Boaz mado na Ruti
4
Boaz ya ze plumun pyeek psi kmbau, antom zoo zolo. Kero ka iin ñiinz aminzun ka zip, a ownk awk aliin boko sotok a hilunk lado zonkont lo. Ka jak lo: Kndoli biir ubi zoo zi." Ka ya zori. 2 Boaz du boyeek 10 ze kmbau, jak boko bo ya zoo zolo ka bo ya zori. 3 Ka jak awk aliinu sotok: " Ze mi Noemi binmunk osaak osi Moab, ajeu phaap ksaal khilunk o ksi Elimelek awk aliin nja. 4 Nji ja, njo pzu olado ominzi zurunu, antom useh ksaal zurun boyeek bondaaki na bopugi ni bonzooki zi. Ze wop ganz kolo, ukganz kolo. Ze wampo pganz kolo uk zuupin, antom mme, zonkont ukaun kfah pganz kolo. Zu toomi nji saun nek ze wi sa pganz kolo uz. "Ñinz jaka: "Njo pganz ka." 5 Boaz jaka: "Onu woi pseh ksaal ze kñen Noemi, usa kjek Ruti uz, nmoabita ankez nanunk ahina, antom ktiim ñankezi hilun pduko ze piij lo." 6 Ñinz aminzun jak lo: "Ze minzmi mbazi hilun pganz ka, zonkont khilun psok piij ni. Njo phulu kfah antom uzuun hilun pganz kolo," zonkont mbazo philun pganz ka."7 Zokil ominzun ze Israel, o hil o mhagzin ze ña o pganz o pseh, zunu zonkont pdo un ominzun na mnjona wo punu isapat phul asinzu ankaunk zunu. Antom uduko kmatir ze Israel. 8 Hunkran, ñiinz amimunzu jakdun Boaz: "Jekunka kduk o ksinu." Ka punu isapat lo. 9 Boaz jak boyeek na bopugi bomatirki zolo: Nde o baña bomatirki hankri nji sehi ze kñen Noemi ŋun uzuuz ŋhoŋi ŋnsi piij Elimelek, Kilon na Malon; 10 nji sa pot opjek Ruti Nmoabita a hilunk o ahar Malon, aduk a o nhari, pzu ktiim ña akenzi ze piij lo, zonkont ktiim lo ki khilun pkek ze psoof bowk oliin, na plumun phieek psi kmbau. Hankri nde matiri. 11 Bopugi uzuuz na boyeek bonhoki zolo ze plumun pyeek psi kmbau jak lo: Ndo matiri. NYEEK opzu ñaz aminzun a ownk pneej ze mez nu, injaka Raquel na Leia, 2 ukun bontepki kiiñ ksi Israel. Ndo jeu unir ze Efrata, antom wo ña ankai ktiim ze Belen. 12 Pzaro NYEEK oi phulu na ñaz aminzun apnam pzaro bowk Perez, ninsi Tamar bukunk na Judá." Ze Pzaro Boaz.
Rute Buk Obede
13 Hunkran Boaz jek dun Ruti antom ka duk o ahar. Ka nim lo; ka NYEEK zinkun lo ka leempoo buk nmpoz aloŋ. 14 Bohaz jak Noemi: " Nja zah NYEEK ze mi ani phutnu hankri, antom waŋ ñai pzinknu. Ktiim nmpoz aminzi ko pmag ze Israel. 15 A phugl phila nu, abi phulu ode zoyaaru an zafi, zonkont awawi un anfundari wi, ambukunk lo, ape bopoz 7." 16 Noemi jek nmpoz, antom hup zisou lo, duk ze baap lo. 17 Bohaz ze pkinz jaa: "Noemi kaa nmpoz." Ka bo zulo ktiim Obedi. A own aliin Jesé, ambuki David.