Boisraelita gut na baña kiiñ ksi Benjamiŋ
20
Bouk Israel uzuuz , ze ptep ze Daŋ ankint jau ze Berseba, injaka osaak osi Jileadi uz, ka bo zoklani injaka ñiinz aloŋ, zurun NYEEK ze Mizpá. 2 Boyeek baña na iiñ boisrael uzuuz bosondo zurun uzoñnor usi baña bo zesi Uzi, boghutun nkunt ŋnsent ŋuakur, bo nazki sagñnor ieje phya ogut. 3 Bouk Benjamiŋ tee ja boisraelita bo hil ya ze Mizpá. Bouk Israel eproo ezi kaa, khuzin kndaaki oo. 4 Ka nlevita un, ahin ñaz anfiŋounk, ka jaa: "Nji jau na ñaz ni ze Jibeá, ze kmbau ksi Benjamiŋ, antom pfur zolo. 5 Ka boiinz bosi Jibeá deŋo bi ze nji, ka bofoio ku zurim, bo jeu fiŋi. Bo do kpe ze ñaz ni an ka kint kezi. 6 Nji jeka, fal-falun lo, antom hilan izink ŋjir uzuuz ze Israel, zokont bo dol khuzin ksi mol ze Israel. 7 Nde uzuuz zunzi nde o bowk Israel. Nde zupam un nde iini, nde ulan ozaŋu. 8 Baña Israel uzuuz bodeŋo injaka ñiinz aloŋ, ka bo jaa: "Ka ña ze nja azo phya ze mez lo. 9 Nja pseŋ onedjo antom pdat kiiñ koki phya pghutun na zosaak osi Jibeá. 10 Ze iiñ isi Israel uzuuz , ze boiinz onsent, nja pjek ondisiñene; Zonkunt nja pjek onsent; ze nkunt ŋndisiñene nja pjek onkunt, antom bo ber ŋun ŋde phul boghutun. Hunkran, zoyar boko an jau ze Jibeá dsi Bejamin, bo philun botum boko pko na khuzin ksi bo dokunk ze Israel uzuuz . 11 Hunkran boiinz uzuuz bosi Israel zoklanun injaka ñiinz aloŋ, phya pughutun na kmbau Jibeá.12 Iiñ isi Israel hilan baña ze kiiñ ksi Benjamiŋ antom bo ya jak boko: "Khuzin kon ki kndolo kink ze psoof nde? 13 Nde ulando boiinz bo uz ieen ukun bonhoki ze Jibeá antom ndo fiŋ boko antom ndo hilun punun khuzin kun ze Israel." Bouk Benjamiŋ bozi digzan pte pzaro boko, bonhoki bowk Israel. 14 Bouk Benjamiŋ pun zimbau boko uzuuz ya zoñnor ze Jibeá antom phya pgut na bowk Israel. 15 Ka bo findoo zonu ominzun, bowk Benjamiŋ zimbau boko boiinz nkunt ŋntaaj ŋmpuguz na ŋnkunt paaj bo hili aka gut na ieje, pot sa ka boiinz ŋnsent jaand bosi Jibeá bon peki phi ogut. 16 Ze boghutun bominzkun uzuuz o ika boghutun ŋnsent jaand, bo o bomai baka lis ilaak isi ondeure ze kiel klon, bozi aka zil. 17 Boiinz bosi Israel, bani pho baña bosi Benjamiŋ, bo ika o ŋnkunt ŋnsent ŋuakr boghutun bo hili aka ghutun na ieje; boko uzuuz boko boghutun. 18 Bouk Israel deŋo ya ze Betel, ka bo yep Uzi: "Ze psoof ndo, an oi phya urun antom phya pgut na Bejamin?" Ka NYEEK seemb boko jaa: Juda oumphia urun."
19 Bouk Israel deŋoo ze nfa bo ya zoñnor ze kwaŋ Jibeá. 20 Boiinz Israel pun phya pgut na bobenjamita, ka bozu boghutun boko bo bamni ogut ze kwaŋ Jibeá. 21 Boiinz Benjamiŋ pun ze Jibeá bo fiŋ zonu ominzun boiinz nkunt ŋntaaj ŋmpuguz na nkunt ŋmpuguz boiinz bo ze Israel. 22 Boghutun boisraelita bo pot ka kziu ya zoñnor zun bo hilunk oni zonu oseke. 23 Bouk Israel bo ya hur zurun NYEEK ankint jau ze montna; ka bo yep lo: "Ka ndo pot opya pgut na pzaro ndo, bowk Benjamiŋ?" NYEEK jak boko; nde ya gut na baka: "Hunkran boisraelita ka dun kziu. Ka bo pot bamno phya pghutun zun ze minzun ze zesi bo hilunk oni zonu oseke.
24 Boghutun bosi boisralita bo soli antom phya pgut na bowk Benjamiŋ zonu opugzan. 25 Boghutun bosi Benjamiŋ bo ya ze Jibeá antom phya pjik na boko, ka bo pot fiŋ baña ŋnkunt ŋndisiñene na ŋnkunt bakari boiinz bonghutunki na ieje. 26 Bouk Israel uzuuz bo ya ze Betel, bo huri, bo hil o za zurun NYEEK, bo buri, zonu ominzun ankint jau ze montna, ka bo tur uojun, sa pot hul wojun busi phioŋ zurun NYEEK. 27 Ka bowk Israel yep NYEEK. Kero ukau Uzi hil o zolo zokil ominzun. 28 Ka Fineias, awk Eleazar, Eleazar, awk Aroŋ, a hil tihuni zurun ukau NYEEK. Bouk Israel yep NYEEK: "Ndo pot o phya Pgut na pzaro ndo, bowk Benjamiŋ, ka mbar ndo phutun?"
Ka NYEEK jak boko: "Nde yan, zonkont faan njo pzu baka ziñen nde." 29 Hunkran boisraelita yadun ya limo ogut, foio Jibeá. 30 Bouk Israel ya zonu oajzan antom phya pjik ogut na bowk Benjamiŋ, ka bo bamno antom pho ogut ze kwaŋ Jibeá injaka mi bo domunk ze ŋias ŋmpuguz ŋu. 31 Bouk Benjamiŋ pun antom pjik na boko, bo lo kmbau, ka bo tep fiŋ bowk Israel injaka mi bo hilunk doli; bofiŋ boiinz ŋntaaj ngajinz bosi Israel ze ksal, ze book un iabi Betel na unsolbuŋk ya ze Jibea. 32 Bouk Benjamiŋ jaa: Nja poto pka kpe duzu bowk Israel injaka uias undabun. Bouk Israel jaa: "Nja kak ofez, antom nja punun boko ze kmbau nja yan ŋrua. 33 Hunkran boiinz bowk Israel uzuuz pundun zun boko ze baal-tamar. Bolimokunk ogut pun zuir usi ilaak ze Jibeá. 34 Boiinz ŋnkunt ŋndisiñene ŋnsi boghutun bosi Israel bo ya jik na baña bosi Jibeá; ogut kak magi. Baña Benjamiŋ bozi bamb ja khuzin kbikun duzu boko. 35 NYEEK hul Israel kpe duzu bobenjamita, zonu ominzun boghutun boisralita fiŋ boiinz bobenjamita ŋnkunt ŋntaaj ŋmpuguz na ŋnkunt kñene na baña onsent bon sagnorki ieje. 36 Zun minzun bowk Benjamiŋ mezun bopeo ogut, zonkont boisraelita bo kakunk ofez zurun boko, bo az ze plimo bo limopunk pgut na baña bosi Jibeá. 37 Baña bonlimoki ogut bo ya osar antom phya pghutun makri; bogar ŋun uzuuz ze kmbau ksi Jibeá, bo fiŋ na ieje baña uzuuz bo hili o ze kmbau. 38 Boghutun bosi Israel o hul baka mnjaŋzin baña bonlimo kunk ogut, bo ka pzu uroo an inzun ieek isi odu ideŋo ze kmbaau; 39 Hunkran boghutun Israel, boki baña ŋntaaj ŋgajinz, zonkont boi ja: "Nja pka kpe duzu boko nin pzil, injaka ogut onzipun." 40 Kodu tep pdeŋo ze kmbau duzu injaka inzun. Baña bosi Benjamiŋ kok kfez, ka bo iin odu kodeŋo ze kmbau phya duzu. 41 Boghutun boisrael ugulo kok kfez. Boiinz bosi Benjamiŋ linki, zonkont bo mee bo o ze khuzin. 42 Bozi boghutun boisraelita, antom ya ze book usi olaal, bozi ka mi bo kburmi zonkont boghutun boisralita kund baka. Ka bon punkunk ze psoof kmbau fiŋ boko uzuuz . 43 Boisralita kund baka, anjau ze pmair onu zosaak osi Gibeá, bo fiŋ baka ze book. 44 Bo kez baña nkunt ndisiñene na nkunt bakari bobenjamita bon kawki kziu zogut. 45 Bondukloki bozii, ya zolaal ya bet ze plaak pieek psi Rimon. Boisraelita fiŋ baka nkunt kñene ze book, bo dook boloŋ ankint jau ze Jidon, ka bo pot fiŋ baña nkunt ŋmpuguz. 46 Zonu ominzun bo kez baña nkunt ŋntaaj ŋmpuguz na nkunt kñene ŋnsi boiinz bosi bobenjamita bo hil aka ghutun na ieje, boko uzuuz bo oko boiinz bosi kziu.