Bobir jeu pneen utihun
4
Kero Sambalati te ndo ze lemp omur, ka deuz makrin, antom tep pdo bojudeu irah. 2 Ka yeproo zurun bosinz na boghutun bosi Samaria: ''Oiee bojudeu bondaf kink klempun? Ka bo plemp omur dozun? Bo pbuŋ Uzi ze wojun bo kdolunk usi Uzi antom bo hilun ptoom utihun zonu oloŋ? Bo pot punu ilaak imbaliri ze mbool mnzoñnormi antom ba turoo uzuuz .'' 3 Amonita anduounk Tobias ika o na Sambalati, a jaa: "Ŋanun bo lemp omur osi ilaak zonsarsar bili o phata osar-osar!" 4 "Uzi ndo! Siinkun mi ndo beehomi." Zun irah boko antom ijet duzu ieene boko, antom bo bupo zogut bo ya pjuuk zosaak oloŋ. 5 Ika ler pjua boko, ka ika punu pjua boko zurun un zonkont bo kar botihunu.6 Hunkran utihun ya dun na urun, ndo lemp omur an ko kint jau ze psoof ohalr olo ze kwaŋ olo uzuuz , zonkont ijuuns baña bamni uzuuz antom ptihun.
7 Kero Sambalati, Tobias na baña bosi Arabia, bomonita na bosi asdodi, te utihun plemp omur osi Jerusalen ya na urun ka iir olo tuoo, ka bo deuz makrin. 8 Bojuk ze ŋnzafu boko, antom bi pgut na Jerusalen, antom pzu ohatat. 9 Ka ndo buur na Uzi ndo, ndo zu nieŋ abaap ndo, zurim na pnak.
10 Baña Juda jaa: "Ofoz bokuŋo mbool otoomi. Mbool sum maakrin ndo zo bi philun plemp omur." 11 Ka bo bir ndo jaa: "Bo zo pme un oloŋ, ka bozo bamb anja kint nja jau ze psoof boko, antom nja fiŋ boko. Antom ol nja toomu na utihun uminzun." 12 Bojudeu bo hili o ze kwaŋ bobir ndo, bo bi ŋaj ndo ŋias ŋndisiñene, ka bo bir ndo o pun ze ŋnjir uzuuz , bi pgut na ndo. 13 Hunkran nji zudun boieŋ ze kfez omur zun ze iolozi, ze nfaszi pghutun. Nji zu baña ze pliin boko, pliin boko na ieeje, iñakon na insaŋi boko. 14 Nji Neemias nji ten mi baña hili oo, nji nazoon jak bowkoliin nlin, bomitran na boiinz boloŋ bondukloki. Nde ika kalo baka, nde lelun NYEEK, ninsi baña kai pkalo, nde gutnara pzaro nde, bowk nde boiinz na bompili, bohar nde na iku nde.
15 Kero bo bir ndo te ndo me un oknzipi, ka Uzi o gar ŋnzafu boko, nja uzuuz nja kak zomur, ña khia zutihun lo. 16 Ptep zonu ominzun psoof bopoz bozala nin, ze tihun ka psoof pndapun bup iñakon, ŋuel, insaŋi, na isaku isi metal. Boyeek boghutun seh ifah boko ze kfez baña uzuuz bosi Judá, 17 bo klempki omur. Bo kuŋo mbool ze tihun na kñen kloŋ, sa bup kzij kgutnin na kloŋo. 18 Bo klempkunk omur ña ktan keeje lo zulank, kero a ka tihun. Nluul ptin hil o ze kwaŋi. 19 Nji Neemias nji jak bowkoliin nlin, bomitran na bondukloki. Nja loroo, nja taaslor maakrin zutihun umagbink. 20 Zun ze zesi nde oonzi ze nde sink ptin luuli, nde kbi koulor na ndo zolo Uzi nja opgutnar nja.
21 Hunkran ndo bup dun zutihun, psoof botihun bo hil kaa iñakon, ptep zomair onu ampkint pjau zopunr ŋhuzu. 22 Zokil ominzun nji jak baña. Ña na nmpoz nzala lo bo duko ze Jerusalen antom bo o injaka nieŋ zurim, antom bo bup utihun ze pnak. 23 Ŋanu nji, ŋanu bozain, ŋanu nmpoz nzala ntihun ni, ŋanu boieŋ ni, ŋanu ndo zi zimlan yun ndo itimo. Ña kpiinz na keej lo ze kñen krei.