Ruti na Boaz ze zun ze poli.
3
Onwa Noemi jak Ruti: "Nmbukin, mbaza njoun pbedu unima, antom uhilun pho na mnjona ze mez nu? 2 Boaz aminzun, ai uhilunk o na bompili botihun lo, a o awk aliindo sotok. zurimbi a ka kpol sevada ze zun ze poli. 3 Nazoon uñou oleef, uzu oarser, utiimo yun impei pnuro antom uzuun ya ze zun ze poli. IKA ka hutunaa ame woza an akint antom pde na pdaan. 4 Zoyar lo ampiinzi, wo pten zun apiinzunzi; antom uneej ulel izim lo antom upiinz duzu yolo. Apzuupu un ukai pdo. 5 Ruti jak lo: "Njo pdo ze mi ujaŋmunk nji.Boaz ja apmar Ruti
6 Hunkran ayadun ze zun ze poli, dol uzuuz ze mi ateem jak munk lo a do. 7 Boaz dee, daani, liilni, antom ya piinz ze pñog uzoñu sevada. Ruti ya na mnjona, lel izim lo piinz duzu yolo. 8 Ze psoof ujuuŋ ka linkro zuŋoi, huglo iin ñaz piinz duzu izim lo. 9 Ka yep lo: "Woko noon" Ka semb lo njia Ruti, ntihun nu. Leran na knoŋt un zonkont woun ña anhoi piijin. 10 Boaz jaka: NYEEK opzuu mnjona, ze wi nmbukin. Mnjona mi udomink ze krank mpee mnsi udomunk urun, zonkont uzi duko ze kfez nmpoz nzala, ka uzi duko ze kfez ña ñagani o ñaniri. 11 Ze kran nmbukin ika linki. Njo pdo ŋun uzuuz ze mi ujakmunk, zonkont baña uzuuz ze plumun pyeek psi kmbau me wo ñaz ninsi philun. 12 Zowadadi njo awk aliinu sotok, osa ka ña ampei nji pñogu. 13 Dukoon zi zurimbi. Ze nfa, ze abamno antom piiju, o kho na mnjona, zampjeu piiju nji bisro ze ktiim NYEEK ankai phila, zowadadi njo piiju. Pinzun zi an ujau ze nfa."
14 Hunkran apiinzdun ze izim lo anjau ze nfa lis, ka nazoo ña ki khikran lo, zonkont Boaz azi jeu baña me ñaz ya ze zun ze poli sevada. 15 Ka jak Ruti: "Bina knoŋt utanunk, ulef kolo." Ka lef kolo; Boaz jaau ijawi 6 isi sevada, kuŋu lo. Ruti kak phya kmbau. 16 Kero kajau zun ateem, kaminzun yep lo: "Nmbukin, ŋun ya jaan?" Ka zuup lo mi Boaz domi lo. 17 Ka jak lo: A hulin ijawi 6 isi sevada, zonkont ajakin mbazi hilun pkak ze nteemin iñen isiil . 18 Noemi jak lo: "Nmbukin, ioŋu an ukint ume mi un ominzi oi phya, zonkont ñiinz aminzun azo phyoŋ ampkint plemp olo hankri."