Neemias 6

Bobido na bojudeu

Kero Sambalati, Tobias na narabi andau Gesém, na bondukloki ze bobir nja, kero bo te nji Neemias njo lemp omur antom ptuh ir uzuuz , ka mbazo zu ilumun ze mntum iolo. 2 Sambalati na Gesém bo hilan pjakin nhia nkoulor na boko antom ndo ya do uieslor zontank oloŋ zunjir usi Onu. Ka un ominzi oko klas ksi bo bamunki antom pdolin khuzina. 3 Nji hil boili nliinboya jak boko: "Njo ze plemp utihun umpebi firo. Onkanu mbazi hilun phya da. Ka njo phutun utihun bi jan, psol pbi pkero nde"? 4 Bo ilani inkuni ankint do ŋias ŋuakr, ka nji seemb boko ze mi njon ko zuup boko. 5 Zuias uñiinzan Sambalati hilan nkuni, ka nmpoz lo bi na karta knhawki, ze kñen lo, 6 knjaki jeink: "Ojako ze psoof ŋrasa, Gesém sa ja uz, ka wi na bojudeu nde jeu pñankun na nliinnieek, un ominzun kaun ka uka lemp omur. Ze mi olado ndo teink wi wo pho nlin. 7 Uber bo hurun Uzi bo duka ja ze Jerusalen wo nliinJudá. Olado ominzi o pjau zurun nliinnieek. O na mnjona ubi antom nja lado ze un ominzi. 8 Nji hilan pjaka: Ŋun uzuuz ŋnsi ulAdoŋi ŋoko ujubl, ka wi uzafun un ominzi zueen nu. 9 Boko uzuuz bojeu pzuin mnkalo, bo ika ze ja: "Iñen boko o phutun utihun, bozo ptoom lo." Ka nji buuri: Uzi ni linslisna kñen ni.

10 Onwan nji ya ze mez Semaias, awk Delaias awk Meetabel, zonkont aneeno pun ze mez azi hilun bi zun njonzi. Ajakin nja saŋ nja bopugz nja ya ze ku ksi Uzi, nja neej ze zun ze iimna antom nja dis plumun zonkont bo bi pfiŋu; zurim uloŋo bo bi pfiŋu." 11 Ka nji yep lo: "Ñinz injaka nji sa pot ka pzi: Ka mbar ña injaka nji hilun pneej zun ze iimna, antom a duko na phila? Mbazo pneej za." 12 Ka nji bi bamb ja mbaza Uzi hulun lo olado ominzun, a tezan olado ominzun pzu ubinkro ze nji. Tobias na Sambalati bo ika luka. 13 Antom a zuin mnkalo, nlemp un ominzun, antom njuu, bo hilun psokin ktiim, antom bo ladarin un onjozi. 14 Nji buuri: Uzi ni, lelun Tobias na Sambalati zonkont ŋun bo lemp ŋink, injaka uz ñaz nhurun aknduoi Noadias na nhurun anjeunk pzuin mnkalo.

Utihun mugi

15 Kero ŋnu ŋntaaj kñene na ŋnu ŋmpuguz zipi, utihun omur toomi ze ŋnu ŋntaaj ŋmpuguz na ŋnu kñene ze pli psi Elul. 16 Kero bo mbidoki na ndo uzuuz ze ŋrasa uzuuz ze kwaŋ te utihun omur toomi, ka bo linki aŋ phaz ze ŋnfoz boko bo bamb ja utihun uminzi tihunoo na mnzinknar Uzi ndo. 17 Zokil ominzun bowkoliin boliin boloŋ bosi Juda bo hil a kpisr Tobias ikarta insumii; Tobias sa kpisr boko uz. 18 Zonkont baña bonsumki bosi Juda hil ka ukoulor na Tobias zonkont ubisro injaka ze mi animunk awk Sekanias; Sekanias awk Ará: Joanan awk uz sa hil nim awk Mesulan, Mesulan awk Berekias. 19 Bo dukoo ze lado zuruni ŋun ŋnuroŋi ŋnsi Tobias lempŋi, ba khia kzupa ŋun nji jaki. Tobias uz a sa kpis ikarta antom pzuin mnkalo.