Neemias 2

Neemias ya Jerusalen

Onwan, ze pli psi Nisan, ze ŋnlur 20 ŋnsi nliin Artaserksis, kero pkem o baan zurun lo, nji Neemias nji jek pkem ya tiit lo; uni o wyas useke nji hili duko na kjoozi zurun lo. 2 Nliin yepin : Hyezi kaa, ka mnkil nu joozni, ka uzi maaki? Uni ozi o un oloŋ ze mbaza kjoozi ujuuns ka, nji liinki, 3 jak nliin: Phila ze nliin! Mnkil ni ampo pjozun pjan kmbau zun boliini moinozi soko uzuuz , ilumun kolo ieek ituroo, na uroo. 4 Nlin yepin: Oie ujeu? Nji bur na Uzi usi duzu. 5 Nji jak nlin: Ze nliiniin ja o na mnjona, ze ntihun nu iin kñago ze kil nu ukhilin nhya Juda, ze kmbau zun boliini moinozi, antom mpot nlemp kmbau kminzkun. 6 Nliin, na ahar anzori ze kwaŋ lo ka yepin ŋnu njoi pka ze wyas ŋnu njoi pkak. Nji zu klee; ka nliin nyeek digzan philin. 7 Nji jak nliin nyeek uz: Ze nliin iin ja o na mnjona ukhulin ikarta nhya nhul bomitran boyeek bonhoki zozee ojirun krik Eufrati, antom bo hilun phutni nzip nhya Juda. 8 Nji pot sa ñaun nliin nyeek karta phya phul Asafi nyeŋ pgof psi nliin nyeek, antom ahilun phulin mndera mnsi irarm isi ilumun zun ze liinzi ze nkuundzi ku kyeek ksi Uzi, na ilumun isi omur osi kmbau, na ku uz ksi njoi phya phon. Nliin nyeek hulin ikarta iminzyun zonkont kñen kmbalirki ksi Uzi hil o duzu ni.

9 Asa hulin boyeek bogutun uz na bogutun bosi ŋnsumpliz. Nji jau zun nmitran nyeek aounk zozee ojirun krik ksi Eufrati, nji hul baka ikarta isi nliin nyeek. 10 Kero Sambalati, ninsi ontank osi Beti-Oron, na Tobias nyeek ninsi bomonita, bo te ja ña bil antom ptihun pzinkun bowk Israel ka bo deuzi.

Neemias hul bopugi kliinsi

11 Nji jau ze Jerusalen. Kero nji kazi ŋnu 3, 12 Nji nazoo zurim, nji na knzoŋ kmpozki ksi boiinz, kero mbazi hil o zuup ña un Uzi ni zui zujuuns ni antom nlemp ze Jerusalen. Onsaam nji yani oloŋ, osi nji dapounka. 13 Zurim uminzun nji pun ze plumun psi unjir nji zipni zojir plik pkndwopi dragon, na plumun psi mulur. Nji ten na mnjona zun ze zesi omur Jerusalen hili taunoo na ilumun omur inturohi na uroo. 14 Nji zip ze plumun pyeek psi plik, antom ya zun ze lami ze zesi nliin, ozi hil ka zun nji hilunzi pzipn antom pdapo onsaam ni. 15 Nji pot sa yaanz zurim zunjir usi kruuz kmpozki, ze ten omur, nji kak pot neej ze kmbau ze plumun psi unjir. 16 Bomitran bozi me zun nji yazi, ka bozi me un nji klempi, anjau ze krank mbazi hil o zuup bojudeu, un oloŋ, ka mbazi zuup bopenen Uzi, bowkoliin nliin na bonhoki bi plemp utihun uminzun.

17 Ka nji jak boko: Nde iin onor nja oni; Jerusalen sokoo, ilumun dolo turo na uroo. Nde biir antom njat nja lemp omur osi Jerusalen, nja ki kot kbi duko ze mmol. 18 Nji zuup baka mi kñen Uzi ni hili o na nji antom pziinkni, injaka olado nliin nyeek zuupi nji uz. Bo jaa: "Nja nazo njat nja lemp omur." Hunkran bo hinzarun antom utihun uminzun ya na urun. 19 Kero Sambalati, Tobias na Jesen ninsi Arabia, me un ominzi, bo dol irah, bo beh ndo, bo yeproo: Oyee nde klempink? Nde jeu pñankun na nliin nyeek? 20 Nji seemb jak boko: Uzi usi duzu bo pziinkun ndo antom ŋun ya na urun; ndo bonhoki botihun wolo ndo pnazo antom plemp omur, ka nde, nde zi ka klika, nin kfah zunzi, ka nde zi o bosi Jerusalen."