Artaserksis hil Esdras ze Jerusalen
7
Kero ŋnlur ŋnsumŋi zipi, ze nkil ŋnsi Artaserksis hili o nliin ninsi Persia, o hil ka ñiinz aloŋ aknduoi Esdras, bowk Seraias, bowk Ajarias, bowk Ilkias, 2 Awuk Salun, bowk Jadoki, bowk Aitub, 3 bowk Amarias, bowk Ajarias, bowk Meraioti, 4 bowk Jerias, bowk Uji, bowk Buki, 5 bowk Abisua, bowk Fineias, bowk Eliazar, bowk Aroŋ, nyeek bopenen Uzi. 6 Esdras hil oko ninjukjukun amei oiimna na mnjona, Oiimna osi NYEEK, Uzi usi Israel hilunk hul Moises. Kñene NYEEK, Uzi lo hil o duzu lo; antom ka nliin hul lo ŋun añauŋi lo. Esdras pun ze Babilonia, 7 Aya Jerusalen, na bowk Israel boloŋ: Bopenen Uzi, bolevita, boyeh, boyeŋ plumun na botihun ze ku Uzi, zolur ojaandun osi pliin Artaserksis. 8 Ka ajau ze Jerusalen ze pli pñenzan psi olur ojaandu osi nliin. 9 Uyas lo ze Babilonia tep ze onu 1 ze pli pseke; kajau ze Jerusalen ze onu 1 ze pli pñenzan, zonkont mnjona na philun Uzi lo. 10 Esdras hil o bamun ujuunslo pber oiimna NYEEK, pte olo, ze pjukjukun un onkai pdolo na mhagzin ze Israel.11 Un ondai oko "Mnjaŋzin" mnsi karta nliin Artaserksis hilii hul nmpenen Uzi aknduwoi Esdras, ninjukjukun olado na ŋiimna ŋnsi NYEEK, na ŋun ŋnjaalŋi ze Israel: 12 "Artaserksis, nliin duzu boliin, ze nmpenen Uzi Esdras, ninjunkjukun oiimna Uzi usi duzu: Nji hilanu knonzan ksi phioŋ. 13 Njo pzu nde, nde dol un ondai: Ze ña o ze baña Israel bonhoki ze pliin, baña bonhoki bopenen Uzi na bolevita bon jeuki psol na wi phya Jerusalen bo hilun psol. 14 Nji na bozaŋni jaand ndo philu uten mi ŋun khiami ze Juda na Jerusalen, men baña ze yaanz ze mi oiimna Uzi jaki osi ulowi pzoŋ. 15 Wo philo uz phya na praata na mhuru mi nji jeumi phul Uzi Israel na boknzanki nji unkabi ku ze Jerusalen. 16 Wo phya na praata uzuuz uz na mhuru mnsi usehmi ze ŋnsaak uzuuz ŋnsi Babilonia, na un onhaloi osi baña boloŋ bosi Israel na bopenen Uzi boko jeuwi phul ze ku ksi Uzi boko ze Jerusalen. 17 Wo pganz ŋiit nkal, na onsaam ominzi, ŋmpalalu ŋinz, ŋuk ŋmpalalu, na wojun usi ŋun ŋhaloŋi ŋnde, na pran, wo phojun ŋa ze pkak psi ku Uzi nde unhobi ze Jerusalen. 18 Praata na mhuru mnduklomi, wi na bozau nde hilun pdo na ma un nde mei ona mnjona, ze mi Uzi jeumi. 19 Jaŋu zurun Uzi usi Jerusalen na injuju nde huloi ze utihun ku Uzi nu. 20 Zuka pber un oloŋ onfiroi ze ku Uzi nu, ohilun pluko na uluk nliin.
21 "Nji" nliin Artaserksis, njo phul prim ze bobaan onsaam uzuuz bosi ojirun-Eufrates pjak boko un osi nmpenen Uzi Esdras, ninjukjukun olado Uzi usi duzu, ñauni nde, nde khul lo. 22 Ampjau ze nkilu nkunt 3,4 ŋnsi praata, ŋhus 600 ŋnsi mbuk ifor opoŋ ŋlitru 2000 ŋnsi pkem na ŋlitru 2000 ŋnsi mnsitidos, na ptila pnsumpi. 23 Ŋun uzuuz ŋnsi Uzi duzu ñauni, nka pdolo uzuuz ze ku wolo, Uzi usi duzu uki kbi ka oreu oyeek duzu pliin psi nliin na bowk. 24 Ndo sa opzuup nde uz zonkont bopenen Uzi uzuuz , bo yeŋ ilumun, botihun ze ku Uzi, na ña aloŋ akntihuni ze ku ksi Uzi, bozi hilun psigo ŋun ŋsi uwapa, ŋnsi pluk uweene na pluk oren. 25 Uwi, Esdras, ze mi Uzi hulmi wi ulipl, udat bomitran na bo dol olado bonlioki baña uzuuz bosi ojirun-Eufrates bomeuki ŋiimna Uzi nu, bani pme ŋiimna ŋminzŋun, ukjuk-jukun boko. 26 Ze ña ampte oiimna Uzi na oiimna nliin aka pdolo olado nimpjon; mbar afiŋo, mbar apuno zosaak, mbar apuno ze ku lo, mbar a ka phya kalauz.