ze ŋnjir uzuuz ze plin lo an oi bi pkoulan bompili bonuroki uzuuz ze kmbau klinski ksi Susan, ze ku ksi bohaz zonkont Egai, ña ankalohi ninsi nliinnieŋ bohaz. Bo phulo ŋun boi pñig boko antom bo nuro. 4 Nmpili nliinpei pjeu alio ze kfah ksi Vasti. Nlin lindar olado ominzun. Antom do jaunk.

5 Okaa ñiinzan njudeu anhoi ze kmbau klinski ze Susan, aknduoi Mardokeu awk Jair, Jair awk Simei, Simei awk Kis, ñiinz ninsi kiiñ ksi Benjamiŋ. 6 Bo ika jeka ze Jerusalen na bojuuk na Jekonia uz nliinJudá, bosi Nabukodononsor sonkunk. 7 Mardokeu ika ze kul Adasa, anhoi Ester, asi boliin boko zaroki, zonkont azi kaa aniin na aliin. Ai o nmpili anuroi oleef na mnkil. Kero aniin na aliin kezi Mardokeu jeka injaka awk. 8 Kero prim nliinpminzpun bi lado ze ŋnlik uzuuz , bompili bonsumki zoñnor ze kmbau klinski ze Susan, ze kñen Egai. Bo sa ya na Ester uz, ze mez nlin, bozu lo ze kñen Egai, nieŋ bohaz. 9 Egai lindar Ester, janŋ mnjona; ka minti, antom phul lo ŋun ai pñig oleef na ŋolo, na ŋun ŋnde lo; sa pot hul lo bompili jaand bonkaawki ulujul ze mez nlin, ka ya na bompili lo, ze zun ze mpezi pho na mnjona ze mez bohaz. 10 Ester azi zuup ña orasa lo, ka azi zuup ña baña bonhoki bowk boliin, zonkont Mardokeu hula prim aki kzup ña. 11 Mardokeu ika jaka lawar ze ŋnu pñog uzaanz usi mez bohaz antom pme mi Ester kzip mi, na un o knhiri na lo.

12 Ŋnu ŋnfiroŋi antom bohaz zinz-zinzno ŋho kli odisiñene na kli kpuguz. Kli paaj na minsitidos mnsi mira kli paaj na oarser na ŋun ŋnloŋo nkirnoŋi. Zotomr boko olura uzuuz okaa pjau zonu osi nmpili oi pneej zun nliinAsueru. 13 Kero aka pun ze ku bohaz, phya ku nlin, ahilun pñaun un ajewi aphulo a. 14 Ze montna a ilo pneej zun nliinonzi; ze nfa ajaka ya ze ku kpuguzan ksi bohar nlin, ze kñen Saasgaz ankalohi nieŋ bohaz nlin. Azi poto pkak ze mez nlin, apkak za, ze nliinjeu lo du ktiim lo.

15 Ester, awk Abiail, amak aliin Mardokeu ñiinz ankuli Ester injaka awk, ojaur onu lo osi ai pneej ze mez nlin, azi ñaun un oloŋ, ze mbaza osi Egai nieŋ bohaz nliinjaki lo ayana. Ester iin mnjona zurun baña uzuuz . 16 Bo ya na lo ze nliinAsueru ze palans nliinze pli ondisiñene ze pli Tebet, zolur ojaandun osi plin lo. 17 Nlin fundara ampempen bohaz uzuuz ; Ester iin kñago na ŋnjona pempen bompili uzuuz . Nlin zu kdaŋu ze been lo, zulo ahar nliinze kfah ksi Vasti. 18 Antom ka abeunar bohuli, bomitran bo ya matir onah Ester, adu phioŋ ze ŋnsaak plin uzuuz , ka hal ŋun ŋnsumŋi ŋntaambŋi prez. 19 Kero bompili zoñnori uyas upuguzan, Mardokeu kaa utihun ze plumun phieek psi nlin. 20 Ester azi zuup ña a oi awk aliin, ka azi zuup bopugi lo, ze mi Mardokeu jakmunk lo, zonkont Ester zañ ze pte Mardokeu injaka mi a hilunk ze kul lo.

Mardokeu burburun phila nlin

21 Ze ŋnu nminzŋun, kero Mardokeu o zutihun ze plumun phieek psi nlin, Bigta na Teres botihun bopugz bosi nliinboieŋ plumun phieek, bodeuzi ankint jeu pfiŋ nliinAsueru. 22 Mardokeu bi mee un ominzi, hilan pzuup Ester. Ester zuup nliinna ktiim Mardokeu. 23 Bo dol uiepro; un ominzun meo, botihun bominzkun siko ze bunu. Un ominzi piso zoliuri plin zurun nlin.