OLIURI OSI
NEEMIAS
Ibuur isi Neemias
1
Olado ondai o osi Neemias awk Akalias. Ze pli kisleu, ze ŋnlur ŋntaaj ŋmpuguz kero Artaserksis lioo, nji Neemias nji hil o ze zun nliinszi ze kuundzi palans ze Susan kmbau ksi Persia. 2 Anani, ze pzaro ni na baña boloŋ bo biin Juda. Nji yep baka zonkont Jerusalen na bojudeu uz bomburkunk pjuuk. 3 Bojakin: Bonduklokunk ze pjuuk bookunk zojir osaak osi Juda bo o ze kjozi kyeek; baña akbeh baka. Omur Jerusalen jeti, ka ilumun olo yeek turo na uroo.4 Kero ka nji te ŋun ŋminzŋun, nji zoori, antom huri. Ze ŋnu ŋnloŋ nji yukni, buurna Uzi na phamp pde, Nji buur na Uzi usi duzu. 5 Nji jaa: "NYEEK-Uzi usi duzu, Uzi uyeek, unlinkumbi, unhwoi na mnjona ba hazni ze pbaap phuuz na baña bonfundarki wi bonjai ka baap ŋiimna nu. 6 Tenun ze nji waul ywaz, antom usiink ibuur isi ntihun nu kbuurhi zurun nu hankri, ze pnak na urim, ze bowk Israel, botihun nu. Nji zuup pjwa psi ndo dopi bowk Israel ze wi, nji uz na bowkoliini ndo jwi. 7 Zowadadi ndo juu maakrin ndo zi te ŋiimna, ka ndo za te ŋiimna ŋndiima yeel ŋun uzuupi ŋnsi hulŋi Moises, ntihun nu. 8 Lelun un uzuupi ntihun nu Moises, jak lo: Ze nde kit ŋiimna ni, njo ptaaslan nde ze psoof baña boloŋ. 9 Ka ze nde kak ze nji, antom dol un nji jaki nde, ŋanu bowk nde taaslor ze ŋnjir uzuuz zosaak, njo punun baka za, nzoklan boko, mbiin zun nji datzi antom ktiim ni duko zolo. 10 Botihun nu bonhoki, baña nu bosi uburburni ze pjuuk na philun nu pyeek na kñen nu knjiinzki. 11 NYEEK, aulan kwaz nu zibuur ntihun nu antom usa siink uz ibuur isi botihun nu bonjeuki pmolo ktiim nu. Zinknan hankri uzu zujuuns nliin andai antom ajaaŋ kñago ze nji. Utihun ni hil o ptiit nliin pran.