Oliuri osi
ESTER
Onah osi Asueru
1
Uni oun un onhiri zokil Asueru, Asueru aminzun liho ptep ze India anjau ze Etiopia, Asueru alio duzu ojir ŋnsaak onsent na ŋntaaj ŋmpuguz na ŋnsaak jaand, ptep ze India ampkint pjau ze Etiopia. 2 Zokil ominzun Asueru lio, ze kmbau klinski ksi Susan. 3 Zolur oajzan osi plin lo, adol onah oyeek antom beunar bohuli, na botihun lo, boyeek boghutun lo bosi Persia, Media, bowkoliin nlin, bomitran bo ŋjir osaak bo hil o zurun lo. 4 Ze ŋnu ŋnjoŋi makri ŋhoŋi ŋnu onsent na ŋnu ŋntaaj bakari, ka jaŋ priza na ulujul usi plin lo, ze a omi nliin nyeek makri. 5 Kero ŋnu toomi, nliinbeunar baña uzuuz , ze kmbau klinski ze Susan, ptep ze bonirki amp pjau ze boñagin bontik. Onah ominzun kaa ŋnu jaand, zunu zojardim ze mezu palans psi nlin. 6 Ŋnlankoŋ ŋieek ŋnfasla, ŋnfulful na ŋnfulamul ŋili hakno na itala isi mmuz mikjilmi (púrpura) tano na kmiun ksi prat tano ze isap isi mármori. Izori uzuuz yoko ihuru na prat; ozee olemp na mosaiku ŋndiima ŋgajinz; mármori, ifasla, ijenkle, na ilaak inkay ulur. 7 Pkeme haio zinkopu ihuru; Inkopu pero na isiinz yolo. Pkem nliinsumi ze mi priza nliinkapi. 8 Ze mi nliinladomi ña zo pzuo pdaan pkem oforsa, zonkont nliinjaki botihun lo bosi mez bo hai ze me ña jeumi. 9 Vasti ahar nliin nyeek sa dol onah uz na bohaz bosinz zojir oloŋ ze mezu palans Asueru.Vasti hyeel phya pkero nliin
10 Zonu ojaandu kero ujuuns nliin Asueru siink mnliina pkem, a hil botihun lo jaand bokntihunki na lo ze palaans, bonhoki Meuman, Bizta, Arbona, Bigta, Abagta, Zetar na Karkas, . 11 Antom boya bina Vasti ahar nliin nyeek zurun lo, na kndaŋu ksi ahar nliin nyeek antom pjanŋ baña, na boyeek knuro lo, zonkont anuroo makri. 12 Kero boiinz bominzkun ya na nkuni nlin, Vasti ahar nliin nyeek yeel phya. Zonkont un ominzun nliindeuz makri, koreu lo ii ze mezu lo. 13 Ze mi oiili o mhagzin nliin ber uyepro ze boiinz bomeuki zonkont ŋiimna na pdol olado, bo bi iep bonlipkunk ka kme ze mi ŋun jai ka ya. 14 Bo ñogkunk lo makri bo o Karsena, Setar, Admata, Tarsis, Meres Marsena na Memukan, boyeek jaand bosi Persia na Media bon ilunki pneej zun nlin, bo ka kfah knhaalki ze plin. 15 Bo yep boko: Ze mi ŋun ai ka dolo, ye Vasti, ahar nliin nyeek oun pdolo, ze mi ayeelmunk pdo un nliin Asueru jaki ze iñen botihun lo? 16 Memukan seemb zurun nliin na boyeek, jaa: Vasti ahar nliin nyeek mbaza nliin a juun nkonalo, apot sa juu boyeek uzuuz , baña uzuuz bonhoki zojir osaak Asueru. 17 Zonkont bohaz uzuuz bo bi pme un ahar nliin nyeek doli, bo pbeh bohin boko antom pja: Asueru nliin nyeek, hilan pdu ahar lo Vasti ka yeel phya. 18 Hankri hunkran bohaz bosi boyeek Persia na Media bonteuki un ominzi osi Vasti ahar nliin nyeek doli bo pzuup bohuli nlin. Hunkran ulujul oun phaŋo, na pham pkaa utezor. 19 Ze nliin digzani, ahilun phul prim phopi piso zoiimna osi Persia na Media, onhani philun phugl, onjaki Vasti azi poto pneej oloŋ zurun nliin nyeek akndwoi Asueru. Antom udat ñaz aloŋ ampei lo pho na mnjona. 20 Hunkran, zoyaar olado ominzun osi nliin teo ze ŋnjir uzuuz ŋnsi pliin lo pmagpink, bohaz uzuuz bo pzu bohin boko pña, ptep ze boniirki ampjau ze boñagin. 21 Nliin na bohuli lo liindar olado ominzun. Hunkran nliin dodun ze mi Memukan ladomi. 22 Ka ahilan ikarta, ze ŋnjir uzuuz ŋnsi pliin lo, ze ŋnsaak ze mi bo ai ka pis, ze ŋnrasa ze mi bo kladomi. Antom prim ñiinz hilun pteo ze mez lo. Olado ominzi ka pzuupo ze ŋnrasa ze mi bo kladomi.