Dariu iimnan olado
6
Nliin Dariu lado; baña ya dol ubere ze zun ze baaniŋun ze Babilonia, zun bo kbaanzi idukment. 2 Ze ku ksi pliin knduoki Akmeta, khoki zojir Media, ka bo bi iin oliuri oloŋ on hili ka ŋun ŋnsi mnlelnin ŋmpisoŋi ze olo jaa: 3 Zolur oseke osi pliin lo, nliin Siru lado zonkont ku Uzi ze Jerusalen. Ku kminzkun o plempo antom pho zun wojun oi pjaaŋno otepi kolo o pnaz. Ku o pka ŋmetru ŋntaaj Bopugz na jaand ŋnsi ohalr na ŋmetru ŋntaaj Bopugz na jaand ŋnsi ohanr na nkaru ŋgajinz ŋnsi ilaak yeek na okaru oloŋ osi mndera. 4 Opka klinzan kajinz ksi ilaak yeek na plinzan ploŋ psi itaguwa yalu, onsaam o pun ze knjiu nliin. 5 Imbalu iminziun uz isi mhuru na prat psi ku Uzi mnsi Nabukodonosor puni ze ku Uzi ze Jerusalen yan Babilonia, yo phulo antom hilun pdiŋno zun yonzi ze ku Uzi ze Jerusalen, ze kloŋ ze zun yonzi ze ku Uzi.6 Hunkran nliin Dariu hilanu psemb: "Tatenai, nmitran ninsi ojirun-Eufrates, Setar-Bosnai na bosinz, boyeek bosi osaak, nde loon zun ze minzun; 7 nde hutunann baka ze plemp ku Uzi, antom nliin bojudeu na boyeek boko hilun plemp ku ksi Uzi zun kiili oni. 8 Nji sa o plado uz antom nde hilun pme un ndei pdo boyeek bojudeu, antom boilun plemp ku kminzkun. Antom utihun ki knaz, ŋun ŋnsi boiinz bominzkun lempŋi nka pluko ze kle ŋnkaŋi plukno, ksi uluk nliin, uluk boi pluko zojirun-Eufrates. 9 Un onfiroi, injaka ŋwai, ŋmpalalu nkal, ŋmpalalu ŋmbukoŋi antom ŋho un onhaloi osi wojun uknturowi usi Uzi usi duzu: Trigu, ptiil, pkeme na mnsitidos, ze mi bopenen Uzi ze Jerusalen, ñaumunk nde, ba khulo, zonu, antom un oloŋ ki kzankl boko, 10 antom bohilun pjaaŋ ŋojun ŋi kñelŋi un onliili osi Uzi usi duzu, antom bo buur na Uzi zokont phila psi nliin na bowk. 11 Njo plado, olado oloŋ, ze ñiinz aloŋ Hugul oiimna ondai, psap ploŋ ka pduto ze ku lo, antom bo diŋlo bo hakun lo ze polo. Mez lo uz sa o pho zun mulur. 12 Hunkranda Uzi, un zubi ktiim wolo ze ku kminzkun, wo phat ŋanu nliin o baña bo ndeŋi iñene antom phugul oiimna ondai antom psok ku ksi Uzi kndakun ze Jerusalen, Nji, Dariu, nji ladoun olado ondai. Oka pdolo zonu osi hankri.
Otoomr ku Uzi
13 Tatenai, nliin ninsi ojirun-Eufrates, na Setar- Bosnai na bosinz boko ka bo minti dol uzuuz ze mi nliin Dariu jak mi. 14 Boyeek bojudeu yana olemp zurun, ŋun yana na baka na mnjona. Bohurun Uzi bonduwoki Ajeu na Jakarias , bowk Idu, ka boka hurun. Hunkran bolempdun ku ksi Uzi, tooml kolo, ze mi Uzi Israel jakmi boko, ze mi Siru jakmunk boko, Dariu na Artaserksis, nliin Persia. 15 Ku toom ze ŋnu 3 ŋnsi pli Adar, zolur opaajun osi pliin Dariu.
Bo iimnan ku Uzi
16 Ka, bowk Israel, bopenen Uzi, bolevita na baña uzuuz bon hili biin pjuuk, bo iimna ku Uzi na mnliina. 17 Piimna ku Uzi bo dol wojun na ŋiit nkal onsent, ŋmpalalu nkal ŋnsent Bopugz, ŋmpalalu ŋmpozŋi ŋhoŋi ŋnsent ŋuakr, na ŋmpi ŋndisiñene na ŋmpi Bopugz ŋiinz, oloŋ ze kiiñ ksi Israel, injaka wojun unhalobi antom pjour pjuwa Israel. 18 Bo zu kle utihun ze bopenen Uzi na knzoŋ botihun Uzi ze Jerusalen, ña na onu lo, ze mi opisomi zoliuri Moises.
Mnliina mburi
19 Ze ŋnu ŋndisiñene na ŋnu ŋwakr ze pli pseke, bombiinkunk pjuuk bo baap mnliina mburi. 20 Bopenen Uzi na bolevita, injaka ñiinz aloŋ nkonalo, bo dol wojun usi pjinz-jinzun; hunkran bojinzdun uzuuz . Bolevita fiŋ ŋmpalalu ŋntik ŋnsi mnliina mburi phul baña uzuuz bombiinki pjuuk kak ze pzaro boko, bopenen Uzi, injaka yeene boko uz. 21 Hunkran, bowk Israel bompunki ze pjuuk bo de mnlina mburi na baña uzuuz bonhili yeel mhagzin mnzopmi mnsi baña boloŋ bonhili o ze Juda, antom bohilun pber NYEEK, Uzi usi Israel. 22 Ze ŋnu jaand bo baap mnliina mburi mnsi opoŋ ani pka iferment na mnliina, ze mi Uzi zumunk boko ka boliini, ze mnsi hhugul munk ujuunsnliin Asiria antom ajaŋ boko pña, a zinkun boko zolemp ku Uzi usi Israel.