Ujik Ruti na Boaz
2
Noemi ika kaa awk aliin ahina, ze phuk pliin boko anduoi Elimelek, ñiinz aniri, ankai philun; ktiim lo duo Boaz. 2 Onwan, nmoabita un Ruti jak Noemi: "Nji jeu phya pten mnjona piin ña ai phutni njaka huns ze kfez bokit ze zun lo." Noemi jak lo: " Yan, nmbukin." 3 Ruti jau zun bo kit oonzi, ka a ka huns ze kfez bokit. Zonejo zun akhunsun zunk zun ze mizun zo ze zesi Boaz, bo o ze pliin boko na Elimelek. 4 Boaz jau ze Beleŋ, jak bokit: "NYEEK opho na nde." Ka bo semb lo: "NYEEK opzuu mnjona." 5 Ka Boaz yep nmpoz nzala anhoi nyeek bokit: "Nonzi ka neegn andai?" 6 Neegn nmoabita ambilunk na Noemi zosaak osi Moab. 7 Añauni nhutun lo ajaka sinz trigu ze kfez bokit. Abi ze nfa abupun anjau ze krank; a yoŋ mpozmi zoku."Boaz lado na Ruti un onliili
8 Boaz jak Ruti: "Nmbukin sinkan. Ika ya sinz zun ze loŋ, ka ika punzi, wo pduko na bompili ni bosi utihun. 9 Jaka ten zun bokitunzi, wo ze kfez boko. Nji lado na bopoz bozala ni, bo hutnu ujaka sinz bozo pdandaŋnu. Zu kaa olof, ukhya zimbalu boko khya kdaan mnzup bopoz bozala likmunk." 10 Ruti juz na mnkil zo zee, yep lo: "Ezi kaa nji iin mnjona zurun nu, ze mi uikran munk mi nji omunk nhya." 11 Boaz seemb lo: "Nji te, ŋun uzuuz ŋi udoŋi ateemu zokezr ahinu; hutun aliinu na aniinu, zosaak osi ubuknoi, bi ze baña wani pme. 12 NYEEK opluku ze un udoli. NYEEK, Uzi Israel, ubi ber zun ze betnozi, zeu iwaaklu lo, Apluku ŋun ufirŋi." 13 Ruti jaka: "Ofiro nzañ ze piin mnjona zurunu nyeek ni, zonkont hulin klinsi, hulana nji na mnjona, ŋanun njam pliŋ na ña aloŋ ze bompili botihun nu. 14 Zoder baña ayu, Boaz jaka: "Ñogun zi, uzuun bi jek poŋ uñoyun zutiip." Ruti zona bokit; Boaz hula sevada onhilari ka dee ankint yoki duklan ŋloŋo. 15 Ka nazoo pot phya phuns. Boaz jak bopoz bozala: "Nde hutunannaa asinz, ze psoof ŋnuŋu; nde ika fuptanaa. 16 Nde hilun phutun oloŋ ojot antom ahilun psinz olo; nde ika nenaa." 17 Ruti duko ze sinz zun ze minzun ankint jau ze montna; apol osi akaunk an ko ñog pjau ŋnlitru 20 ŋnsi sevada. 18 Asonaya yan kmbau; ka teem iin sevada asinzunk. Ruti sa pot punun uz ŋun ŋnde ŋnsi aduklaŋunk ze mi ademunk yoki, ya hul ateem. 19 Ka teem yep lo: "Usinzun zoon hankri? Ze zun noon zozu utihuninzu? Ña aminzun an ikrani wi, Uzi op zwa mnjona. "Ruti zuup ateem zun atihuninzi, jak lo: "Ktiim ñiinz aminzun nji tihunini hankri kdwo Boaz." 20 Noemi jak Ruti: "NYEEK opzu ŋnjona duzu lo, zonkont NYEEK azi hutun pdo mnjona lo ze bonhilki na bonkezki." Jak lo: Ñinz aminzun a o awk aliindo sotok. A onz baña bonkaki pbaap nja." 21 Ruti nmobita un jak lo: "Ñinz aminzun sa pot jakin nzañ ze phuns zolo na botihun lo ampjau zotoomi ikit." 22 Noemi jak nmbawi lo Ruti: "Nmbukin, o na mnjona uduko na bompili lo, zonkont zun ze loŋo ña hilun pdisnu." 23 Hunkran Ruti dukodun ze phuns zolo na bompili botihun bosi Boaz, anjau ze ptoomi ikit sevada na isi trigu antom kak duko na ateem.