Bohaz ze kiiñ ksi Benjamiŋ
21
Boiinz Israel hil bisro ze Mizpá jaa: Ka ña loŋ ze boko azo phul awk ñaz antom amado na boiinz Benjamiŋ. 2 Baña ya ze Betel, bo ya duko dolo zurun Uzi anjau ze montna; Ka bo deŋ irim boko hur makri. 3 Bo jaa: "Ai NYEEK, Uzi Israel, iezi kaa, ka un ominzi dolo ze Israel, mnsi kiiñ kloŋ ani pho hankri ze Israel?" 4 Konu luŋ jiinzi ze nfa baña nazoon, lemp pkak, ka bo dol wojun unturobi, un onhaloy usi pyoŋ. 5 Bouk Israel dodo uyepro men o ka ña ze iiñ uzuuz isi boisrael ani bi uzoñnor usi NYEEK? Zonkont bo hil dol ubisro uieek jaa, banunk pbi zurun NYEEK ze Mizpá bo ka pfiŋo. 6 Bouk Israel ka kñago ksi pzaro boko psi Benjamiŋ, bo jaa: "Hankri kiiñ kloŋ falo ze Israel. 7 Oie njaun pdo antom pber bohaz antom phul bondukloukunk? Ze mi nja bisromunk ze ktiim NYEEK jaa, njazo phul baka bowk nja bohaz antom boho bohar boko.8 Bo yeproo: "Oka baña boloŋ bosi kiiñ ksi Israel kani bi zurun NYEEK ze Mizpá? "Ka bo mee, ja ozi ka ña nnsi Jabes-Jileadi bozi hil bil antom pkoulan zuzoñnor. 9 Ze mi bo fimunk baña, ten iin ja ozi ka ña aloŋ ze baña boouki ze Jabes-Jileadi an hili o zolo. 10 Hunkran baña bosi ukoulor hilanu boiinz nkunt ŋndisiñene na nkunt ŋmpuguz ŋnsi boiinz bompeuki pka iziu, bo hil baka, jaa: Nde jekun ieje, nde ya fiŋ baña bosi Jabis-Jileadi, bohaz uzuuz na bopoz. 11 Un ondai ol nde kaun pdo: Nde pfiŋ boiinz uzuuz , na bohaz uzuuz bani pho bompili. 12 Bo ya iin ze psoof baña bonhoki ze Jabes-Jileadi bompili ŋnsent ŋuakr bani po me boiinz. Bo ya na baka zuzoñnor ze Silo, ze ozi zosaak osi Kanaan. 13 Antom, ka baña uzoñnor hilan pzu phioŋ na bowk Benjamiŋ bo hili o ze plaak pieek psi Rimon. 14 Bobenjamita kak, ulo bohaz bosi Jabes-Jileadi bani pfiŋo. Ka bohaz bozi zink baka. 15 Baña ka kñago zonkont Benjamiŋ, mnsi NYEEK haulmunk ze psoof kiiñ ksi Israel.
16 Boyeek uzoñnor yeproo: "Ndja ko pdo pjan pber bohaz antom phul bonduklo ukunk, ze mi bohaz Benjamiŋ fiŋomunk? 17 Bon dukloukunk ze Benjamiŋ bo ka pka bowk boko boi piij boko, kiiñ kloŋ kozo pmei ze Israel. 18 Ka nja, njazi hilun phul baka bowk nja bohaz antom bo o bohar boko, zonkont bowk Israel bisromunk jaa: Ña an huli nmbenjamita aloŋ ñaz khuzin o pjet duzu yaa. 19 Kero bo toom jaa: "Zolura, oka dolo onah osi NYEEK ze Silo, zojir duzu Betel, zojir pmair onu osi orwa ompaioi ze Betel phya Sikeŋ, ze zeu osaak osi Lebona. 20 Ka bo hilan pjak bowk Benjamiŋ: " Nde ya meno ze ŋorta ŋnsi mhuba, 21 Nde duka ten. Zoyar bompili bosi Silo pun pki ze knzoŋ, nde punun ze ŋorta; ña kduf nmpili aloŋ; asona a yan osaak Benjamiŋ. 22 Zoyar boliimboko na pzaro boko du nde ze zun ze doli olado ziñen ndo, ndo kjak boko: Nde ñago nan ndo, nde kan kñago boko. Ndozi iin bohaz phulna ña aloŋ ze boko ze zogut Jabes-Jileade. Ndezo pka pjua, mbaza nde hul kunk boko bowk nde.
23 Hunkran bowk Benjamiŋ dodun. Kero knzon bompili ka ki, ña kduf aloŋ ksona lo, a ya o ahar. Bo kak na boko, lemp imbau antom o ze iolo. 24 Bouk Israel uz botas za, ze mi bo omi ze iiñ boko ze plin boko, ña kak zosaak lo.
25 Zokilomizun ozi o ka nliinze Israel; ña akdol un ajeu.