9
Kero ŋun ŋminzŋun dolo, boyeek boloŋ jau zun nji oonzi bo jaki: " Baña bosi Israel, bopenen Uzi ukun uzuuz na bolevita, bozi duko kisro na baña bosi ŋnrasa ŋi, ma bozal mhagzin mnzijrami injaka bokananeu, boeteu, boperiseu, bojebuseu, bomoabita, boejipsu na bosi boamoreu. 2 Bodjek bohaz bosi baña bominzkun antom pnimro na boko, pot psa phul bowk boko antom bomar; hunkran bogumlanu baña Uzi na baña ŋnsaak ŋminzŋun. Boyeek na bo dol olado, bowkun zurun ze pjwa pndapi. 3 Kero nji te un ominzun nji pas kmbisa ni na omaant. Nji dut oyel osi weene ni na uruun ni. Nji zor ujojou 4 Hunkran nji zorun ujojou ankint jau ze pdol wojun usi montna. Baña boloŋo bi koula na nji bonsinki mnkalo zolado osi Uzi usi Israel, zonkont pjwa psi bombiin kunk pjuuk. 5 Kero ori jawi antom pdo wojun usi montna, nji nazoon ze kjozi ni, na kmbisa na omaant ŋmpasoŋi, nji ŋupi deŋ iñen ni ze Uzi ni. 6 Nji jaa: Uzi ni! Njo zoatat na mmol. Mbazi hilun pdeŋ mnkil ni ze wi Uzi ni, zonkont pjwa ndo bundari duzu ieene ndo; pjwa ndo hali ankint jau duzu. 7 Ze ptep ze ŋnu boliindo bondima anjau hankri, pjwa ndo pmagi. Zonkont pjwa ndo, ndo na boliindo bosi ŋnsaak ŋnloŋ ndo mindo ze keje ze pjuuk, ŋun ndo kijoo, ndo o ze mmol, ze mi nja ilumi pin hankri. 8 Ze krankanki, ozi joni Uzi ndo jaŋ ndo kñago, hutun ndo boloŋ bomburki wl ndo zun zlinsi zezunzi zjinsi antom ufiiz nja ikil Wzi ndo antom ndo ka phila phalu ze pjuuk ndo. 9 Zonkont nja hil um o bojuuk ka Uzi nja bozi kulan nja ze pjuuk nja uzu boliin bosi Persia soond kñago ze nja antom nja hilun pka phila phalu, nja nazun ku kyeek ksi Uzi nja khili soko uzuuz antom nja ka bool nja duko nja lins ze Juda na Jerusalen.10 Ze krankanki, Uzi ndo, oyee ndoun pja ze mi ŋun ŋi dolomink? Zonkont ndozi baap ŋiimna. 11 Ŋi hul ŋi ze mntum botihun nu, oi bohurun nu, ujaki. Osaak osi ndei pneej antom pseh olo o osaak onzopi, ze mi baña olo zopni olo na kzopi boko, bo sumun na ze ŋnjir uzuuz , na mhagzin boko mnzijrami. 12 Hunkran, ndezo phul bowk nde bompili bowk boko boiinz antom bonim, nde ika jek bowk boko bompili antom phul bowk nde boiinz bonim. Nde ika zu phioŋ na baka, nde ika zinkun baka antom ŋun ya na boko na mnjona. Hunkran ze nde te ŋun ŋnsi ujaki nde, nde klins, nde kde ŋun ŋhoŋi na mnjona, nde dolun antom bowk nde iij olo onzañi. 13 Ŋun uzuuz ŋmbiŋi duzu ndo, ŋmbi zonkont ŋun ŋhuzŋi ŋnsi ndo doŋi, na pjwa ndo pmagpi, ze ŋun ŋminzŋi uzuuz Uzi ndo, uzi toom na ndo ze mi ndo irmi, ka hhutun ndo na phila. 14 Ka ndo pot opkit ŋiimna nu, ndo nimro na baña bokndoki ŋun ŋnzijraŋunk? Ze ndo do jaink, wo pdeuzar ndo an ukint utoom na ndo uzuuz , uzi hhutun ñaloŋ antom abur. 15 Uzi Israel ujaali. Ndo, ndo buri anjau hankri. Ndouki zurunu ze pjwa ndo, ka ozi ka ña anjali pnaz zurunu zonkont ŋun ŋndaŋi.