Nlevita aloŋ nañaazlo
19
Zokil ominzun, kero ozi o ka nliinze Israel, o ika ka ñiinz aloŋ nlevita an oi ze nkuŋ ŋnsi Efrain, zojir onñali ajekñaazze Belen dsi Juda antom a oñaazlo nnsi pzala. 2 Kañaazlo, bi deuzar lo, antom kak ze mez aliin ze Belen dsi Judá, ka ya duko zolo kli kuakr. 3 Ahina iana nmpoz nzala aloŋ na ŋhuru ŋmpuguz, ka ya ze kfezñaazphia buŋ lo antom akak na lo. Ñaz lo sona ya yan mez aliin. Kero aliin iin lo, ka aliini, ka seh lo nan mnjona. 4 Ka aliin ahar taurani antom aduko zolo. Ka duko ka ŋnu ŋgajinz; Ka boka de, ka daan, ka bo fur zolo. 5 Bo sar nazoon zonu ouakna ; nlevita bamni antom psol, ka aliinñaazlo jak lo: "Den aiu mntik, nde hilun pduko plins ol nde solun. 6 Hunkran boiinz bo puguz kun zodun dee zun ze loŋ, ka bo daani. Aliin ñaz lo jak ñiinz: "Ñagonan, uot ufur zurimbi zi, unouz. 7 Ka ñiinz nazoon antom psol; Aliin ñaz lo buŋ lo antom bo fur zurim uminzun zolo, ka afur zolo. 8 Zonu oñiinza, ka luŋ psol. Aliin ñaz lo jak lo: "Nde deen un oloŋ, nde ioŋ amp jau montna." Hunkran bo koulankun dee. 9 Kero, ñiinz nazoon antom psol, na ñaz lo, na nmpoz nzala lo. Ka aliin ñaz lo, jak lo:" Tere onu o ziou; ñagonan. Tenun, furun zi, unouz. Faan uluŋ, usol ze book un phya mez nu.10 Ka ñiinz azi jeu fur za; Ka nazoon, sol na ñaz lo, na ŋhuru lo ŋmpuguz nkuŋoŋi anjau ze kwaŋ Jebus, khoki Jerusalen, na ñaz lo. 11 Kero ka bo ñog pjau ze kmbau, konu ka iou. Nmpoz nzala jak aieek lo: Biri nja paant ze kmbau ksi bojebuseu antom nja fur zolo. 12 Ka aieek lo jak lo: "Njazo paant zimbau isi bo ya banki pho bowk Israel, nja zip phya urun. 13 Nja phya ampjau ze Jibeá o ze Ramá; Nja ya fur zun loŋ zolo. 14 Ka bo zip zurun, ka yaanz psol. Onu jet kero bo ñog ze Jibeá, dodi kmbau ksi Benjamiŋ. 15 Ka bo paant ze Jibeá antom phya pfur zolo ya zoo, zun uzuñnor ze psoof kmbau, ka ñaloŋ azi nejnaa ze ku antom ailun pfur. 16 Baña kmbau kminzkun bo o baña kiiñ ksi Benjamiŋ. Zurim uminzun ñiinz aloŋ anzafi, nnsi onkuŋ Efrain, an oi ze Jebeá, a ze bin utihun ze ksal. 17 Ka iin nia aminzun zunaam usi kmbau, ka yep lo: "Uo phya zoon? Ua pun zoon?" 18 Ka seemb lo: "Ndo ze book phya Belen dsi Juda zojir oñali, zojir nkuŋ ŋnsi Efrain, zun nji oonzi, zonkont nji ya Belen dsi Judá, ka krank njo phya mez ni, ñazi beunari antom ndo ya mez lo. 19 Ndo kaa otun na ŋun ŋnde ŋnsi ŋhuru ndo, na ndo, botihun nu, ndo ka ŋun ŋnde na pkeme psini, psi ñaz ni, ntihun nu, na nmpoz nzala an oi na ndo. Ka un oloŋ ozi zankl ndo." 20 Ñiinz anzafi jak lo: Phioŋ o pho na wi." Njo phulo ŋun uzuuz ŋnzanklŋi wi, ka uzi hilun pfur ze kmbau. UZUUN hilun bi pfur ze mez ni." 21 Ka ya na lo mez lo, ka hul ŋhuru lo ŋun ŋnde. Bo ñou izima, ka bo dee ŋun ŋnde, daan pkem.
22 Kero ka boka zupz, boiinz bouz ieene bosi kmbau kminzkun. Ka boka pamb plumun, ka bo jak ñiinz anzafunk, nminz mez: "Punan zuri ñiinz anejunk ze ku nu, antom ndo hilun piinz na lo:" 23 Nminz mez pun jak boko:" Ah, pzaroni, nde ika dol un on uzink jeink. Ze mi ñiinz andai oi nia ni, nde ika do mnguli mndami. 24 Nmbukin alei nmpili azo me ñiinz na ñaz ñiinzi; Njo punun baka zuri; antom nde jek boko, nde doboko un nde jewi, ka nde ika do ñiinz andai mnguli." 25 Boiinz bominzkun bozi digzan pte. Ka nlevita un, jek ñaz lo, hul boko zuri. Ka bo piinz na lo, do lo kpe zurim uzuuz ankint jau ze nfa antom hutun lo. 26 Kero onu jiinzi, ñaz ya jet ze plumun ku ksi ñiinz, zun ze zesi ñiinz lo oonzi; Ka duko zolo Anko un toom pjinz.
27 Ka ñiinz lo nazoon ze nfa, haul plumun psi ku antom pdimpo book lo; Ka iin ñaz lo ka piinz ze plumun ku, na iñen ipuguz zurun kjaja. 28 Ka jak lo: "Deŋon nja sol." Ka azi semba. Ka zu lo duzu o huru, antom soli phya mez lo. 29 Ka jau ze mez lo, ajek ombañ, bup ñaz lo, fal-falun lo ze inzink indisiñene na inzink ipuguz; antom hilan yolo kiiña-kiiña ze iñ indisiñene na iñ ipuguz isi bowk Israel. 30 Ka ña iin un ominzun a hil akja:" Un injaka ondai ozo dolo, ka ozo iinoo, kero bowk Israel puni zosaak osi Ejitu anjau krank nde zafun na mnjona ze un ondai, nde zuupun un nja hilni pdo.