Mika na kiiñ ksi Daŋ
18
Zokil ominzun, azi ka ña anzoŋi Israel, kiiñ ksi Daŋ ze ber osaak osi piij lo, antom philun phya pzo zolo, zonkont okil ominzun bozi hil o seh piij boko psi bo ulopi ze psoof iiñ isi Israel. 2 Hunkran bowk Daŋ ildun boiinz kñene ze iiñ boko, bon kaki kziu zogut, ze Zora na Estaol, antom boyaa ten osaak zikmeno. Ka bo jak boko: "Nde yan ten osaak, ze mi o mi." Bo jau zonkuŋ osi Efrain, bo ya ankint jau ze ku ksi Mika, bo fur zolo. 3 Kero bo ñog ze ku ksi Mika, bo ikran prim psi nmpoz nzala nlevita, ka bo ya zo lo, bo ya yep lo: "Nonzi bina wi zi? Hel ukdolun zunzi? Ezi ka, ka wo zunzi? 4 Ka zuup boko un Mika doli lo, ka jaa:" A ka lukin; Nji ze tihunara injaka nmpenen." 5 Ka bo jak lo: "Iepun Uzi antom ndo hilun pme zuias ndo, bo phya na mnjona." 6 Nmpenen jak baka: Nde yan na phioŋ. Uias nde bo ze kñen ksi NYEEK.7 Boiinz kñene kun bo ya ankint jau ze Laís; bo me ja baña bomizkun bhoza, bo linsi, injaka baña bosi Sidoŋ, iŋnoo, ba sukioo, ka bozi ka ña ak knzoŋi boko. Ka bozi ñog ze baña Sidoŋ, ka bozi ka un na ña. 8 Kero bo kaki ze Zorá na Estaol, ka pzaro boko yep boko: "Ka onoa o nde binun?" 9 Ka bo jak boko:" Nde deŋo, nja sol, nja ya ze boko, zonkont ndo ten osaak ominzun iin ja obaliri ampee. Ka nde pduko pam pdol unu? Nde ika jon, phya pseh osaak ominzun. 10 Ze nde jau zolo, nde piinz baña bonsukioki, zosaak onhani, onhani pka un oloŋ onzankli olo. Uzi zua ziñen nde.
11 Boiinz ŋnsent paaj bosi kiiñ ksi Daŋ, bosagnor antom phya ogut, bo pun ze Zorá na Estaol. 12 Bo ya zoñnor ze Kiriat-Jearin, ze Judá. Un ominzun kaun ka zun zozunk ze kfez Kiriat-Jearin duo uzoñnor usi Daŋ anjau hankri. 13 Zun ze minzun bo zip zojir onkuŋ osi Efrain, ka bo ya ankint jau ze mez Mika .
Bo seh kmbau Laís
14 Boiinz kñene bon iaki pten osaak osi Lakís ze kmeno bo jak pzaro boko: "Nde me ja ze iku yun oka kmbaru kienki ksi bopenen, ŋnzi ŋnfejoŋi na ŋialaŋi ŋnsi prat? Nde tenun mi nde ilumi pdo. 15 Ka bo ya zolo, ka bo jau ze ku ksi nmpoz nzala nlevita ze mez Mika; ka bo nonzalo. 16 Ka boiinz ŋnsent paaj ukun bosi kiiñ ksi Daŋ, bosagnor phya ogut, ka bo duko ze plumun pieek. 17 Ka boiinz kñene kun boyakunk pten osaak bo neej ze ku, bo jek uzi unfejobi, kienki ksi nmpenen, ŋnzi, na uzi usi prat. Nmpenen nazi ze plumun pieek na boiinz ŋnsent paaj bonsagnorki phya ogut. 18 Kero bo neej ze ku ksi Mika, bo jek uzi unfejobi, kienki nmpenen, ŋnzi na uzi usi prat, nmpenen yep baka: Ka el nde kdolun? 19 Ka bo jak lo: Joun ze mntum, ika ka lado hul oloŋ. Bina ndo, antom wo aliin ndo nan nmpenen ndo. Ka ozi pe pfiro wo nmpenen, nnsi kiiñ ksi bowk Israel, te par wo nmpenen nnsi ku ksi ñiinz aloŋ." 20 Ka nmpenen liini zujuuns lo, ka jek kmbaru kienki, ŋnzi na uzi unfejobi, ka sona boko ya neej ze psoof baña bominzkun.
21 Hunkran bo kak dun soli; ka bo zu bopoz lo zurun, ŋnsaam lo, priza lo na ŋun akaŋi. 22 Kero bo lo ku ksi Mika, baña bookunk ze kwaŋ Mika ka bo zoñnor ya ze kfez bowk Daŋ, ka bo ya bup boko. 23 Ka boka kiik ze kfez boko. Daŋita bo uglo yep Mika: "Ezi kaa uzoñun bañawki uzuuz ? 24 Mika seemb baka: Nde jek ŋnzi ni, ŋnsi nji lemp ŋi, na nmpenen ni uzuuz , sol ni. Oie nde dukrun nji? Ezi kaa, nde ka yepin un nji kai?" 25 Bouk Daŋ jaka: "Ika unso na ndo, antom boiinz bon sarki pdeuz bo ik kbi gut na nde, wi na bowk oliinu, antom nde ika kbi kez ze mez nde." 26 Hunkran bowk Daŋ sol dun ze book boko. Mika iin ja bo pea philun, ka akak ze mez lo.
27 Bouk Daŋ sol na ŋun ŋnsi Mika hili o lempi, na nmpenen lo, bo jau ze Laís, ze baña bon iŋnoki, ba sukio. Bo fiŋ baka na ieje, antom tur kmbau boko na uroo. 28 Ozi ka ña an oi pbuburburun boko, zonkont bo ika loo Sidoŋ, bozi ka mnkoulin na baña boloŋo. Kmbau boko o zunjir usi Beti-Reob. Bouk Daŋ ot kak lemp kmbau, antom o ze kolo. 29 Ka bo zu kmbau kminzkun ktiim Daŋ, ze mi ktiim Daŋ aliin boko ninjona, bowk Israel, ma ktiim kmbau kminzkun hil duoo Laís. 30 Bouk Daŋ bozu uzi unfejobi antom bo duka ŋupr. Jonatas, awk Jerson, Jerson awk Moises bo hil o bopenen bosi kiiñ ksi Daŋ, na bowk uzuuz , ankint jau zokil baña soli phya pjuuk. 31 Bo duko na uzi Mika fejbi, ze nkil uzuuz ŋnsi ku Uzi hili o ze Silo.