Neemias zinkun boñagin
5
O hil o mhiuknin magmi, mnsi bopugi mnsi bohar boko ze khuzin bojudeu, ze pzaro boko. 2 Boloŋ jaa: Ndo na bowk ndo, ndo sumi, ndo fir trigu pde antom ndo ki kbi kez. 3 Boloŋ jaa: "Ndo piñar ŋri ndo, ŋnzanz ndo ŋnsi mhuba na iku ndo, antom ndo hilun pber trigu zokil ondai osi ono." 4 Boloŋ jaa: "Nja ika ka pnanko onsaam antom nja luk ieene ze nliinze ŋri ja na ŋnzanz ŋnsi mhuba. 5 Nja o ze pñaak ploŋ na pzaro nja; bowk nja bo oko injaka bowk boko. Ka ndo zuo phaap bowk ndo injaka bojuuk, anka boloŋ ze bowk nja bompili o zuo pjuuk. Ndo zi ka mi ndoi punun boko za, zonkont ŋri ndo na ŋnzanz ndo ŋho ziñen baña boloŋ.6 Nji Neemias kero nji te miuknin nji deuz makrin. 7 Nji dukoo ze zaaf na un ominzi; antom ka nji hunsoo na bowkoliin nliinna bomitran, nji jak baka: "Nde pseh onsaam pzaro nde pempen atoom pbundar ozinde." Ka nji du uzuñnor uyeek antom plado na boko. 8 Nji jak baka: "Ze mi nja hilumi, nja ganz pzaro nja bojudeu bohaapoki baña bani pme Uzi. Ka nde pzu boko bo pot bo haapo?" Ka nde jeu phaap ndo baka? Ka bojoui bozi kaa un boi pja. 9 Nji pot sa jak boko: "Un nde klempink ozi o na mnjona. Ka ndezi hilun phianz na pkalo Uzi nja antom bo bir nja bani pme Uzi khilun psoond nja pkoño? 10 Nji Neemias uz na bozain na botihun ni bozala, ndo nankan baka onsaam na trigu. Nja kaa phutun psik baka opafu. 11 Nde botna baka hankri ŋri boko, ŋnzanz boko ŋnsi mhuba na ŋnsi mbuk mnsi olivera, na iku boko, nde sa botun boko uz ze un ze mezu onsent ze ŋun nde nankani boko, injaka onsaam, trigu, pkeme na mnsitidos ŋinsi nde zuuŋi boko." 12 Bo jaa: Ndo pbotun baka; ndo zi poto pñahun baka un oloŋ. Ndo pdo ze mi ujakmi. Nji Neemias nji du bopenen Uzi antom bo zu boko bobisro zonkont olado boladounk.
13 Nji Neemias nji iiŋ yun ni itimo, jaa: "Hunkran Uzi oun piiŋ ñiinz ani pdo un ajaki. A piiŋo ze ku lo na ŋun akaŋi uzuuz , an akint aduko iñin isil." Baña uzuuz bonzoñnori zolo jaa: Hunkranda." Bozah NYEEK. Ka Baña do ze mi bojakmi. 14 Ze ŋnlur ŋndisiñene na ŋnlur ŋmpuguz nliinnieek zuin ka nji o nmtran zosaak osi Judá, ptep ze ŋnlur ŋntaaj ŋmpuguz anjau ze ŋnlur ŋntaaj ŋgajinz na ŋnlur ŋmpuguz ŋnsi Artaserksis nliinnieek, ka nji na bozain ndo ze de ŋun ŋnde ŋnsi ndo kaŋi pde zonkont nlin. 15 Ka boliin bo nlioukunk urun kero mbazo lioo bo do baña ŋun ŋnjozŋi, zonkont bo ka seh ziñen baña ŋun ŋnde na pkeme, injaka uz ŋntaaj ŋuakr zonsaam osi prat. Pot kak bo poz boko bosi utihun bo ka kpe duzu baña. Ka nji Neemias bazi do jaunk nji kalo Uzi. 16 Nji zu ujuunszutihun plemp omur, bopoz ni uzuuz bo zoñnor za zutihun. Ndozi ganz uri usi kjaar. 17 O ika ka uz bojedeu osent na bojudeu ŋntaaj kñene, boyeek na baña bani pme Uzi, bo hil bi ze ndo bo hil o ze kwaŋ ndo, bo hil aka de ze mez ni. 18 Zonu bo ka fiŋ oiit oloŋ na ŋmpalalu paaj ze ŋnuroŋunk na nkas injaka ŋmpiru uz. Ze ŋnu ŋndisiñene nja kber pkeme pnsumpi uzuuz pnditpi ktiim, ka mbaza zu baka bo hulin ŋun nde ze mi njomi ña anlioi, zonkont pkuŋ pndizpi o duzu baña. 19 Uzi ni, lelan na kñago ze ŋun uzuuz ŋnsi nji lempŋi baña bondawki.